མཚོ་སྔོན་པོར་འཇིག་རྟེན་ལས་འདས་དང་མ་འདས་པའི་ལྷ་ཀླུ་མཐུ་རྩལ་ཅན་གནས་ཤིང་། བོད་རྒྱལ་སྲོང་བཙན་སྒམ་པོས་བོད་དབུས་ཀྱི་ལྗོངས་དེ་ཁྱད་ཆོས་དུ་མ་དང་ལྡན་པར་བསྔགས་པའི་གསུང་ལས། ཁྲི་བཤོས་རྒྱ་མཚོའི་ཀླུ་བློན་བྱང་ཆུབ་སེམས།། ཆུ་བོ་ཆེན་པོ་ཀུན་ལ་ཕན་པར་མཛད།།ཅེས་གསུངས། མཚོ་འདིའི་གནས་བདག་ནི་ཞི་དྲག་ཆོ་འཕྲུལ་སྟོང་གི་རྩེ་དགའ་འཛིན་པའི་ཀླུ་བློན་བྱང་ཆུབ་སེམས་དཔའ་ལ་སྨན་མོ་ཀླུ་སྲིན་དྲེགས་པ་འབུམ་གྱིས་བསྐོར། མཚོ་སྙིང་གནས་ཡིག་ཏུ། གང་མཚོ་ཆེན་ཁྲ་ཤོག་རྒྱལ་མོ་ལ། ཕྱི་ནང་གསང་བའི་ཞིང་ཁམས་བསམ་མི་ཁྱབ་ཅེས་དང་། བསང་གསོལ་དུ། མཚོ་སྙིང་རྡོ་རྗེ་ཕོ་བྲང་ནས།། རིགས་གསུམ་ལྷ་ཚོགས་དཔའ་བོ་ཌྰ་ཀི་མ།། འཇིག་རྟེན་འདས་དང་མ་འདས་སྲུང་མའི་ཚོགས།། ཕྱོགས་མཚམས་ཉིན་སྲིབ་རི་ཀླུང་ནེའུ་གསིང་སོགས།། གནས་ཀྱི་ཁྱད་པར་སོ་སོར་དབང་བའི་ལྷ།། ཞེས་བློན་པོ་གསེར་ཆེན། ཟོ་དགུ། དཔའ་རྟུལ་རྫ་རྒན། ཧེ་སྣ། རྐང་ཚའི་རྫ་དམར། སྨོན་ལམ་མཐོན་པོ། ཨ་མ་ཉག་རི། སོགས་གཉུག་མར་གནས་པའི་གཞི་བདག་བསམ་གྱིས་མི་ཁྱབ་བོ།།

མཚོ་མཆོད་པའི་སྲོལ་ཚུགས་པའི་ཐད། ངག་རྒྱུན་ལ་སྔོན་ཧན་རྒྱལ་རབས་ཀྱི་དུས་སུ་རྒྱལ་པོ་ཞིག་གིས་ས་དེའི་ཡུལ་བདག་ལ་རྒྱ་ཁབ་སྤར་གང་བསྐུར། ཁབ་ཀྱིས་གོ་མཚོན་ཧྲག་པོ་ཡོད་པ་མཚོན་ལ། ས་འདི་བཙན་གྱིས་འཕྲོག་རྒྱུ་ཡིན་པའི་བརྡ་བསྟན། ས་འདིའི་ཡུལ་བདག་གིས་ཕྱིར་ལན་ལ། དར་སྔོན་པོ་ཆད་ཁ་གང་གི་ཁུད་དུ་ཆུ་བུམ་པ་གང་བཏུམས་ནས་བསྐུར། ཁྱོད་ལ་གོ་མཚོན་ཧྲག་པོ་ཡོད་ནའང་། ང་ལ་ཁྱོད་ཀྱི་ས་ཆེན་པོ་སྐད་ཅིག་ཏུ་བསྣུབ་ཐུབ་པའི་མཚོ་ཆེན་པོ་ཡོད་པའི་བརྡ་བསྟན། རྒྱ་ནག་རྒྱལ་པོས་ཉུལ་མ་བལྟ་རུ་མངགས། ངོ་མ་གནམ་ཐང་ཏུ་ལྷུང་བ་འདྲ་བའི་མཚོ་ཆེ་ཞིང་དྭངས་པོ་ཞིག་རི་ཆེན་དུ་མའི་དབུས་སུ་ལྟེམས་ལྟེམས་སུ་ཡོད་ཅིང་། ཉག་ཁང་ནས་ས་ཅུང་ཙམ་བརྐོས་ན་མཚོ་ཤོར་ནས་རྒྱ་ནག་གི་ས་ཆེན་པོ་སྐད་ཅིག་ལ་བསྣུབ་པའི་ཉེན་ཆེ་བ་མཐོང་། ཉུལ་མས་རྒྱལ་པོ་ལ་རང་གི་མཐོང་ཐོས་རྣམས་སྙན་སེང་ཞུས། རྒྱལ་བློན་ཚོས་མཚོ་འཕྱུར་བའི་ཁ་བཟློག་ཆེད་བཀའ་གྲོས་གནང་། མཚོར་མཆོད་དེ་ཀླུ་རྒྱལ་ལ་མཚོ་འཕྱུར་ནས་རྒྱ་ཡུལ་དུ་གནོད་འཚེ་མི་འབྱུང་བའི་གསོལ་བ་འདེབས་པ་དང་མཉམ་དུ། མཚོ་ཆུ་སྐམ་བྱེད་ཀྱི་རྫས་བསྒྲིགས་ནས་ལོ་རེར་མཚོ་ནང་དུ་འདེབས། དེ་ནས་བཟུང་མཚོར་མཆོད་པའི་སྲོལ་རྒྱུན་འཇགས་སུ་སོང་ཟེར།

རྒྱལ་རབས་ཐང་སུང་ཡོན་མིང་ཆིང་གི་དུས་སུ་མཚོ་སྔོན་པོ་བླ་མཚོ་ལ་བརྩིས་ནས། ཀོང་རོན་ལྭང་དང་། ལིན་ཤན་ཆིན་ཧེ་ཏ་ཏུ་ཀྲི་ཙོང་ཧྲིན། ཧྲིན་ལེན། ཧྲིས་ཧྲིན་སོགས་མཚན་དང་ཐོབ་ཕུལ་མྱོང་། མི་རིགས་སོ་སོས་མཚོ་སྔོན་པོ་གངས་ཅན་ལྷ་མཚོའམ་བླ་མཚོར་བརྩིས་ནས་མཆོད། ཨ་མདོའི་བོད་མིས་ལྷ་མཆོད་ལྷ་བསང་འབུལ་དུས་ཨ་མྱེས་རྨ་ཆེན་དང་ཁྲི་ཤོག་རྒྱལ་མོ་གཉིས་མི་འབོད་མཁན་མེད། ཁྱད་པར་ལུག་གི་ལོ་ལ་མཚོར་མཆོད་པ་དང་། མཚོ་གཏེར་འབུལ་བ། ལྷ་ཐོ་ཀླུ་ཐོ་བརྩིག་པ། སྐོར་བར་འགྲོ་བ། ཀླུ་གཏོར་བསྔོ་བ་སོགས་བྱེད། མཚོར་མཆོད་པའི་སྲོལ་དམངས་ཁྲོད་དུ་དར་བར་མ་ཟད། གོང་མའི་གཞུང་ནས་ཀྱང་གཙིགས་སུ་འཛིན། ཆང་རྒྱལ་རབས་སྐབས་ལྷག་པར་རྒྱ་ཆེ། གོང་མ་ཡུང་ཀྲིན་ཁྲི་ལོ་བཞི་བ1726མཚོ་ཤར་དུ་རྡོ་རིང་བཙུགས། སྟེང་དུ་ལེན་ཤན་ཆིན་ཧེ་ཧྲིན་ཞེས་མན་སོག་རྒྱ་གསུམ་གྱི་ཡི་གེ་བརྐོས་ཡོད། ཏོ་ཀོང་ཁྲི་ལོ་བཅུ་གཉིས་པར1832རིག་སྨོན་ཚ་གན་མཁར་གྱི་བྱང་དུ་མཚོའི་ལྷ་ཁང་བཞེངས། ལོ་རེར་གོང་མས་མི་མངགས་ནས་མཚོར་མཆོད། དེ་ལས་སོག་པོའི་ཝང་ཀུང་དང་། བོད་ཀྱི་ཆན་ཧུ་པེ་ཧུ་ཚོགས་ནས་དཔོན་པོར་སྐྱེས་འབུལ། མེན་གོའི་སྐབས་སུའང་དེ་ལྟར་རྒྱུན་བསྐྱངས།

མཚོར་མཆོད་པའི་དུས་ནི་དབྱར་སྟོན་ཡིན་ཞིང་། དཔོན་ཕྱོགས་ཀྱིས་མཚོར་མཆོད་ས་ནི་ཚ་གན་མཁར་དང་། ས་ཐོབ་དགོན། ཁེ་ཐུ་ཉག་ཁ་གསུམ་པོ་ཡིན། མཚོར་མཆོད་དུས་མཐའ་སྐོར་གྱི་མིས་རང་རང་གི་སྐྱེ་ལྷར་མཆོད། དཔའ་མཁར། ལ་རྩེ། ལྷ་ཐོ་ཀླུ་ཐོ་བསྟོད་པ།རྟ་རྒྱུག་སོགས་རྩེད་འཇོ་ལ་རོལ་བ་ཡིན།

མཚོ་སྔོན་པོའི་ནང་དུ་གསང་བ་མི་རྟོགས་པ་ཡ་མཚན་དུ་མ་ཡོད་དེ། སློབ་དཔོན་གྱི་ཕྱག་རྗེས། མཚོ་གཉིད་པ། དུས་བཟང་གི་རྔ་སྒྲ། མཚོ་ཡབ་ཡུམ་ཞལ་མཇལ་བཅས་ཡོད། ལས་དབང་ཅན་ཚོས་དེ་དག་རྣ་ཐོས་མིག་མཐོང་ཐུབ་པ་ཡིན།

བོད་མིའི་སེམས་སུ་མཚོ་དང་ཆུ་བོར་མི་གཙང་བས་ནོལ་མི་རུང་འདོད་དེ། མཚོ་དང་གཙང་བོར་དག་གཙང་བྱེད། མཚོ་ལ་དམར་དང་མི་གཙང་བ་འདོར་མི་ཉན། མཚོ་འགྲམ་ཆུ་འགྲམ་དུ་ས་རྐོ་རྡོ་སློག་ལ་འཛེམ་པ་ཡིན།

བསང་ནི་མི་གཙང་བ་དག་པར་བྱེད་པའི་དོན་ཡིན་ཕྱིར། བསང་ནི་ལྷ་ཀླུ་གཞི་བདག་ལ་མཆོད་པ་ཡིན་པར་མ་ཟད། ཤུག་པ། བ་ལི།མཁན་པ། ཉ་རིད་སོགས་ཤིང་སྣ་འབྲུ་སྣ་དྲི་ཞིམ་རྫས་རྣམས་མེར་བསྲེགས་ནས་དུ་བས་མཁའ་རླུང་བསངས་པ་དང་། རང་ཉིད་གཙང་བར་བྱས་ནས་ལུས་ལ་ལྷ་འགོ་བ་དང་། ལྷས་མགོན་སྐྱབས་བྱེད་ཐུབ་པའི་ཐབས་བྱེད་པ་ཡིན།