མཚོ་སྔོན་ཞིང་ཆེན་མི་དམངས་སྲིད་གཞུང་དྲ་བ།
སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་དབུ་བརྙེས་ནས་ལོ་ངོ77འཁོར་བར་རྟེན་འབྲེལ་ཞུ་བའི་སྣེ་ལེན་ཚོགས་འདུའི་སྟེང་ནན་གྱིས་བསྟན་དོན། ང་ཚོས་ཡིད་ཆེས་བརྟན་པོ་དང་དམིགས་འབེན་གཏན་འཁེལ་བྱས་ཏེ། གོམ་པ་རེ་རེ་བཞིན་མདུན་དུ་སྐྱོད་ཚེ། རྒྱལ་ཁ་ངེས་པར་དུ་རླབས་ཆེན་གྱི་ཀྲུང་གོ་གུང་ཁྲན་ཏང་དང་། རླབས་ཆེན་གྱི་ཀྲུང་གོའི་མི་དམངས། རླབས་ཆེན་གྱི་ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་བཅས་ལ་དབང་ངེས་ཡིན། སྤྱི་ཁྱབ་ཧྲུའུ་ཅིའི་གསུང་བཤད་གལ་ཆེན་གྱིས་མི་རྣམས་མདུན་དུ་སྐྱོད་པར་སྐུལ་འདེད་གཏོང་བ་དང་། རྒྱ་ཆེའི་ལས་བྱེད་པ་དང་མང་ཚོགས་ཀྱིས་རྡོག་རྩ་གཅིག་སྒྲིལ་དང་རྒྱུན་མཐུད་འབད་འཐབ་བྱས་ན། རྒྱལ་ཁབ་སྟོབས་ལྡན་འཛུགས་སྐྲུན་དང་མི་རིགས་བསྐྱར་དར་གྱི་རླབས་ཆེན་འཆར་འགོད་དེ་མཛེས་སྡུག་ལྡན་པའི་དོན་དངོས་སུ་འགྱུར་ཐུབ་ཅེས་བསྟན།
སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་བསྟན་དོན། ལོ77རིང་། ང་ཚོའི་ཏང་གིས་མི་དམངས་ལ་མཐུན་སྒྲིལ་སྣེ་ཁྲིད་བྱས་ཏེ་འབད་འཐབ་ལྷོད་མེད་བྱས་པས། དཔལ་འབྱོར་མགྱོགས་མྱུར་ངང་འཕེལ་རྒྱས་བྱུང་བ་དང་སྤྱི་ཚོགས་ཡུན་རིང་བརྟན་བརླིང་གི་བྱས་རྗེས་ངོ་མཚར་ཅན་གཉིས་གསར་གཏོད་བྱས་པ་དང་། ཁྱོན་ཡོངས་ནས་འབྱོར་འབྲིང་སྤྱི་ཚོགས་བསྐྲུན་པའི་བརྒྱ་ལོ་དང་པོའི་འབད་འཐབ་དམིགས་འབེན་མངོན་འགྱུར་བྱུང་སྟེ། ཕྱོགས་ཡོངས་ནས་སྤྱི་ཚོགས་རིང་ལུགས་དེང་རབས་ཅན་གྱི་རྒྱལ་ཁབ་སྟོབས་ལྡན་བསྐྲུན་པའི་བརྒྱ་ལོ་གཉིས་པའི་འབད་འཐབ་དམིགས་འབེན་གྱི་ཕྱོགས་སུ་དཔའ་ངར་ཆེན་པོས་མདུན་སྐྱོད་བྱེད་བཞིན་ཡོད།
ཟླ10པའི་ཚེས1ཉིན་ནི་རྒྱལ་སྟོན་དུས་ཆེན་ཡིན་ཞིང་། ཀྲུང་གོའི་ས་གཞི་ཆེན་མོར་མེ་ཏོག་རྣམ་པར་བཞད་ལ། རྒྱ་ཆེའི་ལས་བྱེད་པ་དང་མང་ཚོགས་རྣམས་ཀྲུང་གོ་གསར་པས་འཛམ་གླིང་ཀུན་གྱིས་དོ་སྣང་བྱེད་པའི་གྲུབ་འབྲས་གལ་ཆེན་ཐོབ་པར་ང་རྒྱལ་སྐྱེ་བཞིན་ཡོད་ལ། ཀྲུང་གོའི་ལུགས་ཀྱི་དེང་རབས་ཅན་གྱི་འོད་སྟོང་ལྡན་པའི་མདུན་ལྗོངས་ལ་ཡིད་ཆེས་ཀྱིས་ཁེངས་ཡོད།
ཡུན་ནན་ཞིང་ཆེན་ཐིན་ཁྲུང་གྲོང་ཁྱེར་ཆིང་ཧྲུའེ་གྲོང་རྡལ་སན་ཅ་སྡེ་བའི་ཏང་ཀྲི་པུའུ་ཧྲུའུ་ཅི་ལི་ཅ་མེན་གྱིས་བཤད་རྒྱུར། སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་གསུང་བཤད་གལ་ཆེན་ལ་ཉན་རྗེས། ང་ལ་སྐུལ་ལྕག་ཆེན་པོ་ཐེབས་བྱུང་། ཀྲུང་གོ་གསར་པའི་ལོ་ངོ77རིང་གི་འོད་སྟོང་འབར་བའི་གྲུབ་འབྲས་ཀུན་གྱིས་མིག་མཐོང་ལག་ཟིན་ཡིན་ལ། མཐའ་མཚམས་མི་རིགས་སྡེ་བའི་ཏང་ཀྲི་པུའུ་ཧྲུའུ་ཅི་ཞིག་ཡིན་པའི་ཆ་ནས། ངས་སི་མོ་ལ་ཡི་འཕོ་འགྱུར་ཆེན་པོ་དངོས་སུ་བརྒྱུད་མྱོང་བ་དང་། མང་ཚོགས་ཀྱི་སྐྱིད་སྣང་རྒྱུན་ཆད་མེད་པར་ཇེ་མཐོར་ཕྱིན། རྗེས་ཕྱོགས་ངས་སྡེ་བའི་ཏང་རྩ་འཛུགས་སྟོབས་དང་ལྡན་པ་ཞིག་བསྐྲུན་ཏེ། སྡེ་བའི་ཐུན་མོང་དཔལ་འབྱོར་སྟོབས་ལྡན་དུ་བཏང་ནས་མང་ཚོགས་ཀྱི་ཡོང་སྒོ་འཕར་བར་སྐུལ་ཁྲིད་བྱས་ཏེ། བདེ་སྐྱིད་ཀྱི་བཱ་རིགས་སྡེ་བ་སྔར་ལས་བདེ་སྐྱིད་ལྡན་པར་བྱ་རྒྱུ་ཡིན་ཟེར།
མཚོ་སྔོན་ཞིང་ཆེན་སྨར་ཁོག་ནགས་ལས་ཅུས་པཎ་ཆེན་ནགས་རའི་ཏང་ཀྲི་པུའུ་ཧྲུའུ་ཅི་ཀྲང་ཆིང་ཡུན་གྱིས་བཤད་རྒྱུར། ལོ་འདི་དག་གི་རིང་ལ། སྐྱེ་ཁམས་སྔར་ལས་ཇེ་ལེགས་སུ་སོང་བ་རང་གིས་དངོས་སུ་མཐོང་བ་དང་། “ཀྲུང་ཧྭའི་ཆུ་མཛོད”ཀྱི་ཆུ་བོ་སྔར་ལས་ཇེ་དྭངས་སུ་སོང་ལ། ནགས་རའི་སྡོང་བོ་ཡང་སྔར་ལས་ཇེ་མང་དུ་ཕྱིན་པས། ཚང་མའི་སྐྱེ་ཁམས་སྲུང་སྐྱོབ་ཀྱི་ཡིད་ཆེས་སྔར་ལས་ཇེ་བརྟན་དུ་ཕྱིན། ང་ཚོས་ངེས་པར་དུ་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་མངགས་བཅོལ་ཡིད་ལ་དམ་པོར་བཅངས་ཏེ། གོམ་སྟབས་རེ་རེ་བཞིན་མདུན་དུ་བསྐྱོད་ནས། མཐོ་སྒང་སྐྱེ་ཁམས་ཀྱི་ལྗང་མདོག་རྨང་གཞི་སྔར་ལས་ཇེ་བརྟན་དུ་བཏང་སྟེ། རི་སྔོ་ཆུ་དྭངས་མི་རབས་ནས་མི་རབས་བར་རྒྱུན་འཛིན་བྱེད་རྒྱུ་ཡིན་ཟེར།
ཞིན་ཅང་ཁུའུ་ཁྲེ་གྲོང་ཁྱེར་རེ་སི་ཐན་སྲང་ལམ་ཀུའུ་ལི་པ་ཀེ་སྡེ་ཁུལ་གྱི་སྡོད་དམངས་ཕ་རི་ཀྲ་ཐི་ཁུའུ་ཨར་པན་གྱིས་བཤད་རྒྱུར། སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་ནན་གྱིས་བསྟན་པའི་དམངས་འཚོར་འགན་ལེན་དང་ལེགས་སྒྱུར་ཏན་ཏིག་བྱེད་དགོས་ཞེས་པ་དེ་ཚང་མའི་བསམ་ཐོག་ཏུ་བབས་སོང་། ཏང་གི་དམངས་ཕན་སྲིད་ཇུས་ཀྱི་སྣེ་ཁྲིད་འོག ངའི་ཕ་ཡུལ་ལ་འགྱུར་ལྡོག་ཆེན་པོ་བྱུང་པ་དང་སྒོ་རྩ་ནས་ལས་ཞུགས་བྱེད་པའི་གོ་སྐབས་ཀྱང་ཇེ་མང་དུ་སོང་། ང་ཚོས་སེ་འབྲུ་ནང་བཞིན་ལག་རྡང་སྦྲེལ་ནས་ཏང་གི་བཀའ་ལ་ཉན་པ་དང་ཏང་གི་རྗེས་སུ་འབྲངས་ཏེ། རང་གི་ལག་པར་བརྟེན་ནས་སྔར་ལས་བདེ་སྐྱིད་དང་མཛེས་སྡུག་ལྡན་པའི་འཚོ་བ་བསྐྲུན་རྒྱུ་ཡིན་ཟེར།
ད་ལོ་ནི“ལོ་ལྔའི་འཆར་འགོད་བཅོ་ལྔ་པ”འགོ་རྩོམ་པའི་ལོ་ཡིན་པ་དང་། རྒྱལ་སྟོན་གྱི་གུང་གསེང་འདིར་ད་དུང་མི་མང་པོ་ཞིག་གིས་ལས་གནས་བརྟན་སྲུང་བྱེད་བཞིན་ཡོད་དེ། ཧུའུ་པའེ་དབྱི་ཁྲང་གི་འབྲི་ཆུའི་འགྲམ་རྒྱུད་དུ། འཛུགས་སྐྲུན་པ་བརྒྱ་ལྷག་གིས་ཨར་ལས་ཀྱི་ཡུལ་དངོས་ན་བྲེལ་བ་ཆེན་པོས་འབྲི་ཆུའི་འགག་གསུམ་ཆུ་ཐོག་སྐྱེལ་འདྲེན་གྱི་བགྲོད་ལམ་གསར་པ་བསྐྲུན་པར་སྐུལ་འདེད་གཏོང་བཞིན་ཡོད། ཅི་ལིན་ཁྲང་ཁྲུན་གྱི་ཐོན་སྐྱེད་འཁོར་ཁང་དུ། ཇུས་འགོད་ཚོགས་པས་སྒུལ་འཁོར་ཚོགས་ཆུང་གི་མེ་འཁོར་གསར་པར་དམིགས་ནས་ཚོད་ལྟའི་ཚད་ལེན་སྣ་ཚོགས་བྱས་ཏེ། ལག་རྩལ་འགག་སྒྲོལ་སོགས་ལ་སྐུལ་འདེད་གཏོང་བཞིན་ཡོད་ལ། སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་གསུང་བཤད་གལ་ཆེན་གྱིས་ལས་རིགས་ཁག་གི་མི་རྣམས་ལ་སྐུལ་ལྕག་ཐེབས་བཞིན་ཡོད།
འབྲི་ཆུའི་འགག་གསུམ་གྱི་ཆུ་ཐོག་སྐྱེལ་འདྲེན་གྱི་བགྲོད་ལམ་གསར་པའི་འཛུགས་སྐྲུན་པ་ཝང་ཁྲེན་ལིན་གྱིས་བཤད་རྒྱུར། ང་ཚོས་ད་ལྟ་འཛུགས་སྐྲུན་བྱེད་བཞིན་པའི་འབྲི་ཆུའི་འགག་གསུམ་ཆུ་ཐོག་སྐྱེལ་འདྲེན་གྱི་བགྲོད་ལམ་གསར་པ་ ནི། “ལོ་ལྔའི་འཆར་འགོད་བཅོ་ལྔ་པའི”རྒྱལ་ཁབ་ཀྱི་མཚོན་རྟགས་རང་བཞིན་གྱི་བཟོ་སྐྲུན་ཐོག་མ་དེ་ཡིན་ཞིང་། མིག་སྔར་སྔོན་སྐྱོད་སྔོག་འདོན་ཁུལ་ལེགས་པར་གྲུབ་ཟིན་པས། བཟོ་སྐྲུན་འཛུགས་སྐྲུན་དུས་མཚམས་གསར་པར་སླེབས་ཡོད། ང་ཚོས་སྤྱི་ཁྱབ་ཧྲུའུ་ཅིའི་མངགས་བཅོལ་སྟོང་ཟད་དུ་མི་གཏོང་བར། སྤུས་ཚད་མཐོ་བ་དང་ཚད་གཞི་མཐོ་བའི་སྒོ་ནས་ཨར་ལས་ཀྱི་ལས་འགན་སོ་སོར་སྐུལ་འདེད་བཏང་སྟེ། བགྲོད་ལམ་གསར་པ་དེ་ལོ་རྒྱུས་ཀྱི་ཞིབ་བཤེར་ཐེག་པའི་སྤུས་ལེགས་བཟོ་སྐྲུན་ཞིག་ཏུ་བསྐྲུན་རྒྱུ་ཡིན་ཟེར།
ཀྲུང་ཁྲེ་ཁྲང་ཁྲུན་ལྕགས་ལམ་འགྲུལ་སྐྱེལ་རླངས་འཁོར་མ་རྐང་ཚད་ཡོད་ཀུང་སིའི་བསྐྱར་དར་རྟགས་ཅན་ཤུགས་འགྲེམས་མེ་འཁོར་གྱི་ཇུས་འགོད་པ་ཏུང་ཞུའེ་ཡན་གྱིས་བཤད་རྒྱུར། སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་གསུང་བཤད་ལ་ཉན་རྗེས། ང་ལ་སེམས་འགུལ་ཆེན་པོ་ཐེབས་བྱུང་། ད་ལྟ་ང་ཚོའི་ཚོགས་པས་ཞིབ་བཟོ་བྱས་པའི་བསྐྱར་དར་རྟགས་ཅན་གྱི་རིག་ནུས་འགུལ་འཁོར་རིམ་སྤོར་བྱས་པ་དེ་པེ་ཅིང་ནས་ཧྲང་ཧའེ་བར་གྱི་མྱུར་བགྲོད་ལྕགས་ལམ་གྱི་ལམ་ཐིག་སྟེང་རྒྱུག་བཞིན་ཡོད། ངས་རང་བརྟེན་གསར་གཏོད་རྒྱུན་འཁྱོངས་དང་སྟོབས་ཤུགས་གཅིག་སྒྲིལ་གྱིས་ལག་རྩལ་གྱི་དཀའ་གནད་བསལ་ཏེ་ཀྲུང་གོའི་མྱུར་བགྲོད་ལྕགས་ལམ་གྱི་རྒྱལ་ཁབ་ཀྱི་མིང་བྱང་ཇེ་ཆེར་བཏང་ནས། ཀྲུང་གོའི་ལུགས་ཀྱི་དེང་རབས་ཅན་ལ་སྐུལ་འདེད་གཏོང་བར་སྟོབས་ཤུགས་འབུལ་རྒྱུ་ཡིན་ཟེར།
འཐབ་ལམ་གསར་བ་ནི་གཟི་བརྗིད་དང་ཕུགས་འདུན་གྱིས་ཁེངས་པའི་རྒྱང་སྐྱོད་ཅིག་ཡིན། རྒྱ་ཆེའི་ལས་བྱེད་པ་དང་མང་ཚོགས་ཀྱིས་བསྟན་དོན། སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་ཡང་དག་པའི་མཛུབ་ཁྲིད་དང་། ཞི་ཅིན་ཕིང་གི་དུས་རབས་གསར་པའི་ཀྲུང་གོའི་ཁྱད་ཆོས་ཀྱི་སྤྱི་ཚོགས་རིང་ལུགས་དགོངས་པའི་ཚན་རིག་དང་མཐུན་པའི་ཁྲིད་སྟོན་ཡོད་ན། ང་ཚོ་མདུན་སྐྱོད་ཀྱི་བགྲོད་ལམ་ཐོག་གི་ཉེན་ཁ་དང་འགྲན་སློང་ལས་རྣམ་པར་རྒྱལ་ཐུབ་ངེས་ཡིན་པས། སྤྱི་ཁྱབ་ཧྲུའུ་ཅིའི་གསུང་བཤད་གལ་ཆེན་གྱི་དགོངས་དོན་སློབ་སྦྱོང་དང་ལག་བསྟར་ནན་ཏན་བྱས་ཏེ་ཡིད་ཆེས་བརྟན་པོ་དང་དམིགས་འབེན་ཇེ་བརྟན་དུ་བཏང་ནས་ཀྲུང་གོའི་ལུགས་ཀྱི་དེང་རབས་ཅན་གྱི་མཛེས་སྡུག་ལྡན་པའི་ལེའུ་ཧུར་ཐག་གིས་རྩོམ་དགོས།
དམར་དམག་རྒྱང་སྐྱོད་རྗེས་དྲན་རྡོ་རིང་གླིང་དོ་དམ་ཁྲུའུ་ཡི་ཁྲུའུ་ཀྲང་གཞོན་པ་ཝུའུ་ལུན་མིང་གིས་བཤད་རྒྱུར། དཔལ་འབྱོར་འཕེལ་རྒྱས་མགྱོགས་པ་དང་སྤྱི་ཚོགས་ཡུན་རིང་བརྟན་ལྷིང་གི་ངོ་མཚར་ཆེན་པོ་གཉིས་བསྐྲུན་པ་ནི་ཏང་གི་འགྱུར་མེད་སྟོབས་ལྡན་གྱི་འགོ་ཁྲིད་དང་མི་རབས་ནས་མི་རབས་བར་གྱི་ཀྲུང་གོ་བས་མཐུན་སྒྲིལ་རྡོག་རྩ་གཅིག་སྒྲིལ་དང་མུ་མཐུད་འབད་འཐབ་བྱེད་པར་བརྟེན་ཡོད། སྤྱི་ཁྱབ་ཧྲུའུ་ཅིས་ཀྲུང་ཧྭ་མི་རིགས་ཀྱི་རླབས་ཆེན་བསྐྱར་དར་མངོན་འགྱུར་ཡོང་རྒྱུ་ནི་འགོག་ཐབས་མེད་པ་ཞིག་ཡིན་ཞེས་བསྟན། ང་ཚོས་སྤྱི་ཁྱབ་ཧྲུའུ་ཅིའི་མངགས་བཅོལ་ཡིད་དམ་པོར་བཅངས་ནས་དམར་དམག་རྒྱང་སྐྱོད་ཀྱི་ གཏམ་རྒྱུད་བརྗོད་དེ། མི་སྔར་ལས་མང་པོ་དང་ལྷག་པར་དུ་ན་ཆུང་ལ་མཚར་སྡུག་འོད་སྟོང་འབར་བའི་ལོ་ཟླ་དེ་ཤེས་སུ་བཅུག་ནས་འབད་འབུངས་ཀྱི་སྟོབས་ཤུགས་བསྡུ་ལེན་བྱས་ཏེ་དུས་རབས་གསར་པའི་རྒྱང་སྐྱོད་ལམ་བུར་བསྐྱོད་དགོས་ཟེར།
ནང་སོག་མཁར་སྔོན་པོའི་ཧྲ་ལེའང་ལྕགས་ལམ་གྱི་དེང་རབས་ཕྱོགས་བསྡུས་ཟོག་འགྲེམས་གླིང་གི་བཟོ་སྐྲུན་པ་ཆེན་མོ་ཡའོ་ལི་ཆང་གིས་བཤད་རྒྱུར། སྤྱི་ཁྱབ་ཧྲུའུ་ཅིའི་གསུང་བཤད་ཀྱིས་མི་སེམས་ལ་སྐུལ་མ་ཐེབས་ཡོང་། ལོ་འདི་དག་ནང་ཀྲུང་གོ་དང་ཡོ་རོབ་ཀྱི་དུས་གཏན་མེ་འཁོར་གྱི་སྐྱེལ་འདྲེན་བྱས་པའི་ཚོང་ཟོག་དེ་ཞིང་ཞོར་ཐོན་རྫས་དང་ཁྱིམ་སྤྱོད་གློག་ཆས་ཆུང་གྲས་ནས་རླངས་འཁོར་དང་འཕྲུལ་ཆས་ཆེ་གྲས་སོགས་ཟུར་སྣོན་རིན་ཐང་མཐོ་བའི་ཐོན་རྫས་སུ་འགྱུར་བཞིན་ཡོད། ང་ཚོས་སྲིད་ཇུས་ཀྱི་ཁེ་ཕན་བེད་སྤྱོད་གང་ལེགས་བྱས་ཏེ། དངོས་ཟོག་འགག་སྒྲོལ་གྱི་ལས་ཕྱོད་ཟམ་མི་ཆད་པར་ཆེ་རུ་བཏང་ནས་དཔལ་འབྱོར་རྒྱུན་མཐུད་ངང་གསར་ཕྱོགས་ལེགས་ཕྱོགས་སུ་འཕེལ་རྒྱུར་སྟོབས་ཤུགས་འབུལ་དགོས་ཟེར།
ཀྲུང་ཀོན་གྲོང་ཚོའི་ཚན་རྩལ་གླིང་ཁུལ་ཁྲའོ་དབྱང་སྐྱེད་ཚལ་དོ་དམ་ཨུ་ཡོན་ལྷན་ཁང་གི་ཀྲུའུ་རེན་ལི་ཙེ་ལིན་གྱིས་བཤད་རྒྱུར། ང་ཚོས་བློ་མཐུན་ཞི་ཅིན་ཕིང་སྲོག་ཤིང་ཡིན་པའི་ཏང་ཀྲུང་དབྱང་གི་མཐའ་འཁོར་དུ་སྔར་ལས་མཐུན་སྒྲིལ་དམ་ཟབ་བྱས་ཏེ། ཆ་ཚང་ཞིང་འཕྱུགས་མེད་སྒོས་འཕེལ་རྒྱས་ཀྱི་འདུ་ཤེས་གསར་པ་ཕྱོགས་ཡོངས་ནས་ལག་བསྟར་དང་། འཕེལ་རྒྱས་ཀྱི་རྣམ་པ་གསར་པ་གང་མགྱོགས་སྒོས་འཛུགས་པ། འཐབ་ཇུས་རང་བཞིན་ལྡན་པའི་གསར་དར་ཐོན་ལས་དང་མ་འོངས་པའི་ཐོན་ལས་ལ་དམིགས་ཏེ། ཚན་རྩལ་དངུལ་རྩ་དང་ཚོད་ལྟའི་ལས་སྟེགས། གྲུབ་འབྲས་གཞན་སྒྱུར་སོགས་འགག་རྩའི་ལས་རིམ་དམ་འཛིན་ཡག་པོ་བྱས་ཏེ། རྒྱལ་སྤྱིའི་ཚན་རྩལ་གསར་གཏོད་ལྟེ་གནས་འཛུགས་སྐྲུན་ལ་རམ་འདེགས་བྱེད་དགོས་ཟེར།
ཞང་ཀང་དང་ཨོ་མོན། ཐའེ་ཝན་གྱི་མི་སྣས་ཀྲུའུ་ཞི་ཞི་ཅིན་ཕིང་གི་གསུང་བཤད་གལ་ཆེན་གྱིས་སྐུལ་ལྕགས་ཐེབས་བྱུང་ཞེས་བསྟན།
ཞང་ཀང་དམིགས་བསལ་སྲིད་འཛིན་ཁུལ་སྲིད་གཞུང་གི་ཚན་རྩལ་གསར་གཏོད་དང་བཟོ་ལས་ཅུས་ཀྱི་ཅུས་ཀྲང་གཞོན་པ་ཀྲང་མིན་ལིས་ཀྱིས་བཤད་རྒྱུར། ཀྲུའུ་ཞི་ཞི་ཅིན་ཕིང་གི་གསུང་བཤད་གལ་ཆེན་གྱི་གཟིགས་རྒྱང་རིང་ཞིང་མི་སེམས་ལ་སྐུལ་མ་ཐེབས་ཐུབ། ཞང་ཀང་གི་ལས་རིགས་སོ་སོས་གོ་སྐབས་དམ་འཛིན་བྱས་ནས་རྣམ་པ་གསར་གཏོད་བྱེད་ངེས་ཡིན། “རྒྱལ་ཁབ་གཅིག་ལ་ལམ་ལུགས་གཉིས”ཀྱི་ལམ་ལུགས་ཀྱི་དགེ་མཚན་འོག ནང་འབྲེལ་དང་ཕྱི་མཐུད་ཀྱི་ཟམ་པ་ལྟ་བུའི་བྱེད་ནུས་ལེགས་པོར་བཏོན་ཏེ། ལོ་ལྔའི་འཆར་འགོད་ཕྱོགས་ཡོངས་ནས་དོན་འཁྱོལ་སྒོས་རྒྱལ་ཁབ་འཕེལ་རྒྱས་ཀྱི་སྤྱི་ཡོངས་ནང་མཉམ་འདྲེས་དང་དེར་ཞབས་འདེགས་ཧུར་ཐག་ཞུ་དགོས་ཟེར།
ཨོ་མོན་དམིགས་བསལ་སྲིད་འཛིན་ཁུལ་གྱི་ཁྲིམས་འཛུགས་ཁང་གི་ཁོངས་མི། ཨོ་མོན་བུད་མེད་མཉམ་འབྲེལ་ལྷན་ཚོགས་ཀྱི་ལས་འཛིན་དཔོན་གཞོན་པ་ལའེ་ཆིས་ཡུན་གྱིས་བཤད་རྒྱུར། ཀྲུའུ་ཞི་ཞི་ཅིན་ཕིང་གིས“རྒྱལ་ཁབ་གཅིག་ལ་ལམ་ལུགས་གཉིས”དང་། “ཨའོ་མོན་པས་ཨའོ་མོན་སྐྱོང་བ”། ཚད་མཐོའི་རང་སྐྱོང་བྱེད་ཕྱོགས་བཅས་བློ་བརྟན་འགྱུར་མེད་ཀྱིས་ལག་ལེན་མཐར་ཕྱིན་བྱེད་དགོས་པ་བསྟན། དེས་ཨའོ་མོན་གྱི་འཕེལ་རྒྱས་ལ་ཁ་ཕྱོགས་གསལ་སྟོན་བྱས་ཡོད། ངས“རྒྱལ་གཅེས་མཁན་གྱིས་ཨའོ་མོན་སྐྱོང་བའི”རྩ་དོན་བློ་བརྟན་འགྱུར་མེད་ངང་དོན་འཁྱོལ་བྱས་ཏེ། སྤྱི་ཚོགས་ལས་རིགས་ཁག་དང་སེམས་ནུས་གཅིག་སྒྲིལ་གྱིས་ཀྲུང་དབྱང་གི་ཐུགས་ཁུར་དང་རེ་བ་དོན་ཐོག་ཏུ་འཁྱོལ་བར་བྱེད་དགོས་ཟེར།
ཧྲེ་ཤིན་སློབ་ཆེན་གྱི་འཆད་ཁྲིད་དགེ་རྒན་ཆེན་མོ་ཡིའུ་ཙེ་ཞང་གིས་བཤད་རྒྱུར། སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་འགྲམ་གཉིས་ཀྱི་བརྗེ་རེས་མཉམ་ལས་གཏིང་ཟབ་ཏུ་གཏོང་དགོས་ཞེས་ནན་གྱིས་བསྟན། “ཐའེ་ཝན་རང་བཙན”གྱི་ཁ་ཕྲལ་སྟོབས་ཤུགས་ལ་མཐའ་གཅིག་ཏུ་རྡུང་རྡེག་གཏོང་བ་དང་། ཕྱི་ཕྱོགས་སྟོབས་ཤུགས་ཀྱིས་ཐེ་གཏོགས་བྱེད་པར་ངོ་རྒོལ་བྱས་ཏེ། འགྲམ་གཉིས་ཀྱི་ཞི་བའི་འཕེལ་རྒྱས་ནུས་ཤུགས་ཡོད་རྒུས་སྲུང་སྐྱོང་བྱ་དགོས། སློབ་གསོའི་བྱ་བ་སྒྲུབ་མཁན་ཞིག་ཡིན་པའི་ཆ་ནས། ངས་གཞོན་ནུ་རྣམས་ལ་བསམ་བློ་བརྗེ་རེས་བྱེད་པ་ནས་འགོ་བརྩམས་ཏེ། འགྲམ་གཉིས་ཀྱི་གཞོན་ནུ་ཚོས་རང་སོ་སོའི་ལེགས་ཆ་འདོན་སྤེལ་བྱས་ནས་མི་རིགས་བསྐྱར་དར་ཡོང་ཆེད་སྟོབས་ཤུགས་འབུལ་དགོས་ཟེར།
