ཆབ་མདོ་གོ་འཇོ་དེ་སྔའི་ཕ་ས་ཡིན། སྤོ་བོ་མཁར་རྨོག་དེང་གི་ཕ་ཡུལ་ཡིན།

མཁར་རྨོག་གྲོང་ཚོ་ནི་རྒྱལ་ལམ་318འགྲམ་དུ་གནས་པའི་སྤོ་བོ་རྫོང་ཁྲབ་རྨོག་གྲོང་རྡལ་གྱི་ཁོངས་སུ་གཏོགས་ཤིང་། སྤྱི་ལོ་2003ལོར་ཆབ་མདོ་གྲོང་ཁྱེར་གོ་འཇོ་རྫོང་ནས་གནས་དེར་སྤོས་པ་ཡིན་འདུག གྲོང་ཚོ་དེ་ནི་སྤོ་བོ་རྫོང་གྲོང་ནས་སྤྱི་ལེ་7.8ཙམ་དུ་ཕྱིན་ན་སླེབས་ཐུབ་ཅིང་།  གྲོང་ཚོ་དེར་བརྗིད་ཆགས་པའི་གངས་རི་དང་། ལྷུན་སྟུག་གི་གདོད་མའི་ནགས་ཚལ། དེ་བཞིན་ལྟ་ན་སྡུག་པའི་ཞིང་ར། ཆལ་ཆིལ་གྱི་རྦ་རླབས་གཡོ་བའི་གཙང་པོ་སོགས་ཡོད་ལ། གྲོང་ཚོ་དེའི་ཆ་སྙོམས་ས་བབ་མཐོ་ཚད་སྨི་2720ལས་མེད་པ་དང་། ལོ་རེའི་ཆ་སྙོམས་དྲོད་ཚད་8.5℃ཡིན་པས། ཡུལ་དེའི་གནམ་གཤིས་ཆ་རྐྱེན་ཤིན་ཏུ་ལེགས། དེའི་ཐོག་གྲོང་ཚོ་དེ་ནི་རྒྱལ་ལམ་318ཀྱི་རྒྱུད་དུ་གནས་པས། གྲོང་ཚོ་དེ་སྔར་ནས་ཡུལ་སྐོར་བས་ཚ་ཕོག་རྒྱག་ས་དང་ཞག་སྡོད་བྱེད་ས་དམིགས་བསལ་ཞིག་ཏུ་གྱུར་ཡོད། 

གྲོང་ཚོ་དེའི་གྲོང་མི་ཕལ་ཆེ་བ་ནི་ཆབ་མདོ་གྲོང་ཁྱེར་གོ་འཇོ་རྫོང་ནས་གནས་སྤོས་བྱས་པའི་མི་དང་དེ་དག་གི་ཕྱི་རབས་པ་ཤ་སྟག་ཡིན། ཐོག་མར་གནས་དེར་སྤོ་སྐབས་ཀྱི་གནས་ཚུལ་ཕྱིར་དྲན་བྱེད་སྐབས། མཁར་རྨོག་གྲོང་ཚོའི་ཏང་ཀྲི་པུའི་ཧྲུའུ་ཅི་རྡོ་རྗེས། ང་ཚོ་དེ་སྔ་གནས་འདིར་མ་སྤོས་གོང་ཡུལ་འདིར་རྒྱུས་མངའ་ཡོད་པའི་མི་གཅིག་ཀྱང་མེད་པས། གནས་སྤོ་བ་ཚང་མའི་སེམས་ནང་གདེང་མེད་ཅིང་། བློའི་ནང་ཐེ་ཚོམ་གྱིས་ཁེངས་ནས་གནས་འདིར་ཡོང་བ་ཡིན། ཡིན་ནའང་སྲིད་གཞུང་ནས་ང་ཚོ་མཁར་རྨོག་གྲོང་ཚོའི་ནང་བཀོད་སྒྲིག་བྱས་རྗེས། མི་ཚང་མ་བློ་བདེ་བག་ཕེབས་པར་གྱུར་སོང་ཞེས་གསུངས། 

མིག་སྔར་གྲོང་ཚོ་འདི་འབྱུང་ཁམས་ཁོར་ཡུག་སྲུང་སྐྱོང་དང་ཐོན་ལས་གོང་སྤེལ་མཉམ་འདྲེས་ཀྱི་ལམ་དུ་བསྐྱོད་བཞིན་ཡོད་ལ།  གྲོང་ཚོ་གཅིག་དང་ཁུལ་གསུམ་གྱི་ཤང་གྲོང་དར་སྤེལ་གྱི་དཔེ་མཚོན་གྲོང་ཚོར་གྱུར་ཡོད་པ་དང་། གྲོང་མིའི་སྡོད་ཁང་དང་། གྲོང་ཚོའི་ཁོར་ཡུག གྲོང་ཚོའི་ལམ་བུ། མི་ཕྱུགས་ཀྱི་བདེ་འཇགས་ལྡན་པའི་འཐུང་ཆུ། བཙོག་བཤངས་སྦུག་ལམ་སོགས་རྨང་གཞིའི་སྒྲིག་ཆས་ཁག་ཁྱོན་ཡོངས་ནས་ལེགས་བཅོས་བྱས་ཡོད་ཅིང་། མི་རྣམས་ལ་མཛེས་སྡུག་ལྡན་པའི་གྲོང་གསེབ་ཅེས་པ་དེ་གྲོང་ཚོ་འདི་འདྲར་ཟེར་བ་འདྲ་སྙམ་པའི་མྱོང་ཚོར་སྟེར་བཞིན་ཡོད། 

རྒྱལ་ལམ་318བརྒྱུད་བོད་དུ་ཡུལ་སྐོར་དུ་ཡོང་མཁན་མཁྱེན་ལྡན་མ་ལི་ལགས་ཀྱིས་གསར་འགོད་པར། དེ་སྔ་གྲོགས་པོ་དང་དྲ་ལམ་བརྒྱུད་མཁར་རྨོག་གྲོང་ཚོའི་ཡུལ་ལྗོངས་ཧ་ཅང་མཛེས་པོ་ཡོད་པ་གོ་ཐོས་བྱུང་། ད་ཐེངས་འདི་གར་སླེབས་སྐབས་ཁོང་ཚོས་བཤད་པ་བཞིན་དངོས་གནས་ས་ཆ་མཛེས་པོ་སྐྱིད་པོ་ཞིག་འདུག་པས། འདི་གར་ཞག་པོ་གཅིག་བསྡད་ནས་འདི་གའི་མཛེས་སྡུག་ལ་མྱོང་རོལ་བྱས་ཏེ་བསྡད་པ་ཡིན། ཁོར་ར་ཁོར་ཡུག་སྔོ་ལྗང་ཤིང་སྣས་བཀླུབས་ཤིང་མིག་གདངས་མ་ཐག་ཤིན་ཏུ་བརྗིད་ཆགས་པའི་གངས་རི་མཇལ་སྐབས་ངོ་མ་མྱོང་ཚོར་ཐུན་མོང་མ་ཡིན་པ་ཞིག་འདུག་ཅེས་གསུངས།    

                    

མཁར་རྨོག་གྲོང་ཚོའི་ཏང་ཀྲི་པུའུ་ཧྲུའུ་ཅི་རྡོ་རྗེས། ང་ཚོ་འདི་གར་སྤོས་ནས་ལོ་22འདས་པའི་ནང་། ཐོག་མར་ས་མ་འདྲིས་པ་ནས་ད་ཆ་ས་ཡོངས་སུ་འདྲིས་ཤིང་སེམས་ཆགས་པར་གྱུར་པའི་བར་དང་། ཐོག་མར་གྲོང་མི་མང་ཆེ་བར་ཡོང་འབབ་གསོག་པའི་ནུས་པ་ཅུང་ཞན་པ་ནས་ད་ཆ་མི་ཚང་མས་རང་འགུལ་ཐོག་རང་གི་ནུས་པར་གཞིགས་ནས་ཡོང་འབབ་བསགས་ཏེ་རང་ཉིད་ཀྱི་དེ་བས་བདེ་སྐྱིད་ལྡན་པའི་འཚོ་བ་བསྐྲུན་པའི་བར། ཐོག་མར་ཁྱིམ་བདག་རྣམས་ནས་རང་ཉིད་ཀྱི་ཕྲུ་གུ་སློབ་གྲྭར་གཏོང་འདོད་དེ་ཙམ་མི་བྱེད་པ་ནས་ད་ཆ་ཕ་མ་ཚང་མས་རང་ཉིད་ཀྱི་ཕྲུ་གུ་སློབ་གྲྭ་འགྲིམ་དུ་འཇུག་རྒྱུ་དེ་ཤིན་ཏུ་གལ་ཆེ་བར་འཛིན་པའི་བར། ཐོག་མར་གྲོང་མི་མང་པོ་ཞིག་གིས་གྲོང་ཚོ་ཐུན་མོང་གི་ལས་ཀར་རྒྱབ་སྐྱོར་དེ་ཙམ་མི་བྱེད་པ་ནས། ད་ཆ་ཚང་མས་གྲོང་ཚོའི་སྤྱི་དོན་རང་ཉིད་ཀྱི་སྒེར་དོན་ལྟར་དུ་བརྩིས་ནས་ཕྱར་བ་གྲུ་འདེགས་བྱེད་པའི་བར་འགྱུར་བ་བྱུང་བ་སོགས་འདི་ལྟ་བུའི་འགྱུར་ལྡོག་བརྗོད་ཀྱིས་མི་ལང་ཞེས་གསུངས། 

མཁར་རྨོག་གྲོང་ཚོའི་གྲོང་མི་ཚེ་རིང་སྒྲོལ་མས། སྔོན་མ་ངའི་ཕ་ཡུལ་གོ་འཇོ་རེད། ད་ལྟ་ངའི་ཕ་ཡུལ་མཁར་རྨོག་རེད། ང་རང་གནས་འདིར་སྤོས་པའི་རྗེས་ངའི་ཟས་གོས་སྡོད་གསུམ་གྱི་སེམས་ཁྲལ་ཚང་མ་མེད་པར་གྱུར་སོང་། ངའི་བུ་ཡིས་ཁང་པ་མཛེས་བཟོའི་ལས་ཀ་བྱེད་པ་དང་། མནའ་མས་གྲོང་ཚོའི་ཡུལ་ཟོག་ཁྲོམ་སྟེགས་སྤྱད་ནས་ཡུལ་སྐོར་བར་ཡུལ་ཟོག་འཚོང་བཞིན་ཡོད། ད་དུང་ངའི་ཚ་བོ་དང་ཚ་མོས་སློབ་གྲྭ་འགྲིམ་བཞིན་ཡོད། ཚ་བོ་དང་ཚ་མོ་མུ་མཐུད་སློབ་གྲྭར་གཏོང་རྒྱུ་ཡིན། རྗེས་སུ་གཞུང་གི་ལས་གནས་མ་རེག་ཀྱང་ལས་ཀ་ག་ནས་བཙལ་ཡང་ཆོག་ཅེས་གསུངས། 

ད་དུང་གྲོང་ཚོ་འདིར་གྲོང་ཚོའི་ལོ་རྒྱུས་འགྲེམ་སྟོན་ཁང་སྨི་ངོས་གྲུ་མ་400ཙམ་ཟིན་པ་ཞིག་བསྐྲུན་ཡོད་པ་དང་། དེ་ནི་སྤོ་བོ་རྫོང་གི་གནས་སྤོས་གྲོང་ཚོའི་ལོ་རྒྱུས་ཁང་ཐོག་མ་དེ་ཡིན་པ་དང་། དེའི་ནང་གྲོང་མི་རྣམས་ཐོག་མར་གནས་སྤོ་བྱས་པ་ནས། བར་དུ་གཞིས་ཆགས་ཏེ་སེམས་ཆགས་པ། དེ་ནས་ཕྱུག་པོར་གྱུར་པ་བཅས་ཀྱི་ལོ་རྒྱུས་དག་ཡིག་བརྙན་པར་གསུམ་གྱི་ཐོག་ནས་འགྲེམ་སྟོན་བྱས་ཡོད་ལ། འགྲེམ་སྟོན་ཁང་དེ་ལས་ཏང་གི་བོད་སྐྱོང་མཛད་ཇུས་ཀྱི་ཁྱད་འཕགས་རང་བཞིན་ལེགས་པར་མངོན་ཐུབ་ཀྱི་ཡོད།

ད་ཆ་མཁར་རྨོག་གྲོང་ཚོས་སྤོ་བོ་རྫོང་གི་གྲོང་གསེབ་དར་རྒྱས་གཏོང་བའི་དཔེ་སྟོན་གྲོང་ཚོ་ཁག་དང་པོ་འཛུགས་སྐྲུན་བྱེད་པའི་གོ་སྐབས་དམ་འཛིན་ནན་པོ་བྱས་ཏེ། རྨང་གཞིའི་སྒྲིག་བཀོད་ཕྱོགས་ཡོངས་ནས་རིམ་པ་སྤར་བ་དང་། སྡོད་ཁང་བསྐྱར་སྐྲུན་བྱེད་པ།  གཞུང་ལམ་ལེགས་སུ་གཏོང་བ། མི་ཕྱུགས་གཉིས་ཀྱི་འཐུང་ཆུ་སྒྱུར་བཀོད་སོགས་ཀྱི་ལས་གྲྭ་བརྒྱུད། གྲོང་ཚོའི་འཚོ་སྡོད་མཐུན་རྐྱེན་དང་ཐོན་ལས་འཕེལ་རྒྱས་ཀྱི་རྨང་གཞི་སྔར་བས་ཡག་པོ་བསྐྲུན་དང་སྐྲུན་མུས་ཡིན་ལ། ཁྱད་ཆོས་ལྡན་པའི་དམངས་སྲོལ་གནས་ཚང་དང་། ཚ་ཕོག་རླངས་འཁོར་འཇོག་ས། ལྗོངས་གཟིགས་སྟེགས་བུ། ཡུལ་ཟོག་འཚོང་སའི་ཁྲོམ་སྟེགས། བཟའ་བཏུང་བྱེད་ས་སོགས་ཡུལ་སྐོར་གྱི་རྨང་གཞིའི་སྒྲིག་ཆས་ཆ་ལག་ཆ་ཚང་བསྐྲུན་ནས་ཕྱོགས་བཞིའི་ཡུལ་སྐོར་བའི་ཡིད་དབང་འགུག་བཞིན་ཡོད། 

 སྤྱི་ལོ་2022ལོའི་ཟླ་6པར་མཁར་རྨོག་གྲོང་ཚོར་སྤོ་བོ་རྫོང་གི་ཞིང་གྲོང་ཕྱོགས་བསྡུས་ཆུང་གྲས་ཐོག་མ་དེ་བསྐྲུན་པ་དང་། སེང་གེ་གངས་རིའི་འདབས་སུ་གནས་པའི་གྲོང་ཚོ་དེའི་ཞིང་རའི་ནང་སྡོང་ཕུང་མུའུ་330འདེབས་འཛུགས་བྱས་པར་ལོ་རེའི་ཐོན་སྐྱེད་རིན་ཐང་སྒོར་ཁྲི་མང་པོ་ཟིན་ཡོད་པ་རེད།

མཁར་རྨོག་གྲོང་ཚོས་གྲོང་མིའི་སྡོད་ཁང་24ཡི་ཕྱི་རོལ་གྱང་ལྡེབས་སུ་ད་དུང་གསར་བརྗེའི་སློབ་གསོ་དང་། བོད་རིགས་ཀྱི་དམངས་སྲོལ་རིག་གནས་སོགས་བརྗོད་བྱ་གཙོ་བོར་བྱས་པའི་མཛེས་རིས་བྲིས་ནས་གྲོང་མིའི་སྡོད་ཁང་དེ་དག་ནང་མི་ཡི་སྡོད་ས་དང་ཕྱི་སྒྱུ་རྩལ་དངོས་པོ་ལྟ་བུར་འགྱུར་བར་བྱས་ཡོད། 

གངས་རིའི་འདབས་ཀྱི་གྲོང་ཚོ་དེས་ལག་ལེན་ལ་བརྟེན་ནས་སྔོ་ལྗང་གི་རི་ཆུ་ནི་གསེར་རི་དངུལ་རི་ཡིན་པ་ར་སྤྲོད་བྱེད་བཞིན་ཡོད་ལ། ས་མཐོའི་གྲོང་གསེབ་དར་རྒྱས་ལ་དཔེ་སྟོན་གསར་པ་ཞིག་ཀྱང་མཁོ་འདོན་བྱེད་བཞིན་ཡོད།