མཚོ་སྔོན་གྱིས་རང་བྱུང་སྲུང་སྐྱོབ་ཁུལ་གྱི་བློ་གྲོས་ཅན་གྱི་དོ་དམ་སྲུང་སྐྱོབ་ལ་སྐུལ་འདེད་བཏང་།

ཟླ8པའི་ཚེས19ཉིན་བར། “འབྱུང་ཁུངས་མང་བའི་གཞི་གྲངས་མཉམ་འདྲེས་ལག་རྩལ་དེ་རང་བྱུང་སྲུང་སྐྱོབ་ཁུལ་གྱི་སྐྱེ་ཁམས་སྤུས་ཚད་གདེང་འཇོག་ཁྱབ་སྤེལ་དཔེ་སྟོན་ལས་གཞི”ཡིས་སྤྱི་ཆིང་འབུམ་གཅིག་དང་ཁྲི་གཉིས་སྟོང་གཅིག་དགུ་བརྒྱའི་སྲུང་སྐར་རྒྱང་ཚོར་འོད་ཤལ་མང་བའི་རྒྱང་ཚོར་བརྙན་རིས་གཞི་གྲངས་འཚོལ་བསྡུ་དང་འཛུགས་སྐྲུན་ལེགས་གྲུབ་བྱུང་བ་དང་། འོད་ཤལ་མང་བ་དང་། སྐུལ་འོད་རེག་བརྡ། ཚ་དྲོད་དམར་ཕྱི་སོགས་ཀྱི་ལག་རྩལ་འདུས་པའི་མི་མེད་གནམ་གྲུའི་གཞི་གྲངས་འཚོལ་བསྡུ་སྒྲིག་ཆས་མ་ལག་འཛུགས་སྐྲུན་བྱས་ཤིང་། མི་མེད་གནམ་གྲུའི་རྒྱང་ཚོར་ལྟ་ཞིབ་ཚད་ལེན་ཁུལ2བཙུགས། ལི་སྨི་རིམ་པའི་ཞིབ་ཚད་འོད་ཤལ་མང་བའི་གཞི་གྲངས་འཚོལ་བསྡུའི་ལམ་ཚད་སྤྱི་ལེ200ལས་བརྒལ་བ་དང་། ལས་འགན་ཁག་གོ་རིམ་ལྡན་པའི་ངང་སྤེལ་བཞིན་ཡོད།

མཚོ་སྔོན་ནི་རྒྱལ་ཡོངས་ཀྱི་སྐྱེ་ཁམས་བདེ་འཇགས་སྲུང་ཡོལ་གལ་ཆེན་ཡིན་པའི་ཆ་ནས། རང་བྱུང་སྲུང་སྐྱོབ་ས་ཆའི་ཁྱབ་རྒྱ་ཆེ་བ་དང་ས་དབྱིབས་རྙོག་འཛིང་ཆེ། 2026ལོར། མཚོ་སྔོན་ཞིང་ཆེན་རྒྱལ་ཁབ་སྤྱི་གླིང་ཚན་ཞིབ་ལྟ་ཞིབ་ཚད་ལེན་དཔྱད་འཇོག་ལྟེ་གནས་ཀྱིས“འབྱུང་ཁུངས་མང་བའི་གཞི་གྲངས་མཉམ་འདྲེས་ལག་རྩལ་དེ་རང་བྱུང་སྲུང་སྐྱོབ་ཁུལ་གྱི་སྐྱེ་ཁམས་སྤུས་ཚད་གདེང་འཇོག་ཁྱབ་གདལ་དཔེ་སྟོན་རྣམ་གྲངས”ལག་བསྟར་བྱས་ནས། རང་བྱུང་སྲུང་སྐྱོབ་ཁུལ་གྱི་སྐྱེ་ཁམས་སྤུས་ཚད་གནད་འཁེལ་ཅན་དང་དུས་ཐོག་ཅན་གྱི་ལྟ་ཞིབ་ཚད་ལེན་ཆུ་ཚད་རྒྱུན་མཐུད་ངང་མཐོ་རུ་བཏང་སྟེ། ས་ཁོངས་སྐྱེ་ཁམས་ཀྱི་ཡུན་ཕན་ལྟ་ཞིབ་ཚད་ལེན་དང་གནད་འཁེལ་སྲུང་སྐྱོབ་མངོན་འགྱུར་ཡོང་བ་བྱས་ནས། རང་བྱུང་སྲུང་སྐྱོབ་ཁུལ་གྱི་དོ་དམ་ནུས་པ་ཁྱོན་ཡོངས་ནས་ཆེ་རུ་བཏང་།

རང་ཞིང་གིས་རྟ་ཐང་པེ་ཁྲོན་ཆུ་བོའི་འབྱུང་ཡུལ་དང་ཞུན་ཧྭ་སྟོང་རི་ལྷ་མཚོ་རྒྱལ་ཁབ་རིམ་པའི་རང་བྱུང་སྲུང་སྐྱོབ་ཁུལ་གཉིས་དཔེ་སྟོན་ས་ཁོངས་སུ་བདམས་ནས། ཀྲུང་གོ་ཚན་རིག་གླིང་ནུབ་བྱང་མཐོ་སྒང་སྐྱེ་དངོས་ཞིབ་འཇུག་སའོ་ཡི་ལག་རྩལ་ཚོགས་པ་དང་མཉམ་འབྲེལ་བྱས་ཏེ། ཞིབ་ཚད་མཐོ་བའི་འོད་ཤལ་མང་བའི་མི་མེད་གནམ་གྲུའི་གཟུགས་བརྙན་གཞི་གྲངས་ལ་གཞིགས་ནས། སྐྱེ་ཁམས་དམིགས་ཚད་ལྡོག་སྟོན་རྩི་ཐབས་ཞིབ་འཇུག་གསར་སྤེལ་བྱས་པ་དང་། སྲུང་སྐྱོབ་ཁུལ་གྱི་རྒྱང་ཚོར་སྐྱེ་ཁམས་ཀྱི་སྤུས་ཚད་དང་། རྩི་ཤིང་གི་ཁེབས་ཚད། ས་ཞིང་ཞན་འགྱུར། མྱ་ངམ་ཐང་དུ་འགྱུར་བ། དེ་མིན་རི་སྐྱེས་སྲོག་ཆགས་དང་རྩི་ཤིང་གི་འཚོ་གནས་ཀྱི་འགུལ་རྣམ་འགྱུར་ལྡོག་བཅས་ལ་ཚད་འབེབས་དབྱེ་ཞིབ་དང་། སྐྱེ་ཁམས་ཉམས་ཞན་ཁུལ་དབྱེ་འབྱེད་གནད་འཁེལ་བྱས་ནས། རང་བྱུང་སྲུང་སྐྱོབ་ཁུལ་དེ་མི་ཐབས་ལ་བརྟེན་ནས་ས་ཆ་དངོས་སུ་སྐོར་སྲུང་བྱེད་པ་ནས་གྲངས་ཀ་ཅན་གྱི་རིག་ནུས་དོ་དམ་ཚོད་འཛིན་བྱེད་པར་བསྒྱུར་བར་སྐུལ་འདེད་གཏོང་དགོས།

ཞིང་ཆེན་རྒྱལ་ཁབ་སྤྱི་གླིང་ཚན་ཞིབ་ལྟ་ཞིབ་ཚད་ལེན་དཔྱད་འཇོག་ལྟེ་གནས་ཀྱིས་སྲུང་སྐྱོབ་ཁུལ་གྱི་མཁའ་འགྲུལ་པར་ལེན་ལས་དོན་མུ་མཐུད་གཅིག་གྱུར་འཆར་འགོད་བྱས་ནས། དབྱེ་འབྱེད་ཚད་སྨི1གི་དྲ་མིག་རྒྱང་ཚོར་བརྙན་རིས511དུས་ལྟར་ལེགས་འགྲུབ་བྱས་ནས་སྐྱེ་ཁམས་རིག་ནུས་ལྟ་ཞིབ་ཚད་ལེན་མཉེན་ཆས་ཀྱི་སྔ་ཕྱིའི་སྒྲོམ་གཞི་བསྐྲུན་རྒྱུར་དུས་གཅིག་ཏུ་སྐུལ་འདེད་བཏང་སྟེ། ལྟེ་བའི་སྐྱེ་ཁམས་སྤུས་ཚད་ཀྱི་དམིགས་ཚད་དཔེ་དབྱིབས་རྩིས་རྒྱག་སྣ7ལེགས་འགྲུབ་བྱ་རྒྱུ་རེད། སྲུང་སྐར་རྒྱང་ཚོར་དང་མི་མེད་གནམ་གྲུའི་མཁའ་འགྲུལ་པར་ལེན། ས་ངོས་ཀྱི་དངོས་རྫས་ལྟ་ཞིབ་ཚད་ལེན། རི་ཐང་གི་མ་དཔེར་བརྟག་དཔྱད་བཅས་འབྱུང་ཁུངས་མང་པོ་མཉམ་འདྲེས་བྱས་པའི་གཞི་གྲངས་ལ་བརྟེན་ནས་གྲངས་ཚད་གཏན་འཁེལ་གྱི་དབྱེ་ཞིབ་གྲུབ་འབྲས་ཆགས་པར་བྱེད་པ་དང་། སྐྱེ་ཁམས་སླར་གསོའི་ཁུལ་དབྱེ་འབྱེད་གནད་ལ་འཁེལ་བ་དང་ཁྱད་པར་ལྡན་པའི་སྲུང་སྐྱོབ་བཅོས་སྐྱོང་བྱེད་ཐབས་རིགས་དབྱེ་གཏན་འབེབས་བྱས་ཏེ། སྲུང་སྐྱོབ་ཁུལ་གྱི་རྒྱུན་ལྡན་སྐོར་སྲུང་དང་། སྐྱེ་ཁམས་དང་རང་བྱུང་གནོད་འཚེའི་ཉེན་ཟོན་སྔོན་བརྡ། སྐྱེ་ཁམས་སླར་གསོ་ལག་བསྟར་བཅས་ལ་ཚན་རིག་དང་མཐུན་པའི་འདེགས་སྐྱོར་འདོན་སྤྲོད་བྱ་རྒྱུ་རེད།