མཚོ་སྔོན་ཞིང་ཆེན་མི་དམངས་སྲིད་གཞུང་དྲ་བ།
ཟླ3པའི་ཚེས3ཉིན། མཚོ་སྔོན་དུ་སྡོད་པའི་རྒྱལ་ཡོངས་སྲིད་གྲོས་ཀྱི་ཨུ་ཡོན་པེ་ཅིང་དུ་འབྱོར་ནས་རྒྱལ་ཡོངས་སྲིད་གྲོས་སྐབས་བཅུ་བཞི་པའི་གྲོས་ཚོགས་ཐེངས་བཞི་པར་ཞུགས་རྒྱུ་རེད། ད་ལོ་ནི“ལོ་ལྔའི་འཆར་གཞི་བཅོ་ལྔ་པ”ལག་བསྟར་བྱེད་འགོ་རྩོམ་པའི་ལོ་ཡིན། མཚོ་སྔོན་དུ་སྡོད་པའི་རྒྱལ་ཡོངས་སྲིད་གྲོས་ཨུ་ཡོན་གྱིས་ཞིང་ཆེན་ཡོངས་ཀྱི་མི་དམངས་ཀྱི་རེ་བ་དང་མངགས་བཅོལ་ཟབ་མོ་ཕྲག་ཏུ་འཁུར་བ་དང་། བརྟག་དཔྱད་གཏིང་ཟབ་བྱས་ནས་གྲུབ་པའི་གྲོས་གཞི་འཁྱེར་ནས་ཚོགས་འདུའི་སྟེང་ཧུར་ཐག་གིས་གྲོས་གཞི་འདོན་རྒྱུ་རེད། ཁོ་ཚོས་སྐྱེ་ཁམས་དཔལ་ཡོན་འཛུགས་སྐྱོང་དང་། དམངས་འཚོ་འགན་སྲུང་དང་ལེགས་བཅོས། དཔལ་འབྱོར་སྤུས་ཚད་མཐོ་བའི་འཕེལ་རྒྱས་སོགས་གཙོ་གནད་ཁྱབ་ཁོངས་ལ་དམིགས་ནས“ལོ་ལྔའི་འཆར་འགོད་བཅོ་ལྔ་པའི”འགག་རྩའི་གྲོས་གཞིར་དམིགས་ནས་མཚོ་སྔོན་གྱི་དོན་དངོས་དང་ཟུང་འབྲེལ་བྱས་ཏེ། དམིགས་སའི་རང་བཞིན་ལྡན་པའི་བསམ་འཆར་དང་གྲོས་གཞི་བཏོན་ཏེ་རྒྱལ་ཁབ་འཕེལ་རྒྱས་ཀྱི་ཁྱོན་ཡོངས་ལ་མཚོ་སྔོན་གྱི་བློ་གྲོས་དང་སྟོབས་ཤུགས་འབུལ་རྒྱུ་རེད།
མཚོ་སྔོན་དུ་སྡོད་པའི་རྒྱལ་ཡོངས་སྲིད་གྲོས་ཀྱི་ཨུ་ཡོན་ལི་ཆིང་གིས་ད་ལོར་མཚོ་སྔོན་གྱི་རི་སྔོ་ཆུ་དྭངས་ཀྱི་སྐྱེ་ཁམས་རྨང་གཞི་དང་། ནུས་རྒྱུ་གཙང་མའི་ལྗང་མདོག་ལེགས་ཆ། ལྗང་རྩིས་ཆིང་ནུས་ཐོན་ལས་ཀྱི་འཕྲུལ་འཁོར་གསར་པ་བཅས་ལ་དམིགས་ནས་སྐྱེ་ཁམས་ལེགས་ཆ་དང་ཐོན་ཁུངས་ལེགས་ཆ་དེ་འཕེལ་རྒྱས་ལེགས་ཆ་དང་འགྲན་རྩོད་ལེགས་ཆར་བསྒྱུར་ནས། རྒྱལ་ཡོངས་ཀྱི་དཔལ་འབྱོར་དང་སྤྱི་ཚོགས་སྤུས་ཚད་མཐོ་བའི་འཕེལ་རྒྱས་ལ་རྒྱུན་ཆད་མེད་པར་ལྗང་མདོག་སྒུལ་ཤུགས་སྣོན་པའི“མཚོ་སྔོན་གྱི་ཇུས་གཞི”འདོན་རྒྱུ་རེད། ཁོས་གྲོས་གཞི་དེ་དག་བརྒྱུད་ནས་རྒྱལ་ཡོངས་དང་ཐ་ན་འཛམ་གླིང་གི་ཤེས་ལྡན་པ་མི་སྣ་སྔར་ལས་མང་པོ་མཚོ་སྔོན་དུ་བསྐྱོད་ནས་མཚོ་སྔོན་ལ་གཞི་ཚུགས་ཏེ་ལག་གདང་སྦྲེལ་ནས་དུས་རབས་གསར་པའི་མཚོ་སྔོན་གྱི་སྐྱེ་ཁམས་དཔལ་ཡོན་གྱི་མཐོ་ས་བསྐྲུན་པ་དང་སྤུས་ཚད་མཐོ་བའི་འཕེལ་རྒྱས་ཀྱི་ལེའུ་གསར་པ་འབྲི་རྒྱུའི་རེ་བ་བྱེད་ཀྱི་ཡོད་ཟེར།
པེ་ཅིང་དུ་བསྐྱོད་པའི་ལམ་བར་དུ། ཨུ་ཡོན་རྣམས་ཀྱིས་གྲོས་བསྡུར་ཟབ་མོ་བྱས་ཏེ་སོ་སོའི་གྲོས་གཞིའི་ཁ་ཕྱོགས་དང་བརྟག་དཔྱད་ཞིབ་འཇུག་གི་བསམ་ཚུལ་བརྗེ་རེས་བྱས། སྡོད་ཡུལ་དུ་ཐོན་རྗེས་མྱུར་དུ་བྱ་བར་ཞུགས་ནས་ཚད་མཐོའི་འགན་འཁྲི་སྒྲུབ་སེམས་དང་ལས་འགན་ཁུར་སེམས་བཅངས་ཏེ་ཚོགས་འདུའི་གྲོས་རིམ་སོ་སོར་དམིགས་ནས་བསམ་གཞིག་གཏིང་ཟབ་བཏང་བ་དང་ཧུར་ཐག་གིས་གཏམ་བཤད་བྱས་ནས། མཚོ་སྔོན་མི་དམངས་ཀྱི་སེམས་གཏམ་ཚོགས་འདུའི་ཐོག་ཁྱེར་ནས་བརྟག་དཔྱད་ཞིབ་འཇུག་གི་གྲུབ་འབྲས་ཏན་ཏིག་དང་དངོས་གཉེར་གྱི་གྲོས་གཞིའི་སྟེང་ནས་རྒྱལ་ཁབ་ཀྱི་ཐབས་ཇུས་བཀོད་སྒྲིག་མཚོ་སྔོན་དུ་ལག་ལེན་དུ་བསྟར་ནས་ཕན་འབྲས་ཐོན་པར་སྐུལ་འདེད་བཏང་སྟེ། མཚོ་སྔོན་གྱི་ཁྱད་ཆོས་དང་ལེགས་ཆ་རྒྱལ་ཁབ་འཕེལ་རྒྱས་ཀྱི་ཁྱོན་ཡོངས་ཀྱི་ཁྲོད་སྔར་ལས་འབུར་དུ་ཐོན་པར་འབད་བརྩོན་བྱས་ཏེ། “ལོ་ལྔའི་འཆར་འགོད་བཅོ་ལྔ་པའི་འགོ་བཟང་པོ་རྩོམ་པར་མཚོ་སྔོན་གྱི་འགན་འཁྲི་ལེགས་སྐྱེས་སུ་འབུལ་རྒྱུ་རེད།
