མཚོ་སྔོན་ཞིང་ཆེན་མི་དམངས་སྲིད་གཞུང་དྲ་བ།
དུས་ཚོད་ནི་འུ་ཅག་གི་འཚོ་བའི་བར་གསེང་ན་གཟུགས་མེད་ཀྱི་རླུང་བུ་ལྟར་ཡར་ཡར་འཕྱོ་ཞིང་མར་མར་ལྡིང་། དུས་ཚོད་ནི་ལྷུང་ལྷུང་གི་གཙང་པོ་བཞིན་ཁ་སང་དང་དེ་རིང་། སང་ཉིན་བཅས་ཀྱི་ཡུར་ལམ་དུ་མི་སྡོད་རྒྱང་ནས་རྒྱང་ལ་བྱེར།
ཆུང་དུས་སུ། ཐག་ཐག་གི་དུས་ཚོད་ནི་སྒོ་ཕྱི་ཁྱིམ་བར་ན་བདའ་འདེད་དང་ཡིབ་འཚོལ་ལ་བྲེལ་བའི་བྱིས་པ་ཚོའི་འཛུམ་རྐོང་ཁྲོད་དུ་ཤར་རེར་བཞུར་ཞིང་། རྩྭ་ཐང་དང་སྤང་ཁུག་ཏུ་མེ་ཏོག་གི་ཁ་དོག་བགྲངས་ཤིང་གཡུ་སྦྲང་གི་འཕུར་རྩལ་ལ་ཕྱོགས་ཏེ་དུས་ཀྱི་མདའ་མོ་ཇི་ལྟར་ཤོར་པའང་མ་ཚོར།
གཞོན་པའི་དུས། ལང་ཤོར་དང་པྲ་ཆལ་གྱི་ཁྲོ་འཛིང་ཁྲོད་དུ། ཕམ་ཁར་མགོ་མི་སྒུར་ཞིང་ཅི་ནུས་ལ་སྤོབས་སེམས་བརྟས་པའི་ང་རྒྱལ་གྱི་སྒང་བུ། མཁའ་དབྱིངས་སུ་བྱིའུ་ཆུང་དང་མཉམ་དུ་ཁེངས་དྲེགས་ཀྱིས་འཕྱོ། བྱ་ལས་གང་ལའང་ཨ་གསར་ཚ་བོས་འཇུག་ཅི་ཐུབ་ཀྱིས་དུས་ཀྱི་འཇའ་ཚོན་ཇི་ལྟར་ཡལ་བའང་མ་རྟོགས།
དར་མའི་དུས། སེམས་ཁྲལ་དང་བྱ་གཞག་གི་དྲ་བའི་ཀློང་དུ་བར་སྣང་ན་རྒྱུ་བའི་གླག་རྒོད་ཇི་བཞིན་མི་ཁ་དང་ཕམ་ཉེས་ཀྱི་ལྷགས་རླུང་ལ་འཐབ་བཞིན་སྒྲ་མེད་འུར་མེད་ངང་གཞོན་ཤ་དོད་ཅིང་གསོན་ཤུགས་རྒྱས་པའི་རང་མདངས་འཕྲོག་སོང་རུང་དྲོད་ཁོལ་གྱི་བདེ་སྐྱིད་ཅིག་ལ་བརྩོན་ཞིང་རེ།
རྒས་པའི་དུས། འགྱོད་གདུང་དང་ཞེན་ཆགས་ཀྱི་ཤུགས་རིང་ཁྲོད་དུ། དཔྲལ་ངོར་གཉེར་རིས་བབས་ཤིང་གཟུགས་གཞི་ཐུར་དུ་སྒུར། དབུ་སྐྲར་སེ་མདའ་ལྷུང་སྟེ་ན་རྒས་ལྕགས་ཐག་ཁུར་བའི་སྒོ་ཁྱི་བཞིན་བསྐྱར་ཟློས་ཀྱི་འོ་དོད་དང་འགྱོད་སེམས་ཀློང་ན་སྐྱ་ཟད་སྔོ་རྡིབ་ཀྱི་འཚོ་བར་རྫོགས་ཚིག་འབྲི་ལ་ཉེ།
འདི་ལྟར། མདུན་དུ་རྒྱུག་པའི་ཆུ་མོ་བཞིན་ཕྱིར་མི་ལོག་པ་དེ་དུས་ཚོད་ཀྱི་རང་མདངས་རེད། ངང་ཚུལ་དེ་བཞིན་སྨྲ་བ་བྲལ་བའི་དུས་ཚོད་ལ་ངེད་ཅག་གིས་གཅེས་སྤྲས་བྱེད་དགོས་པ་སྟེ། ཁྱིམ་བཟའ་ཚང་དང་གྲོགས་མཛའ་བཤེས་ལ་འགྲོགས་པའི་ལྷང་ལྷང་གི་དགོད་སྒྲ་དང་འཛུམ་པ་རེ་རེར་གཅེས་སྤྲས་བྱེད་ཤེས་དགོས། ནང་སྤུན་ཟླ་དང་ལས་རོགས་འཐབ་རོགས་ཚོར་ལྷན་འཛོམས་ཀྱི་སྙིང་གཏམ་དང་དགའ་དགོད་ཀྱི་ལབ་གླེང་བགྱིད་པར་སེར་སྣ་སྤངས་དགོས། མཚམས་མེད་བཞུར་ནས་དབུགས་ངལ་མི་གསོ་བ་དེ་དུས་ཚོད་ཀྱི་རང་མདངས་རེད། དུས་ཚོད་ཀྱི་རྩོལ་བ་དེ་བཞིན་མི་སུ་དང་གང་གིས་ཀྱང་བརྩོན་འགྲུས་དང་རྒྱུན་འཁྱོངས་ཀྱི་གོམ་མཚམས་འཇོག་མི་རུང་།
དུས་ཚོད་ནི་རིན་ཆེན་གྱི་ནོར་བུ་བཞིན་རྩ་ཆེ་བས། འཚར་ལོངས་དང་གྲུབ་འབྲས་ཀྱི་རྨང་རྡོ་ལྟ་བུ་ཡིན། དུས་ཚོད་ནི་རིན་བྲལ་གྱི་གསེར་དངུལ་བཞིན་ཁུག་དཀའ་བས། ཚེ་སྲོག་གི་འཕར་རྩ་དང་ལོ་ཟླ་ཡི་འཁོར་སྐྱོད་ཡིན། རླབས་ཆེན་གྱི་ཚན་རིག་པ་དག་གིས་མི་ཚེ་གང་བོར་སེམས་ཤུགས་ཡོད་ཚད་བཏོན་ཏེ་ཚོད་ལྟ་ཁང་དུ་རབ་དང་རིམ་པའི་ཚོད་ལྟའི་ཕམ་ཁ་གང་མང་བརྒྱུད་ད་གཟོད་ངོམ་རི་བའི་སྔོན་མེད་ཀྱི་གསར་གཏོད་ཆེན་པོ་ལེགས་འགྲུབ་བྱུང་བ་མིན་ནམ། རླབས་ཆེན་གྱི་རྩོམ་པ་པོ་རྣམ་པས་ཀྱང་ཉིན་མཚན་དབྱེར་མེད་དུ་ལྟ་ཀློག་དང་རྩོམ་འབྲི་བྱས་པ་བརྒྱུད་ད་གཟོད་སྤམ་མཐུག་པའི་གླེགས་བམ་གྱི་རི་བོ་བརྩིགས་པ་མིན་ནམ། དཀའ་སྡུག་དང་རྔུལ་ཆུས་བརླན་པའི་རླབས་ཆེན་གྱི་གྲུབ་འབྲས་རེ་རེའི་རྒྱབ་ལོགས་སུ་ཁུ་སིམ་མེའི་དུས་ཚོད་ཀྱི་འཕར་སྒྲ་མངོན་ཡོད་ལ། དལ་བུར་བཞུར་བའི་དུས་ཚོད་ཀྱི་ཁ་དོག་བཀྲ་ཡོད། དུས་ཚོད་ཀྱི་རོགས་རམ་འོག་ད་གཟོད་ཕུགས་བསམ་ལ་གཤོག་པ་ཐོགས་ཤིང་རེ་འདུན་ལ་འབྲས་བུ་སྨིན་པ་རེད། དུས་ཚོད་ཀྱི་སྐྱོར་མའི་འོག་ད་གཟོད་རྒྱང་རིང་ལ་བསྲིངས་པའི་དམིགས་འདུན་གྱི་ཚད་ཤིང་དེར་སླེབས་པ་རེད་ཨང་།
རྙོག་འཛིང་ཆེ་བའི་འཇིག་རྟེན་འདིའི་གྲུ་ཟུར་དུ། དུས་ཚོད་ཀྱིས་ང་ཚོར་འཚར་ལོངས་འབྱུང་བའི་གོ་སྐབས་སྤྲད་ཡོད་ཅིང་། དུས་ཚོད་ཀྱིས་ང་ཚོར་ཐོབ་ཤོར་གྱི་སྡུག་བསྔལ་ཡང་བསྐྱལ་ཡོང་། དུས་ཚོད་ཀྱིས་རེ་བ་དང་ཕུགས་འདུན་ཁྱེར་ཡོང་ཞིང་། དུས་ཚོད་ཀྱིས་ན་རྒས་དང་འཆི་བར་གདོང་གཏོད་དུ་འཇུག དུས་ཚོད་ནི་ཆེས་འདྲ་མཉམ་གྱི་ཤན་འབྱེད་པ་དེ་ཡིན་སྟབས། མི་སུ་དང་གང་ལ་ཕྱོགས་ཞེན་མེད་ཅིང་། མི་སུ་དང་གང་ལ་ཡང་ལྕི་མེད། དུས་ཚོད་ནི་ཆེས་གཏོང་ཕོད་ཅན་དེ་ཡིན་གཤིས་ང་ཚོར་ཟད་མེད་ཀྱི་སྟོབས་ཤུགས་སྦྱིན་ངེས། དུས་ཚོད་ནི་ཆེས་དྲང་བདེན་སྐྱོང་མཁན་དེ་ཡིན་པས་དབུལ་ཕྱུག་ལ་ཁྱད་པར་མི་བགར། དེར་བརྟེན། འུ་ཅག་གིས་ཚད་ཡོད་པའི་དུས་ཚོད་ཀྱིས་ཚད་མེད་པའི་མཛད་འཕྲིན་བསྐྱངས་ཏེ་རང་ཉིད་ལ་དབང་བའི་ངོ་མཚར་གྱི་ལེའུ་གསར་པ་རྩོམ་པར་འབད།
རྩ་ཆེ་བའི་དུས་ཚོད་ཀྱི་རིན་ཐང་རྟོགས་རྗེས། ང་ཚོས་ཐག་ཐག་བསྐྱོད་པའི་དུས་ཚོད་སྐར་ཆ་རེ་རེའང་འཕྲོ་བརླག་ཏུ་གཏོང་མི་ཉན་པའི་ངེས་ཤེས་རྙེད་དགོས། ང་ཚོས་མི་སྡོད་བཞུར་བའི་དུས་ཚོད་ཀྱི་གོམ་འགྲོས་ལ་འཐམ་ཞོར་འཚང་ཁ་ཤིག་ཤིག་ངང་མདུན་དུ་བསྐྱོད་དགོས་པ་རྟོགས་འོས། རླུང་དང་འདྲ་བའི་དུས་ཚོད་ལགས། ང་ཚོས་དུས་ཚོད་ཀྱི་སྨྱུ་གུ་མཛུབ་བར་ལ་དམ་པོར་བཟུང་སྟེ་མི་ཚེའི་ཤོག་བུར་མཛེས་སྡུག་གི་བྲིས་རིས་འཇེབས་པོ་ཞིག་བཞེངས། ཆུ་དང་འདྲ་བའི་དུས་ཚོད་ལགས། ང་ཚོས་ལོ་ཟླ་ལ་བློ་ཕམ་དང་མི་ཚེ་ལ་འགྱོད་པ་མི་སྐྱེས་པའི་དོན་ལྡན་གྱི་ལེགས་བྱས་ཤིག་རྩོམ་པར་རེམ། །
