སྣ་མང་ཕུན་སུམ་ཚོགས་པའི་གུང་གསེང་དགའ་བས་རོལ། བདེ་སྐྱིད་འཚོ་བར་བསྟོད་གླུ་ལེན།

རྒྱལ་སྟོན་དུས་ཆེན་གྱི་གུང་གསེང་སྐབས་སུ། ཕྱོགས་བཞི་མཚམས་བརྒྱད་དུ་བཀྲ་ཤིས་འཆམ་མཐུན་གྱི་རྣམ་པས་ཁེངས་ཤིང་། མི་རྣམས་སྣ་མང་ཕུན་སུམ་ཚོགས་པའི་བྱེད་སྒོའི་ཁྲོད་གུང་གསེང་ལ་རོལ་ནས། མཛེས་སྡུག་འཚོ་བར་བསྟོད་གླུ་བླངས། 

གསེར་ལྡན་སྟོན་གྱི་དུས་སུ།  རི་ཀླུང་མཛེས་ཤིང་ལྟ་ན་སྡུག  མི་རྣམས་ཁྱིམ་ནས་སྒོར་བུད་དེ་སྔོ་ལྗང་རི་ཀླུང་དུ་བསྐྱོད་དེ་རང་བྱུང་གི་མཛེས་སྡུག་དང་སྐྱེ་ཁམས་ཀྱི་མཛེས་པ་ཉམས་སུ་མྱངས།  ཞིན་ཅང་གི་ཐེན་ཧྲན་རི་བོའི་གནམ་མཚོ་ནི་རི་མོ་ཞིག་དང་འདྲ་ལ། ཡུལ་སྐོར་བས་མཐོ་སར་འགོས་ནས་རྒྱང་ལ་བལྟ་བ་དང་། སྤྲིན་པ་དང་ནགས་གསེབ་ཏུ་བསྐྱོད་དེ། “ཉིན་གཅིག་ལ་དུས་བཞིའི་”འགྱུར་ལྡོག་ཚོར་ཐུབ་པའི་རི་བོ་མཐོན་པོའི་མཛེས་ལྗོངས་ཉམས་སུ་མྱོང་གིན་ཡོད། རྒྱལ་སྟོན་གུང་གསེང་གི་ཉིན་དང་པོ་དང་གཉིས་པར། ལྗོངས་ཁུལ་གྱིས་བསྡོམས་པས་ཡུལ་སྐོར་བ་སྣེ་ལེན་བྱས་ཚད་ན་ནིང་གི་དུས་མཉམ་ལས25%འཕར། མཚོ་སྔོན་པོའི་ཡུལ་ལྗོངས་ལྟ་ན་སྡུག་པ་དང་། སྔོ་ཞིང་དྭངས་པའི་མཚེའུ་དང་གངས་རི་ལས་ལྟ་བས་མི་མངོན་པའི་མཛེས་ལྗོངས་ཤིག་གྲུབ་ཡོད། ཚང་མས་མཚོ་འགྲམ་དུ་དྲན་རྟེན་འདྲ་པར་བསྐྱོན་པ་དང་། ཡང་ན་གྲུ་ལ་བསྡད་ནས་མཚོ་སྐོར་བྱས་ཏེ། གསེར་མདོག་སྟོན་ཁའི་ཐུན་མོང་མ་ཡིན་པའི་མཛེས་ལྗོངས་ལ་རོལ། ཧེ་ལུང་ཅང་གི་དབྱི་ཁྲོན་དུ། མི་རྣམས་ཤར་གཏོང་བྱས་ནས་ཅང་འགོར་མེད་པའི་ཧ་དབྱི་མྱུར་བགྲོད་མེ་འཁོར་ལ་བསྡད་དེ།  ནགས་ཚལ་དུ་བསྐྱོད་ནས་སྟོན་ཁའི་མཛེས་ལྗོངས་ལ་བལྟས། ཀོང་ཞིའི་ཀུའེ་ལིན་གྱི་གླང་སྣ་རི་འདབས་དང་ལི་ཅང་གཙང་པོའི་འགྲམ་ངོགས་སུ། ཡུལ་སྐོར་བས་རི་ཆུ་ནགས་གསུམ་གྱི་བར་དུ།《མེས་རྒྱལ་ལ་བསྟོད་གླུ་ལེན》ཞེས་པ་བླངས་ཏེ་རླབས་ཆེན་མེས་རྒྱལ་སྟོབས་འབྱོར་མངའ་ཐང་རྒྱས་པའི་སྨོན་འདུན་ཞུས། 

གུང་གསེང་འདིར། རིག་དངོས་དང་རྟེན་མཛོད་ཁང་གི་ཡུལ་སྐོར་དང་གཟུགས་འདས་རིག་གནས་ཤུལ་བཞག་གི་ཡུལ་སྐོར་བསྟུད་མར་ཇེ་མང་དུ་ཕྱིན།  ལོ་ཕྱེད་ལྷག་གི་འགྲེམ་སྟོན་མཐོར་འདེགས་བརྒྱུད ། གོང་མ་ཆིན་ཧྲི་ཧོང་གི་རྟེན་མཛོད་ཁང་གི་དུར་རྫས་རྫ་བཟོས་གྱད་རྟའི་ས་དོང་གཉིས་པའི་འགྲེམ་ཚོམས་དེ་རྒྱལ་སྟོན་གུང་གསེང་གི་སྐབས་སུ་རྣམ་པ་གསར་རྐྱང་གི་སྒོ་ནས་ཕྱི་ཕྱོགས་སུ་སྒོ་ཕྱེས་ཤིང་། གུང་གསེང་གི་ཉིན་དང་པོ་དང་གཉིས་པར།  ལྗོངས་ཁུལ་གྱིས་བསྡོམས་པས་ཡུལ་སྐོར་བ་མི་ཐེངས་ཆིག་འབུམ་ཆིག་ཁྲི་ལྷག་སྣེ་ལེན་བྱས། པེ་ཅིང་ཡོན་པའོ་སྐྱེད་ཚལ་གླིང་དུ། ཀྲུང་གོའི་ཟློས་གར་རིག་གནས་གཟའ་འཁོར་སྐབས་བཅུ་པ་འཚོགས་བཞིན་པའི་སྒང་ཡིན་ལ། གུང་གསེང་གི་ཉིན་དང་པོ་དང་གཉིས་པར་མི་ཐེངས་བཞི་ཁྲི་ལྷག་གིས་སྐྱེད་ཚལ་དུ་ལྟ་སྐོར་བྱས། ཐེན་ཅིན་གྱི་གནའ་བོའི་རིག་གནས་ཁྲོམ་གཞུང་དུ། སྣ་མང་ཕུན་སུམ་ཚོགས་པའི་དམངས་སྲོལ་རེས་མོས་ངང་འཁྲབ་སྟོན་བྱས་པ་དང་། ཅིན་ཡོན་རྔ་ཆེན་དང་ཐེན་ཅིན་གྱི་སྲོལ་རྒྱུན་སྒྱུ་རྩལ་སྙན་ཞིང་འཇེབས། སྲོལ་རྒྱུན་གྱི་སེང་རྩེད་དང་རྐང་ཤིང་སོགས་འཁྲབ་སྟོན་གྱིས་གང་སར་འདུ་འཛིས་ཁེངས་འདུག ཧྲན་ཞིའི་ཕིན་ཡའོ་གནའ་མཁར་གྱི་ཡུལ་སྐོར་བ་ཧ་ཅང་མང་ལ།  གུང་གསེང་གི་འགྲུལ་རྒྱུན་མང་པོར་དམིགས་ནས། ས་གནས་ཀྱིས་རིག་ལྡན་ཡུལ་སྐོར་ཞབས་ཞུ་བཏོན་ལ། འགྲེལ་བཤད་ལག་རོགསAIབཀོད་སྒྲིག་བྱས་ཏེ། ཡུལ་སྐོར་བས་འགྲོ་ཞོར་དུ་ལྟ་ཞོར་དང་འདྲི་ཞོར་བྱས་ཆོག་ལ། གནའ་གྲོང་གི་རིག་གནས་རྩ་བ་དང་ས་གནས་དེ་གའི་གཟུགས་འདས་རིག་གནས་ཤུལ་བཞག་གི་དམངས་སྲོལ་ལ་རྒྱུས་ལོན་བྱས་ཆོག ཁྲུང་ཆིན་རུང་ཁྲང་གིས་རིག་གནས་ཡུལ་སྐོར་གྱི་ཡུལ་རྣམ་གསར་པ་རྒྱ་བསྐྱེད་པ་དང་། གཟུགས་འདས་རིག་གནས་ཤུལ་བཞག་གི་འདུ་ཚོགས་སྟེང་། ཡུལ་སྐོར་བས་སི་ཁྲོན་གྱི་གདོང་འགྱུར་ཟློས་གར་སོགས་དམངས་སྲོལ་འཁྲབ་སྟོན་ལ་ལྟ་ཐུབ་པ་མ་ཟད། ད་དུང་རུང་ཁྲང་གི་རྫ་ཆས་བཟོ་སྟངས་དང་རས་འཐག་སྟངས་སོགས་སྲོལ་རྒྱུན་གྱི་ལག་རྩལ་ལའང་རོལ་མྱོང་བྱས་ཆོག་པས། རིག་གནས་ཀྱི་འགུག་ཤུགས་ཚོར་ཐུབ། སི་ཁྲོན་དབྱི་པིན་ལི་ཀྲོང་གནའ་བོའི་གྲོང་རྡལ་དུ། མི་རྣམས་ཀྱིས་ཟས་མཆོག་ཟ་བ་དང་།  གཟུགས་འདས་རིག་གནས་ཤུལ་བཞག་གི་སྐྱེད་ཚལ་སྤྲོ་ཚོགས་ལ་ཞུགས། གུང་གསེང་སྔོན་གྱི་ཉིན་དང་པོ་དང་གཉིས་པར། འདི་རུ་བསྡོམས་པས་ཡུལ་སྐོར་བ་མི་ཐེངས་ཆིག་འབུམ་སུམ་ཁྲི་བཞི་སྟོང་ལྷག་སྣེ་ལེན་ཞུས།

དུས་ཆེན་གྱི་དགོང་མོར་གློག་འོད་ཆེམ་ཆེམ་བྱེད་པ་དང་སྐར་ཚོགས་ཐང་ལ་བཀྲམ་པ་འདྲ། ནང་སོག་ཨུ་འར་ཏའོ་སི་རུ། མི་མེད་གནམ་གྲུ་སྟོང་ལྷག་གིས་གྲོང་ཁྱེར་གྱི་མཚན་མོའི་མཁའ་དབྱིངས་གསལ་ལེར་བྱས་ཤིང་། ཀྲུང་གོ་ང་ཁྱོད་ལ་དགའ་ཞེས་པའི་ཡི་གེ་བསྒྲིགས་ཏེ། མེས་རྒྱལ་ལ་ལྷག་བསམ་རྣམ་དག་གིས་སྨོན་འདུན་ཞུས།  ཧྥུ་ཅན་ལུང་ཡན་ཁྲང་ཐིན་གནའ་གྲོང་དུ། ཉ་ཆེན་དབྱིབས་ཀྱི་གློག་སྒྲོན་དལ་གྱིས་སྐོར་སྐྱོད་བྱས་ལ། དེའི་ཤུགས་བསྟན་དུ་འཚོ་བ་ལོ་རེ་བཞིན་ཇེ་རྒྱས་ཇེ་ལེགས་སུ་འགྲོ་བའི་སྨོན་འདུན་བཟང་པོ་མཚོན་ཡོད་དེ། ཡུལ་སྐོར་བའི་ཡིད་དབང་རབ་ཏུ་བཀུག ཅི་ལིན་ཐུང་ཧྭ་རུ། རིག་གནས་ཡུལ་སྐོར་ཁྲོམ་གཞུང་གི་རྣམ་པ་འཁྲུག་ཆ་དོད་པ་དང་རིག་རྩལ་འཁྲབ་སྟོན་སྣ་མང་ཕུན་སུམ་ཚོགས། ཡུན་ནན་ཕུའུ་ཨར་ཇ་རྟའི་གནའ་གྲོང་གི་མཐོངས་ཡངས་ཁྲོམ་གཞུང་དུ་ཟས་མཆོག་གི་དྲི་མ་གང་སར་འཐུལ་ཞིང་།  མི་རྣམས་ཀྱིས་ཤ་སོལ་སྲེག་དང་།  ཚོན་ལྡན་འབྲས་རིལ། རྫ་ཆས་ཟས་རིགས་སོགས་ཁྱད་ལྡན་ཞིམ་ཟས་ཀྱི་བྲོ་བ་མྱངས། ཀོང་ཏུང་ཀྲུང་ཧྲན་གྱིས་ལོ་བརྒྱའི་ལོ་རྒྱུས་ཀྱི་ཁྲོམ་གཞུང་ལ་བརྟེན་ནས། དམངས་སྲོལ་སྐོར་སྐྱོད་དང་རྒྱལ་ཁབ་ཀྱི་དར་སྲོལ་འགྲེམ་འཁྲབ་བྱས་ཏེ། སྨི50ལྷག་ཡོད་པའི་འབྲུག་རིང་ཁྲོམ་གཞུང་དུ་བསྐྱོད་དེ།  བྲོ་ཡི་སྟངས་སྟབས་གསོན་ཉམས་ལྡན་ལ་དཔའ་ཉམས་དོད་པས། མི་རྣམས་ཀྱིས་རིག་གནས་ཀྱི་རྣམ་པ་ཟབ་མོའི་ཁྲོད་དུས་ཆེན་དགའ་བས་རོལ། 

​