མཚོ་སྔོན་ཞིང་ཆེན་གྱིས་ཞིང་ཆེན་ཡོངས་ཀྱི་གྲོང་གསེབ་མེ་འགོག་མེ་གསོད་བྱ་བའི་ཚོགས་འདུ་འཚོགས་པ།

མཚོ་སྔོན་གསར་འགྱུར་དྲ་བའི་འཕྲིན། ཟླ8པའི་ཚེས8ཉིན། ཞིང་ཆེན་ཡོངས་ཀྱི་གྲོང་གསེབ་མེ་འགོག་མེ་གསོད་བྱ་བའི་ཚོགས་འདུ་འཚོགས་པ་རེད། 

གྲོས་ཚོགས་ཀྱི་སྔོན་དུ། ཞིང་ཆེན་མེ་འགོག་མེ་གསོད་རོགས་སྐྱོབ་སྤྱིའི་རུ་ཁག་དང་། མཚོ་ཤར་གྲོང་ཁྱེར་སྲིད་གཞུང་དང་འབྲེལ་ཡོད་སྡེ་ཁག་བཅས་ཀྱི་འགན་ཁུར་བློ་མཐུན། གྲོང་ཁྱེར་དང་ཁུལ་སོ་སོའི་མེ་འགོག་མེ་གསོད་རོགས་སྐྱོབ་རུ་ཁག་གི་འབྲེལ་ཡོད་འགན་ཁུར་བློ་མཐུན་བཅས་ཀྱིས་མཚོ་ཤར་གྲོང་ཁྱེར་དགོན་ལུང་རྫོང་ཚོགས་རྒྱ་ཡུལ་ཚོ་ཧོའུ་ཝན་སྡེ་བ་རུ“རུ་ཁག་གཅིག་དང་ལྟེ་གནས་གཅིག““1+1+N”འགན་ལེན་ལམ་ལུགས་དང་ས་ཁོངས་མཉམ་འབྲེལ་འགོག་སྲུང་“དྲ་རྒྱ་ཅན་དུ་འགྱུར་བ་”སོགས་ལམ་སྲོལ་བཙུགས་པ་དང་འཁོར་སྐྱོད་བྱེད་ཚུལ། མེ་འགོག་མེ་གསོད་ཀྱི་ཆུ་ལེན་ས། མེ་འགོག་མེ་གསོད་དྲིལ་སྒྲོག་བྱེད་ས། སྡེ་བ་རིམ་པའི་དང་བླངས་པའི་མེ་འགོག་མེ་གསོད་རུ་ཁག་འཛུགས་སྐྲུན་དང་ཞིང་ཁྱིམ་གྱི་གློག་རླངས་སྐུད་ལམ་སྒྱུར་བཀོད། ཐོག་མའི་མེ་སྐྱོན་ཉེན་བརྡ་ཐག་གཅོད། ཁྱིམ་སྤྱོད་མེ་གསོད་སྒྲིག་ཆས་བཀོད་སྒྲིག་སོགས་བྱ་བའི་གནས་ཚུལ་ལ་ཡུལ་དངོས་ནས་ལྟ་ཞིབ་བྱས་པར་མ་ཟད། ཐོག་མའི་མེ་སྐྱོན་རོགས་སྐྱོབ་སྦྱོང་བརྡར་རྩ་འཛུགས་བྱས་ནས་སྡེ་བ་དང་ཡུལ་ཚོ། རྫོང་བཅས་རིམ་པ་གསུམ་གྱི་མེ་གསོད་བཀོད་འདོམས་བཀོད་གཏོང་མ་ལག་འཛུགས་སྐྲུན་གནས་ཚུལ་མངོན་པར་བྱས།

གྲོས་ཚོགས་ལས།  གྲོང་གསེབ་ཀྱི་མེ་འགོག་མེ་གསོད་བྱ་བ་ནི་ཞིང་ལས་ཞིང་སྡེ་རྒྱུན་མཐུད་འཕེལ་རྒྱས་ཀྱི་འགན་སྲུང་གལ་ཆེན་ཞིག་ཡིན་པ་དང་། གྲོང་གསེབ་དར་སྤེལ་གྱི་དམིགས་འབེན་བདེ་བླག་ངང་མངོན་འགྱུར་ཡོང་བར་འབྲེལ་བ་ཡོད་པ་མ་ཟད། ཞིང་ཆེན་ཡོངས་ཀྱི་རོང་འབྲོག་མང་ཚོགས་ཀྱི་གཞི་རྩའི་ཁེ་ཕན་ལ་ཡང་འབྲེལ་ཡོད་པས། ས་ཁུལ་སོ་སོ་དང་སྡེ་ཁག་སོ་སོས་ཞིང་སྡེའི་མེ་འགོག་མེ་གསོད་བྱ་བ་དམ་འཛིན་བྱེད་པའི་དོན་སྙིང་གལ་ཆེན་ལ་ངོས་འཛིན་ཟབ་མོ་དང་། རྙོག་འཛིང་གི་གནས་བབ་དང་ལོ་རྒྱུས་ཀྱི་འགན་འཁྲི་ལྕི་མོར་རྒྱུས་ལོན་ཟབ་མོ་བྱས་ཏེ།  ངེས་པ་དོན་གྱིས་ཆབ་སྲིད་ཀྱི་ལངས་གནས་དང་བསམ་བློའི་ངོས་ཟིན་མཐོར་འདེགས་གཏོང་བ་དང་། གནད་དོན་འབུར་ཐོན་དང་ཉམས་ཞན་དུས་རིམ་ཡང་དག་པར་བཙལ་བ། གྲོང་གསེབ་ཀྱི་མེ་འགོག་མེ་གསོད་བྱ་བ་ཕྱོགས་ཡོངས་ནས་བཟང་བོར་སྒྲུབ་པའི་འགུལ་སྐྱོད་དངོས་ལ་བརྟེན་ནས་ཞིང་ཆེན་ཏང་ཨུ་དང་ཞིང་ཆེན་སྲིད་གཞུང་གི་བཀོད་སྒྲིག་བླང་བྱ་དོན་འཁྱོལ་བཟང་བོ་བྱས་ཏེ། གྲོང་གསེབ་ཀྱི་མེ་འགོག་མེ་གསོད་བྱ་བའི་རྣམ་པ་གསར་པ་རྒྱུན་ཆད་མེད་པར་བསྐྲུན་ནས། ཞིང་ཆེན་ཡོངས་ཀྱི་གྲོང་གསེབ་ཕྱོགས་ཡོངས་ནས་དར་སྤེལ་གཏོང་བར་སྟོབས་དང་ལྡན་པའི་བདེ་འཇགས་ཀྱི་འགན་སྲུང་འདོན་སྤྲོད་བྱེད་དགོས། གྲོང་གསེབ་ཀྱི་མེ་འགོག་མེ་གསོད་བདེ་འཇགས་ལ་ཤུགས་རྐྱེན་ཐེབས་པའི་གནད་དོན་འབུར་ཐོན་གཅིག་སྡུད་བྱས་ཏེ། ཉེ་རིང་ཟུང་འབྲེལ་དང་རྩ་ལག་མཉམ་བཅོས་རྒྱུན་འཁྱོངས་དང་འགོག་སྲུང་གཙོར་འཛིན། སྔོན་འགོག་དང་མེ་གསོད་ཟུང་འབྲེལ། ཚན་རྩལ་རྩལ་ནུས་བཅས་ལ་བརྟེན་ནས། མེ་འགོག་མེ་གསོད་བྱ་བའི་དྲ་རྒྱ་འཛུགས་པ་དང་འཐུས་ཚང་དུ་གཏོང་བ། རྣམ་པ་སྣ་མང་གི་མེ་འགོག་མེ་གསོད་རུ་ཁག་ཤུགས་ཆེན་པོས་འཕེལ་རྒྱས་སུ་བཏང་སྟེ། མེ་འགོག་མེ་གསོད་ཀྱི་ལྟ་སྐུལ་དོ་དམ་ནུས་ཤུགས་ཀྱི་མི་འདང་ས་ཁ་གསབ་དང་། ཡུལ་བབ་དང་བསྟུན་ནས་མེ་འགོག་མེ་གསོད་ཀྱི་རྨང་གཞིའི་སྒྲིག་ཆས་འཛུགས་སྐྲུན་ལ་ཤུགས་སྣོན་པ། དམངས་སྲོལ་དང་ཟུང་འབྲེལ་གྱིས་མེ་འགོག་མེ་གསོད་ཐད་ཀྱི་དྲིལ་སྒྲོག་སློབ་གསོ་སྤེལ་བ། ཉེན་ཁ་སྔོན་འགོག་དང་མངོན་མེད་རྐྱེན་ངན་སྟོབས་ཤུགས་ཡོད་རྒུས་མེད་པར་བྱེད་པ། བདེ་འཇགས་ལ་འགན་སྲུང་བྱེད་པའི་བྱ་བ་སོ་སོ་བཟང་བོར་སྒྲུབ་པ་སོགས་བྱས་ནས། གྲོང་གསེབ་ཀྱི་མེ་འགོག་མེ་གསོད་བཅོས་སྐྱོང་བྱེད་ནུས་རྒྱུན་ཆད་མེད་པར་མཐོར་འདེགས་གཏོང་དགོས། གྲོང་གསེབ་ཀྱི་མེ་འགོག་མེ་གསོད་བྱ་བ་ནི་སྤྱི་ཡོངས་རང་བཞིན་གྱི་ལས་དོན་ཞིག་དང་མ་ལག་རང་བཞིན་གྱི་བཟོ་སྐྲུན་ཞིག་ཡིན་པས། ས་ཁུལ་སོ་སོ་དང་འབྲེལ་ཡོད་སྡེ་ཁག་སོ་སོས“དངོས་གཉེར་དང་ཕན་ནུས་ལྡན་པ། གནད་དོན་ཐག་གཅོད་ཐུབ་པའི“རྩ་དོན་ལྟར། གྲོང་གསེབ་ཀྱི་མེ་འགོག་མེ་གསོད་བྱ་བའི་རྣམ་པ་གསར་པ་འཚོལ་ཞིབ་དང་། མེ་འགོག་མེ་གསོད་ཀྱི་བདེ་འཇགས་ཐད་ཀྱི་མི་ཤུགས་དང་དངོས་ཤུགས། ནོར་ཤུགས་བཅས་ཀྱི་གཏོང་སྤྲོད་ཆེ་རུ་གཏོང་བ། སྲིད་ཇུས་དང་ཐོན་ཁུངས། སྟོབས་ཤུགས་བཅས་གྲོང་གསེབ་ཀྱི་མེ་འགོག་མེ་གསོད་ཐད་བཀོལ་བར་སྐུལ་འདེད་གཏོང་བ། གྲོང་གསེབ་ཀྱི་མེ་འགོག་མེ་གསོད་བྱ་བའི་མཉམ་འཛིན་སྤྱི་སྒྲུབ་ཀྱི་མཉམ་ཤུགས་གྲུབ་པར་བྱེད་པ། དངོས་གཉེར་གྱི་བྱེད་ཐབས་དང་དམངས་ཕན་སྲིད་ཇུས་སྔར་ལས་མང་པོ་གྲོང་གསེབ་ས་ཁུལ་དུ་དོན་འཁྱོལ་བྱེད་པར་འགན་སྲུང་དང་། ཞིང་ཆེན་ཡོངས་ཀྱི་གྲོང་གསེབ་ཀྱི་མེ་འགོག་མེ་གསོད་བྱ་བར་གྲུབ་འབྲས་བཟང་བོ་ཐོབ་པར་སྐུལ་འདེད་བཏང་ནས། གྲོང་གསེབ་ཀྱི་མེ་འགོག་མེ་གསོད་བྱ་བའི་ཕན་བདེ་སྔར་ལས་ཆེ་རུ་གཏོང་བ་དང་མི་དམངས་མང་ཚོགས་ཀྱི་ཐོབ་སྣང་སྔར་ལས་ཇེ་དྲག་ཏུ་གཏོང་དགོས་པའི་བླང་བྱ་བཏོན།

གྲོས་ཚོགས་སྟེང་ད་དུང་ཞིང་ཆེན་ཡོངས་ཀྱི་ཞོད་འགོག་བྱ་བའི་བཀོད་གཏོང་གྲོས་ཚོགས་ཀྱི་དགོངས་དོན་བརྒྱུད་སྒྲོག་བྱས་པ་དང་། ཞོད་དུས་ཀྱི་མེ་འགོག་མེ་གསོད་རོགས་སྐྱོབ་ཀྱི་འབྲེལ་ཡོད་བྱ་བ་བཀོད་སྒྲིག་བྱས།