མཚོ་སྔོན་ཞིང་ཆེན་མི་དམངས་སྲིད་གཞུང་དྲ་བ།
ཟླ4པའི་ཚེས1ཉིན། “མཚོ་སྔོན་གྱི་དཔྱིད་ཀ་སླེབས་པ་སྔ་ཞིང་། གནས་མཆོག་གཅན་ཚས་ཁྱེད་རང་ཕེབས་པར་དགའ་བསུ་ཞུ”ཞེས་པ་བརྗོད་དོན་ཡིན་པའི2025ལོའི་གཅན་ཚ་རྫོང་གི་དཔྱིད་དུས་ཡུལ་སྐོར་གྱི་མུ་འབྲེལ་བྱ་འགུལ་རྨ་ལྷོ་བོད་རིགས་རང་སྐྱོང་ཁུལ་གཅན་ཚ་རྫོང་སྣང་ར་ཞང་བདེ་སྐྱིད་སྡེ་བ་ནས་སྤེལ་མགོ་བརྩམས།
བྱ་འགུལ་ཡུལ་དངོས་སུ་གླུ་དང་ཞབས་བྲོ། ཤོམ་འགྲོ་འཁྲབ་སྟོན་གྱི་བྱ་འགུལ་སྤེལ་བ་དང་། ཤོམ་པ་ཚོས་མི་རིགས་ཀྱི་ཁྱད་ཆོས་ལྡན་པའི་གྱོན་ཆས་གྱོན་ནས་གར་སྟེགས་ཐོག་ཉམས་འགྱུར་མངོན་པའི་དུས་མཚུངས་སུ། གཅན་ཚ་རྫོང་གི་ཞིང་ཕྱུགས་ཁྱད་ལྡན་ཐོན་རྫས་དང་གཟུགས་འདས་ཤུལ་བཞག་རིག་གནས་ཐོན་རྫས། ཁྱད་ལྡན་ཟས་རིགས་འགྲེམ་ཚོང་ཁུལ་བཅས་སུ་མང་ཚོགས་ཀྱིས་ཟས་མཆོག་ལ་བྲོ་བ་མྱོང་བ་དང་། ཞོར་དུ་རིག་གནས་གསར་གཏོད་ཀྱི་ཐོན་རྫས་བདམས་ནས་ཡུལ་དངོས་སུ་མི་ཚོགས་ཀྱིས་ཁེངས་འདུག གྲུ་ཁ་ཐང་ཆེན་དང་མདའ་འཕེན་ར་བར་སྐོར་བྲོ་འཁྲབ་སྟོན་དང་མདའ་འཕེན་ཉམས་ལེན་བྱ་འགུལ་དུས་མཉམ་དུ་སྤེལ་ཞིང་། ཡུལ་སྐོར་པ་རྣམས་དེའི་ནང་དགའ་སྤྲོའི་ངང་ཞུགས་ནས་དམངས་སྲོལ་རིག་གནས་ཀྱི་ཐུན་མོང་མ་ཡིན་པའི་མཛེས་སྡུག་ཉམས་སུ་མྱངས།
སྔར་ལས་ལྷག་པར་ཕྱི་ཕྱོགས་ལ་གཅན་ཚའི་ཡུལ་སྐོར་དྲིལ་སྒྲོག་བྱ་ཆེད། བྱ་འགུལ་སྟེང་སྨྱན་སྦྱོར་སྡེ་ཁག་རྩ་འཛུགས་བྱས་ཏེ་གནས་སྐོར་ལམ་ཐུག་འཚོལ་བ་དང་། སྨྱན་སྦྱོར་སྡེ་ཁག་དག་སྔ་གཞུག་ཏུ་དཔའ་ལུང་རྫོང་གི་ཨན་ཏ་ཆི་མེ་ཏོག་གི་ཞིང་ཁམས་དང་ཀ་དག་གཞིས་ཀ བོད་ཁྱིམ་གསོལ་མགྲོན་གླིང་། ཁམས་རའི་རྒྱལ་སྤྱིའི་མགྲོན་ཁང་། ཁམས་རའི་མཛེས་ལྗོངས་ཁུལ་སོགས་སུ་བསྐྱོད་དེ་ཡུལ་དངོས་སུ་ཉམས་ལེན་བྱས། ལམ་བར་དུ་སྨྱན་སྦྱོར་གསར་འགོད་པ་ཚོས་པར་རིས་དང་ཡི་གེ བརྙན་ཐུང་སོགས་ལ་བརྟེན་ནས་གཅན་ཚའི་དཔྱིད་དུས་ཡུལ་སྐོར་གྱི་ཐུན་མོང་མ་ཡིན་པའི་ཡུལ་ལྗོངས་ཐོ་འགོད་བྱས་ཏེ། ས་གནས་ཀྱི་ཡུལ་སྐོར་ཐོན་ཁུངས་གསར་སྤེལ་དང་འཛུགས་སྐྲུན་གནས་ཚུལ་ལ་རྒྱུས་ལོན་ཟབ་མོ་བྱས།
གཅན་ཚ་རྫོང་གིས་ཐེངས་འདིའི་དཔྱིད་དུས་ཀྱི་ཡུལ་སྐོར་བྱ་འགུལ་སྤེལ་བའི་མཛད་སྒོ་རྒྱལ་ཁའི་ངང་སྤེལ་བ་བརྒྱུད། ས་གནས་དེ་གའི་ཡུལ་སྐོར་ཐོན་རྫས་མཁོ་སྤྲོད་ཕུན་སུམ་ཇེ་ཚོགས་སུ་སོང་བ་མ་ཟད། གཅན་ཚ་རྫོང་གི་མཚན་སྙན་གྲགས་ཇེ་ཆེར་སོང་བ་དང་། གཅན་ཚ་རྫོང་གི་ཡུལ་སྐོར་ཁྲོམ་ར་ལ་གསོན་ཤུགས་གསར་པ་བསྣན་ནས་ས་གནས་དེ་གའི་ཡུལ་སྐོར་ལས་རིགས་ཀྱི་སྤུས་ཚད་མཐོ་བའི་འཕེལ་རྒྱས་ལ་རྨང་གཞི་བརྟན་པོ་བཏིང་།
གཅན་ཚ་རྫོང་གིས་མུ་མཐུད་དུ“རྨ་ཆུའི་སྐྱེ་ཁམས་རིག་གནས་ཡུལ་སྐོར་མཉམ་འདྲེས་འཕེལ་རྒྱས་དཔེ་སྟོན་ཁུལ”དང“མཚོ་སྔོན་ལྷོ་རྒྱུད་སྐྱེ་ཁམས་རིག་གནས་ཡུལ་སྐོར་སྤུས་ཚད་མཐོ་བའི་འཕེལ་རྒྱས་ཚོད་ལྟ་ཁུལ”བསྐྲུན་པའི་དམིགས་འབེན་མུ་མཐུད་དུ་གཏན་འཁེལ་བྱས་ཤིང་། ཞིང་ཆེན་ཡོངས་ཀྱི“ལྟེ་གཅིག་གདུབ་གཅིག་རྒྱུད་མང”གི་ཡུལ་སྐོར་འཕེལ་རྒྱས་ཀྱི་རྣམ་པ་དང་རང་འགུལ་ངང་མཉམ་འདྲེས་བྱེད་པ་དང་། ཁྱད་ཆོས་དམ་འཛིན་དང་ལེགས་ཆ་དར་སྤེལ་བཏང་ཞིང་། “གནས་མཆོག་གཅན་ཚའི”རིག་གནས་ཀྱི་ནང་སྙིང་དང་མིང་རྟགས་རིན་ཐང་མཐོར་འདེགས་སུ་བཏང་སྟེ།“རྨ་ཆུའི་ཡུལ་སྲོལ་ཡུལ་སྐོར་དང་མཐོ་སྒང་ལུས་གསོ་ཡུལ་སྐོར། ཞིང་སྡེའི་ཉམས་ལེན་ཡུལ་སྐོར། རིག་གནས་བསྡུ་ལེན་ཡུལ་སྐོར། སྐྱེ་ཁམས་ལྟ་སྐོར་ཡུལ་སྐོར་བཅས་གཞི་གཅིག་ཏུ་འདྲེས་པའི་རྨ་ཆུའི་སྐྱེ་ཁམས་རིག་གནས་ཡུལ་སྐོར་གྱི་སྤུས་ཚད་མཐོ་བའི་འཕེལ་རྒྱས་ཀྱི་འཕེལ་ཕྱོགས་འཚོལ་ཞིབ་ཐད་སྐུལ་འདེད་གཏོང་རྒྱུ་རེད། །
