མཚོ་སྔོན་ཞིང་ཆེན་མི་དམངས་སྲིད་གཞུང་དྲ་བ།
བློ་མཐུན་རྩོམ་སྒྲིག་པ་ལགས།
ཉིན་ཞིག་གི་མཚན་མོར། ང་རང་ལས་ཚོགས་གྲོལ་ནས་ཁྱིམ་དུ་ཐོན་མ་ཐག ཉལ་ཁང་གི་ཕྱོགས་ནས་མི་ཞིག་གི་གོམ་སྒྲ་གྲག་བྱུང་བས་སེམས་སུ་ཁྱིམ་དུ་དུས་རྒྱུན་རང་ཉིད་གཅིག་པུ་མ་གཏོགས་བསྡད་མེད་ལ། ཡང་ཅིག་བཤད་ན་ཁྱིམ་དུ་རང་ལས་ཕན་ཆད་ཀྱི་མི་ཞིག་ཡོད་ཚེ་རྐུན་མ་ཡིན་པར་འདོད་དེ་བློ་རིག་བསྒྲིམས་ནས་ཕར་ལྟ་ཚུར་ལྟ་ཞིག་བྱས་པ་ན། གཞི་ནས་ཕོ་གསར་ཆ་མེད་ཅིག་གིས་ངའི་རྩིས་འཁོར་བརྐུས་ནས་སྒོར་འབྲོ་རྩིས་བྱེད་བཞིན་ཡོད་པ་མཐོང་། དེ་བས་ངས་ཕོ་གསར་ཆ་མེད་དེའི་མདུན་བཀག་སྟེ་སྐད་ཆེན་པོས་ལག་གི་རྩིས་འཁོར་འཇོག་དགོས་ཞེས་བཤད་པའི་སྐད་ཅིག་ཉིད་ལ། ཕོ་གསར་དེས་དོར་མའི་ཁུག་མ་ནས་གྲི་ཆུང་ཞིག་བླངས་ཏེ་ང་ལ་བསྣུན་གྲབས་བྱས་པར་ངས་ལྡེམ་མྱུར་དང་ལྡན་པའི་སྒོ་ནས་གཡོལ་རྗེས། གྲི་ལ་འཐམས་ནས་ཕོ་གསར་ཕར་འདེད་ཚུད་འདེད་བྱས་པའི་གོ་རིམ་ཁྲོད་གྲི་ཡིས་བསྣུན་ཏེ་ཁ་མལ་ནས་བསད། འདིར་ཁྱེད་བཅའ་ཁྲིམས་བློ་སྟོན་ཁང་ལ་དྲི་རྒྱུ་ཞིག་ཡོད་པ་ནི་འདི་འདྲའི་གནས་ཚུལ་འོག་ཏུ་ངས་ཉེས་དོན་འགན་འཁྲི་འཁུར་དགོས་སམ།
ཞེས་བཀྲ་རྡོ་ཡིས།
བློ་མཐུན་བཀྲ་རྡོ་ལགས།
ཁྱོད་ཀྱི་བྱ་སྤྱོད་ནི་ལུགས་མཐུན་འགོག་སྲུང་གི་ཁོངས་སུ་གཏོགས་པས་ཉེས་དོན་འགན་འཁྲི་འཁུར་མི་དགོས། ལུགས་མཐུན་འགོག་སྲུང་ནི་རྒྱལ་ཁབ་ཀྱིས་སྤྱི་དམངས་ལ་གནང་བའི་ཉེན་ཁའི་སྐབས་ཀྱི་འགོག་སྲུང་དབང་ཆ་ཞིག་ཡིན་ཞིང་། དེ་སྤྱོད་སྐབས་ཆ་རྐྱེན་ངེས་ཅན་ཞིག་ལྡན་དགོས་ཏེ། དང་པོ། ངེས་པར་ཁྲིམས་འགལ་གྱི་གནོད་འཚེ་ཡོད་ཚེ་གཞི་ནས་ལུགས་མཐུན་འགོག་སྲུང་བྱས་ཆོག གཉིས་པ། ལུགས་མཐུན་འགོག་སྲུང་ལ་དུས་ཚོད་ཀྱི་ཚད་བཀག་ཡོད་པས་ངེས་པར་ཁྲིམས་འགལ་གྱི་གནོད་འཚེ་གཏོང་བཞིན་པ་ཡོད་དགོས་ལ། གལ་ཏེ་ཁྲིམས་འགལ་གྱི་གནོད་འཚེ་ད་དུང་མགོ་བརྩམས་མེད་པའམ་མཇུག་རྫོགས་ཚེ་ཡང་བསྐྱར་འགོག་སྲུང་བྱས་ན་ལུགས་མཐུན་འགོག་སྲུང་གི་ཁོངས་སུ་མི་གཏོགས། གསུམ་པ། འགོག་སྲུང་བྱ་ཡུལ་ནི་ཁྲིམས་འགལ་གྱི་གནོད་འཚེ་གཏོང་མཁན་ཁོ་ན་ཡིན་པ་ལས། ཉེ་འཁོར་གྱི་མི་ལ་དམིགས་མི་ཆོག བཞི་པ། ལུགས་མཐུན་འགོག་སྲུང་ནི་ངེས་པར་འགོག་སྲུང་བྱེད་པའི་རང་སྣང་གི་བསམ་འདུན་ལ་གཞིག་དགོས། གལ་ཏེ་དམིགས་ཡུལ་གཞན་ཡོད་ན། དེའི་བྱ་སྤྱོད་ནི་ཁྲིམས་འགལ་གྱི་གནོད་འཚེ་ལ་ངོས་འཛིན་བྱ་སྲིད། ལྔ་པ། ལུགས་མཐུན་འགོག་སྲུང་ནི་དགོས་ངེས་ཀྱི་ཚད་ལས་བརྒལ་མི་རུང་ཞིང་། དགོས་ངེས་ཀྱི་ཚད་ལས་བརྒལ་ན་འགོག་སྲུང་ཚད་ལས་བརྒལ་བའི་ཁོངས་སུ་གཏོགས་པས་ཉེས་དོན་འགན་འཁྲི་འཁུར་དགོས།
གོང་གི་གྱོད་དོན་འདིའི་ཁྲོད་དུ། ཁྱོད་ཀྱིས་འགོག་སྲུང་བྱེད་སྐབས་རྐུན་མ་བསད་ནའང་། རྐུན་མ་དེའི་བྱ་སྤྱོད་ནི་ཁྱིམ་དུ་འཛུལ་ཏེ་རྐུ་འཕྲོག་བྱས་པ་ནས་དྲག་ཤུགས་འཕྲོག་བཅོམ་བྱས་པ་རུ་འཕར་བའི་བྱ་སྤྱོད་དུ་གཏོགས། གལ་ཏེ་ཁྱོད་ཀྱིས་འགོག་སྲུང་མ་བྱས་ན་རྨས་སྐྱོན་ཕོག་པ་ནི་རང་ཉིད་ཡིན་སྲིད། དེར་བརྟེན། ཁྱོད་ཀྱི་བྱ་སྤྱོད་ནི་འགོག་སྲུང་ཚད་བརྒལ་དུ་མི་གཏོགས་པས་ཉེས་དོན་འགན་འཁྲི་འཁུར་མི་དགོས།
ཞེས་འདི་གའི་བཅའ་ཁྲིམས་བློ་སྟོན་ཁང་ནས།
རྩོམ་སྒྲིག་པ། ཡེ་ཤེས་སྒྲོལ་མ།
