གཟིགས་དང་། འདི་ནི་རྨ་སྟོད་ཡིན།

ཡོང་ཁུངས། མཚོ་སྔོན་ཞིང་ཆེན་སྲིད་གཞུང་དྲ་བ། སྤེལ་དུས། 2026-04-20

རྨ་སྟོད་ཅེས་པའི་དོན་ནི་རྨ་ཆུའི་མགོ་ཁུངས་ཞེས་པ་ཡིན་ལ། དེ་ནི་རང་ཞིང་གི་ལྷོ་རྒྱུད་དང་མགོ་ལོག་བོད་རིགས་རང་སྐྱོང་ཁུལ་གྱི་ནུབ་བྱང་རྒྱུད་དུ་ཡོད་ཅིང་། མཚོ་འཕགས་མཐོ་བའི་ཀླུང་ཐང་ས་ཆར་གཏོགས། རྨ་སྟོད་རྫོང་གི་སྤྱིའི་རྒྱ་ཁྱོན་ལ་སྤྱི་ལེ་གྲུ་བཞི་མ་ཁྲི2.53ཡོད་ཅིང་། མགོ་ལོག་ཁུལ་གྱི་སྤྱིའི་རྒྱ་ཁྱོན་གྱི་གསུམ་ཆའི་གཅིག་ཟིན་པ་དང་། རང་ཞིང་གི་སྤྱིའི་རྒྱ་ཁྱོན་གྱི3.5%ཟིན་ཡོད། རྫོང་ཁོངས་ཀྱི་སྤྱིའི་མི་གྲངས14400ཡོད་ཅིང་། འཚོ་སྡོད་གནས་ཚུལ་ནི་སྤྱི་ལེ་གྲུ་བཞི་མ་གཉིས་ཀྱི་ས་ཆ་ན་མི་གཅིག་རེ་མ་གཏོགས་མེད་སྟབས། རང་ཞིང་གི་མི་གྲངས་ཆེས་ཉུང་བའི་རྫོང་ཞིག་ཡིན།

རྨ་སྟོད་རྫོང་ནི་རང་ཞིང་གི་མཚོ་འཕགས་ཆེས་མཐོ་བའི་རྫོང་ཞིག་ཡིན་པ་དང་། རྫོང་ཁོངས་ཀྱི་ཆ་སྙོམས་མཚོ་འཕགས་སྨི4500ཡི་ཡན་ཡིན་ཞིང་། ལོའི་ཆ་སྙོམས་དྲོད་ཚད-4℃ཡིན་པ་དང་། དུས་ཚིགས་བཞི་པོའི་ཁྱད་པར་མེད་པར་གཙོ་བོ་ནི་དྲོད་དུས་དང་འཁྱགས་དུས་གཉིས་ཡིན་སྟབས། རྒྱལ་ནང་གི་མིའི་རིགས་འཚོ་སྡོད་ཀྱི་ཁོར་ཡུག་ཆེས་ཞན་པའི་ས་ཁུལ་ཞིག་ཡིན། འོན་ཀྱང་། སྐྱེ་ཁམས་གོ་གནས་ཧ་ཅང་མཐོ་བ་སྟེ།གཙང་གསུམ་འབྱུང་ཡུལ་རྒྱལ་ཁབ་རིམ་པའི་རང་བྱུང་སྲུང་སྐྱོབ་ཁུལ་གྱི་ལྟེ་བའི་ས་ཆ་ན་ཡོད་ཅིང་། མདོ་དབུས་མཐོ་སྒང་གི་གལ་ཆེ་བའི་སྐྱེ་ཁམས་སྲུང་ཡོལ་དང་རྨ་ཆུའི་བར་རྒྱུད་དང་སྨད་རྒྱུད་ས་ཁུལ་གྱི་དཔལ་འབྱོར་སྤྱི་ཚོགས་འཕེལ་རྒྱས་ཀྱི་སྐྱེ་ཁམས་བྱེད་ནུས་ཀྱི་དོ་སྙོམས་ཁུལ་གལ་ཆེན་ཞིག་ཡིན།

ཀྲུང་ཧྭ་མི་རིགས་ཀྱི་མ་ཡུམ་ཆུ་བོ་སྟེ་རྨ་ཆུ་ནི་ཡུལ་འདི་ནས་བྱུང་བ་དང་། རྫོང་ཁོངས་སུ་བཞུར་ཆུ་མང་ཞིང་མཚེའུ་ཆེ་ཆུང4077ཙམ་ཡོད་སྟབས། མིང་ལའང“རྨ་ཆུའི་འབྱུང་ཡུལ”དང“མཚེའུ་སྟོང་གི་རྫོང” “ཀྲུང་ཧྭའི་ཆུ་མཛོད”བཅས་ཐོགས་ཡོད། དེའི་ནང་གི་སྐད་གྲགས་ཆེ་བ་ནི་མཚོ་སྐྱ་རེངས་དང་སྔོ་རེངས་གཉིས་ཡིན་ཞིང་། 2005ལོར། མཉམ་འབྲེལ་རྒྱལ་ཚོགས《བརླན་སའི་སྤྱི་ཆིངས》ཀྱིས་རྒྱལ་སྤྱིའི་བརླན་ས་གལ་ཆེན་གྱི་མིང་ཐོའི་ནང་དུ་བཅུག རྫོང་ཁོངས་ཀྱི་ཐོན་ཁུངས་ཕུན་སུམ་ཚོགས་ཤིང་། རི་སྐྱེས་སྲོག་ཆགས་ཀྱི་རིགས་སུ་རྐྱང་དང་གནའ་བ། ཁྲུང་ཁྲུང་དཀར་མོ་སོགས50ལྷག་ཡོད།

སྨན་སྤྱོད་རིན་ཐང་ལྡན་པའི་རྩི་ཤིང་གི་རིགས120ལྷག་ཡོད་པ་དང་། མཐོ་སྒང་གི་སྐྱེ་ཁམས་ཁོར་ཡུག་ལ་ཚན་རིག་རྟོག་ཞིབ་བྱེད་པའི་གནས་མཆོག་ཅིག་ཡིན།

2021ལོའི་ཟླ10པའི་ཚེས20ཉིན་གཙང་གསུམ་མགོ་ཁུངས་རྒྱལ་ཁབ་སྤྱི་གླིང་རྨ་ཆུའི་མགོ་ཁུངས་གླིང་ཁུལ་དུ་སྐྱེ་ཁམས་དོ་དམ་སྲུང་སྐྱོང་པས་སྐོར་སྲུང་བྱེད་བཞིན་པའི་ཚུལ།

2020ལོའི་ཟླ10པའི་ཚེས30ཉིན་པར་བླངས་པའི་མགོ་ལོག་བོད་རིགས་རང་སྐྱོང་ཁུལ་རྨ་སྟོད་རྫོང་ཁོངས་ཀྱི་བརླན་ས།

2026ལོའི་ཟླ3པའི་ཚེས10ཉིན་པར་བླངས་པའི་མགོ་ལོག་བོད་རིགས་རང་སྐྱོང་ཁུལ་རྨ་སྟོད་རྫོང་རྨ་ཆུའི་མགོ་ཁུངས་ཀྱི་རྐྱང་།

2026ལོའི་ཟླ3པའི་ཚེས10ཉིན་པར་བླངས་པའི་མགོ་ལོག་བོད་རིགས་རང་སྐྱོང་ཁུལ་རྨ་སྟོད་རྫོང་ཁོངས་ཀྱི་མཚོ་སྐྱ་རེངས།

2021ལོའི་ཟླ10པའི་ཚེས21ཉིན་པར་བླངས་པའི་གཙང་གསུམ་མགོ་ཁུངས་རྒྱལ་ཁབ་སྤྱི་གླིང་རྨ་ཆུའི་མགོ་ཁུངས་གླིང་ཁུལ་གྱི་ཁྲུང་ཁྲུང་།

བརྒྱུད་འགོད།

རྩོམ་སྒྲིག་པ། : ལྷ་ཆེན་རྒྱལ།