མཚོ་སྔོན་ཞིང་ཆེན་མི་དམངས་སྲིད་གཞུང་དྲ་བ།
དེ་ཡང་།
དཔྱིད་ཐོག་མའི་སྟ་གོན་མ་གྲུབ་པའི་དགུན་གཞུང་ཞིག་ལ།
ངའི་ངུ་ངག་གི་དབྱངས་རྟ་ཐོག་མ་ཁ་བའི་ཁྲོད་དུ་ལྷུང་བ་ཡིན་ཟེར།
དུས་དེ་ནས་བཟུང་།
ལས་ཀྱི་སྨོན་ལམ་དེ་ཁ་བའི་ཁྲོད་དུ་སྨིན་སོང་ལ།
བསོད་ནམས་ཀྱི་བགོ་སྐལ་དེ་ཡང་སྤང་ཐང་གི་གཞི་རུ་མཐོར་མགོ་བརྩམས།
ངའི་ངུ་ངག་གི་དབྱངས་འགྱུར་དེས་སུ་དང་གང་གི་བློ་ཁ་བསྒུལ་མ་སོང་མོད།
དྲིན་ཨ་མའི་འཛུམ་མདངས་བཀུག་ཡོད་པ་ངས་བློ་དཔོག་བྱེད་ཐུབ།
ངས་ཨ་མའི་འཛུམ་ཆུང་གི་དྲོད་ཁོལ་ཀློང་ནས་འོད་ཀྱི་རྨི་ལམ་རྨི་དུས།
ཨ་མས་ང་ལ་འདི་ལྟར་གསུངས་མྱོང་སྟེ།
བུ་ཆུང་ལགས།ཡར་བལྟས་ན་གངས་ཤིག་རིག་པ་གན།
བུ་ཆུང་ཁྱོད་ཀྱི་བླ་རི་ཡིན།
ངའི་གཅེས་ལོའི་བླ་རྩ་གངས་ལས་དཀར་དགོས་ཟེར།
མར་བལྟས་ན་ཐང་ཞིག་རིག་པ་གན།
བུ་ཆུང་ཁྱོད་ཀྱི་ཕ་ས་ཡིན།
ངའི་གཅེས་ལོའི་བློ་ཁོག་ཐང་ལས་ཡངས་དགོས་གསུང་།
འདི་ནི།
ངའི་རུས་རྐང་ལ་ཐོག་མར་བབས་པའི་དབྱངས་རྟ་དེ་ཅི་ལ་མིན།
ཡིན་ཏེ།
ཨ་མའི་འགྲོ་དྲུག་སེམས་ཅན་མ་རུ་སྒོམ་པའི་གསོལ་འདེབས་དེ་དག
ལས་ཀྱི་གནས་ལུགས་གསོང་བོར་བརྗོད་པའི་གནའ་གཏམ་དེ་དག་གིས།
ངའི་བློ་ཡིད་ལ་ཐོག་མའི་བྱབས་ཁྲུས་མཛད་ཅིང་མནོལ་གྲིབ་ཀྱིས་གོས་པ་མེད་པར་བྱས།
སྐབས་དེ་དག་ལ།
ནུབ་ནས་ཤར་ལ་འཕྱོ་བའི་སྤྲིན་པ་དཀར་པོ་དེ།
དགུང་སྔོན་པོས་ང་ལ་དཀྲོལ་བའི་དབྱངས་རྟ་ཨེ་ཡིན་བསམ་མྱོང་།
ཚོམ་བུ་ཚོམ་བུར་བཞད་པའི་མེ་ཏོག་ཁྲི་འབུམ་དེ།
ས་ཆེན་པོས་ང་ལ་གྱེར་བའི་དབྱངས་རྟ་ཨེ་ཡིན་འདོད་ཡོད།
ད་དུང་ཐོལ་གྱིས་འཕུར་བའི་བྱ་བྱེའུ་ཡི་གཤོག་རླབས།
ལྷོད་ཀྱིས་ཡན་པའི་ནོར་ལུག་གི་འབའ་ངུར།
ཉི་འོད་དང་རླུང་གཞོན།
ཁ་ཆར་དང་བུ་ཡུགའདི་དག་ཡོད་ཚད་ངའི་བླ་དང་སྲོག
རུས་དང་རྐང་ལ་འཐིམ་པར་གྱུར་ཡོད།
ན་སོ་བཅོ་ལྔའི་གསེར་གྱི་ལང་ཚོ་སྨིན་ཡོང་དུས།
ངས་ད་གཟོད་དབྱངས་གསལ་སོ་བཞིའི་ནུ་ཞོ་ཐོག་མར་རེག་པ་ཡིན་ལ།
དུས་དེ་ནས་བཟུང་།
ངའི་གོམ་ཁ་ཉི་མའི་ཕྱོགས་སུ་བསྒྱུར་མགོ་བརྩམས་ཞིང་།
རི་རབ་ཀྱི་ལྗིད་ཚད་དང་ཐང་ཆེན་གྱི་རྒྱ་ཁྱོན་མག་མོག་ཏུ་རྟོགས་ཡོང་དུས།
མེས་པོ་ཚོའི་དཔའ་མཛངས་ཀྱིས་བསྐྲུན་པའི་ཕ་ས་མཐོན་པོ་འདིའི།
མེས་མོ་ཚོའི་བྱམས་སེམས་ཀྱིས་བྲན་པའི་གཞིས་ཁྱིམ་དྲོན་མོ་འདིའི།
ཟབ་དོན་དང་དབུགས་རྒྱུན་ལ་སེམས་པ་གླན་དགོས་པའི།
གནས་ལུགས་དང་འགན་འཁྲི་དེ་ང་ལ་ལྷང་ལྷང་དུ་སྒྲོག་གིན་འདུག
ཉི་འོད་ཀྱི་ཀློང་ནས།
ཆར་རླུང་གི་ཁྲོད་ནས།
གསེར་གྱི་པི་ཝང་ལྟ་བུའི།
འོད་ཀྱི་རྒྱུད་སྐུད་ལྟ་བུའི།
སྨྲ་མི་ཤེས་པའི་ཡིག་འབྲུ་དེ་དག་ངའི་གློ་སྙིང་དུ་བབ་ཡོང་དུས།
ངས་རང་སེམས་ནས་ཅི་ཞིག་གྱེར་དགོས་པའི་ཧམ་པ་དེ།
གངས་ཀྱི་ངོས་སུ་བྲིས་མྱོང་ལ།
གཙང་བོའི་གཞུང་དུ་བསྲིངས་མྱོང་།
ཡང་སྐབས་དེ་དག་ལ།
ན་ཟུག་ཅིག་གིས་ང་ཡོངས་སུ་བཏུམས་སོང་།
མིག་ཆུ་ཞིག་གིས་ང་ཡོངས་སུ་བརླན་སོང་།
དེ་ནི་ངས་གངས་ཀྱི་ར་བ་འདིར་ཡིད་སངས་པའི་གླུ་ཞིག་ལེན་མ་ཐུབ་པས་ཡིན།
དེ་ནི་རིགས་ཀྱི་སྤུན་ཟླ་འདིར་མཁོ་སོད་པའི་ཀི་ཞིག་འདེབས་མ་ཐུབ་པས་ཡིན།
ཡིན་ན་ཡང་།
ངས་ཟོས་པའི་མར་རྩམ་སྣུམ་པོ་དེས།
ངས་འཐུང་བའི་འོ་ཞོ་མངར་མོ་དེས།
ང་ལ་འདི་ལྟ་བུའི་ན་ཟུག་ཅིག་དང་།
མིག་ཆུ་ཞིག་བར་མེད་དུ་སྦྱིན་སོང་བ་ནི།
ངའི་བླ་ཚེ་སྲོག་གསུམ་ལ་སིམ་པའི་དབྱངས་རྟ་དེ་ཨེ་ཡིན་འདོད།
ད་ནི་མི་ལོ་ལྔ་བཅུ་ལ་སོན་སོང་།
ཕོ་ལོ་ལྔ་བཅུའི་སྐས་རྐང་འདི་ནས།
ངས་སློབ་ཆེན་གྱི་སྒོ་ཐེམ་ལས་དབང་གིས་བཀག་པའི་ཕངས་སེམས་དང་།
གླེགས་བམ་གྱི་ཞལ་ཐག་སྒྱིད་ལུག་གིས་འཕྲོག་པའི་འགྱོད་སེམས་ཀྱི་ཀློང་ནས།
ངག་འདར་འདར་དུ།
ལུས་ཞུམ་ཞུམ་གྱིས་གླུ་འདི་ཁྱེད་ཚོར་བླངས་ན།
ངའི་ཞེ་སེམས་ལ་འཁོར་བའི་འབོད་པ་དེ་ཡིན་ཆོག་པར་ཞུ།
ངའི་རུས་རྐང་ལ་འཁྱིལ་བའི་དབྱངས་རྟ་དེ་ཡིན་ཆོག་པར་ཞུ།
ཕ་ས་ཕ་ཡུལ། ཕ་མ་སྤུན་མཆེད། ཕུ་ནུ་མིང་སྲིང་།
དྲིན་ཆེན་དགེ་རྒན། རིགས་མཐུན་སྤུན་ཟླ། ལས་མཐུན་གྲོགས་པོ།
དེ་རིང་ངས་མི་ཟས་ཡུན་རིང་ཟོས་པའི་རིན་བབ་ཏུ་མིན་ཡང་།
ཡིད་སེམས་ཀྱི་རྒྱུད་སྐུད་དཀྲོལ་བའི་གླུ་ངག་གི་མཆོད་པ་འདི་ཁྱེད་ལ་མི་འབུལ་སུ་ལ་འབུལ།
རུས་རྐང་གི་སྡོང་རས་སྒྲོན་པའི་སྙན་ཚིག་གི་མར་མེ་འདི་ཁྱེད་ལ་མི་སྒྲོན་སུ་ལ་སྒྲོན།
རྒྱུ་མཚན་ནི།
ཁྱེད་ཅག་ཡོད་པས་ང་དངོས་གནས་ཕྱུག་པོ་རེད།
ཨ་་་
ཁྱེད་ཅག་ཡོད་པས་ང་དངོས་གནས་ཕྱུག་པོ་ཕྱུག་པོ་རེད་ཡ།
རྩོམ་སྒྲིག་པ། ལྷ་ཆེན་རྒྱལ།
