མཚོ་སྔོན་ཞིང་ཆེན་མི་དམངས་སྲིད་གཞུང་དྲ་བ།
མཚོ་སྔོན་གསར་འགྱུར་དྲ་བའི་འཕྲིན། ཟླ11ཚེས26ཉིན། ཞིང་ཆེན་རིག་གནས་དང་ཡུལ་སྐོར་ཐིང་གིས་གཙོ་སྒྲུབ་དང་། ཞིང་ཆེན་རིག་གནས་ཡུལ་སྐོར་ཐོན་རྫས་གསར་གཏོད་ཇུས་འགོད་མཐུན་ཚོགས། ཞིང་ཆེན་དངོས་མང་བཤམས་སྟོན་ཁང་མནའ་འབྲེལ་གཉིས་ཀྱིས་སྒྲུབ་འགན་ཁུར་བའི2024ལོའི་ཞིང་ཆེན་རིག་གནས་གསར་གཏོད་དང་ཡུལ་སྐོར་ཐོན་རྫས་འགྲན་སྡུར་ཆེན་པོ་ཟི་ལིང་ཅི་ཧི་དཔེ་ཁང་དུ་བསྡུས་པ་དང་། བཟོ་རྩལ་དང་མཚོན་སྟངས་ཉམས་དགའ་བའི་རིག་གནས་གསར་གཏོད་དང་ཡུལ་སྐོར་གྱི་ཐོན་རྫས་སྣ423ཀུན་གྱི་མིག་མདུན་དུ་བཤམས།
ཐེངས་དེའི་འགྲན་སྡུར་ནི2024ལོ་ནས2025ལོའི་བར་མཚོ་སྔོན་ཞིང་ཆེན་གྱི་དགུན་དཔྱིད་དུས་ཚིགས་ཀྱི་ཡུལ་སྐོར་དམངས་ཕན་གྱི་མུ་འབྲེལ་བྱེད་སྒོ་ཉག་ཅིག་ཡིན། འགྲན་སྡུར་གྱིས་བརྗོད་བྱང་ལ“རིག་གནས་གསར་གཏོད་བྱེད། འཚོ་བར་འོད་སྣང་སྦྱིན”ཞེས་པ་བཀོད་དེ། རིག་གནས་གསར་གཏོད་ཀྱི་ཐོན་རྫས་དང་ཡུལ་སྐོར་ཚོང་རྫས་ཀྱི་རིག་གནས་རང་བཞིན་དང་། གསར་གཏོད་རང་བཞིན། བཟོ་རྩལ་རང་བཞིན། བཀོལ་སྤྱོད་རང་བཞིན། ཁྲོམ་ར་རང་བཞིན། དཔེ་སྟོན་རང་བཞིན་སོགས་ཁྱད་ཆོས་གཟེངས་སུ་བཏོད་པ་དང་། ཞིང་ཆེན་ཕྱི་ནང་གི་ཁེ་ལས་དང་ལས་ཁུས། སྤྱི་གཞུང་རིག་གནས་ལས་ཁུངས། ལྗོངས་ཁུལ། སློབ་ཆེན་སོགས150འགྲན་སྡུར་ལ་ཞུགས།
བྱེད་སྒོ་ཡུལ་དངོས་སུ། རིག་གནས་གསར་གཏོད་ཀྱི་ཐོན་རྫས་དང་ཡུལ་སྐོར་ཚོང་རྫས་སྣ423བཤམས་ཤིང་། ཐོན་རྫས་དེ་དག་ཏུ་མཚོ་སྔོན་གྱི་སྐྱེ་ཁམས་རིག་གནས་དང་། ལོ་རྒྱུས་རིག་གནས། གསར་བརྗེ་རིག་གནས། མི་རིགས་རིག་གནས། དེ་མིན་ཁྱད་ཆོས་ལྡན་པའི་མཐོ་སྒང་གི་རིག་གནས་སོགས་འདུ་བས། སྲོལ་རྒྱུན་རིག་གནས་དང་དེང་རབས་གསར་གཏོད་གཉིས་ཟུང་འབྲེལ་ལེགས་པོ་བྱས་ཡོད།
ཞིང་ཆེན་རིག་གནས་དང་ཡུལ་སྐོར་ཐིང་གི་འབྲེལ་ཡོད་འགན་འཁུར་བས་འདི་སྐད། ཉེ་བའི་ལོ་རིང་ལ། རང་ཞིང་གིས་མཚོ་སྔོན་གྱི་ཐུན་མོང་མ་ཡིན་པའི་རང་བྱུང་སྐྱེ་ཁམས་དང་། མི་ཆོས་ལོ་རྒྱུས་ཀྱི་ཐོན་ཁུངས་སྔོག་འདོན་བེད་སྤྱོད་བྱས་ཏེ། ས་ཁོངས་ཅན་དང་ཁྱད་ཆོས་ཅན། ཁྲོམ་ར་ཅན་གྱི་རིག་གནས་གསར་གཏོད་ཐོན་རྫས་དང་ཡུལ་སྐོར་ཚོང་རྫས་བཏོན་ནས་ཞིང་ཆེན་ཡོངས་ཀྱི་རིག་གནས་ཡུལ་སྐོར་གྱི་གསར་གཏོད་ཐོན་ལས་སྤུས་ལེགས་པའི་སྒོ་ནས་གོང་དུ་འཕེལ་བར་སྐུལ་འདེད་བཏང་།
2024ལོར་ཞིང་ཆེན་རིག་གནས་གསར་གཏོད་ཐོན་རྫས་དང་ཡུལ་སྐོར་ཚོང་རྫས་འགྲན་སྡུར་ནི་ཟླ9བ་ནས་བཟུང་མགོ་བརྩམས་པ་ཡིན་ལ། སྨྱན་བྱེད་དྲིལ་སྒྲོག་དང་། བརྩམས་ཆོས་འཚོལ་སྡུད། འགྲན་ཞུགས་བརྩམས་ཆོས་དཔྱད་འདེམས། ཡུལ་དངོས་དཔྱད་ཞིབ་ལ་སོགས་ཐབས་ལམ་བརྒྱུད་མཐར། གསེར་གྱི་རྟགས་མ5དང་། དངུལ་གྱི་རྟགས་མ10། ཟངས་ཀྱི་རྟགས་མ15། ཕུལ་བྱུང་བྱ་དགའ20བཅས་བདམས། འགྲན་སྡུར་དེས་མཚོ་སྔོན་གྱི་རིག་གནས་ཡུལ་སྐོར་ཐོན་ཁུངས་སྔོག་འདོན་དང་། རིག་གནས་གསར་གཏོད་ཐོན་རྫས་དང་ཡུལ་སྐོར་ཚོང་རྫས་ཀྱི་རིག་གནས་སྤུས་ཀ་མཐོར་འདེགས་སུ་བཏང་སྟེ། སྤུས་ལེགས་ཐོན་རྫས་ཕུན་སུམ་ཚོགས་ལ་འཛད་སྤྱོད་པའི་འཛད་སྤྱོད་ཀྱི་མི་མངོན་ནུས་ཤུགས་ཕྱིར་འདོན་ཐད་མཚོ་སྔོན་གྱི་ཁྱད་ཆོས་ལྡན་པའི་ཡུལ་སྐོར་དང་རིག་གནས་ཀྱི་ཐོན་རྫས་སྔར་ལས་མང་པོ་ཞིག་བཏོན་པ་དང་། ཡུལ་སྐོར་བའི་དགོས་མཁོ་དང་། རིག་གནས་ཡུལ་སྐོར་གྱི་འཛད་སྤྱོད་རྒྱ་སྐྱེད་བཅས་ཐད་ལ་ནུས་པ་ཆེན་པོ་བཏོན།
ཞིང་ཆེན་རིག་གནས་དང་ཡུལ་སྐོར་ཐིང་གིས་ཐོག་མར་བྱ་དགའ་ཐོབ་མཁན་གྱི་ཐོན་རྫས་རྣམས་ལྗོངས་ཁུལ་དང་རིག་གནས་ཡུལ་སྐོར་བྱེད་ས། ཁྲོམ་ར་ཆེན་པོ་བཅས་སུ་འོས་སྦྱོར་བྱ་རྒྱུ་མ་ཟད། ཀྲུང་གོའི་ཁྱད་ལྡན་ཡུལ་སྐོར་ཚོང་རྫས་འགྲན་སྡུར་ཆེན་མོ་དང་ཧྲེན་ཀྲེན་དངོས་མང་བཤམས་སྟོན་ཚོགས་ཆེན་སོགས་འགྲན་སྡུར་དང་འགྲེམ་སྟོན་དུ་ཞུགས་ཏེ། ཁྲོམ་རའི་སྦས་ཤུགས་ཅུང་ཆེ་བའི་བྱ་དགའ་ཐོབ་པའི་ཐོན་རྫས་དག་གི་ཕྱི་ཐུམ་དང་དེའི་ཇུས་འགོད། བཅོས་སྒྱུར། འགྲེམ་སྟོན་ཁྱབ་གདལ་ལ་སོགས་ཕྱོགས་ལ་དགོས་ངེས་ཀྱི་ཐོན་ལས་ཅན་གྱིས་རོགས་སྐྱོར་བྱ་འཆར་ཡོད་དོ། །
