མཚོ་སྔོན་ཞིང་ཆེན་མི་དམངས་སྲིད་གཞུང་དྲ་བ།
བོད་ལྗོངས་བོད་ལུགས་གསོ་རིག་སློབ་གྲྭ་ཆེན་མོ། སྙན་རྐང་གླིང་།
གཤིས་སྤྱོད་ལྷ་ཡི་ངང་ཚུལ། །
འགྲོགས་ན་འདྲིས་ཤིང་བྱམས་པ། །
མཇལ་ན་ཡིད་དབང་འཕྲོག་པ། །
ང་ཚོ་འབྲོག་གི་བུ་མོ། །
ཞལ་རས་ལག་གིས་མ་བཅོས། །
བྱུགས་རྫས་གཞན་གྱིས་མ་བསླད། །
རང་བྱུང་དོད་པའི་ཞལ་རས། །
ཁྲ་ཆུང་མིག་ཏུ་མཛའ་བྱུང་། །
མཆུ་སྒྲོས་བུམ་པའི་ལྟོ་བར། །
དམར་བའི་རྫས་དེ་མ་བྱུགས། །
རང་བཞིན་སྣུམ་པའི་མདངས་དེ། །
འདོད་པའི་ཁ་མཆུ་སྡུད་བྱུང་། །
ཞལ་རས་འཛུམ་དཀར་ཟླ་བ། །
འབྲོག་པའི་ལྷས་ནས་འཛུམ་དུས། །
མཛེས་པའི་མདངས་ཤིག་མངོན་བྱུང་། །
སྙིང་ཆུང་དམར་པོ་འཕྲོག་སོང་། །
ཐེངས་རེར་མཐོང་བས་མི་ངོམ། །
མི་ཚེ་གཏན་འགྲོགས་བསམ་ཡོད། །
ལས་ཀྱིས་བཀོད་པ་འདུག་ན། །
མཉམ་དུ་ཁ་ཕྱོགས་འཚོལ་འགྲོ། །
དབུ་སྐྲ་ལྕང་ལོ་གནག་སྣུམ། །
མཛེས་པའི་རྒྱབ་ཏུ་སྐྱོད་དུས། །
དགའ་བའི་ཉམས་ཤིག་དོད་ལ། །
མཛའ་བའི་གར་དུ་བསྡོངས་འདུག །
སྐུ་ལུས་འབྲོག་ཏུ་སྐྱེས་ཏེ། །
ལང་ཚོ་འབྲོག་ནས་རྒྱས་ལ། །
འབྲོག་ཡུལ་སེམས་སུ་འཛིན་པའི། །
ཨ་ཅག་འབྲོག་གི་མཛངས་མ། །
སྲོལ་རྒྱུན་འབྲོག་གི་འཚོ་བ། །
དཀའ་དང་ངལ་བས་སྐྱོང་ནས། །
འབྲོག་སར་རྟ་ནོར་འཚོ་བའི། །
འབྲོག་མོ་གཡང་གི་ལྷ་མོ། །
སེམས་པ་བལ་ལས་དཀར་ཞིང་། །
ཞི་དུལ་བག་འཇམ་ལྡན་བཞིན། །
བརྩེ་ལྡན་སེམས་རྒྱུད་དྲང་མོས། །
འབྲོག་ཁྱིམ་སྲོག་ཏུ་བཟུང་ཡོད། །
