མཚོ་སྔོན་ཞིང་ཆེན་མི་དམངས་སྲིད་གཞུང་དྲ་བ།
མཚོ་སྔོན་གསར་འགྱུར་དྲ་བའི་འཕྲིན། ཟླ8པའི་ཚེས13ཉིན། ཞིང་ཆེན་སྲིད་གཞུང་གི་ཏང་ཙུའུ་ཧྲུའུ་ཅི། ཧྲིན་ཀྲང་ལའོ་ཏུང་ཁྲོན་གྱིས་འགོ་འཛིན་བྱས་ཏེ་ཞིང་ཆེན་སྲིད་གཞུང་གི་ཏང་ཙུའུ་གྲོས་ཚོགས་དང་རྒྱུན་ལས་གྲོས་ཚོགས་བསྡུས་ཤིང་། སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་ཉེ་དུས་ཀྱི་མཛུབ་སྟོན་གལ་ཆེན་དང་ཀྲུང་དབྱང་གི་འབྲེལ་ཡོད་གྲོས་ཚོགས་ཀྱི་དགོངས་དོན་བརྒྱུད་སྒྲོག་དང་སློབ་སྦྱོང་བྱས་པ་དང་། ཞིང་ཆེན་ཏང་ཨུའི་བླང་བྱ་དོན་འཁྱོལ་བྱས་ཏེ། དཔལ་འབྱོར་འཁོར་སྐྱོད་དང་ཚོང་འགུག་དངུལ་འདྲེན། རྐང་གྲུག་ལུས་རྩལ་འཕེལ་རྒྱས། སྲིད་དོན་དམངས་ཕན་ཞབས་ཞུ་སོགས་བྱ་བར་ཞིབ་འཇུག་དང་བཀོད་སྒྲིག་བྱས།
ཞིང་ཆེན་སྲིད་གཞུང་གི་ཏང་ཙུའུ་གྲོས་ཚོགས་སྟེང་སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་ཀན་སུའུ་ཞིང་ཆེན་ལན་ཀྲོའུ་གྲོང་ཁྱེར་ཡུས་ཀྲུང་རྫོང་གི་ཆུ་ལོག་གི་གནོད་འཚེའི་ཐད་གནང་བའི་མཛུབ་སྟོན་གལ་ཆེན་གྱི་དགོངས་དོན་བརྒྱུད་བསྒྲགས་དང་སློབ་སྦྱོང་བྱས། གྲོས་ཚོགས་སྟེང་དུ། བློ་བརྟན་འགྱུར་མེད་ངང་ལྷོད་གཡེང་གི་སེམས་ཁམས་སེལ་ནས། རང་ཞིང་གི་ཞོད་འགོག་གནོད་སེལ་གནས་བབ་ཀྱི་རྙོག་འཛིང་རང་བཞིན་དང་ཛ་དྲག་རང་བཞིན་ལ་ངོས་འཛིན་ཡང་དག་དང་། གནམ་གཤིས་ལྟ་ཞིབ་ཚད་ལེན་སྔོན་བརྡ་དང་འཁོར་སྐྱོད་མཉམ་འབྲེལ་གྲོས་ཚོགས་ལ་སྔར་ལས་ཤུགས་སྣོན་པ། ཉེན་ཁ་ཞིབ་བཤེར་དང་ཉེན་འགོག་གནས་སྤོར་བྱེད་ཤུགས་ཇེ་དྲག་ཏུ་གཏོང་བ། རིམ་པ་སོ་སོའི་ཞོད་འགོག་འགན་འཁྲི་ཇེ་ཞིབ་ཏུ་གཏོང་བ། སྟོབས་ཤུགས་ཡོད་རྒུས་ཞོད་འགོག་གནོད་སེལ་བྱ་བ་ལེགས་པོར་བསྒྲུབ་ནས། མི་དམངས་མང་ཚོགས་ཀྱི་ཚེ་སྲོག་དང་རྒྱུ་ནོར་བདེ་འཇགས་ལ་འགན་སྲུང་བྱེད་དགོས་ཞེས་ནན་གྱིས་བསྟན།
གྲོས་ཚོགས་སྟེང་། སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་དྲ་དམངས་ཀྱི“ལོ་ལྔ་ཚན་བཅོ་ལྔའི“འཆར་གཞི་སྒྲིག་བཟོ་བྱ་བའི་ཐད་ཀྱི་བསམ་འཆར་བསྡུ་ལེན་དང་ཞིབ་འཇུག་ཐད་གནང་བའི་མཛུབ་སྟོན་གལ་ཆེན་གྱི་དགོངས་དོན་བརྒྱུད་བསྒྲགས་དང་སློབ་སྦྱོང་བྱས། གྲོས་ཚོགས་སྟེང་། ཇུས་གཞི་དམངས་ལ་འདྲི་བ་དང་བསམ་བློ་རྒྱ་ཆེར་གཅིག་སྡུད། གོང་རིམ་གྱི་གནས་ཚུལ་ལ་རྒྱུས་ལོན་དང་དོན་དངོས་ཤེས་པ། ཕྱིའི་གནས་ཚུལ་ལ་རྒྱུས་ལོན་དང་། དམངས་ཀྱི་གནས་ཚུལ་ཤེས་རྟོགས་བཅས་ལ་མཐོང་ཆེན་བྱས་ཏེ། ཀྲུང་དབྱང་གི་དགོངས་དོན་ལག་བསྟར་དང་མཚོ་སྔོན་གྱི་དངོས་ཡོད་གནས་ཚུལ་དང་མཐུན་པ། དམངས་ཀྱི་རེ་འདོད་དང་མཐུན་པ་བཅས་ཀྱི་ཆུ་ཚད་མཐོ་བའི“ལོ་ལྔ་ཚན་བཅོ་ལྔའི“འཆར་གཞི་སྒྲིག་བཟོ་བྱེད་དགོས་ཞེས་ནན་གྱིས་བསྟན།
གྲོས་ཚོགས་སྟེང་། རྒྱལ་ཡོངས་རྐང་གྲུག་བྱ་བའི་གྲོས་ཚོགས་ཀྱི་དགོངས་དོན་སློབ་སྦྱོང་དང་བརྒྱུད་བསྒྲགས་བྱས། སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་ལུས་རྩལ་དང་རྐང་གྲུག་བྱ་བའི་ཐད་གནང་བའི་འབྲེལ་ཡོད་མཆན་བཀོད་མཛུབ་སྟོན་གལ་ཆེན་གྱི་དགོངས་དོན་སློབ་སྦྱོང་དང་ལག་བསྟར་ཟབ་མོ་བྱས་ཏེ། རྐང་གྲུག་ལས་དོན་འཕེལ་རྒྱས་གཏོང་རྒྱུ་དེ་དམངས་ཡོངས་ཀྱི་བདེ་ཐང་ཆུ་ཚད་མཐོར་འདེགས་གཏོང་བ་དང་། མི་རིགས་མཐུན་སྒྲིལ་ཡར་ཐོན་དང་ཞིང་ལས་དང་ལུས་རྩལ། རིག་གནས་ཡུལ་སྐོར། ཚོང་ལས་བཅས་ནུས་ལྡན་མཉམ་བསྲེས་ལ་སྐུལ་འདེད་གཏོང་བའི་ལས་དོན་གལ་ཆེན་ཏུ་བརྩིས་ནས་དམ་འཛིན་བྱེད་དགོས་ལ། མཚོ་སྔོན་གྱི་རིམ་འདས་མཉམ་འབྲེལ་འགྲན་སྡུར་མུ་མཐུད་དུ་བཟང་བོར་བསྒྲུབ་ནས། ཤུགས་ཆེན་པོས“མཐོ་སྒང་གི་རྐང་གྲུག“ཁྱད་ལྡན་ཚོང་རྟགས་བསྐྲུན་ཏེ། རང་ཞིང་གི་རྐང་གྲུག་ལས་དོན་རྒྱུན་ཆད་མེད་པར་སྐས་རིམ་གསར་པ་ཞིག་ཏུ་སླེབས་པར་སྐུལ་འདེད་གཏོང་དགོས་ཞེས་ནན་གྱིས་བསྟན།
གྲོས་ཚོགས་སྟེང་། སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་དམག་དཔུང་སྟོབས་ལྡན་དུ་གཏོང་བའི་དགོངས་པར་སློབ་སྦྱོང་དང་ལག་བསྟར་ཟབ་མོ་བྱེད་པ་དང་། ཞིང་ཆེན་ཏང་ཨུའི་དམག་དཔུང་གྲོས་ཚོགས་ཀྱི་བཀོད་སྒྲིག་བླང་བྱ་དོན་འཁྱོལ་ནན་མོ་བྱས་ཏེ། རྒྱལ་སྲུང་སྐུལ་སློང་དང་སྟོབས་ཤུགས་འཛུགས་སྐྲུན་བྱ་བ་དམ་འཛིན་བཟང་བོ་བྱས་ནས། རྒྱལ་སྲུང་སློབ་གསོར་ཤུགས་སྣོན་པ་དང་དམག་དམངས་མཉམ་བསྲེས་ཟབ་མོ་བྱེད་པ་སོགས་བྱས་ཏེ། སྔར་ལས་ལྷག་པའི་སྒོ་ནས་རྒྱལ་སྲུང་ལ་དོ་ཁུར་དང་དམག་དཔུང་ལ་དགའ་བ། དམག་མིར་བརྩི་བཀུར་བྱེད་པའི་སྤྱི་ཚོགས་ཀྱི་སྣང་ཚུལ་བཟང་བོ་བསྐྲུན་དགོས་ཞེས་ནན་གྱིས་བསྟན།
ཞིང་ཆེན་སྲིད་གཞུང་གི་རྒྱུན་ལས་གྲོས་ཚོགས་སྟེང་དུ། དུས་ཚིགས་གསུམ་པ་ནི་ཐོན་སྐྱེད་དང་འཛད་སྤྱོད། ཡུལ་སྐོར་བཅས་ཀྱི“དུས་སྐབས་བཟང་པོ“ཞིག་ཡིན་པ་དང་། ལོ་ཧྲིལ་བོའི་དཔལ་འབྱོར་འཕར་སྣོན་ལ་སྐུལ་འདེད་གཏོང་བའི་གནད་འགག་གི་དུས་སྐབས་ཤིག་ཀྱང་ཡིན་པས། ས་ཁུལ་སོ་སོ་དང་སྡེ་ཁག་སོ་སོས་སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་ལོ་སྟོད་ཀྱི་དཔལ་འབྱོར་གནས་བབ་དང་ལོ་སྨད་ཀྱི་དཔལ་འབྱོར་བྱ་བའི་ཐད་གནང་བའི་འབྲེལ་ཡོད་གསུང་བཤད་གལ་ཆེན་གྱི་དགོངས་དོན་སློབ་སྦྱོང་ནན་མོ་དང་ལག་བསྟར་ཟབ་མོ་བྱས་ཏེ། ཡིད་ཆེས་སྔར་ལས་ཇེ་བརྟན་དུ་གཏོང་བ་དང་དངོས་སྒྲུབ་སྔོན་བརྩོན་བྱེད་པ། ཤུགས་ཆེན་པོས་ལས་ཞུགས་དང་ཁེ་ལས། ཁྲོམ་ར། སྔོན་དཔག་བཅས་བརྟན་པོ་ཡོང་བར་བྱེད་པ། རྒྱུན་མཐུད་ངང་དཔལ་འབྱོར་འཕར་སྣོན་གྱི་གནས་བབ་བཟང་བོ་སྲ་བརྟན་དུ་བཏང་ནས། ལོ་ཧྲིལ་བོའི་དམིགས་འབེན་ལས་འགན་ཡོངས་འགྲུབ་དང“ལོ་ལྔ་ཚན་བཅུ་བཞི་པ“བདེ་བླག་ངང་མཇུག་བསྡུ་བར་རྨང་གཞི་བཟང་བོ་འདིང་དགོས་ཞེས་བསྟན།
གྲོས་ཚོགས་སྟེང་དུ། ཚོང་འགུག་དངུལ་འདྲེན་ལ་རྒྱུན་ཆད་མེད་པར་སྐུལ་འདེད་གཏོང་བ་དང་། གོ་རིམ་ཧྲིལ་བོའི་བཀོད་གཏོང་དང་རྗེས་འདེད་ཞབས་ཞུ་ཇེ་དྲག་ཏུ་བཏང་སྟེ་ཚོང་འགུག་དངུལ་འདྲེན་གྱི་ཕན་ནུས་དངོས་ལ་བསྟེན་ནས་དཔལ་འབྱོར་སྤྱི་ཚོགས་ཀྱི་སྤུས་ཚད་མཐོ་བའི་འཕེལ་རྒྱས་ལ་སྒུལ་ཤུགས་བསྩོལ་དགོས། ཞིང་ཆེན་ཡོངས་ཀྱི12345སྐུད་ལམ་ཚད་གཞི་ཅན་དང་ཚད་ལྡན་ཅན། ནུས་མཐོ་ཅན་དུ་འཁོར་སྐྱོད་བྱེད་པར་སྐུལ་འདེད་བཏང་སྟེ་ཞིང་ཆེན་ཡོངས་ཀྱི་ཁེ་ལས་དང་མང་ཚོགས་ལ་སྔར་ལས་སྟབས་བདེ་དང་ནུས་ཡོད། རིག་སྟོབས། སྤུས་ལེགས་བཅས་ཀྱི་སྲིད་དོན་ཞབས་ཞུ་འདོན་སྤྲོད་བྱེད་དགོས། མཚོ་སྐོར་ལྕགས་རྟ་རྒྱུགས་འགྲན་གྱི་ཉམས་མྱོང་བཟང་བོ་དང་བྱེད་ཐབས་བཟང་བོ་སྤྱི་སྡོམ་བྱས་ནས། རྒྱལ་སྤྱི་ཅན་དང་ཆེད་ལས་ཅན། ཁྲོམ་ར་ཅན་གྱི་འདུ་ཤེས་རྒྱུན་འཁྱོངས་དང་། དོ་དམ་དང་གསར་སྐྲུན། མཉམ་བསྲེས་བཅས་ཀྱི་སྟེང་ཤུགས་བཏོན་ནས། མཚོ་སྐོར་ལྕགས་རྟ་རྒྱུགས་འགྲན་གྱི་རྒྱལ་སྤྱིའི་ཤུགས་རྐྱེན་དང་ཚོང་རྟགས་ཀྱི་མིང་གྲགས་ཚད་རྒྱུན་ཆད་མེད་པར་མཐོར་འདེགས་གཏོང་དགོས་ཞེས་ནན་གྱིས་བསྟན།
གྲོས་ཚོགས་སྟེང་ད་རུང་དོན་དག་གཞན་པར་ཞིབ་འཇུག་བྱས།
