མེ་ཏོག་ཅིག་གི་ལས་དབང་། འཇུ་སྐལ་བཟང་།

——ཨ་ཁྱུང་གནམ་རྫོང་གི་ཇོ་དགོན་ལས་རྙེད་པའི་རྟོག་འཆར།

ནག་ཉིལ་ཉིལ་གྱི་སྐྲ་ལོ།

དྲི་བསུང་འཐུལ་བའི་འཇིག་རྟེན་ཞིག་རྨང་ནས་བསྒྱེལ།

མཛེས་སྡུག་གི་སྨིན་མ་བསྣོལ་མཚམས་ན།

ཡིད་ཆེས་དཀའ་བའི་དམ་བཅའ་ཞིག་འཁྱོག་པོར་བཀུག

བལ་སྐུད་ལྟར་ལྷོད་པའི་སྤྱོད་ལམ་དེས།

ནགས་ཚལ་སྟུག་པོ་དེ་འདྲ་ཞིག་བརྟོལ་འོང་བ་བདེན་ཡང་།

སྒོམ་ཆེན་ཚོའི་རྐང་གླིང་རིང་མོ་དེ་འཚོལ་ཕྱིར།

གངས་ཁྲོད་ནས་གངས་ཁྲོད་དུ་ཆས་འགྲོ་བ་ངོ་མ་ཡིན་ནམ།

རྦད་སེམས་ཐེངས་གཅིག་གིས་བཅད་པའི།

བྱུར་དམར་གྱི་ལན་ཚར་དེ།

སུ་ཞིག་གི་ཟུག་གཟེར་གྱི་ཕང་བར་བསྐྱུར།

ཆུ་ཟོ་ལ་ཤར་བའི་གསང་བ་ཆུང་ཆུང་དེ།

མིག་འབྲས་ནག་པོའི་དབུས་སུ་ཡིབས་པ།

ཞིབ་པར་བལྟས་ན་ཨེན་ཙམ་གསལ་མོད།

འགྲམ་ཆང་གིས་གཤེར་བའི་མདུན་སོ་ན།

ཨ་ཡིག་རང་བྱོན་དེ་དངོས་གནས་འདུག་པས།

ཡིད་མི་ཆེས་ཐབས་མེད་བྱུང་།

རྩོམ་སྒྲིག་པ། ལྷ་ཆེན་རྒྱལ།