ཤིན་ཧྭ་གསར་འགྱུར་ཁང་ཤིས་ཨན་ནས་ཟླ་5ཚེས་17ཉིན་གློག་འཕྲིན་འབྱོར་པ་གཞིར་བཟུང་། ཟླ་5ཚེས་17ཉིན་གྱི་ཕྱི་དྲོར། རྒྱལ་ཁབ་ཀྱི་ཀྲུའུ་ཞི་ཞི་ཅིན་ཕིང་གིས་ཤིས་ཨན་དུ་ཀྲུང་གོར་ཀྲུང་གོ་དང་ཨེ་ཤེ་ཡ་དབུས་མའི་དབུ་ཚོགས་ལ་ཞུགས་པ་དང་འབྲེལ་རྒྱལ་དོན་འཚམས་འདྲི་གནང་བར་ཕེབས་པའི་ཧ་སག་སི་ཐན་གྱི་ཙུང་ཐུང་ཐུའོ་ཁཱ་ཡེ་ཕུའུ་དང་གྲོས་མོལ་གནང་བ་རེད།     ཞི་ཅིན་ཕིང་གིས་ནན་བཤད་གནང་དོན། རང་བཙན་རང་བདག་དང་། བདེ་འཇགས་བརྟན་ལྷིང་། དར་རྒྱས་གོང་འཕེལ་བཅས་ཀྱི་ཧ་སག་སི་ཐན་ནི་ཀྲུང་གོ་དང་ཧ་སག་སི་ཐན་རྒྱལ་ཁབ་གཉིས་པོའི་མི་དམངས་ཀྱི་ཐུན་མོང་གི་ཁེ་ཕན་དང་མཐུན་ཡོད། ཧ་སག་སི་ཐན་གྱིས་རྒྱལ་ཁབ་ཀྱི་རང་བཙན་དང་། བདག་དབང་། མངའ་ཁོངས་ཆ་ཚང་བཅས་ལ་སྲུང་སྐྱོང་བྱ་རྒྱུར་ཀྲུང་གོ་ཕྱོགས་ཀྱིས་རྒྱབ་སྐྱོར་མཐའ་གཅིག་ཏུ་བྱ་རྒྱུ་དང་ཧ་སག་སི་ཐན་གྱིས་རང་རྒྱལ་ཁབ་ཀྱི་གནས་ཚུལ་དང་འཚམ་པའི་འཕེལ་རྒྱས་ཀྱི་ལམ་བུར་བསྐྱོད་པར་རྒྱབ་སྐྱོར་བྱ་རྒྱུ་ཡིན། ངས“རྒྱུད་གཅིག་ལམ་གཅིག”མཉམ་སྐྲུན་གྱི་གྲོས་འགོ་བཏོན་ནས་ལོ་10སོང་རིང་ཀྲུང་ཧ་རྒྱལ་ཁབ་གཉིས་པོས་མཉམ་ལས་རྣམ་གྲངས་གལ་ཆེན་བཅུ་ཕྲག་ཁ་ཤས་གྲུབ་འབྲས་ཐོབ་པའི་ངང་ལག་བསྟར་བྱས་པ་ལས་རྒྱལ་ཁབ་གཉིས་པོའི་མི་དམངས་ལ་ཕན་པ་ཐོབ་པ་དང་ཐུན་མོང་ཐོག་འཕེལ་རྒྱས་ལ་སྐུལ་མ་ཐེབས་ཡོད། ཕྱོགས་གཉིས་པོས་དཔལ་འབྱོར་ཚོང་དོན་དང་། མ་འཇོག ཞིང་ལས། རླངས་འཁོར་བཟོ་སྐྲུན། ནུས་རྒྱུ་སོགས་ཁྱབ་ཁོངས་ཀྱི་མཉམ་ལས་བྱེད་རྒྱ་ཆེ་རུ་གཏོང་བ་དང་། ཕན་ཚུན་འབྲེལ་མཐུད་བྱེད་ཟབ་ཏུ་གཏོང་བ། སྐམ་མཚོ་མཉམ་འདྲེན་ལ་སྐུལ་འདེད་གཏོང་བ། དྲ་ཐོག་ཚོང་དོན་དང་། གསར་གཏོད། གྲངས་གཞི་ཆེ་མོ་སོགས་ཁྱབ་ཁོངས་གསར་པའི་མཉམ་ལས་བྱེད་རྒྱ་ཆེ་རུ་གཏོང་བ། ཕན་ཚུན་རིག་གནས་ལྟེ་གནས་འཛུགས་པ་དང་ལུའུ་པན་བཟོ་ཁང་འཛུགས་པར་དམ་འཛིན་བྱེད་པ། ཕན་ཚུན་རྒྱལ་སྒྲོལ་ཐོངས་མཆན་འགོད་མི་དགོས་པའི་གྲོས་ཆོད་ལ་མིང་རྟགས་འགོད་པ་གོ་སྐབས་སུ་འཛིན་ནས་མི་ཆོས་རིག་གནས་སྤེལ་རེས་དང་མཉམ་ལས་ལ་ཤུགས་སྣོན་བརྒྱབ་སྟེ་དམངས་འདོད་ཀྱི་རྨང་གཞི་བརྟན་དུ་གཏོང་དགོས། ཧ་སག་སི་ཐན་ཕྱོགས་ཀྱིས་2024ལོར་ཀྲུང་གོར་ཧ་སག་སི་ཐན་གྱི་ཡུལ་སྐོར་ལོ་གཉེར་རྒྱུར་དགའ་བསུ་ཞུ་རྒྱུ་ཡིན། ཤིས་ཨན་དུ་བཅའ་སྡོད་ཧ་སག་སི་ཐན་གྱི་སྤྱི་ཁྱབ་ཁེ་སྐྱོང་ལས་ཤག་བཙུགས་པ་དེས་རྒྱལ་ཁབ་གཉིས་པོའི་ས་གནས་དབར་གྱི་སྤེལ་རེས་ལ་སྐུལ་འདེད་ནུས་ལྡན་ཐེབས་རྒྱུ་ཡིན་པའི་ཡིད་ཆེས་ཡོད། ཕྱོགས་གཉིས་པོས་ད་དུང་སྨྱན་སྦྱོར་གྱི་སྤེལ་རེས་མཉམ་ལས་ལ་ཤུགས་སྣོན་བརྒྱབ་ནས་ཐུན་མོང་ཐོག་ཀྲུང་ཧའི་མཛའ་གྲོགས་གཏམ་རྒྱུད་ཡག་པོ་ཤོད་དགོས།    ཐུའོ་ཁཱ་ཡེ་ཕུའུ་ཡིས་བརྗོད་དོན། གདན་ཞུས་ལྟར་ཤིས་ཨན་དུ་ཀྲུང་གོ་དང་ཨེ་ཤེ་ཡ་དབུས་མའི་དབུ་ཚོགས་ལ་ཞུགས་པ་དང་འབྲེལ། ཀྲུང་གོར་རྒྱལ་དོན་འཚམས་འདྲི་བྱ་རྒྱུ་བྱུང་བར་ཡང་ཧ་ཅང་དགའ་པོ་བྱུང་། “རྒྱུད་གཅིག་ལམ་གཅིག”མཉམ་སྐྲུན་ནི་རླབས་ཆེན་གྱི་གྲོས་འགོ་ཞིག་ཡིན་པས་ཧ་སག་སི་ཐན་ཕྱོགས་ཀྱིས་མུ་མཐུད་ཧུར་ཐག་ཞུགས་རྒྱུ་ཡིན། མིག་སྔའི་རྙོག་འཛིང་ཆེ་བའི་རྒྱལ་སྤྱིའི་དུས་བབ་འོག་ཀྲུའུ་ཞི་ཞི་ཅིན་ཕིང་གིས་གོ་ལ་ཧྲིལ་པོའི་འཕེལ་རྒྱས་ཀྱི་གྲོས་འགོ་དང་། གོ་ལ་ཧྲིལ་པོའི་བདེ་འཇགས་ཀྱི་གྲོས་འགོ གོ་ལ་ཧྲིལ་པོའི་ཤེས་དཔལ་གྱི་གྲོས་འགོ་བཅས་བཏོན་པར་དོན་སྙིང་གལ་ཆེན་ལྡན་ཡོད་པས། ཧ་སག་སི་ཐན་ཕྱོགས་ཀྱིས་རྒྱབ་སྐྱོར་ཧུར་ཐག་བྱ་རྒྱུ་དང་དེའི་ཐད་ཀྲུང་གོ་ཕྱོགས་དང་མཐུན་སྦྱོར་མཉམ་ལས་ལ་ཤུགས་སྣོན་རྒྱག་འདོད་ཡོད། ཧ་སག་སི་ཐན་ཕྱོགས་ཀྱིས་ཀྲུང་གོ་ཕྱོགས་དང་མཉམ་དུ་ཀྲུང་གོ་དང་ཨེ་ཤེ་ཡ་དབུས་མའི་ལམ་སྲོལ་གང་ལེགས་སྤྱད་དེ་ས་ཁུལ་གྱི་བདེ་འཇགས་དང་། བརྟན་ལྷིང་། འཕེལ་རྒྱས་བཅས་ལ་ཐུན་མོང་ཐོག་སྐུལ་འདེད་གཏོང་འདོད་ཡོད།    གྲོས་མོལ་གནང་མཇུག་འགྲིལ་རྗེས་རྒྱལ་ཁབ་གཉིས་པོའི་གཙོ་བདག་གིས《ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་དང་ཧ་སག་སི་ཐན་སྤྱི་མཐུན་རྒྱལ་ཁབ་ཀྱི་མཉམ་འབྲེལ་གསལ་བསྒྲགས》ལ་མིང་རྟགས་བཀོད་ནས་དཔལ་འབྱོར་ཚོང་དོན་དང་། ནུས་རྒྱུ། འགྲིམ་འགྲུལ། ཞིང་ལས། ཕན་ཚུན་འབྲེལ་མཐུད། མི་ཆོས་རིག་གནས། ས་གནས་སོགས་ཁྱབ་ཁོངས་ཀྱི་ཕྱོགས་གཉིས་ཀྱི་མཉམ་ལས་ཡིག་ཆ་མང་པོར་མིང་རྟགས་བཀོད་པར་ཐུན་མོང་ཐོག་བདེན་དཔང་གནང་བ་རེད།