མཚོ་སྔོན་ཞིང་ཆེན་མི་དམངས་སྲིད་གཞུང་དྲ་བ།
ཟླ་འོད་མེད་རུང་།
གློག་སྒྲོན་གྱི་ངོགས་ནས་ཆ་རྒྱུས་ཡོད་པའི་གྲིབ་གཟུགས་བཙལ།
སྔོན་ཆད།
ཉི་འོད་དང་ཟླ་འོད། གློག་སྒྲོན་འོག་ན།
ངའི་གྲིབ་གཟུགས་དང་ལྷན་དུ།
ང་ཡི་སྐེ་ལ་འཐམས་ཤིང་།
ང་ཡི་ལག་པར་འཇུས་པའི་ཁོ་མོའི་གྲིབ་གཟུགས་ཡོད།
འོན་ཀྱང་།
དོ་དགོང་།
ངས་གློག་སྒྲོན་རེ་རེའི་འོག་ནས་ཁོ་མོའི་གྲིབ་གཟུགས་མ་རྙེད།
དེ་ཡང་གྲིབ་གཟུགས་ང་རང་དང་གྱེས་སོང་བ་ག་ལ་ཡིན།
གྲིབ་གཟུགས་དེ་ངའི་སེམས་ན་ཡོད།
ངའི་གཡས་གཡོན་ན་ཡོད།
གྲིབ་གཟུགས་དེས་གྲུབ་པའི་མོ་རང་ང་དང་རྒྱང་དུ་གྱེས།
ཟླ་འོད་མེད་རུང་།
བསིལ་རླུང་འཇམ་པོ་ཞིག་གིས་ང་ཡི་ཞལ་ངོར་རེག
སྔོན་ཆད།
ང་ཡི་ཕྱོགས་བཞི་དང་མཚམས་བརྒྱད་ན།
མོ་རང་ཁོ་ནར་དབང་བའི་དྲི་ཞིམ་ཞིག་ཐུལ་ཡོད།
ང་ཡི་ཤ་གསེང་ལ་འཐིམ་ཞིང་།
ང་ཡི་དབང་བོར་འདྲེས་པའི་དྲི་ཞིམ་གཞན་དང་མི་འདྲ་བ་ཞིག་ཡོད།
འོན་ཀྱང་།
དོ་དགོང་།
དྲི་འཛིན་སྣ་ཡི་བུ་ག་རུ་ང་རང་གོམས་ཡོད་པའི་དྲི་ཞིམ་དེ་མ་ཚོར།
འུ་གཉིས་ཀྱི་ཤ་འདྲེས་པགས་འདྲེས་སུ་སོང་བའི་དྲི་ཞིམ་དེ་རླུང་གིས་ཁུར་སོང་།
ང་གཅིག་པུ་བསྐྱུར་ནས་རང་དབང་གིས།
ངའི་གཡས་གཡོན་ནས་གར་གྱི་སྟང་སྟབས་དང་བཅས་བཞུད་སོང་།
