མཚོ་སྔོན་གྱི་སྨན་བཅོས་འགན་སྲུང་སྐོར་གྱི་གཏམ་བཟང་།

སྨན་བཅོས་འགན་སྲུང་ཁྱིམ་མིར་མཉམ་སྤྱོད་བྱ་བའི་ཁྱབ་ཁོངས་སླར་ཡང་ཆེ་རུ་ཕྱིན།     

ལས་བཟོ་པའི་སྨན་བཅོས་འགན་སྲུང་གི་མི་སྒེར་རྩིས་ཐོ་ཡིས་ཁྱིམ་མི་ལ་ཡང་གོ་ཆོད་པའི་ནུས་པ་སྔར་བས་འདོན་སྤེལ་ཡག་པོ་བྱ་ཆེད།    ཞིང་ཆེན་སྨན་བཅོས་འགན་སྲུང་ཅུའུ་ཡིས་བཅོས་སྒྱུར་རྒྱུན་ཆད་མེད་པར་གཏིང་ཟབ་ཏུ་བཏང་ནས་ལས་བཟོའི་སྨན་བཅོས་འགན་སྲུང་གི་མི་སྒེར་གྱི་རྩིས་ཐོའི་མཉམ་ཕན་ཁྱབ་ཁོངས་དེ་ལས་བཟོའི་གཉེན་ཉེའི་བར་སྔར་བས་རྒྱ་ཆེར་བཏང་བ་དང་། མི་སྒེར་གྱི་རྩིས་ཐོའི་མ་དངུལ་དེ་ལས་བཟོ་མི་སྒེར་དང་དེ་བཞིན་དེའི་གཉེན་ཉེ་སྨན་བཅོས་འགན་སྲུང་ནང་ཞུགས་པའི་མིའི་སྒེར་དངུལ་འཇལ་བའི་རིམ་པ་དེ་འཇལ་ཆོག་པ་མ་ཟད། གནས་གཏན་འཁེལ་གྱི་སྨན་ཁང་དུ་སྨན་བཅོས་བྱེད་རིང་སྤྲད་དགོས་པའི་མི་སྒེར་གྱི་སྨན་རིན་ཐད་ཀྱང་སྤྱད་ཆོག་གི་ཡོད།     

ཉེ་བའི་ལོ་ཤས་རིང་ཞིང་ཆེན་སྨན་བཅོས་འགན་སྲུང་ཅུའུ་ཡིས་མང་ཚོགས་ཀྱི“བྲེལ་བ། དཀའ་བ། སེམས་ཁྲལ། རེ་སྒུག”བཅས་ལ་དམིགས་ནས་སྨན་བཅོས་འགན་སྲུང་ལམ་ལུགས་བཅོས་སྒྱུར་ཟམ་མི་ཆད་པར་གཏིང་ཟབ་ཏུ་བཏང་སྟེ། རྒྱལ་ཡོངས་ཀྱི་སྔོན་དུ་ལས་བཟོའི་སྨན་བཅོས་འགན་སྲུང་གི་མི་སྒེར་གྱི་རྩིས་ཐོའི་ཁྱབ་ཁོངས་སུ་ལས་བཟོ་བ་རང་ཉིད་ནས་རང་གི་བཟའ་ཟླ་དང་།    ཕ་མ།    བུ་ཕྲུག་བཅས་ལ་ཞིང་ཆེན་ནང་ཁུལ་གྱི་ས་ཁུལ་ལས་བརྒལ་ནས་སྨན་བཅོས་བྱེད་དུས། མི་སྒེར་གྱི་རྩིས་ཐོ་ལས་ཁྱིམ་ཚང་ལ་རོགས་སྐྱོར་བྱ་ཆོག་པ་ཁྱོན་ཡོངས་ནས་མངོན་འགྱུར་བྱུང་།    ད་སྔའི་བར་ཞིང་ཆེན་ཡོངས་ཀྱིས་ཁྱིམ་ཚང་ལ་རོགས་སྐྱོར་བྱེད་པའི་རྩིས་ཐོའི་རྣམ་གྲངས་ཁྲི37.6བཏོད་ཅིང་། ཁྱོན་མི་ཐེངས་ཁྲི419.3ལ་རོགས་སྐྱོར་བྱས་པ་དང་། ཁྱོན་མ་དངུལ་སྒོར་དུང་ཕྱུར10.55བཏང་ལ། དེའི་ནང་མི་ཐེངས་ཁྲི377.8ལ་རོགས་སྐྱོར་བྱས་ནས་གནས་གཏན་འཁེལ་སྨན་ཁང་དུ་གྲོན་དངུལ་སྒོར་དུང་ཕྱུར་8.98སྤྲད་པ་དང་། མི་ཁྲི་41.5ལ་གྲོང་མིའི་སྨན་བཅོས་འགན་སྲུང་གྲོན་དངུལ་སྒོར་དུང་ཕྱུར1.57འཇལ་ཡོད་དོ། །     

ཐེངས་འདིའི་མི་སྒེར་གྱི་རྩིས་ཐོ་བཅོས་སྒྱུར་གཏིང་ཟབ་ཏུ་དང་། ལས་བཟོའི་སྨན་བཅོས་འགན་སྲུང་གི་མི་སྒེར་གྱི་རྩིས་ཐོ་ལས་གཉེན་ཉེ་ལ་རོགས་སྐྱོར་བྱེད་ཆོག་པའི་ཁྱབ་ཁོངས་དེ་དེ་སྔའི“བཟའ་ཟླ་དང་།    ཕ་མ།    བུ་ཕྲུག”བཅས་ནས་ནུ་བོ་དང་གཅེན་མོ་དང་གཅུང་མོ།    སྤོ་བོ་དང་རྨོ་བོ།    ཚ་བོ་དང་ཚ་མོ་བཅས་བར་ལ་བསྐྱེད་དེ། ལས་བཟོའི་སྨན་བཅོས་འགན་སྲུང་གི་མི་སྒེར་གྱི་རྩིས་ཐོ་ཞིང་ཆེན་བརྒལ་ནས་རོགས་སྐྱོར་བྱ་བར་སྐུལ་འདེད་གཏིང་ཟབ་བཏང་བ་དང་། རོགས་སྐྱོར་གྱི་ནུས་པ་འདོན་སྤེལ་གང་ལེགས་བྱས་ཏེ་ལས་བཟོ་རང་ཉིད་དང་དེ་བཞིན་འགན་སྲུང་ནང་ཞུགས་པའི་གཉེན་ཉེའི་འགྲོ་གྲོན་ཡང་འཇལ་ཆོག་པ་བྱས་ནས་ནད་ལ་ལྟ་ཞིང་སྨན་བཅོས་བྱེད་པའི་ཁུར་པོ་ཇེ་ཡང་དུ་ནུས་ལྡན་གཏོང་རྒྱུ་ཡིན་པ་ཁ་གསལ་བཏོན་ཡོད་དོ། །