མཚོ་སྔོན་ཞིང་ཆེན་མི་དམངས་སྲིད་གཞུང་དྲ་བ།
ནངས་སྔ་མོའི་ཉི་ཟེར་གངས་ལ་འཕྲོ་སྐབས། ཞོགས་པའི་སྨུག་པའི་ཁྲོད་རྨ་ཆུའི་མགོ་ཁུངས་རིམ་གྱིས་གསལ་ལེར་གྱུར། ཆུ་མིག་ཅིག་གིས་རྩྭ་ཐང་དུ་ཀྱག་ཀྱོག་གི་གཞུ་ཐིག་བྲིས་ཡོད་པ་དེ་དངུལ་མདོག་གི་ཁ་བཏགས་ཤིག་དང་མཚུངས།
དེ་ནི་རྨ་ཆུའི་ཚེ་སྲོག་གི་མགོ་ཚུགས་ས་རེད། ཆུ་ཐིགས་རེ་རེ་སྨད་རྒྱུད་ཀྱི་ཚེ་སྲོག་ཁྲི་སྟོང་དང་འབྲེལ་ཡོད། ས་ཆ་རེ་རེར་རང་ཉིད་ཀྱི་གཏམ་རྒྱུད་རེ་ཡོད་པས། དེ་གར་སྲུང་སྐྱོང་ཡག་པོ་བྱ་རྒྱུ་ནི་ས་ཆ་དེའི་ཐོག་འཚོ་བ་རོལ་བཞིན་པའི་མི་རྣམས་ཀྱི་དོན་དག་གལ་ཆེ་ཤོས་སུ་གྱུར་ཡོད།
མི་ཚོགས་གཅིག་ལོ་ངོ་མང་པོར་མཐོ་སྒང་དུ་བསྐྱོད་ནས་རླུང་དང་ཁ་ཆར་གདོང་གིས་བསུ་བཞིན། ཆུ་ངོགས་དང་བརླན་ས་རྩྭ་ཐང་བཅས་ལ་ཡང་དང་བསྐྱར་དུ་ལྟ་ཞིབ་བྱེད་ཀྱིན་ཡོད། ཁོ་ཚོ་ནི་སྐྱེ་ཁམས་བདག་སྐྱོང་པ་ཡིན་ལ། མང་ཆེ་ཤས་ས་གནས་དེ་གའི་འབྲོག་པ་རེད། སྔོན་ཆད་ཁོ་ཚོས་ནོར་ལུག་འཚོས་མོད། ད་ལྟ་ཁོ་ཚོས་རྩྭ་ཐང་སྲུང་སྐྱོང་དང་ཆུ་འགྲམ་དུ་སྐོར་སྲུང་བྱེད་བཞིན་ཡོད། ཉིན་རེའི་ཞོགས་པར་སྔ་མོ་ནས་ཕྱི་གོས་མཐུག་པོ་གྱོན་ཞིང་། བྲོ་ཁ་དང་བཏུང་བྱ་ཁྱེར་ནས་འཕྲུལ་རྟར་ཞོན་པའམ་རྐང་ཐང་དུ་རྩྭ་ཐང་གི་ཕང་བར་བགྲོད། ཁོ་ཚོས་རྩྭ་ཡི་སྐྱེ་ཚུལ་ལ་བལྟ་དགོས་ལ། སྲོག་ཆགས་ཀྱི་རྗེས་ཤུལ་ཟིན་ཐོར་འགོད་དགོས། གད་སྙིགས་དང་འཕྲད་ན་གད་སྙིགས་འཐུ་བ་དང་། ལྕགས་རར་སྐྱོན་ཤོར་བ་མཐོང་ན་ལྕགས་ར་ཞིག་གསོ་བྱས། དུས་ཡུན་རིང་པོ་འགོར་རྗེས། རྩྭ་ས་གང་ཞིག་སླར་གསོས་པ་བཟང་བ་དང་། བརླན་ས་གང་དུ་འདབ་ཆགས་རིགས་གང་ཞིག་གསར་དུ་སླེབས་པ་སོགས་ཀྱི་ཐད་ལ་ཁོ་ཚོ་མི་རེ་རེར་རྩིས་ཐོ་རེ་ཡོད།
རྨ་ཆུའི་འབབ་རྒྱུད་ཀྱི་སྐྱེ་ཁམས་བཅོས་སྐྱོང་ནི་ཡུན་རིང་མ་དངུལ་གཏོང་བ་དང་མི་རབས་ནས་མི་རབས་བར་རྒྱུན་མཐུད་དགོས་པའི་བྱ་སྤྱོད་ཅིག་རེད། གཙང་པོའི་མགོ་ཁུངས་ཀྱི་ཞིང་ཆེན་ཡིན་པའི་ངོས་ནས། མཚོ་སྔོན་གྱིས་རང་ཉིད་ཀྱི་ཕྲག་ཏུ་བབས་པའི་ལས་འགན་གསལ་པོར་ཤེས་ཡོད།
ལོ་འདི་དག་གི་རིང་ལ་བྱེད་ཐབས་རབ་དང་རིམ་པ་བཏོན་པ་དང་། ཕྱུགས་བཀག་རྩྭ་གསོ་ལག་བསྟར་བྱས་ནས་རྩྭ་ས་བསྐྱར་གསོ་ཐུབ་པ་དང་། རྩྭ་ཐང་ཉམས་གསོ་བྱས་ཏེ་ས་ནག་བྱེ་ཐང་དང་བྱེ་འགྱུར་ས་ཆ་བཅོས་སྐྱོང་བྱས་ཤིང་། འོས་འཚམ་ས་ཁུལ་དུ་སྡོང་འཛུགས་ནགས་སྐྲུན་བྱས་ནས། བྱེ་ས་གཏན་འཇགས་དང་ས་ཆུ་སྲུང་འཛིན་བྱས།
བརླན་སའི་ཆུ་ངོས་སླར་གསོ་བྱུང་བ་དང་། བྱ་ལོང་ལྟག་ཁྲ་དང་ངུར་བ་ཇེ་མང་དུ་འགྲོ་བཞིན་ཡོད་ལ། སྦྲེ་དང་དགོ་བ་ཡང་རྟག་ཏུ་མི་རྣམས་ཀྱི་མཐོང་ལམ་དུ་མངོན་བཞིན་ཡོད། སྐྱེ་དངོས་སྣ་མང་རང་བཞིན་དལ་གྱིས་སླར་གསོ་བྱུང་བ་དང་རྩྭ་ཐང་དང་བརླན་སའི་སྐྱེ་ཁམས་ནུས་པ་རིམ་བཞིན་སླར་གསོ་བྱུང་ཡོད། ཆུ་བོ་སྔར་བཞིན་དྭངས་གཙང་ངང་ཤར་ཕྱོགས་སུ་བཞུར་གྱིན་ཡོད་མོད། འོན་ཀྱང་ཤང་ཤང་གི་བཞུར་སྒྲ་དེའི་ཀློང་དུ་མི་གྲངས་མེད་ཅིག་གི་བརྟན་སྲུང་དང་འབད་བརྩོན་གྱི་རྔུལ་ཆུ་འདྲེས་ཡོད།
རྨ་ཆུའི་མགོ་ཁུངས་ཀྱི་གཏམ་རྒྱུད་ནི་ཀྲུང་གོའི་སྐྱེ་ཁམས་དཔལ་ཡོན་འཛུགས་སྐྲུན་གྱི་བསྡུས་རིས་ཤིག་རེད། དེར་གནམ་ས་གཡོ་བ་ལྟ་བུའི་གྲག་འགུལ་མེད་ལ།ཡོད་པ་ནི་ཉི་མ་རེ་རེའི་རྒྱུན་འཁྱོངས་དང་འགྱུར་ལྡོག་ཕྲ་མོ་རེ་རེ་ཡིན། སྤྱིར་བཏང་གི་འབད་བརྩོན་དེ་དག་གིས་མཐོ་སྒང་གི་དག་ཞིང་འདི་བསྲུངས་ཤིང་ཉར་ཡོད་ལ། རྨ་ཆུའི་རླབས་རྒྱུན་དྭངས་མོ་ཤར་ལ་བཞུར་དུ་བཅུག་སྟེ།“ཀྲུང་ཧྭའི་ཆུ་ལྕོག”གི་རླབས་སྒྲ་གཏན་དུ་ཡལ་བ་མེད་པར་བཏང་ཡོད། །
