ཏིང་ཞུའེ་ཞང་ཧྲིན་པིས་ཏི་པའོ་རྒྱལ་སྤྱིའི་དཔལ་འབྱོར་གླེང་སྟེགས་སྐབས་ཉེར་བརྒྱད་པའི་ཚང་འཛོམས་གྲོས་ཚོགས་ལ་ཞུགས་ནས་ཤིས་ཚིག་ཕུལ།

ཟླ6པའི་ཚེས20ཉིན།　ཀྲུང་གུང་ཀྲུང་དབྱང་ཆབ་སྲིད་ཅུས་ཀྱི་རྒྱུན་ལས་ཨུ་ཡོན་ནམ་རྒྱལ་སྲིད་སྤྱི་ཁྱབ་ཁང་གི་ཙུང་ལི་གཞོན་པ་ཏིང་ཞུའེ་ཞང་ཧྲིན་པིས་ཏི་པའོ་རྒྱལ་སྤྱིའི་དཔལ་འབྱོར་གླེང་སྟེགས་སྐབས་ཉེར་བརྒྱད་པའི་ཚང་འཛོམས་གྲོས་ཚོགས་ལ་ཞུགས་ནས་ཤིས་ཚིག་ཕུལ།

ཞིན་ཧྭ་གསར་འགྱུར་ཁང་གི་གློག་འཕྲིན་ལྟར།　ཀྲུང་གུང་ཀྲུང་དབྱང་ཆབ་སྲིད་ཅུས་ཀྱི་རྒྱུན་ལས་ཨུ་ཡོན་ནམ་རྒྱལ་སྲིད་སྤྱི་ཁྱབ་ཁང་གི་ཙུང་ལི་གཞོན་པ་ཏིང་ཞུའེ་ཞང་ཚེས20ཉིན་ཧྲིན་པིས་ཏི་པའོ་རྒྱལ་སྤྱིའི་དཔལ་འབྱོར་གླེང་སྟེགས་སྐབས་ཉེར་བརྒྱད་པའི་ཚང་འཛོམས་གྲོས་ཚོགས་ལ་ཞུགས་ནས་ཤིས་ཚིག་ཕུལ།

ཏིང་ཞུའེ་ཞང་གིས་བསྟན་དོན།　ལོ10ཡི་སྔོན་ལ།　ཀྲུའུ་ཞི་ཞི་ཅིན་ཕིང་སྐབས་བདུན་ཅུ་པའི་མཉམ་འབྲེལ་རྒྱལ་ཚོགས་ཚོགས་ཆེན་གྱི་སྤྱིར་བཏང་རང་བཞིན་གྱི་རྩོད་གླེང་ལ་ཞུགས་སྐབས་གནང་བའི་གསུང་བཤད་གལ་ཆེན་ནང་།　ཞི་བདེ་དང་འཕེལ་རྒྱས།　དྲང་གཞག　དྲང་བདེན།　དམངས་གཙོ།　རང་དབང་བཅས་ནི་མིའི་རིགས་ཀྱི་ཐུན་མོང་གི་རིན་ཐང་ཡིན་པ་དང་།　མཉམ་འབྲེལ་རྒྱལ་ཚོགས་ཀྱི་བླ་ན་མེད་པའི་དམིགས་འབེན་ཡང་ཡིན།　ཆོད་གཏམ་གལ་ཆེན་དེར་རྒྱལ་སྤྱིའི་སྤྱི་ཚོགས་ཀྱི་རྒྱབ་སྐྱོར་ཆེན་པོ་དང་དང་ལེན་གང་ལེགས་ཐོབ།　དེང་སྐབས་འཛམ་གླིང་གི་ལོ་བརྒྱའི་འཕོ་འགྱུར་མགྱོགས་མྱུར་ངང་འཕེལ་བཞིན་ཡོད་པ་དང་།　འགྲོ་བ་མིའི་རིགས་ཐུན་མོང་གི་འགྲན་སློང་མང་པོར་འཕྲད་ཡོད།　ང་ཚོས་ཀྲུའུ་ཞི་ཞི་ཅིན་ཕིང་གི་གསུང་བཤད་གལ་ཆེན་བསྐྱར་དྲན་བྱེད་པ་དང་།　འགྲོ་བ་མི་ཡོངས་ཀྱི་ཐུན་མོང་གི་རིན་ཐང་བརྟན་སྲུང་དང་དར་སྤེལ་གཏོང་བ།　མཉམ་གྲོས་མཉམ་སྐྲུན་དང་མཉམ་སྤྱོད་ཀྱི་འཛམ་གླིང་ཧྲིལ་བོའི་བཅོས་སྐྱོང་ལྟ་བ་རྒྱུན་འཁྱོངས་བྱས་ནས།　མཉམ་འབྲེལ་རྒྱལ་ཚོགས་ཀྱི་དབང་གྲགས་དང་རྒྱལ་སྤྱིའི་དྲང་སྙོམས་དྲང་བདེན་སྲུང་སྐྱོང་བྱེད་དགོས།　སྟོབས་ཤུགས་གཅིག་ཏུ་སྒྲིལ་ནས་སྒོ་འབྱེད་སྣ་མང་གི་འཛམ་གླིང་དཔལ་འབྱོར་གསར་སྐྲུན་བྱེད་རྒྱུ་རྒྱུན་འཁྱོངས་བྱེད་པ་དང་།　དཔལ་འབྱོར་འཛམ་གླིང་ཧྲིལ་བོ་ཅན་དུ་བསྒྱུར་བའི"ཁེ་ཕན"བགོ་བཤའ་ལེགས་པོ་རྒྱག་དགོས།　དཔལ་ཡོན་མི་འདྲ་བའི་བར་ཕན་ཚུན་བརྗེ་རེས་དང་དཔེ་ལྟ་བྱེད་རྒྱུ་རྒྱུན་འཁྱོངས་བྱས་ཏེ།　རྣམ་པ་གང་རུང་གི་འཇམ་འཐབ་གསར་བ་དང་འདུ་ཤེས་འཛིན་སྟངས་ཀྱི་འགྲན་རྒོལ་ལ་ངོ་རྒོལ་བྱེད་དགོས།　འཛམ་གླིང་གི་ཞི་བདེ་དང་འཕེལ་རྒྱས་སྲུང་སྐྱོང་བྱ་རྒྱུ་རྒྱུན་འཁྱོངས་བྱེད་པ་དང་།　གླེང་མོལ་ལ་བརྟེན་ནས་ཕན་ཚུན་བར་གྱི་ཡིད་ཆེས་ཇེ་བརྟན་དུ་གཏོང་བ་དང་།　གླེང་མོལ་ལ་བརྟེན་ནས་རྩོད་གཞི་སེལ་བ།　གླེང་མོལ་ལ་བརྟེན་ནས་བདེ་འཇགས་ལ་སྐུལ་འདེད་གཏོང་བ་བཅས་བྱས་ཏེ།　　མཉམ་དུ་ཡུན་རིང་ཞི་བདེ་དང་ཐུན་མོང་དར་རྒྱས་ཀྱི་ཕྱོགས་སུ་བསྐྱོད་དགོས།

ཏིང་ཞུའེ་ཞང་གིས་བསྟན་དོན།　ཀྲུང་གོ་ཕྱོགས་ཀྱིས་ཨུ་རུ་སུ་ཕྱོགས་དང་མཉམ་དུ།　ཀྲུའུ་ཞི་ཞི་ཅིན་ཕིང་དང་སྲིད་འཛིན་ཕུའུ་ཅིང་རྣམ་གཉིས་ཀྱི་ཐུན་མོང་ལྟ་བ་གལ་ཆེན་དོན་འཁྱོལ་བྱེད་པ་དང་།　ཀྲུང་གོ་དང་ཨུ་རུ་སིའི་འབྲེལ་བའི་མཐོ་ཚད་དང་རྩ་ཚད།　མཉེན་ཚད་བཅས་ཕྱོགས་ཡོངས་ནས་མཐོ་འདེགས་གཏོང་བ།　སྤུས་ཚད་མཐོ་བའི་གཉིས་ཕན་མཉམ་ལས་རྒྱ་བསྐྱེད་པ།　　རྒྱལ་ཁབ་གཉིས་ཀྱི་མི་དམངས་ལ་བདེ་སྐྱིད་བསྐྲུན་ནས།　　སྔར་ལས་དྲང་གཞག་དང་ལགས་མཐུན།　དར་རྒྱས་བཅས་ཀྱི་སྣེ་མང་འཛམ་གླིང་འཛུགས་ཆེད་བྱས་རྗེས་སྔར་ལས་ཆེན་པོ་འཇོག་འདོད་ཡོད།

ཤིས་ཚིག་ཕུལ་རྗེས་ཀྱི་བསམ་ཚུལ་བརྗེ་རེས་སྐབས་སུ།　ཏིང་ཞུའེ་ཞང་གིས་རྒྱལ་ཁབ་ཆེན་པོའི་འབྲེལ་བ་དང་ཀྲུང་གོ་དང་ཨུ་རུ་སུའི་སློབ་གསོ་ཚན་རྩལ་མཉམ་ལས་སོགས་ཀྱི་ཐད་ནས་ཚང་འཛོམས་གྲོས་ཚོགས་ཀྱི་མགོ་འཛིན་པའི་དྲི་བར་ལན་བཏབ།

ཚོགས་འདུའི་སྐབས་སུ།　ཏིང་ཞུའེ་ཞང་གིས་ད་དུང་ཨུ་རུ་སུའི་ཙུང་ལི་གཞོན་པ་དང་པོ་མན་ཐུའུ་ལུའོ་ཧྥུ་དང་།　ཙུང་ལི་གཞོན་པ་ནུའོ་ཝ་ཁི།　རྡོ་སྣུམ་ཀུང་སིའི་སྤྱི་འདོམས་པ་ཞེ་ཆིན།　རང་བྱུང་སོལ་རླངས་བཟོ་ལས་མ་རྐང་ཚད་ཡོད་ཀུང་སིའི་སྤྱི་འདོམས་པ་སྨི་ལེ་སོགས་དང་སོ་སོར་ཐུག་འཕྲད་གནང་།　།