གསེར་རྟའི་གེ་སར་ཟློས་གར་འཁྲབ་སྟོན་འདི་འཛམ་གླིང་ཟིན་ཐོའི་ནང་བཀོད་པ་རེད།

ཟླ་བརྒྱད་པའི་ཚེས་བཅུ་བདུན་ཉིན། དཀར་མཛེས་ཁུལ་གསེར་རྟ་རྫོང་གི་དམངས་ཁྲོད་སྒྱུ་རྩལ་པ་བདུན་བརྒྱ་དོན་བདུན་གསེར་ཁོག་གྲོལ་རྡལ་གྱི་ཡངས་པའི་རྩྭ་ཐང་དུ་འཛོམས་ནས་གེ་སར་ཟློས་གར་འཁྲབ་སྟོན་བྱས་ལ། དེ་ནི་འཛམ་གླིང་ཟིན་ཐོ་དཔང་འཛིན་ལས་ཁུངས་༼WRCA༽ཀྱིས་འཛམ་གླིང་ཐོག་གཞི་ཁྱོན་ཆེས་ཆེ་བའི་གེ་སར་ཟློས་གར་འཁྲབ་སྟོན་ཡིན་པ་ངོས་འཛིན་བྱས་ཡོད།

གསེར་རྟ་ལ་གེ་སར་ཟློས་གར་གྱི་འབྱུང་གནས་ཞེས་པའི་མཚན་སྙན་ཐོབ་ཡོད་ཅིང་། ས་གནས་མང་ཚོགས་ཀྱིས་ཀྱང་གེ་སར་སྒྲུང་དང་དང་གེ་སར་ཟློས་གར་འཁྲབ་སྟོན་ཁོང་དུ་ཆུད་ཡོད་པ་རེད། བོད་ཀྱི་ཟློས་གར་གསར་གཏོད་དང་འཕེལ་རྒྱས་བྱུང་བ་དང་བསྟུན། གསེར་རྟ་རྫོང་གིས་གླིང་སྒྲུང་བཤད་པ་དང་། བོད་ཀྱི་གླུ་བྲོ། ལ་གླུ། རྩལ་འགྲན། སྐོར་བྲོ་སོགས་ཕུང་གཅིག་ཏུ་གྲུབ་པའི་སྒྱུ་རྩལ་འཁྲབ་སྟོན་བྱས་པས་གསེར་རྟའི་གེ་སར་ཟློས་གར་གསོན་ཉམས་ལྡན་ལ་བདེ་མྱུར་ཆེ་བ། བག་ཕེབས་པ་དང་སྤྲོ་སྣང་ལྡན་པའི་སྒྱུ་རྩལ་ཀུན་འདུས་ཀྱི་ལུགས་གསར་པའི་གེ་སར་ཟློས་གར་གྱི་ཁྱད་ཆོས་དང་རྣམ་པ་ཞིག་གྲུབ་ཡོད་ལ། གསེར་རྟའི་གེ་སར་ཟློས་གར་ནི་༢༠༢༤ལོར་སི་ཁྲོན་ཞིང་ཆེན་གྱིས་གྲོང་ཁྱེར་བརྒྱ་ཡི་སྒྱུ་རྩལ་བརྒྱ་ཞེས་པའི་མཚན་ལྡན་རྣམ་གྲངས་ནང་དུ་བདམས་པ་རེད།

འཛམ་གླིང་ཟིན་ཐོ་དཔང་འཛིན་ལས་ཁུངས༼WRCA༽ཀྱིས་ཞིབ་བཤེར་བྱས་པ་བརྒྱུད། འཛམ་གླིང་ཟིན་ཐོ་དཔང་འཛིན་འགན་འཛིན་པ་མ་ཁེ་ཞི་མུའུ་དང་ཀྲུང་གོ་ཕྱོགས་ཀྱི་འཐུས་མི་ཝང་ཅིན་གྱིས་ཐེངས་འདིའི་འཁྲབ་སྟོན་གྱིས་འཛམ་གླིང་ཟིན་ཐོ་གསར་པ་བསྐྲུན་ཡོད་པ་ཁྱབ་བསྒྲགས་བྱས་ཤིང་། དེ་ཡིས་གྲུབ་འབྲས་རླབས་ཆེན་འདི་དངོས་སུ་འཛམ་གླིང་ལོ་རྒྱུས་ཟིན་ཐོའི་ནང་བཀོད་པ་མཚོན་ཡོད།