མཚོ་སྔོན་ཞིང་ཆེན་མི་དམངས་སྲིད་གཞུང་དྲ་བ།
དྭངས་གཙང་ཆུ་བོ་ལྷོ་རུ་འཁྱུགས་པར་སོམས། །
ཡིད་འོང་ཟམ་པ་ཁ་རུ་དཔྱངས་པར་སོམས། །
མི་ཚོགས་སྣེ་མོ་གཉིས་སུ་བགྲོད་པར་སོམས། །
འུ་གཉིས་ཆུ་ཆེན་ཁ་རུ་འཕྲད་པར་སོམས། །
ཆུ་བོའི་ཕར་ཚུར་གཉིས་སུ་གནས་པར་སོམས། །
དུངས་པའི་ཟུར་མིག་ལྐོག་ཏུ་འཕེན་པར་སོམས། །
སྐྱེངས་པའི་ཚུལ་གྱིས་རང་སར་གནས་པར་སོམས། །
ཆུ་བོ་རབ་རྒྱས་ཟམ་པ་ཁུར་བར་སོམས། །
འཕྲད་འདོད་བློ་ཡིས་ཡར་མར་བརྒྱུགས་པར་སོམས། །
སྨྲེང་བའི་གདངས་ཀྱིས་ཕན་ཚུན་བོས་པར་སོམས། །
ཆུ་བོའི་སྒྲ་ཡིས་ཨ་ལན་མེད་པར་སོམས། །
ཞར་དུ་ཆར་གྱིས་ལུས་སེམས་བརླན་པར་སོམས། །
དེ་ལྟར་ལོ་ནས་ལོ་ལ་བབས་པར་སོམས། །
འུ་གཉིས་ཆུ་བོའི་འགྲམ་དུ་རྒས་པར་སོམས། །
སྐྲ་ལོའི་འདབ་མ་དག་ཀྱང་འཐོར་བར་སོམས། །
མིག་གིས་ཟིན་ཡང་རེག་ཏུ་མེད་པར་སོམས། །
འགྱོད་པའི་རྟ་ཕོ་རི་ལ་ཤོར་བར་སོམས། །
ལྡོག་མེད་རི་ལ་སྨུག་སྤྲིན་འཐིབ་པར་སོམས། །
