མཚོ་སྔོན་ཞིང་ཆེན་མི་དམངས་སྲིད་གཞུང་དྲ་བ།
ཉེ་ལམ་སློབ་གསོ་པུའུ་ཡིས་བརྡ་ཐོ་བསྒྲགས་ཏེ། 2026ལོའི་མཐོ་རིམ་སློབ་གྲྭ་དཀྱུས་མའི་སློབ་བསྡུ་ལས་ཀ་བཀོད་སྒྲིག་བྱས་པ་མ་ཟད། 2026ལོའི་རྒྱལ་ཡོངས་གཅིག་གྱུར་མཐོ་རྒྱུགས་ལེན་པའི་དུས་ཚོད་ནི་ཟླ6ཚེས7ཉིན་ནས8ཉིན་བར་ལ་གཏན་འཁེལ་བྱས་པ་ཁྱབ་སྒྲོག་བྱས།
1.《བརྡ་ཐོ》ཡི་ནང་དུ་སློབ་བསྡུ་རྒྱུགས་ལེན་གྱི་བདེ་འཇགས་དོ་དམ་མ་ལག་སྔར་བས་འཐུས་ཚང་དུ་བཏང་སྟེ། མཐོ་རྒྱུགས་སྐབས་ཀྱི་བདེ་འཇགས་དང་། འདྲ་མཉམ། དྲང་གཞག་ལ་འགན་སྲུང་བྱ་དགོས་པ་ནན་གྱིས་བསྟན།
ས་གནས་སོ་སོའི་མཐོ་རིམ་སློབ་གྲྭས་རྒྱུགས་ཞུགས་དང་རྒྱུགས་རའི་ལྟ་རྟོག་ལ་དམ་འཛིན་བྱས་ཏེ། ཆ་འཕྲིན་ཅན་གྱི་དགེ་མཚན་ལ་བརྟེན་ནས་རྒྱུགས་རའི་ཁོར་ཡུག་གི་ཕྱོགས་བསྡུས་བཅོས་སྐྱོང་དང་སློབ་བསྡུའི་ཟབ་སྦྱོང་ལས་ཁུངས་ཚད་ལྡན་ཡིན་མིན་བཅོས་སྐྱོང་ཐད་ལ་ཤུགས་བསྣན་ནས་རྒྱུགས་ལེན་དང་འབྲེལ་བའི་གློ་བུར་བའི་དོན་རྐྱེན་སྣ་ཚོགས་འཕྲལ་མར་ཐག་གཅོད་ཐུབ་པར་འགན་སྲུང་བྱ་དགོས།
རྒྱལ་ཁབ་ཀྱི་སློབ་བསྡུའི་སྲིད་ཇུས་ཀྱི་གཏན་འབེབས་ལག་བསྟར་ནན་མོ་དང་། མཐོ་རིམ་སློབ་གྲྭའི་སློབ་བསྡུ་ལས་ཀའི་སྒྲིག་ལམ་ལ་བརྩི་སྲུང་ནན་མོ། མཐོ་རིམ་སློབ་གྲྭའི་སློབ་བསྡུ་ཆ་འཕྲིན་ཡོངས་བསྒྲགས་ཀྱི་ལམ་ལུགས་ལག་བསྟར་ནན་མོ་བཅས་བྱས་ཏེ། སློབ་བསྡུའི་གོ་རིམ་ཡོངས་ལ་ལྟ་རྟོག་ནན་མོ་བྱས་ནས་སྒྲིག་ལམ་མི་འཆོལ་བར་འགན་སྲུང་ལེགས་པོ་བྱེད་དགོས།
2.《བརྡ་ཐོ》ཡི་ནང་དུ། སློབ་བསྡུའི་འཆར་གཞིའི་སྤྱི་ཁོག་སྙོམ་འཛིན་བྱེད་ཤུགས་སྔར་བས་ཆེ་རུ་བཏང་སྟེ། རྒྱལ་ཁབ་ཀྱི་འཐབ་ཇུས་གལ་ཆེན་དང་དམངས་ཚིས་དགོས་མཁོར་ཞབས་ཞུ་འདོན་དགོས་པའི་བླང་བྱ་བཏོན།
ས་གནས་ཁག་གི་མཐོ་རིམ་སློབ་གྲྭ་སོ་སོས་ཚན་རིག་ལག་རྩལ་གསར་གཏོད་དང་། ཐོན་ལས་གོང་སྤེལ། རྒྱལ་ཁབ་ཀྱི་འཐུབ་ཇུས་དགོས་མཁོ་བཅས་དམིགས་སུ་བཟུང་སྟེ། རིག་ཚན་ཆེད་ལས་ཀྱི་བཀོད་སྒྲིག་དང་སློབ་བསྡུའི་འཆར་འགོད་བཀོད་སྒྲིག་སྔར་ལས་ལེགས་པོ་བརྒྱབ་ནས་འཇོན་མི་སྐྱེད་སྲིང་ལ་འཚམ་པའི་ཚད་རིམ་ཇེ་མཐོར་གཏང་དགོས།
རྒྱལ་ཁབ་ཀྱིས་དབུས་ནུབ་ས་ཁུལ་གྱི་སློབ་བསྡུར་རོགས་སྐྱོར་གྱི་མཉམ་ལས་འཆར་གཞི་དང་། མཐོ་རིམ་སློབ་གྲྭ་གཙོ་བོས་ཞིང་གྲོང་དང་དབུལ་པོ་ས་ཁུལ་ལ་ཕྱོགས་པའི་སློབ་བསྡུའི་ཆེད་དོན་འཆར་གཞི་བཅས་མུ་མཐུད་དུ་ལག་བསྟར་བྱས་ཏེ། ཆ་རྐྱེན་དང་མཐུན་པའི་ཡུལ་གཞན་དུ་སྤོས་པའི་ཕ་མའི་བུ་ཕྲུག་གིས་ཡུལ་དེ་གར་མཐོ་རྒྱུགས་ལ་ཞུགས་ཆོག་པར་རྒྱབ་སྐྱོར་བྱས་ནས་ས་ཁོངས་དང་གྲོང་ཁྱེར་གྲོང་གསེབ་ཀྱི་སློབ་ཞུགས་གོ་སྐབས་འདྲ་མཉམ་ཡོང་བར་སྐུལ་འདེད་ཤུགས་ཆེན་བྱ་དགོས་པའི་བླང་བྱ་བཏོན། །
3.《བརྡ་ཐོ》ཡི་ནང་དུ། སློབ་བསྡུའི་རྒྱུགས་ལེན་གྱི་ལམ་ལུགས་ལ་སྔར་ལས་བཅོས་སྒྱུར་གཏིང་ཟབ་བྱས་ཏེ། སློབ་མའི་ཀུན་སྤྱོད་དང་བློ་རིག ལུས་ཕུང་། མཛེས་དཔྱོད། ངལ་རྩོལ་བཅས་ཕྱོགས་ཡོངས་ནས་འཕེལ་རྒྱས་ཡོང་བར་ཁྲིད་སྟོན་བྱ་དགོས་པ་བསྟན།
ས་གནས་སོ་སོས་མཐོ་རྒྱུགས་ཀྱི་ཕྱོགས་བསྡུས་བཅོས་སྒྱུར་ལ་སྐུལ་འདེད་ཏན་ཏིག་བྱས་ཏེ། ཚན་རིག་དང་མཐུན་པའི་སློབ་མའི་འཕེལ་རྒྱས་ཀྱི་སློབ་སྟོན་མ་ལག་ཆ་ཚང་བ་གཟུག་དགོས།
རྒྱུགས་གཞིའི་ནང་དོན་དང་རྣམ་པར་མུ་མཐུད་ནས་བཅོས་སྒྱུར་ཟབ་མོ་བྱས་ཏེ། སློབ་མའི་གནད་འགག་གི་ནུས་པ་དང་རིག་ཚན་གྱི་བྱང་ཚད། རིགས་པ་གཏོང་སྟངས་སོགས་ལ་བརྟག་དཔྱད་ལེགས་པོ་བྱ་དགོས།
སློབ་རིམ་སློབ་གྲྭས་རྒྱལ་ཁབ་ཀྱི་འཐབ་ཇུས་དང་ས་ཁོངས་འཕེལ་རྒྱས་ཀྱི་ཞབས་ཞུ་གནད་དུ་བཟུང་སྟེ། གསར་གཏོད་ཀྱི་འཇོན་མི་རྩེ་གྲ་འདེམ་གསེས་ཀྱི་ལས་གཞི་གཅིག་གྱུར་འཆར་འགོད་ཐོག་ལག་བསྟར་དང་། སློབ་གྲྭའི་སློབ་བསྡུ་རྒྱུགས་ལེན་གྱི་ལས་ཀ་ཚད་ལྡན་དུ་བཏང་ནས་འཇོན་མི་འདེམ་གསེས་ཀྱི་ཚན་རིག་རང་བཞིན་དང་གནད་འཁེལ་རང་བཞིན་ཇེ་མཐོར་གཏང་དགོས་པ་བསྟན།
4.《བརྡ་ཐོ》ཡི་ནང་དུ། སློབ་བསྡུ་རྒྱུགས་ལེན་གྱི་ཞབས་ཞུ་སྔར་བས་ཇེ་ལེགས་སུ་བཏང་སྟེ། ཡར་བརྩོན་ལ་ཕྱོགས་ཤིང་། དྲོད་ཁོལ་འཆམ་མཐུན་གྱིས་ཕྱུག་པའི་ཁོར་ཡུག་ཡག་པོ་ཞིག་བསྐྲུན་དགོས།
ས་གནས་ཁག་གི་མཐོ་རིམ་སློབ་གྲྭ་སོ་སོས་རྒྱུགས་ཞུགས་སློབ་མའི་མི་ཆོས་ཐུགས་ཁུར་དང་ཕྱོགས་བསྡུས་ཞབས་ཞུའི་འགན་སྲུང་ལ་ཤུགས་བསྣན་ཏེ། སྲིད་ཇུས་ཀློག་འགྲེལ་དང་། ཆ་འཕྲིན་ཁྱབ་སྒྲོག ཤ་ཚའི་དྲན་སྐུལ། དོགས་གཞི་དྲིས་ལན་ལ་སོགས་ཀྱི་ལས་ཀ་ལེགས་པོ་བསྒྲུབ་དགོས།
“ཉི་འོད་དང་བླངས”ཀྱི་ཆ་འཕྲིན་ཞབས་ཞུའི་མ་ལག་འཛུགས་པར་སྐུལ་འདེད་བཏང་སྟེ། འདོད་མོས་རེའུ་མིག་བསྐང་བའི་བློ་འདྲི་ཞབས་ཞུ་དཔུང་སྡེ་འཐུས་ཚང་བཙུགས་ནས་འདོད་མོས་རེའུ་མིག་བསྐང་བའི་བློ་འདྲི་ཞབས་ཞུ་སེམས་ཞིབ་མོས་འདོན་པ་མ་ཟད། སློབ་མ་རྣམས་ལ་སློབ་བསྡུའི་སྐོར་གྱི་ཁ་བསླུས་འོག་ཚུད་པར་ཡིད་འཇོག་བྱེད་དགོས་ཞེས་དྲན་སྐུལ་བྱ་དགོས་པའི་བླང་བྱ་བཏོན།
