ས་གནས་སོ་སོས་བྱེད་སྒོ་སྣ་ཚོགས་སྤེལ་ཏེ་རྒྱ་ལོ་བཅོ་ལྔའི་དུས་ཆེན་དགའ་བས་བསུས།

རྒྱ་ལོ་བཅོ་ལྔའི་དུས་ཆེན་ཐོན་ལ་ཉེ་བའི་སྐབས་སུ། ཡུལ་ཕྱོགས་ཀུན་ལ་ཚོན་མདངས་རྣམ་པར་བཀྲ་བ་དང་། མི་རྣམས་ཀྱིས་སྣ་མང་ཕུན་ཚོགས་ཀྱི་བྱེད་སྒོའི་ཁྲོད་ལྷན་འཛོམས་དགའ་སྐྱིད་ཀྱིས་དུས་ཆེན་བསུས།

དགའ་སྤྲོ་རབ་ཏུ་རྒྱས་ནས་དུས་ཆེན་བསུ། མཚོ་སྔོན་ཟི་ལིང་དུ་གཟུགས་འདས་རིག་གནས་ཤུལ་བཞག་གི་དམངས་སྲོལ་གཅིག་སྡུད་འགྲེམས་འཁྲབ་བྱེད་སྒོ་ཁྲོམ་གཞུང་དུ་སྤེལ་བ་དང་མཐོ་སྒང་གི་ཐུན་མོང་མ་ཡིན་པའི་ཁྱད་ཆོས་ལྡན་པའི་གསའ་ཡི་བརྗོད་དོན་ཡང་དེའི་ཁྲོད་འདྲེས་པར་བྱས་ནས། གྲོང་མི་དང་ཡུལ་སྐོར་བར་རིག་གནས་ཀྱི་སྟོན་མོ་གཟབ་རྒྱས་ཤིག་ཕུལ།

ཧེ་ལུང་ཅང་པའོ་ཆིན་རྫོང་དུ། བྱང་ཤར་གྱི་ཞབས་བྲོ་དབྱང་ཀོ་དང་ཧྲའན་པེའི་ཞབས་བྲོ་དབྱང་ཀོ་སོགས་རྒྱལ་ཡོངས་ས་གནས་སོ་སོའི་ཁྱད་ལྡན་དབྱང་ཀོ་སྣ་ཁ་བཅུ་ལྷག་གི་འཁྲབ་སྟོན་དེ་སྐོར་སྐྱོད་ཁྲོད་རེས་མོས་ངང་འཁྲབ་སྟོན་བྱས་ནས་སྲོལ་རྒྱུན་རིག་གནས་ཀྱི་འགུག་ཤུགས་མངོན་པར་བྱས། ཧི་པེའི་ལང་ཧྥང་ཧྲེང་ཧྥང་གནའ་གྲོང་དུ། ལོ་ངོ400ལྷག་གི་ལོ་རྒྱུས་ལྡན་པའི་གཟུགས་འདས་རིག་གནས་ཤུལ་བཞག་གི་མེ་ཏོག་འདུ་ཚོགས་འགོ་ཚུགས་ཤིང་། ཤིང་རྐང་དང་དྲག་རྩལ། སེང་རྩེད་སོགས་ཡོད་ལ། རྔ་དང་འཁར་རྔའི་འུར་སྒྲ་ལྡིར་ལྡིར་གྲགས།

ཞིན་ཅང་ཝུའུ་རམ་མུའུ་ཆིར་དམངས་སྲོལ་བྱེད་སྒོའི་རྒྱ་འཆམ་འཁྲབ་སྟོན་ཚ་ཚ་འུར་འུར་ངང་སྤེལ། རྔ་དང་འཁར་རྔ་རྡུང་བ་དང་། དབྱང་ཀོའི་ཞབས་བྲོ་འཁྲབ་པ། སྐམ་གྲུ་གཏོང་བ་སོགས་སྲོལ་རྒྱུན་གྱི་རྒྱ་འཆམ་རྣམ་གྲངས་རེས་མོས་ངང་འཁྲབ་སྟོན་བྱས་པ་དང་། འབྲུག་རྩེད་སེང་རྩེད་དང་སྲོལ་རྒྱུན་གྱི་གླུ་གར་ཕན་ཚུན་ཟུང་འབྲེལ་བྱས་པས། གྲོང་མི་དང་ཡུལ་སྐོར་བའི་ཡིད་དབང་བཀུག

ཞིན་ཅང་ཝུའུ་རམ་མུའུ་ཆི་གྲོང་ཁྱེར་རིག་གནས་ཁང་གི་འགོ་གཙོ་ཧྲི་ཀྲུང་མིང་གིས་བཤད་རྒྱུར། རྒྱ་འཆམ་འགྲེམས་འཁྲབ་རུ་ཁག་ཁྱོན18ཡོད་པ་དེ་དག་གིས་སྐོར་སྐྱོད་འཁྲབ་སྟོན་བྱས། མི་རིགས་མང་པོའི་མཉམ་འདྲེས་ལ་བརྟེན་ནས་ང་ཚོའི་རྒྱ་འཆམ་གྱི་འགུགས་ཤུགས་མངོན་པར་བྱས་ཡོད།

རྒྱ་ལོ་བཅོ་ལྔའི་དུས་ཆེན་ལ་ཉེ་བའི་སྐབས་སུ་མི་རྣམས་ཀྱིས་འབྲས་རིལ་ལས་ནས་དུས་ཆེན་བསུས། སི་ཁྲོན་པེ་ཁྲོན་དུ་གྲོང་མི་རྣམས་མཉམ་དུ་འཛོམས་ནས་ཚོན་མདོག་སྣ་ལྔའི་འབྲས་རིལ་གྱིས་སྲོལ་རྒྱུན་གྱི་དུས་ཆེན་ཁྲོད་བདེ་སྐྱིད་ལྡན་པའི་འཚོ་བར་རོལ་མྱོང་བྱས།

ཀུའེ་ཀྲོའུ་ཞིང་ཆེན་ཝང་ཨན་དུ། གྲོང་མི་ཚོས་མཉམ་དུ་འབྲས་ཉོག་དང་འབྲས་རིལ་ལས་ནས་སྲོལ་རྒྱུན་གྱི་ཞིམ་ཟས་བཟོ་བ་དང་ལྷན་དུ། ཁྱིམ་མཚེས་བར་གྱི་བརྩེ་སེམས་བརྒྱུད་སྤྲོད་བྱས། ཧྲང་ཧའེ་ཡུས་ཡོན་སྐྱེད་ཚལ་དུ་གྲོང་མི་དང་ཡུལ་སྐོར་བ་མང་པོ་ཞིག་གིས་ལྒང་ཞུའི་མཛེས་ལྗོངས་ལ་བལྟས་རྗེས་ཟ་ཁང་རྙིང་པ་གདམས་ནས་འབྲས་རིལ་གྱི་བྲོ་བ་རོལ་མྱོང་བྱས།

ཡུལ་སྐོར་བ་ཧི་ཅིན་ཅིན་གྱིས་བཤད་རྒྱུར། ནང་མི་ཚང་མ་མཉམ་དུ་འཛོམས་ནས་འབྲས་རིལ་ཟོས། དགའ་སྐྱིད་ལྷན་འཛོམས་ཀྱི་རྟེན་འབྲེལ་འགྲིག་སོང་།

ཐེན་ཅིན་དབྱང་ལིའུ་ཆིང་གནའ་གྲོང་དུ། བརྗོད་དོན་གཙོ་བོའི་ལྒང་ཞུ་ཚོགས་ཆུང59དང་ལྒང་ཞུ་ཁྲི2སྟོང8བཀར་ནས་ཡུལ་སྐོར་བ་ཚོར་ཚོན་མདངས་བཀྲ་བའི་གློག་འོད་ཁྲོད་རྒྱ་ལོ་བཅོ་ལྔའི་དུས་ཆེན་ལ་རོལ་དུ་བཅུག  ཀྲེ་ཅང་ཕིན་དབྱང་གི་ནན་ཡན་ཏང་རི་བོར། ཡུལ་སྐོར་བ་ཚོས་ལྒང་ཞུ་དང་འཁྲབ་སྟོན་ལ་བལྟ་བ་དང་། རི་བོའི་གསེབ་དང་ཆུ་བོའི་རྒྱུད་དུ་དུས་ཆེན་གྱི་རྣམ་པར་མྱོང་རོལ་བྱས། ཀོང་ཞི་ཁྲུང་ཙུའོ་རུ། མི་རྣམས་ཀྱིས་ལྒང་བཞུའི་གབ་ཚིག་དང་གཟུགས་འདས་རིག་གནས་ཤུལ་བཞག་གི་འགྲེམས་སྟོན་ལ་ལྟ་བཞིན་མཐོང་ཚོར་གྱི་སྟོན་མོ་གཟབ་རྒྱས་ཤིག་ལ་རོལ།

ཧྥུའུ་ཅན་ཕུའུ་ཐེན་ཞན་ཡིའུ་རྫོང་དུ། མི2000ལྷག་གིས་རྐུབ་སྟེགས་ཐོག་གློག་བཀལ་ནས་འབྲུག་རིང་པོ་ཞིག་གྲུབ་པར་བྱས་པ་དང་། ཁྲོམ་ལམ་བརྒྱུད་དེ་སྐོར་སྐྱོད་བྱས་ཤིང་། རྐུབ་སྟེགས་འབྲུག་སྒོར་གྱི་གོམས་སྲོལ་ལ་ལོ་ངོ500ལྷག་གི་ལོ་རྒྱུས་ཡོད་པ་དེས་ཁྱིམ་མཚེས་འཆམ་མཐུན་དང་སྐྱིད་སྡུག་མཉམ་མྱོང་བྱེད་པ་མཚོན་གྱི་ཡོད།

ཧྥུའུ་ཅན་ཕུའུ་ཐེན་ཞན་ཡིའུ་རྫོང་གི་གྲོང་མི་ཧོང་སུའུ་ཧུང་གིས་བཤད་རྒྱུར།

མི་ཇི་ཙམ་མང་ན་དེ་ཙམ་གྱིས་སྤྲོ་སྣང་འཕེལ། ཚང་མ་གཅིག་སེམས་གཅིག་ལ་འབྲེལ། བྲོ་གར་ནི་ང་ཚོའི་གནས་འདིའི་གསོན་ཤུགས་རེད། ད་ལོའི་ཡུལ་སྐོར་གློག་སྒྲོན་ལྷག་ཏུ་མང་ལ། དཔུང་ཁག་དེ་ལས་ཀྱང་རིང་ཞིང་། རྣམ་པ་དེ་བས་འཁྲུག་ཆ་དོད་པོ་ཡོད་པ་དེས་སང་ལོའི་འཚོ་བ་སྔར་ལས་སྐྱིད་པ་མཚོན་གྱིན་ཡོད།