བོད་ལྗོངས་ཀྱིས་ཞིང་སྡེའི་གཞུང་ལམ་འཛུགས་སྐྲུན་ཐད་གྲུབ་འབྲས་མངོན་གསལ་བླངས་ཡོད།

པར་འདི་ནི་ལྷ་གཞིས་མཐོ་རིམ་གཞུང་ལམ་རེད།

པར་འདི་ནི318རྒྱལ་ལམ་གྱི་རྣམ་པ་རེད།

པར་འདི་ནི་ཆབ་མདོ་གྲོང་ཁྱེར་ལྷོ་རོང་རྫོང་གི་ཞིང་སྡེའི་གཞུང་ལམ་གྱི་རྣམ་པ་རེད།

པར་འདི་ནི་ལྷ་ས་གྲོང་ཁྱེར་སྙེ་མོ་རྫོང་དར་རོང་གྲོང་རྡལ་གྱི་ཞིང་སྡེའི་གཞུང་ལམ་རེད།

པར་འདི་ནི་ཆབ་མདོ་གྲོང་ཁྱེར་བྲག་གཡབ་རྫོང་གི་ཞིང་སྡེའི་གཞུང་ལམ་རེད།

པར་འདི་ནི་ལྷ་གཞིས་མཐོ་རིམ་གཞུང་ལམ་དང་ལམ་རྙིང་གི་རྣམ་པ་རེད།

པར་འདི་ནི་ལྷ་ས་གྲོང་ཁྱེར་མལ་གྲོ་གུང་དཀར་རྫོང་རྒྱ་མ་གྲོང་རྡལ་གྱི་ཞིང་སྡེའི་གཞུང་ལམ་རེད།

ཀྲུང་གོ་བོད་ཀྱི་དྲ་བའི་འཕྲིན། དབྱར་གཞུང་གི་དུས་སུ་ལྷ་ས་གྲོང་ཁྱེར་མལ་གྲོ་གུང་དཀར་རྫོང་གི་ཞིང་སྡེའི་གཞུང་ལམ་དུ་རླངས་འཁོར་སྐོར་ནས་སོང་བའི་ཚེ། གཞོགས་གཉིས་ཀྱི་གསེར་མདོག་གི་པད་ཁའི་མེ་ཏོག་གི་རྒྱ་མཚོ་དང་སྣུམ་སྙིགས་བཏིང་བའི་ལམ་གཉིས་ཕན་ཚུན་མཉམ་བསྡུར་བྱས་ན་ལྷག་པར་མཛེས་པ་དང་། ནས་བྱུར་བུར་བླུག་པའི་ཞིང་སྤྱོད་རླངས་འཁོར་དང་ཚོན་མདོག་རྣམ་པར་བཀྲ་བའི་ཞིང་སྡེའི་འགྲུལ་སྐྱེལ་རླངས་འཁོར་གཉིས་ཐུག་པའི་ཚེ་ལོ་ལེགས་བྱུང་བའི་ལྗོངས་རིས་ཞིག་མངོན་ཡོད། འདི་འདྲའི་སྣང་ཚུལ་དེང་སང་གི་བོད་ལྗོངས་ཞིང་སྡེར་རྒྱུན་རྣམ་ཅན་དུ་གྱུར་ཡོད་ལ། གསར་བ་གསར་རྐྱང་གི་གཞུང་ལམ་སྔར་ལས་མང་པོས་མཐོ་སྒང་ས་གཞི་ཆེན་པོའི་རྣམ་པར་འགྱུར་ལྡོག་གཏོང་བཞིན་ཡོད།

2024ལོར་བོད་ལྗོངས་ཀྱི་གཞུང་ལམ་འཛུགས་སྐྲུན་གྲུབ་འབྲས་མངོན་གསལ་ཡིན་ཏེ། ལྗོངས་ཡོངས་ཀྱི་གཞུང་ལམ་ཐོག་རླངས་འཁོར་ཤར་གཏོང་ཐུབ་པའི་སྤྱིའི་ལམ་ཐག་སྤྱི་ལེ་ཁྲི12.49ལས་བརྒལ་ཡོད་ལ། དེའི་ཁྲོད་ཞིང་སྡེའི་གཞུང་ལམ་གྱི་ལམ་ཐག་སྤྱི་ལེ་ཁྲི9.48ལ་སླེབས་ཡོད། འཕྲེད་གཞུང་དུ་དྲ་བ་ལྟར་སྣོལ་བའི་ཞིང་སྡེའི་གཞུང་ལམ་འདི་དག་ཁྲག་རྩ་ཕྲ་མོ་དང་འདྲ་བར་འཕེལ་རྒྱས་ཀྱི་གསོན་ཤུགས་དང་སྐྱེ་སྟོབས་གངས་ལྗོངས་མཐོ་སྒང་གི་ཁུག་འཁྱོག་ཚང་མར་སྐྱེལ་ཡོད། ལྷ་ས་གྲོང་ཁྱེར་གྱི་ཉེ་འདབས་ནས་ཆབ་མདོ་གྲོང་ཁྱེར་གྱི་རི་ཁུལ་དང་། ནག་ཆུ་རྩྭ་ཐང་ནས་སྙེ་མོའི་རོང་ཁུལ་བཅས་ཀྱི“ཞིང་སྡེའི་ལམ་ཡག་ཤོས་བཞི”ཡིས་གྲོང་གསེབ་དར་སྤེལ་གྱི་ཡིད་དབང་འཕྲོག་པའི་ལེའུ་རྩོམ་བཞིན་ཡོད། 

མཐོ་སྒང་གཞུང་ལམ་འཛུགས་སྐྲུན་ལ་འགྲན་སློང་མང་པོ་ཡོད་མོད་ཀྱང་། བོད་ལྗོངས་ཀྱིས་ལས་གཞིའི་ངོ་མཚར་བའི་བྱས་རྗེས་རབ་དང་རིམ་པ་གསར་གཏོད་བྱས་ཡོད། ནག་ཆུའི་རྩྭ་ཐང་དུ་གཞུང་ལམ་དེ་ཁ་བཏགས་དཀར་པོ་ཇི་བཞིན་གཡུ་འབྲུག་འཁྱུག་པ་ལྟར་སྣུར་སྲིང་བྱས་ཡོད་པ་དང་། ཆབ་མདོའི་རི་ཁུལ་གྱི་རི་ལམ་ཀྱག་ཀྱོག་དེ་གཡུ་འབྲུག་སྔོན་མོ་རི་མཐོ་གཡང་གཟར་བརྒྱུད་པ་དང་མཚུངས། སྙེ་མོའི་རོང་ཁུལ་དུ་གཙང་བོ་བརྒལ་བའི་ཟམ་ཆེན་གྱིས་ངོགས་གཉིས་ཀྱི་འོབས་ཆེན་སྣོལ་སྦྲེལ་བྱས་ཡོད། གཞུང་ལམ་འདི་དག་གིས་གྲོང་སྡེ་དང་གྲོང་རྡལ་སྦྲེལ་མཐུད་བྱས་ཡོད་པ་མ་ཟད། ས་གནས་དཔལ་འབྱོར་འཕེལ་རྒྱས་ལ་སྐུལ་འདེད་གཏོང་བའི་སྣ་འདྲེན་གལ་ཆེན་ཏུ་གྱུར་ཡོད། 

ཞིང་སྡེའི་གཞུང་ལམ་དྲ་རྒྱ་ཉིན་བཞིན་འཐུས་ཚང་དུ་ཕྱིན་པ་དང་བསྟུན་ནས་བོད་ལྗོངས་ཀྱི་ཞིང་སྡེར་སྐྱེ་སྟོབས་གསར་བ་མངོན་ཡོད། འགྲུལ་སྐྱེལ་རླངས་འཁོར་གྲོང་ཁྱེར་དང་ཞིང་སྡེའི་བར་དུ་ཕར་འགྲོ་ཚུར་འོང་བྱེད་པ་དང་། གཞུང་ལམ་ལམ་རྒྱུད་ཀྱི་ས་ཚིགས། ལྗོངས་གཟིགས་སྟེགས་བུ་སོགས་རྨང་གཞིའི་སྒྲིག་བཀོད་ཉིན་བཞིན་འཐུས་ཚང་དུ་ཕྱིན་པས། ཞིང་སྡེའི་ཡུལ་སྐོར་དང་ཁྱད་ལྡན་ཞིང་ལས་ཐོན་རྫས་ཕྱིར་འཚོང་སོགས་གསར་དར་ཐོན་ལས་དབྱར་མཚོ་རྒྱས་པ་ལྟར་འཕེལ་རྒྱས་སུ་ཕྱིན་ནས་རོང་འབྲོག་པའི་འབབ་འཕར་ཕྱུག་འགྱུར་ལ་ཐབས་ལམ་གསར་བ་བཏོད་ཡོད། 

བར་སྣང་ནས་ཐུར་ལྟ་བྱས་པའི་ཚེ། འཕྲེད་གཞུང་སྣོལ་མར་གནས་པའི་ཞིང་སྡེའི་གཞུང་ལམ་གྱིས་མཐའ་ཡས་པའི་མཐོ་སྒང་དུ་རྔམ་བརྗིད་ཆེ་ཞིང་མཛེས་སྡུག་ལྡན་པའི་ལྗོངས་རིས་ཞིག་བྲིས་ཡོད། གཞུང་ལམ་འདི་དག་འགྲིམ་འགྲུལ་ལམ་ཐིག་ཡིན་པ་མ་ཟད། ལྷག་ཏུ་ཕྱུག་འགྱུར་ལམ་ཐིག་དང་བདེ་སྐྱིད་ཀྱི་ལམ་ཐིག་ཡིན་པས། མཐོ་སྒང་མི་དམངས་ཀྱིས་བདེ་སྐྱིད་ལྡན་པའི་འཚོ་བར་བཅངས་པའི་རེ་སྒུག་ཐེག་ཁུར་བྱས་ཡོད་པ་དང་། གྲོང་གསེབ་དར་སྤེལ་གྱི་གོམ་སྟབས་བརྟན་པོར་དཔང་པོ་བྱས་ཡོད། ཉི་འོད་ཀུན་ཏུ་འཕྲོས་པའི་ཚེ་གཞུང་ལམ་དག་ས་གཞི་ཆེན་པོའི་ཁྲག་རྩ་དང་འདྲ་བར་གངས་ལྗོངས་མཐོ་སྒང་ལ་སྐྱེ་སྟོབས་དང་གསོན་ཤུགས་གསར་བ་བསྣན་ནས། ཕྱོགས་ཡོངས་ནས་འབྱོར་འབྲིང་སྤྱི་ཚོགས་སུ་སྐྱོད་པའི་ཡངས་ཤིང་རྒྱ་ཆེ་བའི་འགྲོ་ལམ་ཞིག་བཏིང་ཡོད། །