མཚོ་སྔོན་ཞིང་ཆེན་མི་དམངས་སྲིད་གཞུང་དྲ་བ།
སྟོན་ཁ་དང་དགུན་ཁ་གཉིས་ནི་བྱིས་པར་ཆམ་རིམས་ཕོག་མང་བའི་དུས་ཚིགས་ཡིན་པས། ཀྲུང་གོའི་ནད་ཡམས་ཚོད་འཛིན་ལྟེ་གནས་དང་བྱིས་ནད་སྨན་པ་མཁས་དབང་གིས་ཟླ་9པ་ནས་10པའི་བར་ནི་ཆམ་རིམས་སྔོན་འགོག་ཁབ་རྒྱག་པའི་“དུས་སྐབས་ཡག་ཤོས་”དེ་ཡིན་པས། ཟླ་བ་10པའི་ཟླ་མཇུག་གོང་སྔོན་འགོག་ཁབ་བརྒྱབ་ཟིན་པ་བྱེད་དགོས་པའི་ཤ་ཚའི་དྲན་སྐུལ་བྱས་ཡོད། དེའི་རྒྱུ་མཚན་གཙོ་བོ་གཉིས་ཡོད་དེ།
1. འགོག་གཟུགས་ཆགས་པར་དུས་ཚོད་དགོས་པས་“རིམས་ཐར་སྟོང་ཆའི་དུས་”ལས་གཡོལ་དགོས།
རང་རྒྱལ་བྱང་ཕྱོགས་ཀྱི་ཆམ་རིམས་མཐོ་རླབས་ནི་སྤྱིར་བཏང་ཟླ་བ་11པ་ནས་ཕྱི་ལོའི་ཟླ་བ་3པའི་བར་ཡིན། ཆམ་རིམས་སྔོན་འགོག་ཁབ་བརྒྱབ་རྗེས་ལུས་པོར་སྲུང་སྐྱོབ་ཀྱི་ནུས་པ་ལྡན་པའི་འགོག་གཟུགས་ཆགས་པར་གཟའ་འཁོར་2ནས་4ཙམ་དགོས། གལ་ཏེ་མཐའ་འཁོར་གྱི་མིར་ནད་འགོས་ཟིན་རྗེས་ད་གཟོད་སྔོན་འགོག་ཁབ་རྒྱག་ཏུ་སོང་ན། འགོག་གཟུགས་མ་ཆགས་བར་གྱི་དུས་ཚོད་དེ་ནི་ཆེས་ཉེན་ཁ་ཆེ་བའི་“རིམས་ཐར་སྟོང་ཆའི་དུས་”ཡིན། དེས་ན་སྔ་སྣུར་དུ་ཁབ་བརྒྱབ་ཚེ། ཆམ་རིམས་ཀྱི་མཐོ་རླབས་མ་སླེབས་གོང་ལུས་པོར་སྲུང་སྐྱོབ་ཀྱི་འཛིང་རགས་བརྟན་པོ་ཞིག་སྐྲུན་ཐུབ།
2. བྱིས་པར་ནད་གཞི་ལྕི་མོ་འབྱུང་ཉེན་ཆེ་ཞིང་། མཉམ་འདུས་ཁོར་ཡུག་ཏུ་འགོ་མགྱོགས།
སློབ་འགོ་ཚུགས་རྗེས་བུ་བཅོལ་ཁང་དང་སློབ་གྲྭ་སོགས་མི་ཚོགས་འདུ་འཛོམས་ཆེ་བའི་སར་ནད་ཡམས་ཕན་ཚུན་འགོ་བའི་ཉེན་ཁ་ཆེ། དེའི་ཁར་སྟོན་དུས་སུ་ཉིན་མཚན་གྱི་དྲོད་ཁྱད་ཆེ་བས་དབུགས་ལམ་གྱི་འགོག་ཤུགས་ཉམས་སླ། བྱིས་པའི་རིམས་ཐར་མ་ལག་ད་དུང་ཡོངས་སུ་སྨིན་མེད་པས། ཆམ་རིམས་ཕོག་རྗེས་གློ་ཚད་དང་། དབང་རྩའི་མ་ལག་གནོད་སྐྱོན། སྙིང་གི་རྨས་སྐྱོན་སོགས་ཀྱི་བླ་གཉན་ནད་འབྱུང་བའི་ཉེན་ཁ་མི་དར་མ་ལས་མཐོ་བས། སྔ་སྣུར་དུ་སྲུང་ཡོལ་འཛུགས་རྒྱུ་གལ་ཆེ།
དུས་མཚུངས་སུ་ཆམ་རིམས་སྔོན་འགོག་སྐོར་གྱི་རྒྱུན་མཐོང་ནོར་འཁྲུལ་གསུམ་གསལ་བཤད་ཞུ་རྒྱུར།
ནོར་འཁྲུལ་དང་པོ། ཆམ་རིམས་ནི་ཆམ་པ་ལྕི་མོ་ཙམ་ཡིན་པར་འདོད་པ། ཆམ་རིམས་ནི་སྤྱིར་བཏང་གི་ཆམ་པ་མ་ཡིན་པར། འགོས་ཁྱབ་མགྱོགས་ཤིང་ནད་རྟགས་ལྕི་ལ། ཚབས་ཆེན་གྱི་བླ་གཉན་ནད་སློང་སླ།
ནོར་འཁྲུལ་གཉིས་པ། ཁབ་ཐེངས་གཅིག་བརྒྱབ་ན་ཚེ་གང་ལ་ཕན་པར་འདོད་པ། ཆམ་རིམས་ནད་དུག་ནི་ལོ་རེ་བཞིན་འགྱུར་ལྡོག་འགྲོ་སླ་བ་དང་། ལུས་ཀྱི་འགོག་གཟུགས་ཀྱང་དུས་ཚོད་དང་བསྟུན་ནས་རིམ་བཞིན་ཉམས་རྒུད་དུ་འགྲོ་བས། ཆམ་རིམས་སྔོན་འགོག་ཁབ་ནི་ལོ་ལྟར་རྒྱག་དགོས།
ནོར་འཁྲུལ་གསུམ་པ། ཟླ་བ་10པ་ཡོལ་རྗེས་སྔོན་འགོག་ཁབ་རྒྱག་མི་དགོས་པར་འདོད་པ། ཆམ་རིམས་མཆེད་པའི་དུས་ཚིགས་ཧྲིལ་པོའི་ནང་ཁབ་བརྒྱབ་ཀྱང་ནུས་པ་ཡོད། སྔ་ཙམ་སྔོན་འགོག་ཁབ་བརྒྱབ་ན་ཕྱིས་སུ་བརྒྱབ་པ་ལས་ཀྱང་བཟང་བ་དང་། སྔོན་འགོག་ཁབ་བརྒྱབ་ན་མ་བརྒྱབ་པ་ལས་བཟང་བས། གལ་ཏེ་དུས་སྐབས་ཡག་ཤོས་ནས་དུས་འགྱངས་སོང་ཡང་། གང་མགྱོགས་གསབ་རྒྱག་བྱས་ན་སྲུང་སྐྱོབ་ཀྱི་ནུས་པ་ཐོན་ཐུབ།
