བཟའ་བཅའ་ཚ་པོ་སྣོད་ཆས་འདི་རིཊ་ནང་མ་བླུགས་ན་བཟང་ངོ།

 

དུས་རྒྱུན་གྱི་འཚོ་བའི་ཁྲོད། ཁྱེད་རང་ནས་ཐེངས་གཅིག་རང་བཞིན་གྱི་འགྱིག་ཕོར་སྤྱད་ནས་ཆུ་ཚ་པོ་འཐུང་བའམ་ཡང་ན་ཟས་རིགས་ཚ་པོ་བླུགས་ནས་ཟ་བ་སོགས་བྱས་མྱོང་ངམ།    དོན་དངོས་ཐོག་དུས་ཡུན་རིང་པོར་ཐེངས་གཅིག་རང་བཞིན་གྱི་འགྱིག་ཕོར་དང་འགྱིག་སྣོད་སྤྱད་ནས་ཟས་ཚ་པོ་ཟོས་ཚེ་གཟུགས་པོའི་བདེ་ཐང་ལ་གནོད་པ་ཆེན་པོ་ཡོད།

ཉིང་ཞ་གསོ་རིག་སློབ་ཆེན་གྱི་ཞིབ་འཇུག་འབྲས་བུ་ཞིག་ལས་གསལ་བར། རྒྱུན་དུ་ཐེངས་གཅིག་རང་བཞིན་གྱི་འགྱིག་བཟོའི་སྣོད་ཆས་སྤྱོད་མཁན་གྱི་མིའི་སྙིང་ཤུགས་ཉམས་པའི་ཉེན་ཁ་དེ་མི་གཞན་ལས་13%མཐོ་བ་ཡོད།  ཐོག་མའི་བརྟག་དཔྱད་དབྱེ་ཞིབ་ཁྲོད།   ཞིབ་འཇུག་ཚོགས་པས་བརྟག་དཔྱད་ནང་ཞུགས་མཁན་མི་3179བདམས་ནས། ཁོང་ཚོའི་འགྱིག་བཟོའི་སྣོད་ཆས་སྤྱོད་ཚད་དང་སྙིང་ཁམས་ཁྲག་རྩའི་ནད་རིགས་དབར་གྱི་འབྲེལ་བ་ལ་དཔྱད་དཔོག་དང་དབྱེ་ཞིབ་བྱས་པ་དང་། དེའི་བརྟག་དཔྱད་མཇུག་འབྲས་ལས་འགྱིག་བཟོའི་སྣོད་ཆས་སྤྱད་མང་བའི་མིར་ཁྲག་རྒྱས་རང་བཞིན་གྱི་སྙིང་ཤུགས་ཉམས་པའི་ཉེན་ཁ་13%མཐོ་རུ་ཕྱིན་པ་ཤེས་རྟོགས་བྱུང་ཡོད། 

 

དུས་ཡུན་རིང་པོ་ཐེངས་གཅིག་རང་བཞིན་གྱི་འགྱིག་བཟོའི་སྣོད་ཆས་སྤྱད་མི་ཆོག་པ་རྒྱུ་མཚན་ཅིའི་ཕྱིར་ཞེ་ན།

དེའི་རྒྱུ་མཚན་གཙོ་བོ་ནི་དུས་རྒྱུན་ཐེངས་གཅིག་རང་བཞིན་འགྱིག་སྣོད་སྤྱད་ཚེ་རྒྱུ་མའི་འབུ་ཕྲའི་ཁྱུ་ཚོགས་ལ་འགྱུར་བ་བཏང་སྟེ། སྙིང་རྩ་ལ་གནོད་སྐྱོན་དང་སྙིང་ཁམས་ཁྲག་རྩའི་ནད་རིགས་འབྱུང་སྲིད་པས་རེད། ད་དུང་འགྱིག་བཟོའི་སྣོད་ཆས་ཁྲོད་རྒྱུན་པར་ཟགས་ཐོན་གྱི་ནུས་པར་འགལ་རྐྱེན་བཟོ་བའི་རྫས་འགྱུར་དངོས་པོ་འདུས་ཡོད་པ་དཔེར་ན་ཧྥུན་ཟུང་A(BPA)དང་མཚེས་པུན་ཀ་སྐྱུར་གཉིས་ཚྭ(PAEs)བཅས་ཀྱིས་ཀྱང་ལུས་པོའི་སྐུལ་རྩི་དོ་མཉམ་ལ་འགལ་རྐྱེན་བཟོས་ནས་སྙིང་ཁམས་ཁྲག་རྩའི་བདེ་ཐང་ལ་ཤུགས་རྐྱེན་ཐེབས་སྲིད། ཞིབ་འཇུག་བྱས་པ་ལས་གསལ་བར། དྲོད་ཚད་མཐོ་བ་ཡོད་ཚེ་འགྱིག་བཟོ་དངོས་པོའི་ཁྲོད་དུ་འདུས་པའི་གནོད་ཡོད་དངོས་རྫས་ཕྱིར་གཏོང་ཇེ་མགྱོགས་སུ་འགྲོ་སྲིད། དཔེར་ན།  རླབས་ཐབ་སྤྱད་ནས་སྐར་མ་3ལ་ཚ་སྣོན་བྱས་ན་ལི་སྨི་གྲུ་བཞི་མ་རེའི་འགྱིག་བཟོའི་ཡོ་ཆས་ཀྱིས་འགྱིག་རྒྱུ་ཕྲ་མོ་ཁྲི་420ཕྱིར་གཏོང་བྱེད་ཀྱི་ཡོད། 

དེ་ཙམ་གྱིས་མ་ཚད་པར། འགྱིག་བཟོའི་ཐོན་རྫས་ལ་ད་དུང་གནོད་པ་ཤིན་ཏུ་མང་པོ་ཡོད། དཔེར་ན།   འགྱིག་སྣོད་ནང་བླུགས་པའི་ཁུ་བ་ཚ་པོ་དང་།   འགྱིག་ཕོར་ནང་བླུགས་ནས་ཚ་པོ་བཟོས་རྗེས་ཀྱི་ཟས་རིགས།    ད་དུང་འགྱིག་དམ་ནང་བླུགས་ཤིང་དུས་ཡུན་རིང་པོ་ཉི་འོད་འོག་བཞག་པའི་འཐུང་ཆུ་སོགས་བཀོལ་སྤྱོད་བྱས་ཚེ་ལུས་པོའི་བདེ་ཐང་ལ་གནོད་པ་ཆེན་པོ་ཡོད།  

 

གཅིག མཆིན་པར་གནོད་སྐྱོན་ཐེབས་པ། 

ཟས་རིགས་སམ་འཐུང་བྱའི་ནང་གི་སྤུས་འགྱིག་གི་རྒྱུ་ཕྲ་མོ་དེས་མཆིན་པར་གནོད་པ་བཟོ་བ་དང་རྒྱུ་མའི་ཟས་འཇུ་ནུས་པ་དམའ་རུ་བཏང་བ་དང་ནང་ཆགས་དུག་རྒྱུ་ཡི་ཆུ་ཚད་ཇེ་མཐོར་འགྲོ་སྲིད། 

གཉིས། ཀླད་པའི་བདེ་ཐང་ལ་ཤུགས་རྐྱེན་ཐེབས་པ།

འགྱིག་རྒྱུ་ཕྲ་མོ་དེ་དག་ལུས་པོའི་རིམས་འགོག་ཕྲ་ཕུང་གིས་ཁྱུར་མིད་བཏང་རྗེས། ཁྲག་གི་འཁོར་རྒྱུག་དང་བསྟུན་ནས་མཐར་ཀླད་ཆེན་གྱི་ཁྲག་རྩའི་ནང་དུ་ལུས་ཡོད།  འདིས་ཁྲག་རྩ་དང་ཀླད་ཁྲག་འགག་སྲིད་པ་མ་ཟད། དབང་རྩ་ལའང་གནོད་འཚེ་འབྱུང་སྲིད།  

གསུམ། གྲིབ་ནད་ཕོག་པའི་ཉེན་ཁ་ཆེ་རུ་འགྲོ་བ། 

འགྱིག་རྒྱུ་ཕྲ་མོ་དེ་དག་མཇིང་པའི་འཕར་རྩའི་ཕུང་གྲུབ་ནང་དུ་འཛུལ་རྗེས།  སྙིང་ནད་དང་གྲིབ་ནད་ཕོག་པ། ཐ་ན་འཆི་བའི་ཉེན་ཁ་ཇེ་ཆེར་འགྲོ་སྲིད། གྲངས་གཞི་ལས་མངོན་པ་ལྟར་ན། འཕར་རྩའི་ནང་འགྱིག་རྒྱུ་ཕྲ་མོ་འདུས་མེད་པའི་མི་དེ་དག་དང་བསྡུར་ན།  འཕར་རྩའི་ནང་འགྱིག་རྒྱུ་ཕྲ་མོ་འདུས་ཡོད་པའི་མིར་འབྱུང་འགྱུར་ཟླ་བ་34རིང་གི་རྗེས་འདེད་བརྟག་དཔྱད་བྱས་མཐར་སྙིང་ནད་དང་གྲིབ་ནད་བྱུང་བའམ་ཡང་ན་འཆི་བའི་ཉེན་ཁ་ལྡབ་4.53མཐོ་བ་ཡོད་པ་རེད། 

འགྱིག་སྣོད་ཀྱིས་ལུས་པོར་བཟོ་བའི་གནོད་འཚེ་ཉུང་དུ་གཏོང་དགོས་ན། ཕྱོགས་བཞིའི་ཐད་ནས་འགྱུར་ལྡོག་གཏོང་དགོས། 

གཅིག འགྱིག་བཟོའི་སྣོད་ཆས་སྤྱོད་ཚད་ཉུང་དུ་གཏོང་གང་ཐུབ་བྱ་དགོས། འགྱིག་གིས་ཐུམ་སྒྲིལ་མེད་པའི་ཟས་རིགས་འདེམས་པའམ་ཡང་ན་ཤེལ་དམ་དང་དང་ཤོག་བུ་སོགས་ཀྱི་སྣོད་ཆས་སྤྱད་ཡོད་པའི་ཐོན་རྫས་འདེམས་དགོས། གཞན་ད་དུང་འགྱིག་འཇིབ་སྦུ་གུ་ཉུང་ཙམ་སྤྱོད་དགོས།

 

གཉིས། འགྱིག་གི་སྣོད་ཆས་སྤྱད་ནས་ཟས་རིགས་ཚ་སྣོན་བྱེད་མི་རུང་། ཟས་རིགས་ཚ་སྣོན་བྱེད་སྐབས་ཤེལ་གྱི་སྣོད་ཆས་དང་རྫ་སོགས་ཀྱི་སྣོད་ཆས་བཀོལ་གང་ཐུབ་བྱེད་དགོས།

གསུམ། ཕྱི་རོལ་ནས་ཟ་མ་མངག་ཉོ་བྱས་རྗེས་སྔོན་ལ་སྣོད་ཆས་བརྗེ་དགོས་པ་དང་ཡང་ན་ཕྱི་རོལ་གྱི་ཟ་མ་མངག་ཉོ་བྱེད་སྐབས་ཤོག་བུའི་སྣོད་ཆས་འདེམས་གང་ཐུབ་བྱ་དགོས། ཕྱི་རོལ་ནས་ཟ་མ་མངག་ཉོ་བྱས་ནའང་ཁྱིམ་དུ་སླེབས་རྗེས་ཐོག་མར་ཟས་རིགས་དེ་རང་ཉིད་ཀྱི་བདེ་ཐང་སྣོད་ཆས་ནང་བླུག་དགོས།   དེ་ལྟར་བྱས་ཚེ་ཚད་ངེས་ཅན་ཞིག་གི་ཐོག་ནས་གནོད་འཚེ་ཉུང་དུ་གཏོང་ཐུབ།