སྨུག་སྤྲིན་ཀློང་གི་ཀན་ལྷོའི་བཙན་པ་གྲོང་ཚོའི་མཛེས་ལྗོངས།

 ཤིན་ཧྭ་གསར་འགྱུར་ཁང་ལན་ཀྲོའུ་ནས་ཟླ་5ཚེས་9ཉིན་གློག་འཕྲིན་འབྱོར་གསལ། བྲག་སྒམ་ནག་མཛེས་ལྗོངས་ཁུལ་གྱི་ལམ་བུ་བརྒྱུད་དེ་ཤར་རེར་མདུན་དུ་སྐྱོད་ཚེ། ལམ་གྱི་གཞོགས་གཅིག་ནི་སྲོལ་རྒྱུན་གྱི་བོད་ལུགས་གྲོང་ཚོ་དང་གཞོགས་གཞན་ཞིག་ནི་སྨུག་སྤྲིན་ཀློང་གི་སྔོ་ལྗང་གི་རི་བོ་རེད། རབ་རིབ་ཀྱི་ཁྲོད་དུ་རི་རྩེར་རྒྱང་ལྟ་བྱས་ཚེ། གངས་དཀར་གྱི་དབུ་རྩེ་བན་བུན་ཞིག་མཐོང་ཐུབ།ས་བབ་མཐོ་ཤོས་དེར་སླེབས་སྐབས་ཀན་སུའུ་ཞིང་ཆེན་ཀན་ལྷོ་བོད་རིགས་རང་སྐྱོང་ཀྲོའུ་ཐེ་བོ་རྫོང་གཡི་བ་གྲོང་རྡལ་བྲག་སྒམ་ནག་གྲོང་ཚོའི་ཁོངས་གཏོགས་ཀྱི་རང་བྱུང་གྲོང་ཚོ་བཙན་པ་གྲོང་ཚོར་འབྱོར་གྱི་ཡོད། སྨུག་སྤྲིན་ཀློང་དུ་བསྐྲུན་པ་དང་གཉིས་སུ་མ་མཆིས་པའི་བཙན་པ་གྲོང་ཚོའི་རྡོ་རྗེ་དོན་གྲུབ་ཀྱིས་མིང་ལ“དགའ་འཛོམས་འགྲུལ་ཁང”ཞེས་པའི་དམངས་སྲོལ་གནས་ཚང་ཞིག་གཉེར་སྐྱོང་བྱེད་བཞིན་ཡོད།“
  ‘ལྔ་གཅིག’གུང་གསེང་རིང་ཁང་མིག་20ཚང་མར་འགྲུལ་པས་ཁེངས་སོང”ཞེས་རྡོ་རྗེ་དོན་གྲུབ་ཀྱིས་བཤད།བྲག་སྒམ་ནག་གྲོང་ཚོ་དེའི་མཐའ་བཞི་རི་ཡིས་བསྐོར་བ་དང་གྲོང་ཚོ་ཡོངས་ཚང་ཚིང་ནགས་ཀྱིས་བཏུམས་ཁར། བོད་རིགས་ཀྱི་ཐུན་མིན་ཡུལ་སྲོལ་གོམས་གཤིས་ཀྱིས་མི་ཚོགས་མང་པོའི་ཡིད་དབང་བཀུག་པས་རིག་གནས་དང་ཡུལ་སྐོར་ཐོན་ལས་ཀྱིས་ཀྱང་གྲོང་ཚོ་ཆུང་ཆུང་དེར་གོ་སྐབས་མང་པོ་རག་པ་དང་འགྱུར་ལྡོག་ཆེན་པོ་བྱུང་ཡོད།རྡོ་རྗེ་དོན་གྲུབ་ཀྱིས། དེ་སྔ་བཙན་པ་གྲོང་ཚོ་འདི་ཉིད་བྲག་སྒམ་ནག་མཛེས་ལྗོངས་ཁུལ་གྱི་ཆེས་སྦུག་ཤོས་སུ་གནས་པས། རིག་གནས་དང་ཡུལ་སྐོར་འཕེལ་རྒྱས་དེ་མཛེས་ལྗོངས་ཁུལ་གྱི་གྲོང་ཚོ་གཞན་དག་ཁ་ཤས་ལས་སྐྱོ་བ་ཡོད་མོད། འོན་ཀྱང་ལོ་གཉིས་རིང་སྲིད་གཞུང་གི་སྐུལ་འདེད་ཤུགས་ཆེན་འོག་རིག་གནས་དང་ཡུལ་སྐོར་ལས་རིགས་སྔར་ལས་ལྷག་པའི་དར་རྒྱས་ཆེན་པོ་བྱུང་ཞིང་། གྲོང་ཚོའི་དམངས་སྲོལ་གནས་ཚང་དང་། རྒྱ་ཁོག་ཟ་ཁང་། ཚོང་ཁང་ཆུང་ཆུང་སོགས་རིམ་གྱིས་བཙུགས་པ་མ་ཟད། ད་དུང་ཡུལ་སྐོར་སྣེ་ལེན་ལྟེ་གནས་གསར་རྐྱང་ཞིག་ཀྱང་བཙུགས་ཡོད་ཅེས་བཤད།
     རྡོ་རྗེ་དོན་གྲུབ་ཀྱིས་ལོ་བཅུའི་གོང་ནས་དམངས་སྲོལ་གནས་ཚང་གཉེར་སྐྱོང་བྱེད་ཀྱི་ཡོད། “ངའི་འདིར་ཡོང་མཁན་འགྲུལ་པ་མང་པོ་ཡོད། ང་ཚོས་ཀྱང་ཡུལ་སྐོར་བའི་དགོས་མཁོར་གཞིགས་ནས་ཞབས་ཞུ་རྒྱུན་ཆད་མེད་པར་ལེགས་སུ་གཏོང་གི་ཡོད། འགྲུལ་ཁང་ལ་སྐུད་མེད་དྲ་རྒྱ་དང་འཁྲུད་ཁང་ཁེར་རྐྱང་བཟོས་ཡོད་པས་གསོལ་མགྲོན་ཁང་ཆེ་གྲས་དང་ཁྱད་པར་གང་ཡང་མེད”ཅེས་བཤད། ཡུལ་སྐོར་བའི་གྲངས་འབོར་རྒྱུན་ཆད་མེད་པར་མང་དུ་ཕྱིན་པ་དེས་མ་རྩ་འཇོག་མཁན་གྱི་ཡིད་དབང་བཀུག་ཡོད།     རྡོ་རྗེ་དོན་གྲུབ་ཀྱི་དམངས་སྲོལ་གནས་ཚང་ནས་མུ་མཐུད་ཕུ་རུ་བསྐྱོད་ཚེ། “སྤྲིན་གསེབ་གུར་གྱི་མགྲོན་ཁང”ཞེས་པ་ཞིག་ཡོད་པ་དང་། གུར་ཕུབ་པ་དང་འདྲ་བའི་ཁང་པ་རེ་རེ་རིའི་མདུན་དུ་གྲལ་སྟར་འགྲིག་པོས་བསྐྲུན་ཡོད།ཨར་ཁང་གི་འགན་འཁུར་བ་ཨོ་རྒྱན་གྱིས། མགྲོན་ཁང་དེ་ནི་ས་གནས་དེ་གའི་སྲིད་གཞུང་གིས་ཚོང་འགུགས་མ་འདྲེན་བྱས་པ་བརྒྱུད། ནང་འདྲེན་བྱས་པའི་རིག་གནས་དང་ཡུལ་སྐོར་གྱི་རྣམ་གྲངས་ཤིག་ཡིན་པ་དང་། 2023ལོའི་ཟླ་5པར་གཉེར་སྐྱོང་བྱེད་འགོ་ཚུགས་པ་དང་མིག་སྔར་ཁྱོན་ཁང་མིག་31ཡོད་པ་མ་ཟད། ད་དུང་བཟའ་བཏུང་ཞབས་ཞུ་ཡང་མཁོ་འདོན་བྱེད་ཀྱི་ཡོད་པས“ལྔ་གཅིག”གུང་གསེང་རིང་དེ་གར་ཁང་པ་གཅིག་ཀྱང་སྟོང་པར་ལུས་མེད་ཅེས་ངོ་སྤྲོད་བྱས།

“བྲག་སྒམ་ནག་ལ་ཡུལ་ལྗོངས་མཛེས་པོ་ཡོད་ལ་ཡུལ་སྲོལ་གོམས་གཤིས་ཀྱང་ཟབ་མོ་ལྡན་པས། ང་ཚོའི་ཨར་ཁང་གི་ཐུན་མོང་མ་ཡིན་པའི་ཞག་སྡོད་ཁོར་ཡུག་གིས་སྐུ་མགྲོན་མང་པོའི་ཡིད་དབང་འཕྲོག་པ་མ་ཟད། ད་ཆ་དྲ་ཐོག་མིང་ཅན་གྱི་གནས་ཤིག་ཏུའང་གྱུར་ཡོད”ཅེས་ཨོ་རྒྱན་གྱིས་བཤད།     ཨོ་རྒྱན་གྱིས། ཨར་ཁང་གི་ལས་མི་སྤྱིར་ན་ཉེ་འགྲམ་གྲོང་ཚོའི་མི་ཡིན་པ་དང་། ལས་མི་མང་པོ་ཞིག་ཕ་ཡུལ་དུ་ལོག་པའི་གཞོན་ནུ་རེད། འོན་ཀྱང་ཨར་ཁང་མུ་མཐུད་འཛུགས་སྐྲུན་བྱེད་བཞིན་ཡོད་པས་སླད་ཕྱིན་གཞི་ཁྱོན་སྔར་བས་ཆེ་རུ་འགྲོ་ངེས་རེད་ཅེས་བཤད།བྲག་སྒམ་ནག་གྲོང་ཚོའི་ཏང་ཀྲི་པུའི་ཧྲུའུ་ཅི་དཔལ་ལྡན་གྱིས་ངོ་སྤྲོད་བྱས་པར། “ལྔ་གཅིག”གུང་གསེང་རིང་བྲག་སྒམ་ནག་མཛེས་ལྗོངས་ཁུལ་གྱིས་ཁྱོན་ཡུལ་སྐོར་བ་མི་ཐེངས་ཁྲི་5.4ལ་སྣེ་ལེན་ཞུས་པར་ཕྱོགས་བསྡུས་ཡོང་འབབ་སྒོར་ཁྲི་1613.75བྱུང་ཡོད། 
       2023ལོར་བྲག་སྒམ་གྲོང་ཚོས་ཡུལ་སྐོར་བ་ཁྱོན་ཁྲི་178ལ་སྣེ་ལེན་ཞུས་པ་དང་མང་ཚོགས་མི་རེའི་ཆ་སྙོམས་བཀོལ་སྤྱོད་ཆོག་པའི་ཡོང་འབབ་སྒོར་ཁྲི་10ཟིན་ཡོད།དཔལ་ལྡན་གྱིས“བཙན་པ་གྲོང་ཚོར་ཁྱོན་དུད་ཁྱིམ་40ཡོད་པ་དང་། ད་ཆ་དུད་ཁྱིམ་ཚང་མས་རིག་གནས་དང་ཡུལ་སྐོར་ལས་གཉེར་བྱེད་ཀྱི་ཡོད། ཉེ་བའི་ལོ་ཤས་རིང་ས་གནས་དེ་གས་རིག་གནས་དང་ཡུལ་སྐོར་ཐོན་ལས་འཕེལ་རྒྱས་ཤུགས་ཆེན་བཏང་ནས་རྨང་གཞིའི་སྒྲིག་བཀོད་ཀྱི་ལེ་ལག་ལེགས་སུ་བཏང་བ་དང་ཆབས་ཅིག་ས་གནས་དེ་གའི་གྲོང་ཚོའི་གདོད་མའི་རྣམ་པ་སྲུང་སྐྱོང་བྱ་རྒྱུར་ཤུགས་སྣོན་བརྒྱབ་པས་ཡུལ་སྐོར་བས་ཡུལ་སྐོར་ཞབས་ཞུ་འཐུས་ཚང་ལོངས་སུ་སྤྱོད་ཐུབ་པ་མ་ཟད། བོད་རིགས་ཀྱི་ཡུལ་སྲོལ་གོམས་གཤིས་ཀྱང་ཉམས་སུ་མྱོང་ཐུབ་པ་བྱུང་ཡོད། རིག་གནས་དང་ཡུལ་སྐོར་ཐོན་ལས་འཕེལ་རྒྱས་ཕྱིན་པ་དེས་གྲོང་ཚོའི་རྣམ་པ་མཛེས་སུ་དང་མང་ཚོགས་ཀྱི་འཚོ་བའི་ཆུ་ཚད་མཐོ་རུ་ཕྱིན་པའི་ཁར་གྲོང་མི་ཚང་མའི་བྱང་ཚད་ཀྱང་ཧ་ཅང་ལེགས་སུ་ཕྱིན་ཡོད”ཅེས་བཤད།ང་ཚོ་དེ་ནས་ཁ་བྲལ་སྐབས་ཆར་པ་ཆད་ནས་ནམ་མཁའ་གཡའ་དག་པ་དང་། ཡུལ་སྐོར་བ་མི་ཉུང་བ་ཞིག་གིས་མགྲོན་ཁང་གི་སྒེའུ་ཁུང་མདུན་དུ་བྲག་སྒམ་ནག་གི་དམིགས་བསལ་གྱི་མཛེས་ལྗོངས་ལ་རོལ་མྱོང་བྱེད་བཞིན་མཆིས། རི་རྩེའི་སྨུག་སྤྲིན་རིམ་གྱིས་ཡལ་ནས་ཡུལ་ལྗོངས་གཞན་ཞིག་གི་རྣམ་པ་ཀུན་གྱི་མིག་ལམ་དུ་འཆར།

                                                    (བདེ་སྐྱིད་དབང་མོས་བསྒྱུར། དབང་སྒྲོན་སྐྱིད་ཀྱིས་ཞུས)

རྩོམ་སྒྲིག་པ། ཁོན་ཐར་འཚོ།