ཟླ8པའི་ཚེས26ཉིན། ཞིང་ཆེན་སྲིད་གཞུང་གི་ཏང་ཙུའུ་ཧྲུའུ་ཅི། ཧྲིན་ཀྲང་ལུའོ་ཏུང་ཁྲོན་གྱིས་འགོ་འཛིན་བྱས་ཏེ་ཞིང་ཆེན་སྲིད་གཞུང་གི་ཏང་ཙུའུ་གྲོས་ཚོགས་དང་རྒྱུན་ལས་གྲོས་ཚོགས་བསྡུས་ནས། སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་ཉེ་ལམ་གནང་བའི་གསུང་བཤད་གལ་ཆེན་དང་ཀྲུང་དབྱང་གི་འབྲེལ་ཡོད་གྲོས་ཚོགས་ཀྱི་དགོངས་དོན་བརྒྱུད་བསྒྲགས་དང་སློབ་སྦྱོང་བྱས་པ་དང་། ཞིང་ཆེན་ཏང་ཨུའི་བླང་བྱ་དོན་འཁྱོལ་བྱས་ཏེ། ཞིང་ཆེན་སྲིད་གཞུང་ཏང་ཙུའུ་ཡིས་ཕྱོགས་ཡོངས་ནས་ཏང་ནན་སྐྱོང་གི་འགན་འཁྲི་གཙོ་བོ་དོན་འཁྱོལ་བྱེད་པ་དང་། སྐྱེ་ཁམས་སྲུང་སྐྱོབ་ཁ་གསབ་ལམ་ལུགས་བཅོས་སྒྱུར་བྱེད་པ། རིན་མེད་ཀྱི་སློབ་སྔོན་སློབ་གསོ་ཁྱབ་གདལ་བྱེད་པ། བྱིས་པའི་ཁ་གསབ་རོགས་དངུལ་འགྲེམ་གཏོང་སོགས་ཀྱི་བྱ་བར་ཞིབ་འཇུག་དང་བཀོད་སྒྲིག་བྱས།
ཞིང་ཆེན་སྲིད་གཞུང་གི་ཏང་ཙུའུ་གྲོས་ཚོགས་ལས་སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་བོད་རང་སྐྱོང་ལྗོངས་ཏང་ཨུ་དང་སྲིད་གཞུང་གི་བྱ་བའི་སྙན་ཞུར་གསན་སྐབས་ཀྱི་གསུང་བཤད་གལ་ཆེན་གྱི་དགོངས་དོན་བརྒྱུད་བསྒྲགས་དང་སློབ་སྦྱོང་བྱས་ཏེ་ནན་གྱིས་བསྟན་དོན། “གཏན་ཕབ་གཉིས”ཀྱི་ཐག་གཅོད་རང་བཞིན་གྱི་དོན་སྙིང་ལ་གོ་བ་གཏིང་ཟབ་ལེན་པ་དང་། བློ“སྲུང་སྐྱོང་གཉིས”མཐའ་གཅིག་ཏུ་ལེགས་པར་སྒྲུབ་སྟེ། དུས་རབས་གསར་པའི་ཏང་གི་བོད་སྐྱོང་ཐབས་ཇུས་ཕྱོགས་ཡོངས་ནས་ལག་བསྟར་བྱེད་པ་དང་། རྒྱལ་ཡོངས་འཕེལ་རྒྱས་ཀྱི་སྤྱི་ཡོངས་ཁྲོད་ཀྱི་མཚོ་སྔོན་གྱི་འཐབ་ཇུས་ངེས་གནས་ལ་སྟངས་འཛིན་ནན་མོ་བྱས་ཏེ། བློ་བརྟན་འགྱུར་མེད་ཀྱིས“ཀྲུང་ཧྭའི་ཆུ་མཛོད”ལ་སྲུང་སྐྱོབ་བྱེད་པའི་ཆབ་སྲིད་ཀྱི་འགན་འཁྲི་གལ་ཆེན་ཕྲག་ཏུ་ཁུར་བ་དང་། བློ་བརྟན་འགྱུར་མེད་ཀྱིས་སྤུས་ཚད་མཐོ་བའི་འཕེལ་རྒྱས་ལ་སྐུལ་འདེད་གཏོང་བ། བློ་བརྟན་འགྱུར་མེད་ཀྱིས་དམངས་ཀྱི་འཚོ་བར་འགན་སྲུང་དང་ལེགས་བཅོས་བྱེད་པ། བློ་བརྟན་འགྱུར་མེད་ཀྱིས་སྤྱི་ཚོགས་ཀྱི་ཁྱོན་ཡོངས་ཀྱི་འཆམ་མཐུན་བརྟན་བརླིང་ལ་སྲུང་སྐྱོབ་བྱས་ཏེ། ཀྲུང་གོའི་ལུགས་ཀྱི་དེང་རབས་ཅན་གྱི་མཚོ་སྔོན་གྱི་ལེའུ་གསར་པ་འབད་པས་འབྲི་དགོས།
གྲོས་ཚོགས་ལས《2025ལོའི་ལོ་སྟོད་དུ་ཞིང་ཆེན་ཏང་ཨུས་ཁྱོན་ཡོངས་ནས་ཏང་ནན་སྐྱོང་གི་འགན་འཁྲི་གལ་ཆེན་དོན་འཁྱོལ་བྱས་པའི་གནས་ཚུལ་སྙན་ཞུ》བརྒྱུད་བསྒྲགས་དང་སློབ་སྦྱོང་བྱས་ཏེ་ནན་གྱིས་བསྟན་དོན། ཀྲུང་དབྱང་གི་གཏན་འབེབས་དོན་ཚན་བརྒྱད་ཀྱི་དགོངས་དོན་ལག་བསྟར་ཟབ་མོ་བྱེད་པའི་སློབ་སྦྱོང་སློབ་གསོའི་གྲུབ་འབྲས་སྲ་བརྟན་དུ་གཏོང་བ་དང་ཟབ་སྤེལ་བྱས་ཏེ། ཕྱོགས་ཡོངས་ནས་ཏང་ནན་སྐྱོང་བྱེད་པའི་འགན་འཁྲི་གཙོ་བོ་སྔར་ལས་དམ་དཀྲི་ནན་དཀྲི་བྱས་ནས། སྲིད་གཞུང་མ་ལག་གི་གཙོ་གནད་ཁྱབ་ཁོངས་དང་གཙོ་གནད་གནས་མཚམས། གཙོ་གནད་ལས་གནས་བཅས་ཀྱི་ལྟ་སྐུལ་ལ་རྒྱུན་མཐུད་ངང་ཤུགས་བསྣན་ཏེ། མུ་མཐུད་དུ་དབང་ཆ་བཀོད་སྒྲིག་དང་འཁོར་སྐྱོད་ཀྱི་ལྟ་སྐུལ་ཚོད་འཛིན་ལམ་སྲོལ་འཐུས་ཚང་དུ་གཏོང་བ་དང་། རུལ་སུངས་སུ་འགྱུར་བའི་བར་སྟོང་ཇེ་ཆུང་དུ་གཏོང་གང་ཐུབ་བྱས་ཏེ། མི་དམངས་ཡིད་ཚིམས་པའི་ཁྲིམས་སྐྱོང་སྲིད་གཞུང་དང་། གསར་གཏོད་སྲིད་གཞུང་། སྤྱོད་གཙང་སྲིད་གཞུང་དང་ཞབས་ཞུ་རྣམ་པའི་སྲིད་གཞུང་བཅས་མགྱོགས་མྱུར་ངང་འཛུགས་སྐྲུན་བྱེད་དགོས།
ཞིང་ཆེན་སྲིད་གཞུང་གི་རྒྱུན་ལས་གྲོས་ཚོགས་ལས་ཟླ8པའི་ཚེས22ཉིན་གྱི་རྒྱལ་སྲིད་སྤྱི་ཁྱབ་ཁངགི་་རྒྱུན་ལས་གྲོས་ཚོགས་ཀྱི་དགོངས་དོན་བརྒྱུད་བསྒྲགས་དང་སློབ་སྦྱོང་བྱས་ཏེ་ནན་གྱིས་བསྟན་དོན། “གསར་གཉིས”སྲིད་ཇུས་ཀྱིས་ཕན་ནུས་ལྡན་པའི་དངུལ་གཏོང་ལ་སྐུལ་ཁྲིད་བྱེད་པ་དང་མངོན་མེད་འཛད་སྤྱོད་ཆེར་བསྐྱེད་པའི་ནུས་པ་ལེགས་པར་བཏོན་ནས། དཔལ་འབྱོར་སླར་གསོ་བཟང་འཕེལ་ཡོང་བར་སྣེ་ཁྲིད་བྱེད་དགོས། ལུས་རྩལ་ཐོན་ལས་ཀྱི་འཕེལ་གནས་བསྟུད་མར་བསྐྱེད་པ་དང་། ལུས་རྩལ་འཛད་སྤྱོད་ཀྱི་དགོས་མཁོ་བསྐྱེད་ནས། ཞིང་ལས་དང་ལུས་རྩལ། རིག་གནས། ཡུལ་སྐོར། ཚོང་ལས་བཅས་ཀྱི་མཉམ་འདྲེས་འཕེལ་རྒྱས་ལ་ཆུ་ཚད་སྔར་ལས་མཐོན་པོས་སྐུལ་དགོས། བྱང་གསུམ་བཟོ་སྐྲུན་སོགས་སྐྱེ་ཁམས་སྲུང་སྐྱོབ་བཟོ་སྐྲུན་གལ་ཆེན་ཏན་ཏིག་གིས་ལག་ཏུ་བསྟར་ནས། རྒྱལ་ཁབ་ཀྱི་སྐྱེ་ཁམས་བདེ་འཇགས་འགོག་ར་མཐའ་གཅིག་ཏུ་བརྟན་པོར་འཛུགས་དགོས། བདེ་འཇགས་ཐོན་སྐྱེད་ཀྱི་འགན་འཁྲི་དོན་འཁྱོལ་ནན་མོ་བྱས་ཏེ། བདེ་འཇགས་ཐོན་སྐྱེད་ཀྱི་ཚད་མཐའ་དངོས་སུ་སྲུང་དགོས།
གྲོས་ཚོགས་ལས《མཚོ་སྔོན་ཞིང་ཆེན་གྱིས་སྐྱེ་ཁམས་སྲུང་སྐྱོབ་ཁ་གསབ་ལམ་ལུགས་ཀྱི་བཅོས་སྒྱུར་སྔར་ལས་ཟབ་མོར་སྤེལ་བའི་ལག་བསྟར་ཇུས་གཞི》དང《མཚོ་སྔོན་ཞིང་ཆེན་གྱིས་རིན་མེད་སློབ་སྔོན་སློབ་གསོ་རིམ་བཞིན་ཁྱབ་གདལ་གཏོང་བའི་སྐོར་གྱི་ལག་བསྟར་ཇུས་གཞི》《མཚོ་སྔོན་ཞིང་ཆེན་གྱི་བྱིས་པའི་ཁ་གསབ་ལམ་ལུགས་ལག་བསྟར་ཇུས་གཞི》བཅས་ལ་གྲོས་ཞིབ་བྱས་ཏེ་རྩ་དོན་སྟེང་གྲོས་འཆམ་བྱུང་། གྲོས་ཚོགས་ལས་སྐྱེ་ཁམས་སྲུང་སྐྱོབ་ཁ་གསབ་ལམ་ལུགས་ཀྱི་བཅོས་སྒྱུར་སྔར་ལས་ཟབ་མོར་སྤེལ་ནས། སྐྱེ་ཁམས་སྲུང་སྐྱོབ་ཀྱི་སྤྱིའི་སྤུས་ནུས་སྔར་ལས་མཐོར་འདེགས་གཏོང་དགོས། སློབ་སྔོན་སློབ་གསོའི་འགན་སྲུང་རྐྱེན་སྲོལ་འཐུས་ཚང་དུ་བཏང་སྟེ། སློབ་སྔོན་སློབ་གསོ་ཁྱབ་ཆེར་དང་ཀུན་ཕན། བདེ་འཇགས། སྤུས་ལེགས་བཅས་ཀྱི་སྒོ་ནས་འཕེལ་རྒྱས་སུ་གཏོང་དགོས། ཁྱིམ་ཚང་གི་བུ་སྐྱེས་བུ་གསོའི་མ་རྩ་ནུས་ལྡན་སྒོས་ཇེ་དམར་བཏང་སྟེ། བུ་སྐྱེས་མཐུན་འཕྲོད་སྤྱི་ཚོགས་འཛུགས་སྐྲུན་ལ་སྐུལ་འདེད་གཏོང་བ་དང་ཞིང་ཆེན་ཡོངས་ཀྱི་མི་འབོར་སྤུས་ཚད་མཐོ་བའི་འཕེལ་རྒྱས་ལ་སྐུལ་བར་ནུས་ལྡན་གྱི་འདེགས་སྐྱོར་འདོན་སྤྲོད་བྱེད་དགོས་ཞེས་ནན་གྱིས་བསྟན།
གྲོས་ཚོགས་ལས《2024ལོའི་མཚོ་སྔོན་ཞིང་ཆེན་རྒྱལ་དབང་རྒྱུ་ནོར་དོ་དམ་གནས་ཚུལ་གྱི་ཕྱོགས་བསྡུས་སྙན་ཞུའི(ཞིབ་བཤེར་མ་ཡིག)》དང《2024ལོའི་མཚོ་སྔོན་ཞིང་ཆེན་གྱི་ཁེ་ལས(ས་གནས་ཀྱི་དངུལ་རྩའི་ཁེ་ལས་མི་འདུ)ཀྱི་རྒྱལ་ཁབ་རྒྱུ་དབང་དོ་དམ་གནས་ཚུལ་གྱི་ཆེད་དོན་སྙན་ཞུའི(ཞིབ་བཤེར་མ་ཡིག)》ལ་གྲོས་བསྡུར་བྱས་པར་མ་ཟད་རྩ་དོན་སྟེང་གྲོས་འཆམ་བྱུང་ནས། གོ་རིམ་ལྟར་ཞིང་ཆེན་དམངས་ཆེན་རྒྱུན་ལས་ཨུ་ཡོན་ལྷན་ཁང་གིས་ཞིབ་བཤེར་བྱེད་པར་རེ་ཞུ་བྱེད་རྒྱུའི་ཐག་བཅད།
གྲོས་ཚོགས་ལས་ད་དུང་དོན་དག་གཞན་པར་ཞིབ་འཇུག་བྱས།