མཚོ་སྔོན་ཞིང་ཆེན་མི་དམངས་སྲིད་གཞུང་དྲ་བ།
ད་ལོ་ནི“ལོ་ལྔའི་འཆར་འགོད་བཅོ་ལྔ་པ”མགོ་རྩོམ་པའི་ལོ་ཡིན། མཚོ་སྔོན་དུ་སྡོད་པའི་རྒྱལ་ཡོངས་སྲིད་གྲོས་ཀྱི་ཨུ་ཡོན་རྣམས་ཀྱིས་ཞིང་ཆེན་ཡོངས་ཀྱི་མི་དམངས་མང་ཚོགས་ཀྱི་རེ་འདུན་དང་མངག་བཅོལ་ཡིད་ལ་བཅིངས་ཤིང་། རྟོག་ཞིབ་ཟབ་མོ་བྱས་ནས་བྲིས་པའི་གྲོས་གཞི་འཁྱེར་ནས་ཚོགས་ཐོག་ཏུ་བློ་འདོན་ཇུས་འབུལ་བྱེད་པར་སྟ་གོན་བྱས་ཡོད། ཁོ་ཚོས་སྐྱེ་ཁམས་དཔལ་ཡོན་འཛུགས་སྐྱོང་དང་། དམངས་ཚིས་འགན་སྲུང་ལེགས་སྒྱུར། དཔལ་འབྱོར་འཕེལ་རྒྱས་སྤུས་ཚད་མཐོ་པོས་སྤེལ་ལ་སོགས་ཁྱབ་ཁོངས་གཙོ་བོར་དམིགས་ཏེ། “ལོ་ལྔའི་འཆར་འགོད་བཅོ་ལྔ་བའི”འཆར་འགོད་ཀྱི་གྲོས་གཞི་གནད་ཆེན་དག་སྙིང་བོར་བཟུང་ཐོག མཚོ་སྔོན་གྱི་དོན་དངོས་ལ་འབྲེལ་ནས་དམིགས་ཡུལ་རང་བཞིན་གྱི་བསམ་འཆར་དང་བསམ་ཚུལ་བཏོན་ནས་རྒྱལ་ཁབ་ཀྱི་འཕེལ་རྒྱས་སྤྱིའི་བཀོད་ཁྱབ་ལ་མཚོ་སྔོན་གྱི་བློ་གྲོས་དང་སྟོབས་ཤུགས་འབུལ་འཆར་ཡོད།
ད་ལོར། མཚོ་སྔོན་དུ་སྡོད་པའི་རྒྱལ་ཡོངས་སྲིད་གྲོས་ཀྱི་ཨུ་ཡོན་ལི་ཆིན་གྱིས་སྐྱེ་ཁམས་ཀྱི་ཚིས་གཞི་གྱུར་བའི་མཚོ་སྔོན་གྱི་སྔོ་ཞིང་དྭངས་པའི་རི་ཆུ་དང་། ལྷད་མེད་དགེ་མཚན་དུ་གྱུར་བའི་ནུས་ཁུངས་གཙང་མ། ཐོན་ལས་ཀྱི་གོ་སྐབས་གསར་པ་སྟེ་ལྗང་རྩིས་ཆིང་ནུས་བཅས་དཀྱིལ་སྙིང་དུ་བཟུང་སྟེ། སྐྱེ་ཁམས་ཀྱི་དགེ་མཚན་དང་ཐོན་ཁུངས་ཀྱི་དགེ་མཚན་དེ་འཕེལ་རྒྱས་ཀྱི་དགེ་མཚན་དང་འགྲན་རྩོད་ཀྱི་དགེ་མཚན་དུ་བསྒྱུར་བར་སྐུལ་འདེད་བཏང་ནས་རྒྱལ་ཡོངས་དཔལ་འབྱོར་སྤྱི་ཚོགས་སྤུས་ཚད་མཐོ་བའི་སྒོ་ནས་གོང་དུ་སྤེལ་བར་ལྗང་མདོག་སྒུལ་ནུས་ཟམ་མི་ཆད་པ་ཞིག“མཚོ་སྔོན་གྱི་ཇུས་གཞི”ལ་འདོན་རྒྱུ་བྱས་ཡོད། “ གྲོས་འདོན་འདི་དག་བརྒྱུད་དེ། རྒྱལ་ཡོངས་དང་ཐ་ན་འཛམ་གླིང་གི་ཕུགས་འདུན་ཅན་གྱི་མི་སྔར་ལས་མང་པོ་ཞིག་མཚོ་སྔོན་དུ་ཡོང་ནས་རྩ་བ་ཚུགས་ཏེ། མཉམ་དུ་དུས་རབས་གསར་པའི་མཚོ་སྔོན་གྱི་སྐྱེ་ཁམས་དཔལ་ཡོན་གྱི་མཐོ་ས་འཛུགས་སྐྲུན་དང་སྤུས་ཚད་མཐོ་བའི་འཕེལ་རྒྱས་ཀྱི་ལེའུ་གསར་པ་བརྩམ་རྒྱུ་རེ་བ་ཡིན་ཟེར།
པེ་ཅིང་ལ་ཆས་པའི་ལམ་དུ། ཨུ་ཡོན་རྣམས་ལ་སེམས་ཤུགས་ཀྱིས་ཁེངས་ཤིང་། གྲོས་བསྡུར་གྱི་ཚ་རླབས་ཤིག་འཕྱུར། ཕན་ཚུན་བར་འབྲེལ་འདྲིས་བྱས་ནས་གྲོས་འདོན་གྱི་ཁ་ཕྱོགས་དང་རྟོག་ཞིབ་ཀྱི་མྱོང་ཚོར་གླེང་། པེ་ཅིང་དུ་འབྱོར་རྗེས། ལམ་སེང་སྟ་གོན་གྱི་ལས་ལ་ཞུགས་ཏེ། འགན་འཁྲི་འདུ་ཤེས་དང་འོས་འགན་གྱི་འདུ་ཤེས་ཆེན་པོ་ཞིག་བཟུང་ནས་སོ་སོའི་ལས་འགན་གཡོལ་མེད་ཁུར་དུ་བླངས། གྲོས་ཚོགས་ཀྱི་གྲོས་རིམ་སོ་སོ་ལ་བསམ་བློ་ཟབ་མོ་བཏང་སྟེ་བསམ་ཚུལ་ཧུར་ཐག་བརྗོད་པ་དཀྱིལ་སྙིང་དུ་བཟུང་ཐོག མཚོ་སྔོན་མི་དམངས་ཀྱི་རེ་བ་ཚོགས་ཐོག་ཏུ་འཁྱེར་ཏེ། རྟོག་ཞིབ་ཏན་ཏིག་བྱས་པའི་གྲུབ་འབྲས་དང་དངོས་སྒྲུབ་ཀྱི་བསམ་འཆར་ལ་བརྟེན་ནས་རྒྱལ་ཁབ་ཀྱི་ཇུས་ཆོད་བཀོད་སྒྲིག་མཚོ་སྔོན་དུ་ལག་བསྟར་བྱས་ནས་ཕན་འབྲས་ཐོབ་པར་སྐུལ་འདེད་དང་། མཚོ་སྔོན་གྱི་ཁྱད་ལྡན་དགེ་མཚན་དང་མཚོ་སྔོན་གྱི་འཕེལ་རྒྱས་སྤྱིའི་བཀོད་པ་མངོན་གསལ་དོད་པོ་ཡོང་ཆེད་འབད་འབུངས་བཅས་བྱས་ནས“ལོ་ལྔའི་འཆར་འགོད་བཅོ་ལྔ་པའི”མགོ་ལེགས་པར་བརྩམ་པར་མཚོ་སྔོན་གྱི་ཁག་ཁུར་སྐྱེས་སུ་འབུལ་འཆར་ཡོད་དོ།།
