མཚོ་སྔོན་ཞིང་ཆེན་མི་དམངས་སྲིད་གཞུང་དྲ་བ།
ཉེ་ལམ། བོད་ལྗོངས་ཆབ་མདོ་གྲོང་ཁྱེར་གྱིས་གསར་འགྱུར་ཡོངས་བསྒྲགས་ཚོགས་འདུ་འཚོགས་ནས《ཆབ་མདོ་གྲོང་ཁྱེར་གྱི་ཆུ་ལམ་སེག་མ་སྔོག་འདོན་དོ་དམ་སྲོལ་ཡིག》དང《ཆབ་མདོ་གྲོང་ཁྱེར་གྱི་འཐུང་ཆུའི་མགོ་ཁུངས་སྲུང་སྐྱོང་སྲོལ་ཡིག》(གཤམ་དུ“སྲོལ་ཡིག་གཉིས”ཞེས་བསྡུ་རྒྱུ)2025ལོའི་ཟླ9པའི་ཚེས1ཉིན་ནས་དངོས་སུ་ལག་བསྟར་བྱ་རྒྱུ་ཁྱབ་བསྒྲགས་བྱས། ས་གནས་རང་བཞིན་གྱི་ཁྲིམས་སྲོལ་འདི་གཉིས་བཏོན་པ་ཡིས་ཆབ་མདོ་གྲོང་ཁྱེར་གྱི་ས་གནས་རང་བཞིན་གྱི་སྐྱེ་ཁམས་ཁོར་ཡུག་སྲུང་སྐྱོང་ཁྲིམས་སྲོལ་གྱི་སྟོང་ཆ་བསྐངས་པ་དང་། ཆུ་ལམ་གྱི་སྐྱེ་ཁམས་སྲུང་སྐྱོང་དང་། སེག་མའི་ཐོན་ཁུངས་ལུགས་མཐུན་ངང་གསར་སྤེལ། འཐུང་ཆུའི་བདེ་འཇགས་འགན་ལེན་བཅས་ལ་བཅའ་ཁྲིམས་ཀྱི་འདེགས་སྐྱོར་བརྟན་པོ་མཁོ་འདོན་བྱས་ཡོད།
ངོ་སྤྲོད་བྱས་པ་ལྟར་ན། 《ཆབ་མདོ་གྲོང་ཁྱེར་གྱི་ཆུ་ལམ་སེག་མ་སྔོག་འདོན་དོ་དམ་སྲོལ་ཡིག》ལ་བསྡོམས་པས་ལེའུ6དང་དོན་ཚན34ཡོད་ལ། བར་སྟོང་ཐད་སྔོག་འདོན་བྱེད་མི་ཆོག་པའི་ས་ཁོངས་རིགས4དབྱེ་ཡོད་པ་དང་། དུས་ཚོད་ཐད་སྔོག་འདོན་བྱེད་མི་ཆོག་པའི་དུས་ཡུན་གསལ་པོ་བཟོས་ནས། སེག་མ་སྔོག་འདོན་གྱི་དགོས་མཁོ་དང་སྐྱེ་ཁམས་སྲུང་སྐྱོང་གི་འབྲེལ་བ་དོ་སྙོམས་ཡོང་བར་བྱ་རྒྱུ་རེད། དེ་དང་ཆབས་ཅིག སྲོལ་ཡིག་ནང་སེག་མ་སྔོག་འདོན་གྱི་སྤྱི་འབོར་དང་། མཐོ་འཕང་། དེ་བཞིན་ལས་སྒྲུབ་བྱེད་སྟངས་བཅས་ལ་ཚོད་འཛིན་ནན་མོ་བྱས་ཏེ་སེག་མ་སྔོག་འདོན་བྱས་རྗེས་ཀྱི་སྐྱེ་ཁམས་སླར་གསོའི་འགན་འཁྲི་གསལ་བོ་བཟོས་ནས། སེག་མའི་ཐོན་ཁུངས་གསར་སྤེལ་དེ་ཐོག་མཐའ་བར་གསུམ་དུ་སྐྱེ་ཁམས་ཀྱིས་ཐེག་ཐུབ་པའི་ཁྱབ་ཁོངས་ནང་སྤེལ་རྒྱུར་འགན་ལེན་བྱས་ཡོད། ལྟ་སྐུལ་དོ་དམ་ཐད། སྲོལ་ཡིག་ནང་སྡེ་ཁག་བརྒལ་བའི་མཉམ་འགུལ་ལམ་སྲོལ་ཁྱབ་སྤེལ་བཏང་ནས་སྐས་རིམ་རྣམ་པའི་ཆད་གཅོད་ལག་བསྟར་བྱས་པས། སྡེ་ཁག་གི་མཉམ་སྒྲུབ་ཡག་པོ་མེད་པ་དང་ཆད་གཅོད་ཚད་གཞི་གསལ་པོ་མིན་པ་སོགས་ཀྱི་གནད་དོན་ཐག་གཅོད་ནུས་ལྡན་ཐུབ་ཡོད།
《ཆབ་མདོ་གྲོང་ཁྱེར་གྱི་འཐུང་ཆུའི་མགོ་ཁུངས་སྲུང་སྐྱོང་སྲོལ་ཡིག》ནང་རིམ་པ་སོ་སོའི་སྲིད་གཞུང་དང་འབྲེལ་ཡོད་སྡེ་ཁག་གི་འགན་འཁྲི་ལས་བགོས་གསལ་བོ་བྱས་ནས་ཆུའི་མགོ་ཁུངས་སྲུང་སྐྱོང་བྱེད་ཐབས་ཆེ་རུ་བཏང་བ་དང་། ཆུའི་མགོ་ཁུངས་ཉེ་འགྲམ་གྱི་འཛུགས་སྐྲུན་རྣམ་གྲངས་དང་བཙོག་འབུད་བྱ་སྤྱོད་ལ་ཚོད་འཛིན་ནན་མོ་བྱས་ཤིང་། དེ་དང་ཆབས་ཅིག་སྐྱེ་ཁམས་སླར་གསོ་དང་ལྗང་མདོག་བྱ་བར་ཤུགས་བསྣན་ནས་ཆུའི་མགོ་ཁུངས་ཀྱི་སྐྱེ་ཁམས་རང་ཉིད་གཙང་བསྒྱུར་ནུས་པ་མཐོར་འདེགས་སུ་གཏོང་བ། གཞན་ཡང་། སྲོལ་ཡིག་ནང་ད་དུང་ཁ་ཐོར་རྣམ་པའི་ཆུའི་མགོ་ཁུངས་ཀྱི་སྲུང་སྐྱོང་གཏན་འབེབས་ཞིབ་ཚགས་སུ་བཏང་ནས་སྔོན་ཆད་འདིའི་ཐད་ཀྱི་འབྲེལ་ཡོད་བཅའ་ཁྲིམས་ཁྲིམས་སྲོལ་ཁྱབ་ཁོངས་ཀྱི་མི་འདང་ས་བསྐངས་ཡོད། བྱ་དགའ་དང་ཆད་གཅོད་ལམ་སྲོལ་ཐད། སྲོལ་ཡིག་ནང་ཁྲིད་སྟོན་གསལ་བོ་མངོན་ཡོད་དེ། ཁྲིམས་འགལ་བྱ་སྤྱོད་ལ་ཆད་གཅོད་ནན་མོ་དང་སྲུང་སྐྱོང་བྱ་བའི་ཁྲོད་ཀྱི་བྱས་རྗེས་འབུར་ཐོན་ཅན་ལ་གཟེངས་བསྟོད་བྱ་རྒྱུ་ཡིན་ལ། དེའི་དམིགས་ཡུལ་ནི་སྤྱི་ཚོགས་ཡོངས་འཐུང་ཆུའི་མགོ་ཁུངས་སྲུང་སྐྱོང་བྱ་བའི་ནང་ཞུགས་པར་སྐུལ་འདེད་གཏོང་རྒྱུ་དེ་ཡིན། །
