རྡེའུ་དཀར །

　　ན་ནིང་ཁྱོད་ཀྱི་དོན་ལ།།

　　མིག་ཆུས་མཚོ་ཞིག་བསྐྱིལ་བ།།

　　དགུན་ལ་དར་ཁ་འགྲིག་ཀྱང་།།

　　བརྩེ་བའི་ནང་སྙིང་འཁྱགས་མེད།།

　　མཚོ་མོའི་ཕར་ལ་བཞུགས་པའི།།

　　བྱམས་པ་གནས་མ་བུ་ཁྲིད།།

　　གནས་བཟོད་བདེ་མོ་མིན་ན།།

　　ཀོ་གྲུ་བརྒྱབ་ནས་ཐོན་ཡོང་།།

　　སྣང་བའི་མགུར་གླུ་འཐེན་ཞིང་།།

　　འདམ་རྩྭ་མཉམ་ཟ་བྱེད་པའི།།

　　མཚོ་ཐོག་ངང་དཀར་ངང་དམར།།

　　དྲན་ཐོག་སྨྲེང་བཞག་རེད་ཨང་།།

　　གཤོག་དྲུག་བདེ་མྱུར་རྩལ་གྱིས།།

　　སྐད་ཅིག་མཚོ་མཐའ་སྐོར་ཞིང་།།

　　མཚོ་མོའི་གསང་ལམ་ཉུལ་བའི།།

　　གསེར་ཉ་ཡིན་ན་བསམ་བྱུང་།།

　　མཚོ་མོའི་མེ་ལོང་ནང་ལ །།

　　ཁྱོད་ཀྱི་གཟུགས་བརྙན་ཤར་བྱུང་།།

　　ཁྱོད་རང་མཛེས་དང་མི་མཛེས།།

　　ཟླ་བ་ལྷ་མོས་བཤད་ཡོང་།།

　　རླབས་ཀྱིས་གཏོར་བའི་མེ་ཏོག།

　　ཁྱོད་ཀྱི་དབུ་ལ་སྒྲོན་དང་།།

　　མཚོ་མོ་དྭངས་ཤ་ཅན་ལ།།

　　དྲན་པའི་ཆུ་རིས་འཁྱིལ་ཡོང་།།

　　སེམས་ཀྱི་མཚོ་མོའི་ནང་གི།

　　མཚོ་བདག་ཀླུ་མོ་ཁྱོད་ཡིན།།

　　མཚོ་མོ་རྒྱས་དང་མི་རྒྱས།།

　　མཚོ་བདག་སེམས་ཀྱིས་ཤེས་ཡོང་།།