བོད་མིས་གཟིག་དང་སྟག་གི་ལྤགས་པ་ཕྱུ་པའི་གོང་བར་གཏོང་བ་དེ་ནི་གང་བྱུང་དུ་དྲན་པའི་མཛེས་རྒྱན་ཙམ་མིན་པར། དེར་ཐོག་མར་བྱུང་བའི་ལོ་རྒྱུས་དང་རང་རང་གི་དགོས་པ་ངེས་གཏན་ཡོད། དེ་ཡང་ཐོག་མར་བཙན་པོའི་སྐུ་དུས་སུ་གཡུལ་ལས་རྒྱལ་བའི་དཔའ་རྟགས་ཀྱི་ཕྱག་རྒྱར་སྟག་སློག་དང་། རྐྱེན་དྲུག་ལས་དཔའ་བའི་རྐྱེན་དུ་གུང་ལྤགས། སྡར་མའི་རྐྱེན་དུ་ཝ་མོའི་གཞུ་གུ་གནང་སྲོལ་ཡོད་པར་གཞིགས་ན། དེ་ནི་གནའ་དུས་བོད་པའི་ཐོབ་ཐང་དང་གོ་གནས་མཚོན་བྱེད་ཀྱི་དངོས་པོ་ཁྱད་པར་ཅན་ཞིག་ཡིན། དེ་ནས་སྲིད་དང་སྤྱི་ཚོགས་ཀྱི་འཕོ་འགྱུར་དང་བསྟུན་ནས་རིམ་པས་དམངས་ཁྲོད་ཀྱི་མཛེས་རྒྱན་ལྟ་བུར་གྱུར་རུང་། གོང་བ་དང་མཐའ་རྒྱན་སྟག་གཟིག་གི་ལྤགས་པ་ལས་གྲུབ་པའི་ཕྱུ་པ་དག་ནི་སྔར་བཞིན་ཕྱུ་པ་ཀུན་གྱི་མཆོག་ཏུ་བརྩི་སྲོལ་ཡོད།