མཚོ་སྔོན་ཞིང་ཆེན་མི་དམངས་སྲིད་གཞུང་དྲ་བ།
ཉེ་བའི་ལོ་ཤས་རིང་། རང་རྒྱལ་དུ་སྐྲན་ནད་ཕོག་མཁན་ཇེ་མང་དུ་འགྲོ་བཞིན་ཡོད་པ་དང་། དེའི་ཁྲོད་མཆིན་པའི་འབྲས་སྐྲན་ཕོག་ཚད་དེ་བས་ཇེ་མང་དུ་འགྲོ་བཞིན་ཡོད།མཆིན་པའི་དབང་རྩར་ན་ཟུག་བརྒྱབ་ནའང་ཚོར་སྣང་མེད། དེར་བརྟེན་མཆིན་ནད་ཕོག་ཀྱང་ན་ཟུག་མེད་པས་ནད་གཞི་རྟོགས་དཀའ་བ་རེད། རླམ་རྩི་སེར་པོའི་དུག་རྒྱུ་ནི་རླམ་རྩི་སེར་པོ་དང་གཞན་རྟེན་རླམ་པ་ལས་ཐོན་པའི་དུག་རྒྱུ་ཡིན་པས། མིག་སྔར་ཤེས་རྟོགས་བྱུང་བའི་འབྲས་སྐྲན་གྱི་ནད་རྐྱེན་གཙོ་བོ་དེ་རེད།
གཅིག ཡུན་རིང་སྤྱད་པའི་ཐུར་མ།མི་མང་ཆེ་བས་ཐུར་མ་བཀྲུས་རྗེས་སྐམ་གྱིན་མེད་པས། རླམ་རྩི་སེར་པོའི་དུག་རྒྱུ་ཆགས་སླ་པོ་ཡོད། དེར་བརྟེན། ཐུར་མ་བཀྲུས་རྗེས་ཧམ་སྤུ་བརྒྱབ་ཡོད་མེད་ལ་བལྟ་དགོས། ཡག་ཤོས་བྱུང་ན་ཐུར་མ་ལོ་ཕྱེད་རེར་བརྗེ་དགོས། བེད་སྤྱོད་བྱས་རྗེས་དུས་ཐོག་ཏུ་གཙང་མར་བཀྲུས་ནས་སྐམ་དགོས་པའམ་ཡང་ན་ལྕགས་ཀྱི་ཐུར་མ་སྤྱད་ན་ལེགས།
གཉིས། དྲི་མ་བྲོ་བའི་བཟའ་སྣུམ།བཟའ་སྣུམ་ནི་ཟ་མ་ཟ་སྐབས་མེད་དུ་མི་རུང་བ་ཞིག་རེད། འོན་ཀྱང་དབོར་འདྲེན་དང་གསོག་འཇོག་བྱེད་སྐབས་བཞའ་ཚན་ཆེ་བའི་དབང་གིས་བཟའ་སྣུམ་འགའ་ཤས་ལ་ཧམ་སྤུ་རྒྱག་གིན་ཡོད་ཅིང་། རླམ་རྩི་སེར་པོའི་དུག་རྒྱུ་ཆགས་སླ་པོ་ཡོད། གལ་ཏེ་ཟ་མ་གཡོས་སྦྱོར་བྱེད་སྐབས་དྲི་མ་ངར་པོ་ཞིག་ཡོད་ན། བཟའ་སྣུམ་འདིའི་རིགས་བེད་སྤྱོད་བྱེད་མི་རུང་། གལ་ཏེ་བེད་སྤྱོད་བྱས་ན་འབྲས་སྐྲན་ཕོག་ཉེན་ཆེ།
གསུམ། ཧམ་སྤུ་བརྒྱབ་པའི་བ་དམ་སོགས།བ་དམ་དང་མ་རྨོས་ལོ་ཏོག་སོགས་ལ་ཧམ་སྤུ་བརྒྱབ་ཚེ་རླམ་རྩི་སེར་པོའི་དུག་རྒྱུ་འདུས་ཚད་མཐོ་བ་རེད། དེར་བརྟེན་ཟས་རིགས་འདི་དག་རྩ་བ་ནས་ཟ་མི་རུང་།མཆིན་པར་གནོད་པ་ཐེབས་ཚེ། གཤམ་གྱི་ནད་རྟགས་ཐོན་སྲིད།
གཅིག གྲོད་ཁོག་གི་གཞོགས་གཡས་པར་ན་ཟུག་ལངས་པ།གྲོད་ཁོག་གི་གཞོགས་གཡས་པར་ན་ཟུག་ལངས་ན་མཆིན་པར་གནོད་པ་ཐེབས་པའི་རྟགས་རེད། དུས་རྒྱུན་མཆིན་པར་ལག་པས་རེག་མི་ཐུབ་པས། གལ་སྲིད་མཆིན་པ་སྐྲངས་ཚེ་གནས་འདིར་སྐྲངས་འབུར་འབྱུང་བཞིན་ཡོད་པས། ངེས་པར་དུ་དོགས་ཟོན་བྱེད་དགོས།
གཉིས། ཤ་རིད་པ་དང་ལུས་པོར་ཤུགས་མེད་པ།གལ་ཏེ་ཡུན་རིང་པོར་ཆང་འཐུང་བ་དང་རྟག་ཏུ་མཚན་འཁྱོངས་སོགས་བྱས་ནས་ཤ་རིད་པ་དང་ལུས་པོར་ཤུགས་མེད་པར་གྱུར་ན་མཆིན་ནད་ཕོག་པའི་རྟགས་ཡིན་པས་དུས་ཐོག་ཏུ་སྨན་ཁང་ལ་སོང་ནས་བརྟག་དཔྱད་བྱེད་དགོས།
གསུམ། གཅིན་པ་སེར་རྐྱང་ཆགས་པ།མཆིན་པར་ནད་ཕོག་རྗེས་མཁྲིས་པའི་གཤེར་ཁུ་ཁྲག་རྒྱུན་ནང་འདྲེས་པ་དང་དེ་ནས་མཁལ་མ་བརྒྱུད་ནས་ཕྱིར་གཤོང་གིན་ཡོད། དེའི་ནད་རྟགས་སུ་གཅིན་པའི་ཚོས་གཞི་སེར་པོ་ཆགས་པའམ་ཇ་ཁུ་ལྟར་གར་པོར་འགྱུར་གྱིན་ཡོད།
