ཞི་ཅིན་ཕིང་གིས་རྨ་ཆུ་སྲུང་སྐྱོབ་བཅོས་སྐྱོང་བྱ་བ་སྔར་ལས་ཡག་པོར་བསྒྲུབ་རྒྱུའི་ཐད་མཛུབ་སྟོན་གལ་ཆེན་གནང་།

ཀྲུང་གུང་ཀྲུང་དབྱང་གི་སྤྱི་ཁྱབ་ཧྲུའུ་ཅི།  རྒྱལ་ཁབ་ཀྱི་ཀྲུའུ་ཞི།   ཀྲུང་དབྱང་དམག་ཨུའི་ཀྲུའུ་ཞི་ཞི་ཅིན་ཕིང་གིས་རྨ་ཆུ་སྲུང་སྐྱོབ་བཅོས་སྐྱོང་བྱ་བ་སྔར་ལས་ཡག་པོར་བསྒྲུབ་རྒྱུའི་ཐད་མཛུབ་སྟོན་གལ་ཆེན་གནང་སྟེ་བསྟན་དོན།   ཏང་གིས་མི་དམངས་ཀྱི་སྣེ་ཁྲིད་དེ་བགྲང་བྱ་བརྒྱད་ཅུའི་རིང་རྨ་ཆུར་བཅོས་སྐྱོང་བྱས་ནས། ལོ་རྒྱུས་ཐོག་གི་ལོ་གསུམ་རིང་རགས་ཁ་ཐེངས་གཉིས་ལ་ཤོར་བའི་གནས་ཚུལ་རྩ་བ་ནས་བསྒྱུར་བཅོས་བྱས་པ་དང་།    ལོ་རེ་བཞིན་དུས་བདེ་ཞོད་འཇགས་ཀྱི་བྱས་རྗེས་ངོ་མཚར་ཅན་བསྐྲུན་ནས།    སྤྱི་ཚོགས་རིང་ལུགས་ལམ་ལུགས་ཀྱི་མངོན་གསལ་དོད་པའི་དགེ་མཚན་གང་ལེགས་ཀྱིས་མངོན་པར་བྱས།

ཞི་ཅིན་ཕིང་གིས་ནན་གྱིས་བསྟན་དོན།  འཐབ་ལམ་གསར་པའི་སྟེང་།  དུས་རབས་གསར་པའི་ཀྲུང་གོའི་ཁྱད་ཆོས་ཀྱི་སྤྱི་ཚོགས་རིང་ལུགས་དགོངས་པ་མཛུབ་སྟོན་དུ་བཟུང་སྟེ།     སྲུང་སྐྱོབ་དང་བཅོས་སྐྱོང་གཙོར་འཛིན་པའི་འཐབ་ཇུས་བླང་བྱ་ཁོང་དུ་ཆུད་པར་བྱེད་པ་དང་།    ཆུ་གྲོན་ཆུང་བྱེད་རྒྱུ་གཙོར་འཛིན་པ་དང་བར་སྟོང་དོ་མཉམ་ཡོང་བ།  མ་ལག་བཅོས་སྐྱོང་།   སྟོབས་ཤུགས་མཉམ་འདོན་བཅས་ཀྱི་ཆུ་བཅོས་སྐྱོང་བྱེད་པའི་བསམ་ཕྱོགས་རྒྱུན་འཁྱོངས་བྱེད་པ།    སྲུང་སྐྱོབ་ཆེན་པོ་དང་མཉམ་ལས་ཆེན་པོའི་རྣམ་པ་རྒྱུན་ཆད་མེད་པར་འཐུས་ཚང་དུ་གཏོང་བ།  རྨ་ཆུའི་འབབ་རྒྱུད་ཀྱི་སྐྱེ་ཁམས་སྲུང་སྐྱོབ་དང་སྤུས་ཚད་མཐོ་བའི་འཕེལ་རྒྱས་ལ་སྐུལ་འདེད་ནན་མོ་བཏང་ནས།  རྒྱལ་ཁབ་ཀྱི་སྐྱེ་ཁམས་བདེ་འཇགས་འགོག་ར་བརྟན་པོར་འཛུགས་པ། རྨ་ཆུའི་ཡུན་སྐྱོང་བདེ་འགོད་ལ་འགན་སྲུང་བྱེད་པ་དང་།   རྨ་ཆུའི་རིག་གནས་རྒྱུན་འཛིན་དར་སྤེལ་གཏོང་བ་བཅས་བྱས་ཏེ། མ་ཡུམ་གཙང་པོ་འདི་སྔར་ལས་མཛེས་སྡུག་ལྡན་པ་ཞིག་ཏུ་འགྱུར་བར་བྱས་ནས།  ཀྲུང་ཧྭ་མི་རིགས་ལ་བདེ་སྐྱིད་བསྐྲུན་པ་དང་།  བུ་རབས་ཚ་རྒྱུད་ལ་ཕན་འདོགས་དགོས།