《མཚོ་ལྷོ་བོད་རིགས་རང་སྐྱོང་ཁུལ་བོད་ཀྱི་སྐད་དང་ཡི་གེའི་བྱ་བའི་སྲོལ་ཡིག》ལ་བཟོ་བཅོས་བརྒྱབ་པའི་གནས་ཚུལ་སྐོར་གྱི་གསལ་བཤད།

——2025ལོའི་ཟླ5པའི་ཚེས19ཉིན་མཚོ་སྔོན་ཞིང་ཆེན་མི་དམངས་འཐུས་མི་ཚོགས་ཆེན་སྐབས་བཅུ་བཞི་པའི་རྒྱུན་ལས་ཨུ་ཡོན་ལྷན་ཁང་གི་གྲོས་ཚོགས་ཐེངས་བཅོ་ལྔ་པའི་སྟེང་།

མཚོ་ལྷོ་ཁུལ་དམངས་ཆེན་རྒྱུན་ལས་ཨུ་ཡོན་ལྷན་ཁང་གི་ཀྲུའུ་རེན་གཞོན་པ། མཱ་ཧྲའོ་ཧྥུའུ།

ཀྲུའུ་རེན་དང་། ཀྲུང་རེན་གཞོན་པ་རྣམ་པ། དྲུང་ཡིག་ཆེན་མོ། ཨུ་ཡོན་རྣམ་པ་ཚོ། 

     ད་ལྟ《མཚོ་ལྷོ་བོད་རིགས་རང་སྐྱོང་ཁུལ་བོད་ཀྱི་སྐད་དང་ཡི་གེའི་བྱ་བའི་སྲོལ་ཡིག》(གཤམ་དུ《སྲོལ་ཡིག》ཅེས་པར་བསྡུས་ཡོད)བཟོ་བཅོས་བྱས་པའི་གནས་ཚུལ་ལ་གསལ་བཤད་བྱ་རྒྱུ་ཡིན།

 གཅིག བཟོ་བཅོས་བྱེད་པའི་དགོས་ངེས་རང་བཞིན་དང་གཞི་འཛིན་ས།

    ད་ལྟ་སྤྱོད་བཞིན་པའི《སྲོལ་ཡིག》འདི་ནི1989ལོའི་ཟླ5པའི་ཚེས20ཉིན་མཚོ་ལྷོ་བོད་རིགས་རང་སྐྱོང་ཁུལ་མི་དམངས་འཐུས་མི་ཚོགས་ཆེན་སྐབས་བརྒྱད་པའི་གྲོས་ཚོགས་ཐེངས་ལྔ་པའི་སྟེང་གྲོས་འཆམ་བྱུང་ཞིང་། 1990ལོའི་ཟླ6པའི་ཚེས28ཉིན་མཚོ་སྔོན་ཞིང་ཆེན་མི་དམངས་འཐུས་མི་ཚོགས་ཆེན་སྐབས་བདུན་པའི་རྒྱུན་ལས་ཨུ་ཡོན་ལྷན་ཁང་གི་གྲོས་ཚོགས་ཐེངས་བཅོ་ལྔའི་སྟེང་ཆོག་མཆན་ཐོབ་སྟེ་ལག་བསྟར་བྱས་པ་རེད།《སྲོལ་ཡིག》ཁྱབ་བསྒྲགས་ལག་བསྟར་བྱས་པ་ནས་བཟུང་། མཚོ་ལྷོ་ཁུལ་གྱི་བོད་ཀྱི་སྐད་དང་ཡི་གེའི་བྱ་བར་གྲུབ་འབྲས་མངོན་གསལ་དོད་པོ་ཐོབ་པར་སྐུལ་འདེད་བཏང་ཞིང་།འདྲ་མཉམ་དང་། མཐུན་སྒྲིལ། རོགས་རེས། འཆམ་མཐུན་བཅས་ཀྱི་སྤྱི་ཚོགས་རིང་ལུགས་ཀྱི་མི་རིགས་འབྲེལ་བ་སྔར་བས་སྲ་བརྟན་དུ་བཏང་སྟེ། བོད་ཀྱི་སྐད་དང་ཡི་གེ་གོང་འཕེལ་གཏོང་བར་ཁྲིམས་སྐྱོང་གི་རྨང་གཞི་བརྟན་པོ་བཏིང་ཡོད། དུས་བབས་འཕེལ་རྒྱས་ཀྱི་དགོས་མཁོ་དང་བསྟུན་ནས། དྲ་རྒྱའི་ཁོར་ཡུག་དང་གསར་དར་སྨྱན་སྦྱོར་ཁྱབ་ཁོངས་སུ་བོད་ཀྱི་སྐད་དང་ཡི་གེ་བེད་སྤྱོད་བྱ་རྒྱུར་སྔར་བས་ཁྲིད་སྟོན་ཚད་ལྡན་བྱེད་དགོས་པ་དང་།བོད་སྐད་ཡིག་གི་ཕྱི་ཕྱོགས་བརྗེ་རེས་དང་ཡིག་སྒྱུར་ཚད་གཞི་སོགས་ཀྱི་ཐད་ནས་ཀྱང་དུས་བསྟུན་མདུན་སྐྱོད་བྱེད་དགོས་པས།《སྲོལ་ཡིག》བཟོ་བཅོས་བྱས་པ་དེས་བོད་སྐད་ཡིག་དུས་རབས་ཀྱི་གོམ་སྟབས་ཀྱི་རྗེས་སུ་དམ་པོར་འབྲངས་པར་སྐུལ་འདེད་གཏོང་བ་དང་། མཚོ་ལྷོ་ཕྱོགས་ཡོངས་ནས་དུས་རབས་གསར་པའི་འཕེལ་རྒྱས་ཀྱི་སྤྱི་ཡོངས་ཁྲོད་འདྲེས་པར་དོན་སྙིང་ཧ་ཅང་གལ་ཆེན་ལྡན་པ་ཡིན།

    《སྲོལ་ཡིག》འཆར་ཟིན་འགོད་པའི་གཞི་འཛིན་ས་གཙོ་བོ་ནི《ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱི་རྩ་ཁྲིམས》དང《ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱི་མི་རིགས་ས་ཁོངས་རང་སྐྱོང་བཅའ་ཁྲིམས》། 《ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱི་རྒྱལ་ཁབ་ཀྱི་སྤྱི་སྤྱོད་སྐད་ཡིག་བཅའ་ཁྲིམས》སོགས་འབྲེལ་ཡོད་ཀྱི་བཅའ་ཁྲིམས་དང་ཁྲིམས་སྲོལ་ཡིན།

གཉིས། བཟོ་བཅོས་བྱས་པའི་བརྒྱུད་རིམ།

    《སྲོལ་ཡིག》2022ལོར་བཟོ་བཅོས་བྱེད་མགོ་བརྩམས་པའི་ཚུན་ལ། ཐོག་མཐའ་བར་གསུམ་དུ་ཁུལ་ཨུའི་ཡང་དག་པའི་མགོ་ཁྲིད་དང་ཞིང་ཆེན་དམངས་ཆེན་མི་རིགས་དང་ཕྱིར་སྡོད་རང་མིའི་ལས་དོན་ཨུ་ཡོན་ལྷན་ཁང་གི་མཛུབ་ཁྲིད་ནུས་ལྡན་འོག་སྤེལ་བ་དང་། ཁུལ་ཨུ་དང་ཁུལ་སྲིད་གཞུང་གི་མགོ་ཁྲིད་གཙོ་བོས《སྲོལ་ཡིག》བཟོ་བཅོས་བྱ་བར་དོ་སྣང་ཆེན་པོ་གནང་ཞིང་། ཁུལ་སྲིད་གཞུང་གི་རྒྱུན་ལས་གྲོས་ཚོགས་སྟེང་ཆེད་དོན་ཞིབ་འཇུག་བྱས། ཞིང་ཆེན་དམངས་ཆེན་མི་རིགས་དང་ཕྱིར་སྡོད་རང་མིའི་ལས་དོན་ཨུ་ཡོན་ལྷན་ཁང་སྔ་སྣུར་གྱིས་ནང་ཞུགས་བྱས་ནས་བཟོ་བཅོས་ཀྱི་གཙོ་གནད་དང་། ཁྲིམས་མཐུན་རང་བཞིན། སྒྲོམ་གཞིའི་གྲུབ་ཚུལ་སོགས་ཀྱི་ཐད་ནས་མཛུབ་སྟོན་གང་ལེགས་བྱས་ཏེ། 《སྲོལ་ཡིག》བཟོ་བཅོས་བྱེད་པའི་སྤུས་ཚད་སྔར་ལས་མཐོ་རུ་བཏང་། ཁུལ་དམངས་ཆེན་སྐབས་བཅོ་ལྔ་པའི་རྒྱུན་ལས་ཨུ་ཡོན་ལྷན་ཁང་གི་གྲོས་ཚོགས་ཐེངས་ཉེར་བཞི་པ་དང་གྲོས་ཚོགས་ཐེངས་ཉེར་ལྔ་པའི་སྟེང《སྲོལ་ཡིག》ལ་གྲོས་ཞིབ་ཐེངས་གཉིས་བྱས་པ་དང་། མི་སྣ་སྒྲིག་འཛུགས་བྱས་ཏེ་ཅི་ལིན་ཞིང་ཆེན་ཡན་པེན་ཁྲའོ་ཞན་རིགས་རང་སྐྱོང་ཁུལ་དང་སི་ཁྲོན་ཞིང་ཆེན་རྔ་བ་བོད་རིགས་ཆའང་རིགས་རང་སྐྱོང་ཁུལ་དུ་སློབ་སྦྱོང་དང་རྟོག་ཞིབ་བྱེད་དུ་སོང་།སྔ་རྗེས་སུ་ཁྲིམས་འཛུགས་ཆེད་མཁས་པའི་མཐའ་དཔྱོད་ཚོགས་འདུ་ཐེངས་གཉིས་ལ་བསྡུས་པ་དང་།རིམ་པ་མི་འདྲ་བའི་བསམ་འཆར་བསྡུ་ལེན་གྱི་བཞུགས་མོལ་ཚོགས་འདུ་ཐེངས་མང་འཚོགས་ནས་ཕྱོགས་སོ་སོའི་བསམ་འཆར་རྒྱ་ཁྱབ་ཏུ་ཉན་ཞིང་། བཟོ་བཅོས་དང་འཐུས་ཚང་ཡང་ཡང་བཏང་སྟེ། 2025ལོའི་ཟླ1པོའི་ཚེས25ཉིན་ཁུལ་མི་དམངས་འཐུས་མི་ཚོགས་ཆེན་སྐབས་བཅོ་ལྔ་པའི་གྲོས་ཚོགས་ཐེངས་དྲུག་པའི་སྟེང་བརྡས་ཐག་བཅད་པ་བརྒྱུད་གྲོས་འཆམ་བྱུང་མཐར་གྲོས་ཚོགས་ལ་ཕུལ་བའི《སྲོལ་ཡིག》གྲུབ་པ་རེད།

    《སྲོལ་ཡིག》བཟོ་བཅོས་བྱས་པའི་བརྒྱུད་རིམ་ཁྲོད་གཙོ་བོ་གཤམ་གསལ་གྱི་ཞིབ་ཕྲའི་བྱ་བ་སྒྲུབ་པ་ཡིན་ཏེ། གཅིག་ནི་ཞི་ཅིན་ཕིང་གི་དུས་རབས་གསར་པའི་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་དགོངས་པ་མཛུབ་སྟོན་དུ་བྱེད་པ་རྒྱུན་འཁྱོངས་དང་། སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་མི་རིགས་བྱ་བར་ཤུགས་སྣོན་དང་ལེགས་བཅོས་བྱེད་དགོས་པའི་སྐོར་གྱི་དགོངས་པ་གལ་ཆེན་སློབ་སྦྱོང་དང་ལག་བསྟར་གཏིང་ཟབ། ཀྲུང་དབྱང་གི་མི་རིགས་བྱ་བའི་གྲོས་ཚོགས་ཀྱི་དགོངས་དོན་ལག་བསྟར་དོན་འཁྱོལ་ནན་ཏན་བཅས་བྱས་ཐོག  ཀྲུང་ཧྭ་མི་རིགས་གཅིག་མཐུན་ཚོགས་པའི་འདུ་ཤེས་བརྟན་པོར་བསྐྱེད་རྒྱུ་དེ་སྲོག་ཤིང་མཛུབ་ཁྲིད་དུ་བརྟེན་ནས། 《སྲོལ་ཡིག》འདི་མི་རིགས་སོ་སོ་སྤེལ་རེས་མཉམ་འདྲེས་དང་མཉམ་གཅིག་ཏུ་དར་རྒྱས་གོང་འཕེལ་འགྲོ་བར་ཕན་ཐོགས་ཡོད་པར་ཁག་ཐེག་བྱས་པ་ཡིན། གཉིས་ནི་ཏང་གི་མགོ་ཁྲིད་རྒྱུན་འཁྱོངས་བྱས་ཏེ་ཏང་གི་མགོ་ཁྲིད་ཀྱི་ལེགས་ཆ་དེ《སྲོལ་ཡིག》བཟོ་བཅོས་བྱེད་པའི་ལག་ལེན་གྱི་ལེགས་ཆར་བསྒྱུར་ནས། ཏང་གི་བོད་སྐད་ཡིག་བྱ་བའི་སྲིད་ཇུས་དང་ཁྲིམས་སྲོལ་ཕྱོགས་ཡོངས་ནས་ལག་བསྟར་བྱས་པ་དང་། རྫོང་ཁག་སོ་སོའི་བརྟག་ཞིབ་གྲུབ་འབྲས་ལ་བརྟེན་ནས《སྲོལ་ཡིག》གིས་ཆད་ལུས་མེད་པའི་སྒོ་ནས་གོང་གནས་བཅའ་ཁྲིམས་ལག་བསྟར་ནན་ཏན་དང་། ལོ་མང་རིང་མཚོ་ལྷོ་ཁུལ་གྱི་བོད་སྐད་ཡིག་བྱ་བའི་ཁྲོད་ཀྱི་ཉམས་མྱོང་བཟང་པོ་དང་བྱེད་ཐབས་བཟང་པོ་ཧུར་ཐག་གིས་བསྡུ་ལེན་བྱས་ནས། དེ་ཉིད་མཚོ་ལྷོའི་དོན་དངོས་དང་མཐུན་ཞིང་། མཚོ་ལྷོའི་ཁྱད་ཆོས་ལྡན་པ་དང་གོང་འོག་གཅིག་འདྲེས་མཐུན་སྦྱོར་ཡོང་བ་བཅས་བྱས་ཏེ། དུས་ནུས་རང་བཞིན་དང་། ཁ་གཏད་རང་བཞིན། བཀོལ་སྤྱོད་རང་བཞིན་བཅས་ཧ་ཅང་ཆེན་པོ་ལྡན་པར་བྱས་པ་ཡིན། གསུམ་ནི་བཟོ་བཅོས་ཡང་ཡང་བྱེད་པ་རྒྱུན་འཁྱོངས་བྱས་ཏེ། གཞི་རིམ་གྱི་ཁྲིམས་འཛུགས་འབྲེལ་གཏུག་ས་ཚིགས་བེད་སྤྱད་ནས་བརྒྱུད་རིམ་ཧྲིལ་བོའི་མི་དམངས་དམངས་གཙོ་ལག་ལེན་དུ་བསྟར་ཞིང་། གཞི་རིམ་གྱི་ལས་བྱེད་པ་དང་། མང་ཚོགས། ཆེད་ལས་མཁས་པ་དང་ཤེས་ཡོན་པ་བཅས་ནས་ལས་རིགས་གཉེར་མཁན་བར། འོག་ནས་གོང་བར་དང་གོང་ནས་འོག་བར་དུ་ཐབས་ལམ་མང་པོ་བརྒྱུད་ནས་བསམ་འཆར་རྒྱ་ཁྱབ་ངང་བསྡུ་ལེན་བྱས་ཤིང་། འཚོལ་སྡུད་བྱས་པའི་བསམ་འཆར་ལ་རིགས་དབྱེ་ཕྱོགས་བསྡོམས་དང་།དོན་ཚན་རེ་རེ་བཞིན་དབྱེ་ཞིབ། བཟོ་བཅོས་ཡང་ཡང་བཅས་བྱས་ཏེ། 《སྲོལ་ཡིག》གིས་མི་དམངས་མང་ཚོགས་ཀྱི་འདོད་བློ་དང་རེ་ཞུ་མཚོན་ཐུབ་པར་ཁག་ཐེག་དང་། གནད་དོན་དངོས་ཐག་གཅོད་ཏན་ཏིག་བྱས་ནས《སྲོལ་ཡིག》དོན་དངོས་དང་མཐུན་ཞིང་སྤྱོད་གོ་ཆོད་པར་འགན་སྲུང་བྱས་པ་ཡིན། 

 གསུམ། བཟོ་བཅོས་བྱས་པའི་ནང་དོན་གཙོ་བོ།

      (དང་པོ།) སྒྲོམ་གཞིའི་གྲུབ་ཚུལ་གྱི་ཐད་ནས་སྔར་ལས་ལྷག་པར་ལེགས་བཅོས་དང་འཐུས་ཚང་དུ་བཏང་བ། བཟོ་བཅོས་བརྒྱབ་རྗེས་ཀྱི《སྲོལ་ཡིག》ལ་བསྡོམས་པས་དོན་ཚན་ཉེར་བདུན་ཡོད་པ་དང་། ལེའུ་དང་ས་བཅད་མ་བགོས་པར་དོན་ཚན་གཞིར་བཟུང་ནས་བསྐྱར་དུ་སྡེབ་སྒྲིག་དང་ལེགས་བཅོས་བྱས་ཐོག དེ་སྔའི་དོ་དམ་སྒྲིག་གཞིའི་ལེའུ་དང་ས་བཅད་ནང་གི་གྲོན་དངུལ་དང་བྱ་བའི་རྐྱེན་སྲོལ་སོགས་ནང་དོན་གཙོ་བོའི་སྐོར་དོན་ཚན་ལྔ་པའི་ནང་སྔ་སྣུར་བྱས་ཏེ། སྲིད་གཞུང་གིས་མཐོང་ཆེན་དང་གཅིག་གྱུར་འཆར་འགོད་བྱས་ཚུལ་ནན་བཤད་བྱས་ཡོད། དེ་སྔོན་ལེའུ་མང་པོར་ཁ་ཐོར་དུ་བཀོད་པའི་སྡེ་ཁག་གི་འགན་འཁྲི་དང་། ཚད་ལྡན་བེད་སྤྱོད། ཞབས་ཕྱི་འགན་སྲུང་བྱེད་ཐབས་སོགས་ཀྱི་ནང་དོན་དེ་དུས་རབས་གསར་པའི་བོད་སྐད་ཡིག་བྱ་བའི་གཙོ་གནད་གཞིར་བཟུང་ནས་བསྐྱར་དུ་བཀོད་དེ། སྟབས་བདེ་ཞིབ་གསལ་གྱི་རྣམ་པའི་སྟེང་ནས《སྲོལ་ཡིག》གི་ནང་དོན་མངོན་པར་བྱས་ཏེ། སྒྲོམ་གཞི་སྔར་ལས་ཚགས་དམ་པ་དང་གཏན་ཚིགས་ཀྱི་འབྲེལ་ཆགས་རང་བཞིན་སྔར་ལས་ཇེ་དྲག་ཏུ་བཏང་ནས་མང་ཚོགས་ཀྱིས་དང་ལེན་བྱེད་སླ་བ་དང་ཁོང་དུ་ཆུད་བདེ་བར་བྱས་ཡོད། 

      (གཉིས།)  ནང་དོན་སྒྲིག་འགོད་བྱེད་པའི་ཐད་ནས་སྔར་ལས་དུས་བསྟུན་མདུན་སྐྱོད་བྱས་པ། བོད་ཀྱི་སྐད་དང་ཡི་གེའི་བྱ་བའི་ཐད་ཏང་གི་མགོ་ཁྲིད་རྒྱུན་འཁྱོངས་དང་། ཀྲུང་ཧྭ་མི་རིགས་གཅིག་མཐུན་ཚོགས་པའི་འདུ་ཤེས་བརྟན་པོར་སྐྱེད་པ་སྙིང་བོར་འཛིན་དགོས་པ་ངེས་གསལ་བྱས་ཐོག “ཁྲིམས་ལྟར་དོ་དམ་དང་། ཚན་རིག་དང་མཐུན་པར་སྲུང་སྐྱོང་། ཚད་དང་ལྡན་པར་བཀོལ་སྤྱོད། འཆམ་མཐུན་ངང་འཕེལ་རྒྱས་གཏོང་བ”བཅས་ཀྱི་རྩ་དོན་ཁ་སྣོན་བྱས་པ་དང་། རྒྱལ་ཁབ་ཀྱི་སྤྱི་སྤྱོད་སྐད་ཡིག་དང་བོད་ཀྱི་སྐད་ཡིག་གཉིས་དུས་མཉམ་ངང་བེད་སྤྱོད་བྱེད་དགོས་པའི་དོན་ཚན་བཅུ་གཉིས་རེ་རེ་བཞིན་ཞིབ་ཕྲར་བཀོད་ཡོད་པས། སྔར་གྱི་སྲོལ་ཡིག་དང་བསྡུར་ན་དེ་བས་ཆ་ཚང་ཞིང་། ཐོལ་བྱུང་སྤྱི་པའི་དོན་རྐྱེན་ཚབས་ཆེན་གྱི་འཚུབ་ཟློག་སྔོན་ཇུས་ཆ་འཕྲིན་སྤེལ་བ་དང་སྤྱི་དམངས་ཀྱི་ཐོབ་ཐང་དཔང་ཡིག་སོགས་ཀྱི་ནང་དོན་གསར་དུ་བསྣན་ཡོད།

      (གསུམ།) སྡེ་ཁག་གི་འགན་འཁྲིའི་ཐད་ནས་འགན་དབང་སྔར་བས་ཁ་གསལ་བཟོས་པ། “སྲིད་གཞུང་གིས་གཅིག་གྱུར་མཐུན་སྦྱོར། གཙོ་སྐྱོང་སྡེ་ཁག་གིས་འགན་འཁུར་བ། འབྲེལ་ཡོད་སྡེ་ཁག་གིས་གཞོགས་འདེགས། སྤྱི་ཚོགས་ལས་རིགས་ཁག་ནང་དུ་ཞུགས་པ”བཅས་ཀྱི་བྱ་བའི་རྐྱེན་སྲོལ་ངེས་གསལ་བྱས་པས། སྔར་གྱི་སྲོལ་ཡིག་དང་བསྡུར་ན། བོད་ཀྱི་སྐད་དང་ཡི་གེའི་བྱ་བའི་གཙོ་སྐྱོང་སྡེ་ཁག་གི་འགན་འཁྲི་སྔར་ལས་ཞིབ་ཕྲ་དང་ཆ་ཚང་བར་གྱུར་ཡོད་པ་དང་། བོད་སྐད་ཡིག་གི་ལག་རྩལ་འདེགས་སྐྱོར་དང་ཞབས་ཕྱིའི་བྱ་བ། སྐད་གཉིས་ཀློག་དེབ་སྒྲིག་སྒྱུར་རྩ་འཛུགས་བྱེད་པ། བོད་ཡིག་བརྡ་ཆད་གསར་པ་ཁྱབ་གདལ་དང་བེད་སྤྱོད་བྱེད་པའི་ལས་དོན་ལ་ལྟ་སྐུལ་ཞིབ་བཤེར་བྱེད་པ་སོགས་ཀྱི་ནང་དོན་ཁ་སྣོན་བྱས་ཡོད།དེ་དང་ཆབས་ཅིག་མི་རིགས་ཆོས་ལུགས་དང་། ཁྲོམ་རའི་ལྟ་སྐུལ་དོ་དམ་སོགས་སྡེ་ཁག་མང་པོས་འགན་འཁྲིའི་ཁྱབ་ཁོངས་ནང་བོད་སྐད་ཡིག་བྱ་བ་ལེགས་པོར་སྒྲུབ་དགོས་པའི་གཏན་འབེབས་གསལ་བོར་བཟོས་ཡོད།

      (བཞི།)  སློབ་གསོ་དང་ཚན་རིག་ཞིབ་འཇུག་ཐད་ནས་ཁྱད་ཆོས་སྔར་ལས་ལྷག་པར་མངོན་པ། དོན་དངོས་དང་ཟུང་འབྲེལ་དམ་ཟབ་བྱས་ནས་མཚོ་ལྷོའི་ཁྱད་ཆོས་འབུར་དུ་ཐོན་པར་བྱས་ཏེ། རྒྱལ་ཁབ་ཀྱི་སྤྱི་སྤྱོད་སྐད་ཡིག་སློབ་གསོ་ཁྱབ་གདལ་དུ་གཏོང་བ་དང་ཆབས་ཅིག་བོད་སྐད་ཡིག་གི་སློབ་ཚན་བཀོད་སྒྲིག་བྱས་ནས།དེ་གཉི་ག་དོ་སྙོམས་ཡོང་བར་དེ་བས་སྣང་ཆེན་བྱས་ཡོད་པར་མ་ཟད། མི་རིགས་སློབ་གྲྭའི་བོད་ཡིག་དགེ་རྒན་སྐྱེད་སྲིང་བྱེད་པ་སོགས་ཀྱི་ཐད་ནས་བླང་བྱ་དེ་བས་མཐོན་པོ་བཏོན་ཡོད། མཉམ་སྦྲེལ་དྲ་རྒྱ་སོགས་སྨྱན་སྦྱོར་གསར་པ་སྣ་ཚོགས་ཀྱི་བོད་ཀྱི་སྐད་དང་ཡི་གེ་བེད་སྤྱོད་ཚད་ལྡན་དང་དོ་དམ། བོད་ཀྱི་སྐད་ཡིག་དང་དེང་རབས་ཆ་འཕྲིན་ལག་རྩལ་མཉམ་འདྲེས་གཏིང་ཟབ་ཡོང་བར་སྐུལ་འདེད་གཏོང་བ། ཆ་འཕྲིན་ཅན་གྱི་འཕེལ་རྒྱས་ལ་སྐུལ་འདེད་གཏོང་བ། དེ་བཞིན་དུ་དེང་རབས་ཚན་རྩལ་གྱི་བྱེད་ཐབས་སྤྱད་ནས་བོད་ཡིག་གི་དཔེ་རྙིང་དང་བོད་ཀྱི་ཕུལ་བྱུང་སྲོལ་རྒྱུན་རིག་གནས་མྱུར་སྐྱོབ་དང་སྲུང་སྐྱོབ་བྱེད་པ་སོགས་ཀྱི་ཁྱད་ལྡན་ནང་དོན་ཆེད་དུ་ཁ་སྣོན་བྱས་ཡོད།

     (ལྔ།)འཇོན་མི་གསོ་སྐྱོང་བྱེད་པའི་ཐད་ནས་འདེགས་སྐྱོར་ལ་སྔར་ལས་འགན་སྲུང་བྱས་པ། བཟོ་བཅོས་བརྒྱབ་རྗེས་ཀྱི《སྲོལ་ཡིག》ནང་རིགས་སོ་སོའི་ལས་བྱེད་པ་དང་ལས་བཟོ་བས་ཕན་ཚུན་སྐད་ཡིག་སློབ་སྦྱོང་བྱ་རྒྱུར་སྐུལ་མ་བཏང་ཡོད་པར་མ་ཟད། བོད་ཀྱི་སྐད་ཡིག་ལ་སློབ་སྦྱོང་བྱ་རྒྱུ་དེ་ལས་བྱེད་པ་དང་ལས་བཟོ་བའི་སློབ་གསོ་གསོ་སྦྱོང་གི་འཆར་གཞིའི་ནང་བཅུག་ནས། བོད་སྐད་ཡིག་བྱ་བའི་དཔུང་སྡེ་འཛུགས་སྐྱོང་བྱེད་སྟངས་ཕུན་སུམ་ཇེ་ཚོགས་སུ་བཏང་ཡོད། གཞུང་ཞབས་པ་བསྡུ་ལེན་དང་། དོན་ལས་སྡེ་ཚན་གྱི་ལས་བྱེད་མི་སྣ་གདན་འགུག་བྱེད་སྐབས། དགོས་མཁོར་གཞིགས་ནས་དེ་མཚུངས་ཀྱི་ལས་གནས་བཀོད་སྒྲིག་བྱས་ཏེ་སྐད་ཡིག་གཉིས་ཁོང་དུ་ཆུད་པའི་རྒྱུགས་སྤྲོད་སློབ་མ་བསྡུ་དགོས་པ་ཁ་གསལ་བཟོས་ནས། བོད་ཀྱི་སྐད་དང་ཡི་གེ་ཤེས་པའི་འཇོན་མིར་སྔར་ལས་གསལ་བའི་སྲིད་ཇུས་ཀྱི་རྒྱབ་སྐྱོར་མཁོ་འདོན་བྱས་ཡོད།

     གོང་གི་གསལ་བཤད་འདི་དང་འཆར་ཟིན་གྱི་བཟོ་བཅོས་མ་ཟིན་གཉི་གར་མཉམ་དུ་གྲོས་ཞིབ་བྱེད་པར་འཚལ།