ཚྭ་མཚོའི་ཐོན་ཁུངས་གསར་སྤེལ་བེད་སྤྱོད་དང་སྐྱེ་ཁམས་སྲུང་སྐྱོབ་ཀྱི་རིག་གཞུང་བགྲོ་གླེང་ཚོགས་འདུ་ཟི་ལིང་དུ་བསྡུས།

ཟླ8པའི་ཚེས8ཉིན། ཚྭ་མཚོའི་ཐོན་ཁུངས་གསར་སྤེལ་བེད་སྤྱོད་དང་སྐྱེ་ཁམས་སྲུང་སྐྱོབ་ཀྱི་རིག་གཞུང་བགྲོ་གླེང་ཚོགས་འདུ་ཟི་ལིང་དུ་བསྡུས། ཐེངས་འདིའི་བགྲོ་གླེང་ཚོགས་འདུའི་དུས་ཡུན་ཉིན་གཉིས་ཡིན་པ་དང་། ཀྲུང་གོ་ཚན་རིག་གླིང་མཚོ་སྔོན་ཚྭ་མཚོ་ཞིབ་འཇུག་ཁང་གིས་གཙོ་སྒྲུབ་བྱས་པ་དང་། ཚྭ་མཚོའི་ཐོན་ཁུངས་ལྗང་མདོག་རིན་ཐང་མཐོ་བའི་བེད་སྤྱོད་གཙོ་གནད་ཚོད་ལྟ་ཁང་གིས་རོགས་སྒྲུབ་བྱས།  སྲིད་གཞུང་གི་འབྲེལ་ཡོད་སྡེ་ཁག་དང་ཚན་རིག་ཞིབ་འཇུག་ཁང་། མཐོ་རིམ་སློབ་གྲྭ་དང་ཁེ་ལས་བཅས་ནས་ཡོང་བའི་འཐུས་མི་200ལྷག་ཙམ་མཉམ་དུ་འཛོམས་ནས། ཚྭ་མཚོའི་ཐོན་ཁུངས་ནུས་མཐོའི་བེད་སྤྱོད་དང་སྐྱེ་ཁམས་སྲུང་སྐྱོབ་མཐུན་སྦྱོར་འཕེལ་རྒྱས་གཏོང་བའི་ཐབས་ལམ་སྐོར་སོགས་རིག་གཞུང་བགྲོ་གླེང་བྱས་པ་དང་། འཛམ་གླིང་རིམ་པའི་ཚྭ་མཚོའི་ཐོན་ལས་རྟེན་གཞི་འཛུགས་སྐྲུན་ལ་དཔེ་རིས་འཆར་འགོད་བྱས།

འགོ་རྩོམ་མཛད་སྒོའི་སྟེང་། ཀྲུང་གོ་ས་གཤིས་ཚན་རིག་གླིང་གཏེར་ཁའི་ཐོན་ཁུངས་ཞིབ་འཇུག་ཁང་གི་ཡོན་ཧྲི་ཀྲིན་མན་ཕིང་དང་།  ཀྲུང་གོ་ཚན་རིག་གླིང་ལན་ཀྲོའུ་ཡན་ལག་ཁང་། མཚོ་སྔོན་ཞིང་ཆེན་ཚན་རིག་ལག་རྩལ་ཐིན། ཀྲུང་གོ་ཚན་རིག་གླིང་བརྒྱུད་རིམ་བཟོ་སྐྲུན་ཞིབ་འཇུག་ཁང་། ཀྲུང་གོ་ཚྭ་མཚོ་བཟོ་ལས་སྡེ་ཚོགས་ཚད་ཡོད་ཀུང་སི་བཅས་ཀྱི་འབྲེལ་ཡོད་འགོ་ཁྲིད་ཀྱིས་སྔ་རྗེས་སུ་ཤིས་ཚིག་ཕུལ་བ་དང་། མཚོ་སྔོན་ཚྭ་མཚོ་སའོ་ཡིས་ལོ་ངོ་དྲུག་ཅུའི་རིང་བླངས་པའི་འོད་སྟོང་འཕྲོ་བའི་གྲུབ་འབྲས་དང་རྒྱལ་ཁབ་ཀྱི་ཚྭ་མཚོ་ཚན་རྩལ་ལས་དོན། ས་ཁོངས་དཔལ་འབྱོར་སྤྱི་ཚོགས་འཕེལ་རྒྱས་ལ་ཕུལ་དུ་བྱུང་བའི་བྱས་རྗེས་བཞག་པར་ཁས་ལེན་གང་ལེགས་བྱས། མཚོ་སྔོན་ཚྭ་མཚོ་སའོ་ཡི་སའོ་ཀྲང་གཞོན་པ་ཀྲིན་ཧྲི་ལིས་ཀྱིས་ཚོགས་འདུའི་སྟེང་ཁ་ཡིག་ལ《ཚྭ་མཚོའི་ལོ་ངོ་དྲུག་ཅུ་རིང་གི་བྱས་རྗེས་ལ། མུ་མཐུད་གསར་གཏོད་སྐུལ་འདེད་གཏོང》ཞེས་པའི་བརྗོད་དོན་གཙོ་བོའི་སྙན་ཞུ་ཕུལ། སྙན་ཞུ་ལས་ཞིབ་འཇུག་སའོ་ཡི་ད་ལྟའི་བར་གྱི་འོད་སྟོང་འཕྲོ་བའི་གྲུབ་འབྲས་ལ་མ་ལག་ལྡན་པའི་སྒོ་ནས་ཕྱིར་དྲན་བྱས་པ་མ་ཟད།    དུས་རབས་གསར་པའི་རྒྱབ་ལྗོངས་འོག རྒྱལ་ཁབ་ཀྱི་དགོས་མཁོ་གལ་ཆེན་དང་འཛམ་གླིང་གི་ཚན་རྩལ་མདུན་གྲལ་ལ་ཁ་ཕྱོགས་ནས་ཞིབ་འཇུག་སའོ་ཡི་མ་འོངས་འཕེལ་རྒྱས་ཀྱི་འཐབ་ཇུས་ཁ་ཕྱོགས་དང་གཙོ་གནད་ལས་འགན་ལ་རྒྱང་ལྟ་བྱས།

དེ་དང་ཆབས་ཅིག སྐབས་བཅུ་གཉིས་པའི་རྒྱལ་ཡོངས་སྲིད་གྲོས་ཀྱི་ཀྲུའུ་ཞི་གཞོན་པ། ཀྲུང་གོ་ཚན་རིག་གླིང་མཚོ་སྔོན་ཚྭ་མཚོ་ཞིབ་འཇུག་སའོ་ཡི་སའོ་ཀྲང་ཟུར་པ། ཞིབ་འཇུག་པ་མ་ཕེ་ཧྭ་དང་། ཀྲུང་གོ་ཚན་རིག་གླིང་ས་གཤིས་དང་སའི་གོ་ལའི་དངོས་ལུགས་ཞིབ་འཇུག་སའོ་ཡི་ཡོན་ཧྲི་ཀའོ་ཀྲིན་ཐང་། ཀྲུང་གོ་ཚན་རིག་གླིང་མདོ་དབུས་མཐོ་སྒང་ཞིབ་འཇུག་སའོ་ཡི་ཡོན་ཧྲི་ཧྥང་ཞའོ་མིན། ཀྲུང་ནན་སློབ་ཆེན་གྱི་ཡོན་ཧྲི་ཀྲའོ་ཀྲུང་ཝའེ། དེ་མིན་ཆེད་མཁས་པ་གྲགས་ཅན་ཕན་ཐུང་ཙུང་བཅས་ཀྱི་ཚོགས་ཆེན་སྟེང་གཙོ་དོན་སྙན་ཞུ་ཕུལ། སའི་གོ་ལའི་ཚན་རིག་དང་ཚྭ་རིགས་གཏེར་རྫས། ཚྭ་མཚོའི་རྫས་འགྱུར། ཕྱོགས་བསྡུས་བེད་སྤྱོད་སོགས་ཀྱི་ཁ་ཕྱོགས་ལ་དམིགས་ནས། རང་རྒྱལ་གྱི་ཚྭ་མཚོའི་ཐོན་ཁུངས་ཀྱི་ཁྱད་ཆོས་དང་གསར་སྤེལ་གྱི་འགག་རྩར་དབྱེ་ཞིབ་གཏིང་ཟབ་བྱས་ཏེ།  ཚྭ་མཚོའི་ཚན་རྩལ་གྱི་ཆེས་གསར་བའི་ཚད་བརྒལ་དང་མ་འོངས་འཕེལ་ཕྱོགས་མ་ལག་ལྡན་པའི་སྒོ་ནས་འགྲེམ་སྟོན་བྱས་པ་དང་།    ཐོན་ཁུངས་ཁོར་ཡུག་གི་ཚོད་འཛིན་སེལ་བ་དང་ཐོན་ལས་ཕྲེང་འབྲེལ་གྱི་མཉེན་གཤིས་མཐོ་རུ་གཏོང་བར་རྒྱང་ལྟའི་རང་བཞིན་གྱི་བསམ་ཕྱོགས་འདོན་སྤྲོད་བྱས་ཡོད།

དེ་ལས་གཞན། ན་གཞོན་རིག་གནས་པ150ལྷག་ཙམ་གྱིས་བགྲོ་གླེང་ཚོགས་འདུའི་གླེང་སྟེགས་ཁྲོད་ཚྭ་མཚོའི་འཐབ་ཇུས་ཀྱི་གཏེར་ཁའི་ཐོན་ཁུངས་འགན་སྲུང་དང་སྐྱེ་ཁམས་བདེ་འཇགས།  ཚྭ་མཚོའི་ཐོན་ཁུངས་ལྗང་མདོག་ནུས་ཆེའི་དབྱེ་འབྱེད་དང་བེད་སྤྱོད།    ཚྭ་མཚོའི་ཐོན་ཁུངས་ཀྱི་སྤུས་ཚད་མཐོ་ཞིང་རིན་ཐང་མཐོ་བའི་ཐོན་རྫས་གསར་སྤེལ་བེད་སྤྱོད་སོགས་གླེང་མང་བའི་གྲོས་གཞི་ལ་དམིགས་ནས་བརྗེ་རེས་གཏིང་ཟབ་བྱས་པས། བགྲོ་གླེང་ཚོགས་འདུར་གསོན་ཤུགས་དང་ལྟ་ཕྱོགས་གསར་པ་བསྣན་ཡོད་ལ། ཚྭ་མཚོའི་ཐོན་ཁུངས་རྒྱུན་མཐུན་བེད་སྤྱོད་དང་སྐྱེ་ཁམས་སྲུང་སྐྱོབ་བྱ་རྒྱུར་བློ་གྲོས་དང་སྟོབས་ཤུགས་གསར་པ་ཕུལ་ཡོད།

ཐེངས་འདིའི་བགྲོ་གླེང་ཚོགས་འདུ་ནི་མཚོ་སྔོན་ཚྭ་མཚོ་ཞིབ་འཇུག་ཁང་གི་ལོ་ངོ་དྲུག་ཅུའི་རིང་གི་འཕེལ་རྒྱས་གྲུབ་འབྲས་གཅིག་སྡུད་འགྲེམ་སྟོན་བྱས་པ་ཞིག་ཡིན་ལ། བློ་གྲོས་གཅིག་སྡུད་དང་མ་འོངས་པར་ཁ་ཕྱོགས་ནས་ཚྭ་མཚོའི་ཐོན་ཁུངས་གསར་སྤེལ་སྔར་ལས་ལྗང་མདོག་ཅན་དང་ཕན་ནུས་མཐོ་བ། རྒྱུན་མཐུད་བཅས་ཀྱི་ཕྱོགས་སུ་བསྐྱོད་རྒྱུར་སྐུལ་འདེད་གཏོང་བའི་གོ་སྐབས་གལ་ཆེན་ཞིག་ཀྱང་རེད།  མཚོ་སྔོན་ཚྭ་མཚོ་སའོ་ཡིས“རྒྱལ་ཁབ་རུ་ཁག”དང“རྒྱལ་ཁབ་ཀྱི་མི”ཞེས་པའི་འགན་འཁྲི་མུ་མཐུད་ཕྲག་ཏུ་བླངས་ནས། ཚན་རྩལ་གསར་གཏོད་ལ་བརྟེན་ནས་ཚྭ་མཚོའི་ཐོན་ཁུངས་གསར་སྤེལ་དང་སྐྱེ་ཁམས་སྲུང་སྐྱོབ་ཀྱི་མཐུན་སྦྱོར་འཕེལ་རྒྱས་ལ་སྐུལ་འདེད་བཏང་སྟེ། རྒྱལ་ཁབ་ཀྱི་ཐོན་ཁུངས་བདེ་འཇགས་འགན་སྲུང་དང་འཛམ་གླིང་རིམ་པའི་ཚྭ་མཚོའི་ཐོན་ལས་རྟེན་གཞི་འཛུགས་སྐྲུན་བྱ་རྒྱུར་ཚན་རྩལ་གྱི་འདེགས་སྐྱོར་ནུས་ལྡན་འདོན་སྤྲོད་བྱ་རྒྱུ་རེད།