མཚོ་སྔོན་ཞིང་ཆེན་མི་དམངས་སྲིད་གཞུང་དྲ་བ།
དབྱར་ཁ་ཚ་བ་ཆེ་བའི་སྐབས། ང་ཚོ་ཕྱི་རོལ་ནས་ཁྱིམ་དུ་ལོག་སྐབས་རྒྱུན་དུ་ལུས་ནས་རྔུལ་ཆུ་མང་པོ་ཐོན་གྱི་ཡོད།མི་ཁ་ཤས་ཀྱིས་སྐབས་དེར་བཏུང་བྱ་འཁྱགས་པོ་འཐུང་བའམ་ཡང་ན་དྲོ་གྲང་སྙོམས་སྒྲིག་འཕྲུལ་ཆས་ཀྱི་རླུང་དྲང་མོ་གཏོང་སྲིད་པ་དང་། ད་དུང་མི་ཁ་ཤས་ཀྱིས་ལམ་སེང་ཁྲུས་ཁང་དུ་འཛུལ་ནས་ལུས་པོ་འཁྲུ་ཡི་ཡོད། དོན་དངོས་ཐོག་བྱེད་སྟངས་འདི་རིགས་ཀྱིས་ལུས་ཁམས་མི་བདེ་བར་འགྱུར་སྲིད་པ་དང་། ཚབས་ཆེ་ན་བདེ་ཐང་ལ་གནོད་པ་བཟོ་སྲིད།
དེ་བས་དབྱར་དུས་རྔུལ་ཆུ་མང་པོ་ཐོན་རྗེས་གང་འདྲ་བྱེད་དགོས་སམ་ཞེ་ན། གཤམ་དུ་ང་ཚོས་རྒྱུས་ལོན་ཞིབ་ཕྲ་བྱ་རྒྱུ་ཡིན།
རྔུལ་ཆུ་མང་པོ་ཐོན་རྗེས་བྱེད་སྟངས་འདི་རིགས་ཀྱིས་ལུས་པོར་གནོད་པ་ཚབས་ཆེན་བཟོ་སྲིད།
རྔུལ་ཆུ་ཐོན་སྐབས་མིའི་ལུས་པོའི་ཁྲག་རྒྱུན་མགྱོགས་མྱུར་འཁོར་རྒྱུག་བྱེད་ཀྱི་ཡོད་པས། རྔུལ་ཆུ་ཐོན་ན་ལུས་དྲོད་གཏན་འཇགས་ཡོང་བར་ཕན་པ་ཡོད་མོད། འོན་ཀྱང་རྔུལ་ཆུ་ཐོན་རྗེས་གལ་ཏེ་གཤམ་གྱི་བྱེད་སྟངས་འདི་དག་བྱས་ན། ཆམ་ནད་ཕོག་སླ་བ་དང་མགོ་ན་བ། ཐ་ན་སྙིང་དང་ཀླད་པའི་ཁྲག་རྩའི་གནོན་ཤུགས་ཇེ་ཆེར་འགྲོ་སྲིད།
གཅིག ལུས་པོའི་དྲོད་ཚད་ཧ་ཅང་མཐོ་བའི་སྐབས་སུ་མྱུར་དུ་མཁའ་རླུང་སྙོམས་ཆས་ཀྱི་རླུང་གྲང་མོ་གཏོང་བའི་ཁང་པའི་ནང་དུ་འཛུལ་ཚེ། གྲང་རླུང་ཐད་ཀར་ལུས་ཐོག་ཏུ་བརྒྱབ་པས་ལུས་པོའི་དྲོད་ཚད་ལ་ཧོབ་ཏེ་འགྱུར་བ་བྱུང་ནས། ཆམ་ནད་ཕོག་པ་དང་གྲོད་པ་བཤལ་བ་སོགས་ཀྱི་ནད་འབྱུང་ཉེན་ཡོད། ད་དུང་སྙིང་དང་ཀླད་པའི་ཁྲག་རྩའི་གནོན་ཤུགས་ཇེ་ཆེར་གཏོང་སྲིད་པས། མ་གཞི་ནས་ལུས་པོར་རྨང་གཞིའི་ནད་ཡོད་པའི་མི་ལ་དེ་བས་གནོད་པ་ཆེན་པོ་འབྱུང་སྲིད།
གཉིས། དྲོད་ཚད་མཐོ་བའི་སྐབས། མི་མང་པོ་ཞིག་གིས་ཆུ་གྲང་མོའམ་འཁྱགས་ཆུ་འཐུང་སྲིད། དེས་ཕོ་རྒྱུའི་འབྱར་སྐྱི་གློ་བུར་དུ་གྲང་དུ་ཕྱིན་ཏེ་ཁ་ཕྱེ་ནས་ཡོད་པའི་ཁྲག་རྩ་ཕྲ་མོ་དེ་དག་འཁུམ་འགྲོ་བས། ཕོ་རྒྱུའི་གཉན་ཚད་དང་གྲོད་པ་བཤལ་པའི་ནད་འབྱུང་ཉེན་ཡོད། དྲོད་ཚད་གློ་བུར་དུ་ཆག་པའི་དབང་གིས་ད་དུང་ཁྲག་རྩ་འཁུམ་སྲིད་པས། སྙིང་གཟེར་དང་སྙིང་རྩ་འགག་པ། ཀླད་པ་རེང་འགགས་སོགས་ཀྱི་ནད་ཚབས་ཆེན་སློང་ཉེན་ཡོད།
གསུམ། རྔུལ་ཆུས་གྱོན་ཆས་བརླན་པར་བཟོ་སྲིད་པས། གྱོན་ཆས་བརླན་པ་དེ་དག་མ་བརྗེས་ན་ཆམ་ནད་ཕོག་ཉེན་ཡོད་པ་དང་། རྔུལ་ཆུ་ཐོན་དྲགས་པ་དེས་པགས་པར་གནོད་སྐྱོན་ཐེབས་སྲིད། གལ་ཏེ་གྱོན་པའི་སྤུས་ཀ་ཡག་པོ་མེད་ན། རྔུལ་ཆུ་སྐམ་དཀའ་བས་ལུས་པོའི་པགས་ནད་གཞན་སློང་ཉེན་ཡོད།
བཞི། དབྱར་དུས་དྲོད་ཚད་མཐོ་བ་དང་བཞའ་ཚན་ཆེ་བས། དྲོད་ཚད་མཐོ་བའི་ཁོར་ཡུག་ཁྲོད་ཡུན་རིང་བསྡད་ཚེ་ཚ་དྲེག་འབྱུང་སླ་པོ་ཡོད། རྔུལ་ཆུ་འབོར་ཆེན་ཐོན་རྗེས། དུས་ཐོག་ཏུ་ཚ་དྲག་པའི་ཁོར་ཡུག་ལས་གཡོལ་ཏེ། ལྟོས་བཅས་བསིལ་བ་དང་སྐམ་པའི་ཁོར་ཡུག་ཁྲོད་བསྡད་ནས་མི་བདེ་བའི་ཚོར་བ་ཞི་ལྷོད་དུ་གཏོང་ཐབས་བྱེད་དགོས།
རྔུལ་ཆུ་མང་པོ་ཐོན་སྐབས། གཅིག་བྱས་ན་ན་བ་ཡིན་སྲིད།
མིའི་ལུས་དྲོད་ཧྲེ་ཧྲི་ཏུའུ་37ཡས་མས་སུ་རྒྱུན་འཁྱོངས་བྱེད་ཐུབ་པའི་རྒྱུ་མཚན་ནི་རྔུལ་རྨེན་གྱིས་རྔུལ་ཆུ་ཟགས་ཐོན་བྱས་ནས་སྙོམས་སྒྲིག་བྱེད་པས་ཡིན། རིགས་གཅིག་མཁས་ཅན་གྱིས། ཁོར་ཡུག་གཅིག་མཚུངས་འོག རྔུལ་ཆུ་ཐོན་ཚད་མང་ཉུང་དེ་མི་སྒེར་གྱི་ལུས་པོའི་རྨང་གཞིའི་བརྗེ་ཚབ་དང་རྔུལ་རྨེན་གྱི་གྲངས་ཚད། རྔུལ་རྨེན་དར་རྒྱས་ཀྱི་ཚད་གཞི། རྔུལ་རྨེན་གྱི་ཁྱབ་ཚུལ་སོགས་དང་འབྲེལ་བ་ཡོད་ཅེས་གསུངས་ཡོད། དེ་ཡང་རྔུལ་ཆུ་ཐོན་སླ་བ་དེ་ནི་གཅིག་བྱས་ན་ནད་འབྱུང་བའི་བརྡ་རྟགས་ཡིན་སྲིད་པས། རིགས་གཅིག་མཁས་པས་དྲན་སྐུལ་གནང་བ་ལྟར་ན། གལ་ཏེ་རང་ཉིད་མཐའ་འཁོར་གྱི་མི་གཞན་པ་ལས་རྔུལ་ཆུ་ཐོན་སླ་ཚེ། གཤམ་གྱི་གནས་ཚུལ་དེ་དག་ཡོད་མེད་ལ་ཞིབ་བཤེར་བྱ་ཆོག་སྟེ།
གཅིག སྐེ་རྨེན་འཕེལ་ནད། ལུས་པོའི་གཤེར་རྨེན་སྐུལ་རྩི་མང་དྲགས་པ་དེས་རྙིང་ཚབ་གསར་བརྗེ་བྱེད་ཚད་མཐོ་རུ་ཕྱིན་ཏེ་ལུས་དྲོད་ཇེ་མཐོར་འགྲོ་ཡི་ཡོད་པས། རྔུལ་ཆུ་མང་དུ་བཏང་ནས་ལུས་དྲོད་སྙོམས་སྒྲིག་བྱེད་བཞིན་ཡོད། ཀླད་དེའུ་འོག་མས་བརྡ་རྟགས་དེ་ཞིབ་དཔྱད་ཐུབ་པས། རྔུལ་ཆུ་མང་ཙམ་ཐོན་པ་བྱས་ནས་ལུས་དྲོད་སྙོམས་སྒྲིག་བྱེད་ཏུ་འཇུག་གི་ཡོད། རྔུལ་ཆུ་ཐོན་ཚུལ་དེ་རིགས་ནི་སྤྱིར་བཏང་དུ་རྒྱུན་མཐུད་རང་བཞིན་ཡིན་པ་དང་། རྒྱུན་པར་ལུས་པོའི་ལྗིད་ཚད་ཡང་དུ་འགྲོ་བ་དང་སེན་མོ་སོབ་ཏུ་འགྲོ་བ་སོགས་ཀྱི་ནད་རྟགས་ཐོན་སྲིད།
གཉིས། གཅིན་པ་མངར་འགྱུར་གྱི་ནད། གཅིན་པ་མངར་འགྱུར་ནད་ཀྱིས་རང་བདག་དབང་རྩའི་མ་ལག་གི་བྱེད་ནུས་ལ་ཤུགས་རྐྱེན་ཐེབས་པས། གཉིད་ཁུག་དུས་དང་འགུལ་སྐྱོད་དྲག་པོ་མེད་པའི་ལུས་རྩལ་རྩེད་སྐབས་རྔུལ་ཆུ་མང་པོ་ཐོན་སླ་པོ་ཡོད། གནས་ཚུལ་དེ་རིགས་རྒྱུན་དུ་ཁྲག་མངར་མཐོ་དྲགས་པའམ་ཡང་ན་དམའ་དྲགས་པའི་སྐབས་སུ་འབྱུང་སྲིད།
གསུམ། རང་བདག་དབང་རྩའི་སྙོམས་སྒྲིག་ནུས་པ་ཤོར་བ། རང་བདག་དབང་རྩའི་སྙོམས་སྒྲིག་ནུས་པ་ཤོར་བ་དེས་རྔུལ་ཆུ་ཐོན་མང་བའི་ནད་གཞི་འབྱུང་ཉེན་ཡོད།བུད་མེད་ལ་ཕྲུ་གུ་བཙའ་སྐབས་དང་རོ་ཙ་ཉམས་དུས་སོགས་སྐུལ་རྩི་འཕར་ཆག་མངོན་གསལ་དོད་པའི་དུས་སུ་དབང་རྩའི་བྱེད་ལས་རྙོག་འཛིང་ཅན་དུ་འགྱུར་སླ་བས། སུན་སྣང་དང་སེམས་འཚབ་པ་སོགས་ཀྱི་སེམས་ཁམས་ཀྱི་ནད་འབྱུང་བ་དང་རྔུལ་ཆུ་མང་པོ་ཐོན་གྱི་ཡོད།
བཞི། འགོས་ནད་རང་བཞིན་གྱི་ནད། འགོས་ནད་རང་བཞིན་གྱི་ནད་རིགས་འགའ་སྟེ། དཔེར་ན་འདུས་འདྲིལ་གཅོང་ནད་དང་ཨེ་ཙེའི་ནད(HIV)སོགས་འགོས་ཚེ། མཚན་མོར་གྲང་རྔུལ་ཐོན་པ་སྟེ། གཉིད་ཁུག་པའི་སྐབས་རྔུལ་ཆུ་མང་པོ་ཐོན་ཞིང་གཉིད་སད་རྗེས་རྔུལ་ཆུ་མི་ཐོན་པ་སོགས་ཀྱི་གནས་ཚུལ་ཐོན་སྲིད།
རྔུལ་ཆུ་མང་པོ་ཐོན་རྗེས། འདི་ལྟར་བྱས་ན་ལུས་པོའི་བདེ་ཐང་ལ་ཕན་ཐོགས་ཡོད།
གཅིག ལུས་ཡོངས་སུ་རྔུལ་ཆུ་མང་པོ་ཐོན་རྗེས། ཅུང་ཟད་ངལ་གསོ་རྒྱག་དགོས་པ་དང་། རྔུལ་ཆུ་སྐམ་རྗེས་ད་གཟོད་ཆུ་དྲོད་འཇམ་གྱིས་ལུས་པོ་འཁྲུ་བའམ། ཡང་ན་ལག་ཕྱིས་སྐམ་པོའམ་ལག་ཕྱིས་དྲོད་འཇམ་གྱིས་ལུས་པོ་ཕྱིས་ཆོག
གཉིས། གོས་བརླན་པར་གྱུར་རྗེས་གང་མགྱོགས་གོས་སྐམ་པོ་བརྗེ་དགོས། དུས་རྒྱུན་ཡག་ཤོས་བྱུང་ན་རྒྱུ་སྲིང་བལ་གྱི་གོས་གྱོན་དགོས་པ་དང་། རྔུལ་ཆུ་མང་པོ་ཐོན་རྗེས། ཆ་རྐྱེན་ཡོད་ན་གོས་བརླན་པ་དེ་གང་མགྱོགས་བརྗེ་དགོས།
གསུམ། སྔོན་ལ་ཆུ་དྲོད་འཇམ་གྱིས་ཁ་བཤལ་ནས་སྐོམ་པ་སེལ་དགོས།སྐར་མ་10ཡི་རྗེས་སུ་ཐེངས་འགའ་ལ་དབྱེ་ནས་གློག་འབྱེད་རྫས་ཡོད་པའི་ཆུ་ཉུང་ཉུང་རེ་འཐུང་སྟེ། རྔུལ་ཆུའི་ནང་མཉམ་དུ་ཟགས་ཐོན་ཤོར་བའི་ཚྭ་རྒྱུ་ཁ་གསབ་བྱེད་དགོས། དེ་ནས་ཆུ་ཚོད་ཕྱེད་ཀའི་རྗེས་སུ་ཆུ་མང་ཙམ་འཐུང་ནས་ལུས་པོའི་དབང་པོ་ཁག་གི་རྙིང་ཚབ་གསར་བརྗེའི་དགོས་མཁོ་སྐོང་དགོས། ཐེངས་རེར་ཧའོ་ཧྲེང་100ནས་150བར་འཐུང་ན་ཆོག ཐེངས་གཅིག་ལ་འཐུང་རྒྱུ་མང་དྲགས་རྒྱུ་མེད། གལ་ཏེ་ད་དུང་སྐོམ་པ་སེལ་མ་ཐུབ་ཚེ། སྐར་མ་3ནས་5བར་འགོར་རྗེས་ཡང་བསྐྱར་ཆུ་ཉུང་ཙམ་འཐུང་ཆོག
བཞི། དུས་རྒྱུན་རྔུལ་ཆུ་ཅུང་མང་པོ་ཐོན་མཁན་ཡིན་ཚེ། སྲན་མའི་རིགས་དང་འོ་མའི་རིགས་སོགས་ཀལ་རྒྱུ་མང་བའི་ཟས་རིགས་དང་། དེ་བཞིན་ཞོག་ཁོག་དང་ཤ་མོ་སོགས་ཅཱ་རྒྱུ་འདུས་ཚད་ཕུན་སུམ་ཚོགས་པའི་ཟས་རིགས་མང་ཙམ་ཟ་དགོས། གཞན་སྐྱུར་དྲི་ཡིས་རྔུལ་ཆུ་ཟགས་ཐོན་ཉུང་དུ་གཏོང་ཐུབ་པ་དང་བཤལ་མཚམས་འཇོག་ཐུབ་པ། གཤེར་རྒྱུ་སྐྱེ་ནས་སྐོམ་པ་སེལ་ཐུབ་པ། ཕོ་ཁ་བདེ་བ་དང་ཟས་འཇུ་བ་སོགས་ཀྱི་ནུས་པ་ཐོན་པས། ཆི་བི་ཁ་སྐྱུར་མོ་དང་རྒུན་འབྲུམ། སྐྱུ་རུ་ར། འབྲི་ཏ་ས་འཛིན། ཤིང་ཏོག་པོ་ལུའོ། ཤིང་ཏོག་ཨ་མྲ་སོགས་རོ་སྐྱུར་བའི་ཤིང་ཏོག་གི་རིགས་ཟ་ཆོག
