མཚོ་སྔོན་ཞིང་ཆེན་མི་དམངས་སྲིད་གཞུང་དྲ་བ།
གཟུགས་པོའི་ལྗིད་ཚད་ནི་མི་ཞིག་གི་བདེ་ཐང་གནས་ཚུལ་ལ་ཚད་འཇལ་བྱེད་ཀྱི་ཚད་གཞི་གལ་ཆེན་ཞིག་རེད། དེང་རབས་གསོ་རིག་ཞིབ་འཇུག་ལས་ར་སྤྲོད་བྱས་པ་ལྟར་ན། གཟུགས་པོ་རྒྱགས་དྲགས་པའམ་ཡང་ན་སྐམ་དྲགས་ན་བདེ་ཐང་ལ་གནོད་ཀྱི་ཡོད། ད་འོ་ན། གཟུགས་པོའི་ལྗིད་ཚད་ཀྱི་ཚད་གཞི་ཡག་ཤོས་གང་ཡིན་པ་དང་། གཟུགས་པོའི་ལྗིད་ཚད་ལ་ཚོད་འཛིན་གང་འདྲ་བྱེད་དགོས་སམ་ཞེ་ན། གཤམ་ལ་ང་ཚོ་མཉམ་དུ་དེའི་ཐད་ཀྱི་བདེ་ཐང་ཤེས་བྱར་རྒྱུས་ལོན་ཞིག་བྱེད་དོ།
གཅིག གཟུགས་པོའི་ལྗིད་ཚད་ཀྱི་ཚད་གཞི་ཡག་ཤོས།
ལོ་18ནས་64བར། གཟུཊ་པོའི་ལྗིད་ཚད་སྟོན་གྲངས་(BMI)18.5—23.9 ཡིན་ན་ཡག
ལོ་65ཡན་གྱི་གཟུཊ་པོའི་ལྗིད་ཚད་སྟོན་གྲངས་20—26.9 ཡིན་ན་ཡག
ལོ་80ཡན་གྱི་གཟུགས་པོའི་ལྗིད་ཚད་སྟོན་གྲངས་22—26.9 ཡིན་ན་ཡག
གོང་གསལ་ལྟར་རྒན་རྒོན་གྱི་གཟུགས་པོའི་ལྗིད་ཚད་སྟོན་གྲངས་ན་གཞོན་ལས་མཐོ་བ་ཡོད་པའི་རྒྱུ་མཚན་ནི་རྒན་རྒོན་ཚོ་གཟུགས་པོ་ཅུང་ཟད་རྒྱགས་པ་ཡོད་ན་ལུས་སྟོབས་དང་ནད་འགོག་ནུས་པ་མ་ཉམས་པར་ཡུན་རིང་བདེ་ཐང་ཡོང་བར་ཕན་ཐོགས་ཡོད།
གཉིས། གཟུགས་པོའི་ལྗིད་ཚད་དམའ་རུ་གཏོང་ཐབས།
བདེ་ཐང་ཅན་གྱི་ལུས་པོའི་ལྗིད་ཚད་རྒྱུན་འཁྱོངས་བྱེད་དགོས་ན། གལ་ཆེ་ཤེས་ནི་ཟས་རིགས་ཀྱི་སྤང་བླང་ཆ་ཡིན།
འབྲས་དང་གྲོ་ཞིབ་ཟ་ཚད་ཉུང་དུ་གཏོང་དགོས།
ཞོག་ཁོག་རིགས་ཀྱིས་འབྲུ་རིགས་ངེས་ཅན་ཞིག་གི་ཚབ་བྱེད་དགོས་ཤིང་། མ་རྨོས་ལོ་ཏོག་དང་། བྲ་བོ། ཡུག་པོ། སྲན་ཆུང་། སྲན་ལྗང་སོགས་འབྲུ་རིགས་རྩིང་པོ་ཅུང་མང་ཙམ་ཟ་དགོས།
སྔོ་ཚལ་མང་ཙམ་ཟ་དགོས།
དཔེར་ན། ཇིན་ཚལ་དང་། ལ་ཕུག པོའོ་ཚལ། ཤ་མོ། ཧའེ་ཏའེ། ཧོང་ཀྭ། ཏུང་ཀྭ། སྨྱུག་རྩ་སོགས་སྔོ་ཚལ་མང་ཙམ་ཟ་དགོས།
ཤ་ཟ་ཚད་ལ་ཚོད་འཛིན་བྱེད་དགོས།
ཤ་མང་པོ་བཟའ་མི་རུང་། ལྷག་པར་དུ་ཤ་དམར་བརྔོས།(红烧肉) ཕྱེ་ལུམས་ཤ།(粉蒸肉) ཕག་པའི་ཉྭ་རིལ་(酱猪肘) སོགས་ལ་འཛེམ་དགོས།
སྣུམ་དང་ཚྭ་ཉུང་ཙམ་ཟ་དགོས།
སྣུམ་དང་ཚྭ་འདུས་ཚད་མཐོ་བའི་ཟས་རིགས་གང་ཐུབ་ཀྱིས་ཉུང་ཙམ་ཟ་བའམ་ཡང་ན་རྩ་བ་ནས་ཟ་མི་རུང་།
མངར་ཆ་ཉུང་བའི་ཤིང་འབྲས་ཟ་དགོས།
ཤིང་འབྲས་ལ་འཚོ་རྒྱུ་ཕུན་སུམ་ཚོགས་པོ་འདུས་ཡོད་པ་མ་ཟད། ལྟོགས་སྐོམ་ཡང་སེལ་ཐུབ་པས། དཔེར་ན། འབྲི་ཏ་ས་འཛིན་དང་། ལི། ཁམ་བུ་སོགས་མངར་ཆ་འདུས་ཚད་9%མན་གྱི་ཤིང་འབྲས་སོས་པ་མང་ཙམ་ཟ་དགོས།
བཟའ་འཐུང་ལ་ཚོད་འཛིན་བྱེད་དགོས།
ཉིན་རེའི་བཟའ་འཐུང་ཆོས་ཉིད་ལྡན་པ། ལྟོ་དུས་གསུམ་དོ་སྙོམས་ཡོང་བ་བྱེད་དགོས་པ་ལས། བཟའ་འཐུང་ཚོད་མེད་བསྟེན་རྒྱུ་མེད་པར་ལུས་པོར་ཟས་སྐོམ་བསྡུ་ལེན་བྱེད་ཚད་70%ཙམ་ཟིན་ན་ལེགས།
གསུམ། གཟུགས་པོའི་ལྗིད་ཚད་ཆེ་རུ་གཏོང་ཐབས།
སྤུས་ལེགས་སྤྲི་དཀར་བསྡུ་ལེན་བྱེད་ཚད་མང་དུ་གཏོང་དགོས།
དཔེར་ན། ཉ་ཤ་དང་། བྱ་ཤ། སྒོ་ང་། འོ་མ་སོགས་སྤུས་ལེགས་སྤྲི་དཀར་དོ་སྙོམས་མང་ཙམ་ཟོས་ན་ལུས་པོའི་ཤ་གནད་ཀྱི་སྤྲི་དཀར་འདྲེས་གྲུབ་བྱེད་པར་སྐུལ་འདེད་གཏོང་ཐུབ།
ཤུགས་སྐྱེད་ལུས་རྩལ་མང་ཙམ་རྩེ་དགོས།
དཔེར་ན། རྐང་ལག་བརྐྱང་བསྐུམ་དང་། རྡོ་འགྱོགས། འགྱིག་ཐག་འཐེན་པ་སོགས་རྒྱུན་གཏན་གྱི་ལུས་རྩལ་དེ་དག་ཚང་མས་ཤ་གནད་ཀྱི་སྟོབས་ཤུགས་འཕེལ་ནས་ལུས་པོའི་ནུས་པ་ལེགས་བཅོས་བྱེད་ཐུབ།
གཉིད་ཡག་པོ་ཁུག་དགོས།
གཉིད་འདང་ངེས་ཁུག་ན་ལུས་པོའི་ནུས་པ་རྒྱུན་ལྡན་དུ་འཁོར་སྐྱོད་བྱེད་པར་རོགས་རམ་ཐུབ་ནས་ལུས་པོའི་ལྗིད་ཚད་འཕར་བའི་ཕན་འབྲས་མངོན་གསལ་དོད་པོ་ཐོན་ཐུབ།
མཇུག་མཐར་དྲན་སྐུལ་ཞུ་རྒྱུ་ཞིག་ལ། གལ་ཏེ་རང་ཉིད་ཀྱིས་རང་འགུལ་སྒོ་ནས་གཟུགས་པོའི་ལྗིད་ཚད་ཆུང་དུ་གཏོང་བའི་བྱེད་ཐབས་མ་སྤྱད་ཀྱང་། ཉིན་30ཡི་ནང་གཟུགས་པོའི་ལྗིད་ཚད་5%ཡན་ཇེ་ཆུང་དུ་ཕྱིན་པའམ་ཡང་ན་ཟླ་བ་6གི་ནང་དུ་གཟུགས་པོའི་ལྗིད་ཚད་10%ཡན་ཇེ་ཆུང་དུ་ཕྱིན་ན། དོན་དེར་ཚད་མཐོའི་མཐོང་ཆེན་བྱས་ནས་དུས་ཐོག་ཏུ་སྨན་ཁང་དུ་བསྐྱོད་དེ་ནད་གཞི་ཕོག་ཡོད་མིན་ཐད་དགོས་ངེས་ཀྱི་བརྟག་དཔྱད་ཡག་པོ་བྱེད་དགོས།
