མཚོ་སྔོན་ཞིང་ཆེན་མི་དམངས་སྲིད་གཞུང་དྲ་བ།
རྩྭ་ཐང་གི་ལྭ་བ་ཕྱི་ནང་ཡང་ཡང་བརྗེས།
ཡ་གི་སྡེ་བའི་གྲུབ་ཐོབ་དང་མ་གི་ཚོ་བའི་མཁའ་འགྲོ་མའི།
ཡ་མཚན་པའི་གཏམ་རྒྱུད་ལའང༌།
དུད་རྡུལ་སེར་བོ་ཞིག་རིམ་གིས་བབ།
ཨ་ཕྱིའི་ལག་འཁོར་ཆུ་ངུ་དེ་ནི།
ཚད་ཐུང་བའི་རྩྭ་ཐང་གི་ལོ་ཟླ་སྟེ།
ཇེ་མགྱོགས་ཇེ་དལ་དུའང་མ་སོང་བར།
རང་ས་ན་སྐྱར་སྐོར་བྱེད།
དགེ་ལེགས་དང་དཔལ་མོའི་སྐོར་གྱི་ཁ་བརྡ་དེ།
ལོ་དུ་མ་ཞིག་བརྒྱུད་མཐར།
དཔལ་མགོན་དང་དྷུ་བྷེའི་སྐོར་ལ་གྱུར་འདུག་པ།
ཉི་ཐིག་དེད་ནས་སྦྲ་ངོར་འཛེགས།
བཙའ་ཆགས་པའི་བྱིས་སྒྲུང་སྐོར་ཞིག
ཨ་མྱེའི་སྨྲ་ར་གཟེང་བའི་གསེབ་ནས་ལངས་ཏེ།
མར་མེ་ཆུང་ངུའི་ངོགས་སུ་འཕུར་ལྡིང་ལྷབ་ལྷུབ་བྱེད།
དབེན་པ་ཁད་འཇགས་པའི་དུས་སུ།
སུན་སྣང་ཡང་མོ་ཞིག་ཁ་བ་དང་མཉམ་དུ།
ཆོན་ཐག་གི་རྒྱུད་ལས་དུམ་བུ་དང་དུམ་བུར་ཆད་ཅིང༌།
ས་རུ་འཐོར།
ཁྱིམ་བདག་གི་སྤྱི་སྡོམ་བསམ་གཞིགས་ལ།
དོན་འགྲུབ་མཚོའི་དེ་རིང་གི་སྲམ་དེ།
ཁོ་མོའི་ཨ་ཅེའི་བག་ཚར་གྱི་འདབས་སྲམ་ལས།
སོར་མོ་དོ་ཙམ་ཆེ་བས།
རི་བོའི་ངལ་དུབ་ཀྱི་སྣེ་ལས་སྔུར་བ་རིང་བོ་ཞིག
གཅིག་སྣེར་གཅིག་མཐུད་དུ་བརྐྱང་འོང་།
རྩོམ་སྒྲིག་པ། ལྷ་ཆེན་རྒྱལ།
