མཚོ་སྔོན་ཞིང་ཆེན་མི་དམངས་སྲིད་གཞུང་དྲ་བ།
ཟླ10པའི་ཚེས1ཉིན། 2026ལོའི་ཀོས་ནན་རྫོང་སྐྱེ་ལྡན་ཞིང་ཕྱུགས་ཐོན་རྫས་སྤུས་རྟགས་ཁྱབ་སྒྲོག་དང་ཚོང་འགུག་དངུལ་འདྲེན། རིག་གནས་ཡུལ་སྐོར་ཆེད་ཚོགས་འོས་སྦྱོར་ཚོགས་འདུ་དེ་ཟི་ལིང་གྲོང་ཁྱེར་དུ་བསྡུས། བྱེད་སྒོ་ཡིས་གོམ་གང་མདུན་སྤོས་ཀྱིས་ཀོས་ནན་གྱི་སྐྱེ་ལྡན་ཞིང་ཕྱུགས་ཐོན་རྫས་ཕྱིར་འཚོང་བགྲོད་ལམ་རྒྱ་བསྐྱེད་ཆེད། མཐོ་སྒང་ལེགས་རྫས་རྩྭ་ཐང་ནས་ཕྱིར་བསྐྱོད་པ་དང་། གྲོང་ཁྱེར་གྱི་ཁྱིམ་ཚང་ཁྲི་མ་འབུམ་དུ་བསྐྱོད་པར་སྐུལ་འདེད་བཏང་ནས། ཏན་ཏིག་གིས་རོང་འབྲོག་མང་ཚོགས་ཀྱི་ཡོང་འབབ་ལ་སྣེ་ཁྲིད་བྱས།
བྱེད་སྒོ་དེ་གངས་ལྗོངས་གླུ་ཡིས་ལམ་གསར་ཕྱེ་ཞེས་པའི་ཞབས་བྲོའི་ཁྲོད་འགོ་བརྩམས་ཤིང་། ལྡེམ་མྱུར་གྱི་ཞབས་བྲོའི་སྟངས་སྟབས་ཀྱིས། གསོན་ཉམས་ལྡན་པའི་སྒོ་ནས་ཀོས་ནན་གྱི་རིགས་སོ་སོའི་མང་ཚོགས་ཀྱི་ཞུམ་མེད་མདུན་སྐྱོད་ཀྱི་སྙིང་སྟོབས་མངོན་པར་མཚོན། བྱེད་སྒོ་རུ་རིག་རྩལ་འཁྲབ་སྟོན་དང་། ཆེད་དོན་འོས་སྦྱོར། ཞིམ་ཟས་རོལ་མྱོང་། ངོ་འཕྲད་གླེང་མོལ་སོགས་ཀྱི་ཚན་པ་བཀོད་སྒྲིག་བྱས་ཡོད་ཅིང་། དེ་རུ་ཐོན་རྫས་འགྲེམ་སྟོན་དང་། ཡུལ་དངོས་དཔྱད་ཞིབ། མཉམ་འབྲེལ་ངོ་འཕྲད་གླེང་མོལ་བཅས་བྱེད་ནུས་ཆེ་བ་གསུམ་གྱི་ཆེད་ཁུལ་བསྒྲིགས་ཡོད་ལ། ཕྱོགས་ཡོངས་ནས་ཀོས་ནན་གྱི་ཐོན་ལས་ཁྱད་ཆོས་དང་། སྐྱེ་ཁམས་ནུས་སྤྲོད། དངུལ་གཏོང་གོ་སྐབས་བཅས་བསྟན་ཡོད། ཞིམ་ཟས་རོལ་མྱོང་བྱེད་པའི་ཚན་པ་རུ། སྐུ་མགྲོན་རྣམས་ཀྱིས་ཉེ་ས་ནས་རྣམ་པ་སྣ་ཚོགས་ཀྱི་ཞིང་ཕྱུགས་ཐོན་རྫས་དང་། བོད་ཀྱི་གཙགས་དྲུབ་རིག་དངོས་འགྲེམ་རྫས་ལ་བལྟས་ཤིང་། རིན་མེད་དུ་ལུག་ནག་དང་ནོར་གནག ནས་བཟོས་ཟས་རིགས་སོགས་མཐོ་སྒང་ཁྱད་ལྡན་གྱི་ཞིམ་ཟས་རོལ་མྱོང་བྱས་ཏེ། དབྱིངས་ཞུགས་རྣམ་པའི་སྒོ་ནས“མཚར་སྡུག་ཀོས་ནན། འགྲན་མེད་ཁྱད་རྫས”ཞེས་པའི་སྤུས་རྟགས་ཀྱི་ནང་སྙིང་ལ་ཉམས་ཞིབ་བྱས།
བྱེད་སྒོ་ལས་ཞིང་ཆེན་ཕྱི་ནང་གི་ཁེ་ལས་པ་དག་གདན་ཞུ་ཞུས་ཏེ། ཀོས་ནན་གྱི་ཁྱད་ལྡན་ཞིང་ཕྱུགས་ལས་སྣོན་དང་། རིག་གནས་ཡུལ་སྐོར་ཟབ་འདྲེས། ལྗང་མདོག་ནུས་ཁུངས་ཐོན་ལས་འཛུགས་སྐྲུན་བྱེད་པར་ནང་ཞུགས་བྱེད་དུ་བཅུག་ནས། མཉམ་དུ་ཐོན་སྐྱེད་ཕྱིར་འཚོང་གི་མཉམ་འབྲེལ་ལྟེ་གནས་འཛུགས་པ་དང་། ཡུན་ཕན་སྤྲོད་ཚོང་གི་མ་ལག་བསྐྲུན་ནས། སྐྱེ་ཁམས་འཕེལ་རྒྱས་ཀྱི་ཕན་ཁེ་མཉམ་སྤྱོད་བྱེད་དུ་བཅུག་པ་མ་ཟད། རྒྱ་ཆེའི་འགྲུལ་བ་དག་ཀོས་ནན་རྩྭ་ཐང་གི་གནས་མཆོག་ཏུ་འགྲོ་བར་གདན་ཞུ་ཞུས་ཏེ། མཐོ་སྒང་སྐྱེ་ཁམས་དང་། དམངས་སྲོལ་རིག་གནས། ཞིང་གྲོང་ལོ་ལེགས་ཀྱི་མཛེས་པ་ཚོར་དུ་བཅུག
ཀོས་ནན་རྫོང་གིས་རྒྱུན་ཆད་མེད་པར་རྨ་ཆུའི་སྟོད་རྒྱུད་ཀྱི་སྐྱེ་ཁམས་སྲུང་སྐྱོབ་བྱེད་པའི་ངེས་གནས་ལ་རྐང་བཙུགས་ཏེ། སྐྱེ་ལྡན་ཞིང་ཕྱུགས་ལས་ཟབ་སྤེལ་བྱས་ནས། “མཚར་སྡུག་ཀོས་ནན། འགྲན་མེད་ཁྱད་རྫས”ཀྱི་ས་ཁོངས་ཀྱི་སྤྱི་པའི་སྤུས་རྟགས་ཇེ་བཟང་དུ་བཏང་སྟེ། རིག་གནས་ཡུལ་སྐོར་མཉམ་འདྲེས་ཀྱི་ལེའུ་ལེགས་པར་འབྲི་རྒྱུ་རེད།
