ལོ་སྟོད་དུ་ཡུལ་སྐོར་འཛད་སྤྱོད་ཀྱི་གསོན་ཤུགས་མུ་མཐུད་དུ་འཕེལ།

རིག་གནས་དང་ཡུལ་སྐོར་པུའུ་ཡི་གཞི་གྲངས་གསར་བ་ལས་མངོན་པ་ལྟར་ན། 2025ལོའི་ལོ་སྟོད་དུ་རྒྱལ་ནང་སྡོད་དམངས་ཀྱི་ཡུལ་སྐོར་མི་ཐེངས་ཐེར་འབུམ་གསུམ་དང་དུང་ཕྱུར་གཉིས་བྱེ་བ་བརྒྱད་ས་ཡ་ལྔ་ལ་སླེབས་པས། ན་ནིང་གི་དུས་མཉམ་ལས20.6%འཕར་བ་དང་། རྒྱལ་ནང་སྡོད་དམངས་ཀྱི་ཡུལ་སྐོར་འགྲོ་གྲོན་སྒོར་ཁྲག་ཁྲིག་ཆེན་མོ་གསུམ་དང་ཁྲག་ཁྲིག་གཅིག་ཐེར་ཆེན་ལྔ་ལ་སླེབས་པས། ན་ནིང་གི་དུས་མཉམ་ལས15.2%འཕར།

ད་ལོའི་ལོ་སྟོད་དུ། གུང་གསེང་ཡུལ་སྐོར་གྱིས་འཛད་སྤྱོད་ལ་སྐུལ་ཁྲིད་བྱས་པའི་ཕན་འབྲས་མངོན་གསལ་ཡིན་པ་དང་། ལུགས་གསར་ལོ་སར་ནས་ལྔ་པའི་ཚེས་ལྔའི་གུང་གསེང་དུས་སྐབས་ལྔའི་ཡུལ་སྐོར་ཁྲོམ་ར་རྒྱུན་མཐུད་དར་རྒྱས་བྱུང་ནས། 5·19ཀྲུང་གོའི་ཡུལ་སྐོར་ཉིན་མོའི་ཕན་འབྲས་མངོན་གསལ་བྱུང་བ་དང་། ཡུལ་སྐོར་དཔལ་འབྱོར་ཡར་རྒྱས་སུ་བསྐུལ། དགུན་ཁར“བྱང་སྐྱོད་གངས་འཁྱག་དང་ལྷོ་སྐྱོད་གྲང་གཡོལ”གྱི་ཡུལ་སྐོར་ཁྱད་ཆོས་མངོན་གསལ་ཡིན་ཞིང་། དཔྱིད་དུས་མེ་ཏོག་ལ་ལྟ་བའི་ཡུལ་སྐོར་གྱི་རྣམ་པ་མངོན་གསལ་ཡིན་པས། རྒྱལ་ཡོངས་གྲོང་གསེབ་ཀྱི་ཡུལ་སྐོར་ལམ་ཐིག32ཀྱིས་མེ་ཏོག་ལ་ལྟ་བའི་དཔལ་འབྱོར་དེ་སྔོན་ཆད་ཀྱི་རྣམ་པ་རྐྱང་བ་ནས་ད་ལྟའི་མཉམ་འདུས་རྣམ་པའི་ཐོན་ལས་སུ་བསྒྱུར་བར་སྐུལ་ཁྲིད་བྱས་ཏེ། གློག་བརྙན་དང་འགྲོགས་ནས་ཡུལ་སྐོར་དུ་འགྲོ་བ་དང་དམངས་སྲོལ་ཡུལ་སྐོར། ལུས་རྩལ་འགྲན་བསྡུར་སོགས་ཀྱི་ཚ་རླབས་འཕྱུར་བཞིན་ཡོད།

ཀྲུང་གོའི་ཡུལ་སྐོར་ཞིབ་འཇུག་ཁང་གི་འགོ་གཙོ་ཏའེ་པིན་གྱིས་བཤད་རྒྱུར། རྒྱལ་ནང་ཡུལ་སྐོར་གྱི་མི་གྲངས་དང་ཡུལ་སྐོར་འཛད་སྤྱོད། ཡུལ་སྐོར་ཁྱབ་རྒྱ། འདུག་ཡུན་གྱི་དུས་ཚོད་དང་ཡུལ་སྐོར་བའི་ཡིད་ཚིམ་ཚད་བཅས་ཀྱིས་ལོ་རྒྱུས་ཀྱི་ཟིན་ཐོ་གསར་པ་བསྐྲུན།

གཞན་ཡང་། རྒྱལ་ཁོངས་བརྒལ་བར་མཆོག་མཆན་འགོད་མི་དགོས་པའི་སྲིད་ཇུས་རྒྱལ་ཁབ55ལ་ཁེབས་ཤིང་། “ཉོ་བ་དང་ཕྱིར་སློག་པའི”རྒྱལ་ཁོངས་བརྒལ་བར་དཔྱ་ཁྲལ་སློག་པ་སོགས་ཀྱི་བྱེད་ཐབས་རྒྱུན་མི་ཆད་པར་འཐུས་ཚང་དུ་བཏང་བ་དང་། ལོ་སྟོད་དུ་རྒྱལ་ནང་དུ་ཡུལ་སྐོར་བྱེད་ཚད་སྔོན་དཔག་ལས་བརྒལ་ནས་འཕར་ཡོད། ད་ལོའི་ཟླ་དང་པོ་ནས་དྲུག་པའི་བར། ཧྲང་ཧའེ་ཡིས་རྒྱལ་ཁོངས་སུ་ཡོང་བའི་ཡུལ་སྐོར་མི་ཐེངས་ས་ཡ་བཞི་དང་འབུམ་གཉིས་ཁྲི་བཞི་སྟོང་བརྒྱད་སྣེ་ལེན་ཞུས་པས། ན་ནིང་གི་དུས་མཉམ་ལས38.5%འཕར་བ་དང་། ཧའེ་ནན་ནས་རྒྱལ་ནང་དུ་ལོག་པའི་ཕྱི་རྒྱལ་བའི་ཁྲོད་ཀྱི89%ནི་མཆོག་མཆན་འགོད་མི་དགོས་པའི་ཡུལ་སྐོར་བ་རེད།