མཚོ་སྔོན་གསར་འགྱུར་དྲ་བའི་འཕྲིན།   སྨྱུ་གུ་ལྟ་བུའི་རྐོ་གྲིས་བྲིས་པ་ལྟ་བུའི་ཤིང་རིས་བརྐོས། ལོ་རྒྱུས་གྱི་འཕེལ་འགྱུར་དང་བསྟུན་ནས་རྨ་ཙོང་ས་ཆ་འདིར་རྒྱའི་རིག་གནས་གཙོ་བྱས་པའི་རིག་གནས་སྣ་མང་མཉམ་འདྲེས་མཉམ་དར་གྱི་རྣམ་པ་ཆགས་པས།  ས་གནས་རེར་གཞན་དང་ཐུན་མོང་མ་ཡིན་པའི་ཁྱད་ཆོས་རེ་ཡོད།  དེ་ལས་མཚོ་སྔོན་ཞིང་ཆེན་ཟི་ལིང་གྲོང་ཁྱེར་ཧོང་ཀྲུང་ཆུས་བོད་ལུགས་ཤིང་རྐོ་ནི་ཧོང་ཀྲུང་ངམ་སྐུ་འབུམ་རིག་གནས་ཀྱི་ཁྱད་ཆོས་ཉག་ཅིག་རེད།

སྐལ་བཟང་མེ་ཏོག་ཁྱིམ་ཆས་མྱོང་རོལ་ཁང་ནི་མཚོ་སྔོན་ཞིང་ཆེན་ཟི་ལིང་གྲོང་ཁྱེར་ཧོང་ཀྲུང་ཆུས་ན་ཡོད་ཅིང་།  དེ་ནི“མི་རིགས་རིག་གནས་དང+ཁྱད་ལྡན་རྐོ་རྒྱག+སྤུས་ལེགས་ཁྱིམ་ཆས+མྱོང་རོལ་བྲིན་འཚོང”ཟུང་འབྲེལ་གྱི་ལམ་ནས་མང་ཚོགས་ལ་ཤིང་གི་ཁྱིམ་ཆས་དང་། ཙན་དན་དམར་པོའི་ཁྱིམ་ཆས།  མི་རིགས་ཀྱི་ཁྱད་ལྡན་ཁྱིམ་ཆས།  ཤིང་བརྐོས་ཐོན་རྫས།   ཁྱད་ཆོས་ཅན་གྱི་ཁྱིམ་ཆས་ཆེད་བཟོ།   གནའ་བོའི་ཁང་རྒྱུན་སྤུད་སྲོལ་ལ་སོགས་ཕྱོགས་བསྡུས་རང་བཞིན་གྱི་ཆེད་ལས་ཅན་གྱི་ཁྱིམ་ཆས་བྲིན་འཚོང་དང་ངོམ་སོ་མྱོང་རོལ་བྱེད་ས་ཞིག་ཡིན།    ས་ཁུལ་དེའི་རིག་གནས་ཐོན་ལས་ཀྱི་སྣེ་ཁྲིད་ཁེ་ལས་ཞིག་ཡིན་པའི་ངོས་ནས་རྨ་ཙོང་རིག་གནས་འཛིན་སྐྱོང་སྤེལ་གསུམ་ལ་ནུས་པ་གང་ལེགས་བཏོན་ཡོད་པར་མ་ཟད།   ཁེ་ལས་རང་སྟེང་གི་དགེ་མཚན་ལ་བརྟེན་ནས་རྨ་ཙོང་རིག་གནས་ཀྱི་ཤིང་རྐོའི་སྒྱུ་རྩལ་སྔོག་འདོན་དང་། སྲུང་སྐྱོབ། བེད་སྤྱོད་བཅས་ཟུང་འབྲེལ་དང་། བྱ་གཞག་དང་ཐོན་ལས་ཕན་ཚུན་གཅིག་གྱུར་བྱས་ཏེ།  ས་ཁོངས་ཀྱི་ཁྱད་ཆོས་ལྡན་པའི་རྨ་ཙོང་ཤིང་རྐོའི་སྒྱུ་རྩལ་ལྟེ་གནས་བཙུགས་པ་དང་། རྨ་ཙོང་གི་ཤིང་རྐོ་འཛིན་སྐྱོང་སྤེལ་གསུམ་བྱས་ནས་རྨ་ཙོང་རིག་གནས་གོང་ནས་གོང་དུ་སྤེལ་ཡོད།    

སྲོལ་རྒྱུན་ཤིང་རྐོ་ལག་རྩལ་དང་དེང་རབས་ཁྱིམ་ཆས་ཟུང་འབྲེལ། 

ཤེས་གསལ་ལྟར་ན།  རྨ་ཙོང་གི་ཤིང་རྐོ་སྒྱུ་རྩལ་ལྟེ་གནས་སུ་གཏོགས་པའི་མཚོ་སྔོན་ཡུའན་ཧུའེ་ཤིང་རྐོ་ལག་རྩལ་ཚད་ཡོད་ཀུང་སིས་ཐོན་སྐྱེད་བྱས་པའི་ཐོན་རྫས་དག་རྒྱལ་ཡོངས་ཀྱི་ས་གནས་སོ་སོ་དང་།  སོག་པོའི་རྒྱལ་ཁབ། ཨ་རི། སང་ག་ཕོར།  མ་ལ་ཞི་ཡ་སོགས་སུ་བཙོངས་ཡོད།  2012ལོར་ཀུང་སི་དེISO9001ཞེས་པའི་རྒྱུ་སྤུས་ངོས་འཛིན་བརྒྱུད་ནས་དཔང་དངོས་ར་སྤྲོད་བྱས་པ་དང་།  2014ལོར་ཟི་ལིང་གྲོང་ཁྱེར་མི་དམངས་སྲིད་གཞུང་གིས“ལས་གཏོད་ལས་ཞུགས་ཁེ་ལས་སུ་བསྐྱོད”ཅེས་པར་བདམས་པ་དང་། 2015ལོར་ཟི་ལིང་གྲོང་ཁྱེར་ཚན་རྩལ་ཅུས་ཀྱིས“ཚན་རྩལ་ཅན་གྱི་ཁེ་ལས”སུ་བདམས། 2016ལོར་ཀུང་སིའི་ཚོང་རྟགས“སྐལ་བཟང་མེ་ཏོག”དེ“ཀྲུང་གོའི་གྲགས་ཆེ་བའི་ཚོང་རྟགས”སུ་བདམས། 

སྐལ་བཟང་མེ་ཏོག་ཁྱིམ་ཆས་ཀྱིས་མི་རིགས་རིག་གནས་ཀྱི་གྲུབ་ཆ་དག་རྐོ་བཟོ་རེ་རེ་ཁྲོད་བཅུག་ཡོད་པས།  མི་རིགས་སྲོལ་རྒྱུན་རིག་གནས་དང་དེང་རབས་འཚོ་བ་ལྷན་ཐབས་སུ་མངོན་པའི་ལག་རྩལ་ཐུན་མོང་མ་ཞིག་ཡིན་ལ། ལག་རྩལ་དེ་ཉིང་བཅུད་མ་ལུས་ཡོངས་སུ་བསྡུས་པའི་རིག་གནས་ཀྱི་བརྩམས་ཆོས་ཤིག་ཀྱང་ཡིན། 　

ཁེ་ལས་དེ་འཕེལ་རྒྱས་གྱི་བརྒྱུད་རིམ་ཁྲོད་ཞིང་གྲོང་དར་སྤེལ་གྱི་ལས་ལ་ཞུགས་ཏེ།  མ་རྩའི་ཡོང་འབབ་དང་། ལག་རྩལ་ཟབ་སྦྱོང་།  བཟོ་ལས་ལས་ཞུགས་ལ་སོགས་བརྒྱུད་ནས་ཉེ་འཁོར་ཞིང་ཁྱིམ་གྱི་ཡོང་འབབ་ཇེ་མང་དུ་བཏང་ནས་ཁེ་ལས་དང་ཞིང་ཁྱིམ་གཉིས་ཀ་འཕེལ་བའི་མཉམ་རྒྱལ་ལ་ཧུར་ཐག་བྱས་པ་དང་།   “ཁེ་ལས་དང་ཞིང་ཁྱིམ”ཟུང་འབྲེལ་གྱི་བྱེད་ཐབས་གསར་དུ་བཏོད་དེ། ལོ་དུ་མའི་རིང་ལ་རི་སེར་དང་།  ཞང་སྐྱོང་སོགས་ཡུལ་ཚོ་དང་གྲོང་རྡལ5ཡི་སྡེ་བ་དབུལ་བོ81ལ་ཁ་གཏད་རོགས་སྐྱོར་བྱས་པ་དང་། ཁེ་འབབ་ཁྲི600བགོ་བཤའ་བརྒྱབ་ནས་མང་ཚོགས5000ལ་རྒྱུན་ཆད་མེད་པར་ཕན་ཁེ་བསྐྲུན།

 ལག་ཤེས་རྐྱང་རྐྱང་གི་ཤིང་རྐོས་ལག་རྩལ། 

“འབྱུང་འགྱུར་ང་ཚོས་རང་བྱུང་སྐྱེ་ཁམས་དང་རིག་གནས་ཡུལ་སྐོར་གྱི་ཐོན་ཁུངས་གཞིར་བཅོལ་ཏེ། རྨ་ཆུ་འབབ་རྒྱུད་ཀྱི་སྐྱེ་ཁམས་སྲུང་སྐྱོབ་དང་སྤུས་ལེགས་འཕེལ་རྒྱས་ཀྱི་འཕེལ་རྒྱས་འཐབ་ཇུས་དང་། རྨ་ཆུ་སྟོད་རྒྱུད་ཀྱི་རྨ་ཙོང་རིག་གནས་ཡུལ་སྐོར་ཐོན་ལས་གསར་བསྐྲུན་བཅས་གོ་སྐབས་སུ་བཟུང་ནས་རིག་གནས་ཡུལ་སྐོར་དང་བདེ་ཐང་ལ་སོགས་པའི་ཐོན་ལས་མཉམ་སྤེལ་ལ་སྐུལ་འདེད་གཏང་རྒྱུ་མ་ཟད།  རྨ་ཙོང་རིག་གནས་ཀྱི་ལྟེ་བ་ཁུལ་བཙུགས་ཏེ།  ‘རྨ་ཙོང་རིག་གནས’ཞེས་གསེར་གྱི་ཚོང་རྟགས་བརྩམས་ནས་ཞིང་ཆེན་ཡོངས་ཀྱི་རིག་གནས་ཡུལ་སྐོར་མཉམ་སྤེལ་དཔེ་སྟོན་ཁུལ་དང་། ཡུལ་སྐོར་ཐོན་ལས་བཅོས་སྒྱུར་གསར་གཏོད་ཁུལ་བསྐྲུན་ནས་གྲོང་ཁྱེར་རིག་གནས་ཀྱི་ས་རྟགས་ཤིག་གཏོད་འཆར་ཡོད་ཅེས་མཚོ་སྔོན་ཡུའན་ཧུའེ་ཤིང་རྐོ་ལག་རྩལ་ཚད་ཡོད་ཀུང་སིའི་སྤྱི་གཉེར་བ་ཡོའུ་ཆི་ཧུང་གིས་དེ་ལྟར་བརྗོད་བྱུང་། 
 

ལོ་ཙཱ་བ། ཁོན་ཐར་འཚོ།