རྒན་གསོའི་ཞབས་ཞུའི་མ་ལག་འཛུགས་སྐྲུན་ལ་སྐུལ་འདེད་བཏང་།

ཟླ11ཚེས1ཉིན་གྱི་ཕྱི་དྲོ། གསར་འགོད་པ་མཚོ་བྱང་བོད་རིགས་རང་སྐྱོང་ཁུལ་ཧེ་ཡན་ རྫོང་གི་ས་ཁོངས་རང་བཞིན་གྱི་རྒན་གསོའི་ཞབས་ཞུའི་ལྟེ་གནས་སུ་བསྐྱོད་པ་ན།  དེ་རུ་ངལ་གསོ་ཁང་དང་། རོལ་རྩེད་ཁང་། ལུས་སྦྱོང་ཁང་། ཟ་ཁང་བཅས་ཚང་མ་འཛོམས་ཡོད་པས།  རྒན་པ་རྣམས་ཀྱིས་དགའ་དགའ་སྐྱིད་སྐྱིད་ངང་དྲོས་ཇ་འཐུང་བཞིན་ཡོད་པ་མཐོང་།

ཉེ་བའི་ལོ་ཤས་རིང་། མཚོ་བྱང་ཁུལ་གྱིས་རྒན་གསོའི་ཞབས་ཞུའི་སྤུས་ཚད་མཐོ་བའི་འཕེལ་རྒྱས་ལ་སྐུལ་འདེད་བཏང་བ་དང་།  མང་ཚོགས་ཀྱི་རྒན་གསོའི་ཞབས་ཞུའི་དགོས་མཁོ་རྒྱུན་ཆད་མེད་པར་བསྐངས་ནས།  རྒན་པ་རྣམས་ཀྱི་སྐྱིད་སྣང་དང་བློ་ཡིད་ཚིམ་ཚད་ཆེ་རུ་ཕྱིན་ཡོད།  རྒན་གསོའི་སྒྲིག་གཞི་དང་གྲོང་ཁྱེར་དང་གྲོང་རྡལ་གྱི་ཉིན་མོའི་བདག་སྐྱོང་ལྟེ་གནས། སྡེ་བ་རིམ་པའི་རོགས་རེས་བདེ་སྐྱིད་ཁང་སོགས་རྒན་གསོའི་ཞབས་ཞུའི་སྒྲིག་གཞི52བཙུགས་ནས། རྒན་གསོའི་སྒྲིག་གཞི་རིམ་བཞིན་རྫོང་བཞི་ལ་ཁེབས་པར་བྱས་ཤིང་།  སྡེ་ཁུལ་གྱི་རྒན་གསོའི་ཞབས་ཞུའི་སྒྲིག་བཀོད་ཁེབས་ཚད་བརྒྱ་ཆའི70ལ་སླེབས་པ་དང་།  ཡུལ་ཚོ་དང་གྲོང་རྡལ་གྱི་རྒན་གསོའི་ཞབས་ཞུའི་སྒྲིག་བཀོད་ཁེབས་ཚད་བརྒྱ་ཆའི50ལ་སླེབས་པ། རྒན་གསོའི་བདག་སྐྱོང་ཅན་གྱི་ཉལ་ཁྲི་ཁེབས་ཚད་བརྒྱ་ཆའི60ལ་སླེབས་པ་བཅས་ཀྱི་རིམ་པ་བཞིའི་རྒན་གསོའི་ཞབས་ཞུའི་སྒྲིག་བཀོད་དྲ་མིག་ཅན་དུ་འཛུགས་སྐྲུན་བྱེད་པའི་རྣམ་པ་གྲུབ་ནས། རོང་འབྲོག་ཁུལ་གྱི་རྒན་གསོའི་ཞབས་ཞུའི་སྒྲིག་བཀོད་མཁོ་འདོན་གྱི་དགོས་མཁོ་བསྐངས་ཡོད།

མཚོ་བྱང་ཁུལ་གྱིས་ད་དུང་རྒན་པ་རྣམས་ཀྱི་སྡོད་གནས་ཁྱབ་ཚུལ་གྱི་ཁྱད་ཆོས་དང་ཟུང་འབྲེལ་བྱས་ཏེ། “སྐར་མ་བཅོ་ལྔའི”ཞབས་ཞུའི་ཁྱབ་ཁོངས་འཛུགས་སྐྲུན་གྱི་འདུ་ཤེས་བརྩི་སྲུང་བྱས་ནས།  དེ་སྔའི་བཟའ་བཏུང་ཞབས་ཞུ་བྱེད་ས45ཡི་རྨང་གཞིའི་ཐོག བཟའ་བཏུང་ཞབས་ཞུ་བྱེད་ས77ཇེ་མང་དུ་བཏང་བ་དང་།  ཆ་རྐྱེན་འཛོམས་པའི་གྲོང་གསེབ་ཀྱི་ས་ཁོངས་ཚང་མར་ཁྱབ་པ་མངོན་འགྱུར་བྱས།  རྒན་གསོའི་ཞབས་ཞུའི་ཁྲོམ་ར་ཕྱོགས་ཡོངས་ནས་སྒོ་ཕྱེ་སྟེ་གྲོང་ཁྱེར་དང་གྲོང་གསེབ་ཀྱི་དཀའ་ངལ་ཡོད་པའི་རྒན་པ་རྣམས་ཀྱི་དགོས་མཁོ་དང་སྦྲེལ་མཐུད་ལེགས་པོ་བྱེད་པ་དང་།  དྲ་སྦྲེལ་དང་ཁྱིམ་སྡོད་རྒན་གསོའི་ཞབས་ཞུའི་རྣམ་པ་ལག་བསྟར་བྱེད་པ། རིམ་པ་བཞི་ལ་ཁྱབ་པའི་རྒན་གསོའི་ཞབས་ཞུའི་དོ་དམ་མ་ལག་འཛུགས་པ། རྫོང་རིམ་པའི་སྨན་ཁང་དང་ཡུལ་ཚོ་འཕྲོད་བསྟེན་ཁང་སོགས་ཀྱི་ཐོན་ཁུངས་བེད་སྤྱོད་གང་ལེགས་བྱེད་པ། སྨན་བཅོས་ཞབས་ཞུའི་གྲོས་མཐུན་འཇོག་པ་བཅས་བྱས་ཏེ།   སྨན་བཅོས་བདག་སྐྱོང་གི“མཐའ་མའི་འགག་གནད” ཐག་གཅོད་བྱས།

རྒྱུས་ལོན་པ་ལྟར་ན། ད་ལོའི་ཟླ10པར་མཚོ་བྱང་ཁུལ་མཚོ་སྔོན་ཞིང་ཆེན་གྱིས“རྒན་གསོའི་མཐའ་སྐྱོང་འགན་སྲུང་དང་། ཀུན་ཕན་རང་བཞིན་གྱི་རྒན་གསོའི་ཞབས་ཞུ་འཕེལ་རྒྱས། སྡེ་ཁུལ་གྱི་ཁྱིམ་སྡོད་རྒན་གསོའི་ཞབས་ཞུའི་དྲ་བ་འཐུས་ཚང་དུ་གཏོང་བ་སོགས་བྱ་བའི་ཕན་འབྲས་འབུར་ཐོན་ཡིན་པའི་ས་ཁུལ”ལ་བདམས་པ་དང་། ད་ལོར་དམངས་སྲིད་པུའུ་དང་ནོར་སྲིད་པུའུ་གཞུང་སྒྲུབ་ཐིན་གྱིས2022ལོའི་ཁྱིམ་སྡོད་དང་སྡེ་ཁུལ་གྱི་གཞི་རྩའི་རྒན་གསོའི་ཞབས་ཞུ་མཐོར་གཏོང་བྱ་སྤྱོད་ལས་གཞིའི་གྲུབ་འབྲས་ཞིབ་བཤེར་རྩིས་ལེན་བྱས་འབྲས་ཁྱབ་བསྒྲགས་བྱས་པའི་ཁྲོད་མཚོ་བྱང་ཁུལ་ལ་རྒྱལ་ཡོངས་ཀྱི“ཕུལ་བྱུང་ས་ཁུལ”གྱི་མཚན་སྙན་ཐོབ།