ཞིང་ཆེན་མེ་ཟོན་སྡེ་ཁག་གིས་བྱེད་ཐབས་སྣ་མང་སྤྱད་དེ་སློབ་གླིང་གི་མེ་ཟོན་བདེ་འཇགས་རྨང་གཞི་སྲ་བརྟན་དུ་བཏང་།

སློབ་འགོ་གསར་པ་ཚུགས་མ་ཐག མཚོ་སྔོན་གྱི་རིམ་པ་སོ་སོའི་མེ་ཟོན་སྡེ་ཁག་གིས་གཅིག་བསྡུས་སྒོས་ཤུགས་བཏོན་ནས་མི་མངོན་པའི་རྐྱེན་ངན་ཞིབ་བཤེར་དང་འཕྲལ་བསྟུན་སྦྱོང་བརྡར། དྲིལ་སྒྲོག་སློབ་གསོ་སོགས་བྱེད་ཐབས་སྣ་མང་བརྒྱུད་དེ་རྣམ་པ་སྣ་མང་གི་སློབ་སྐབས་གསར་པའི་མེ་ཟོན་སློབ་ཁྲིད་དང་པོའི་བརྗོད་དོན་བྱ་འགུལ་སྤེལ་བ་དང་། སློབ་གླིང་གི་མེ་ཟོན་བདེ་འཇགས་རྨང་གཞི་ཕྱོགས་ཡོངས་ནས་སྲ་བརྟན་དུ་བཏང་སྟེ་རྒྱ་ཆེའི་དགེ་སློབ་རྣམས་ལ་བདེ་འཇགས་འཆམ་མཐུན་གྱི་སློབ་གླིང་ཁོར་ཡུག་བསྐྲུན།

སློབ་སྐབས་གསར་པའི་མེ་ཟོན་བདེ་འཇགས་ལ་འགན་སྲུང་བྱེད་ཆེད། ཞིང་ཆེན་ཡོངས་ཀྱི་རིམ་པ་སོ་སོའི་མེ་ཟོན་སྡེ་ཁག་གིས་སྔོན་ལ་བཀོད་སྒྲིག་དང་རང་འགུལ་ངང་སྦྲེལ་མཐུད་བྱས་ཏེ་སློབ་འགོ་མ་བརྩམས་པའི་སྔོན་ལ་སྟོབས་ཤུགས་གཅིག་བསྡུས་སྒོས་ས་གནས་སོ་སོའི་སློབ་གྲྭ་ཆུང་འབྲིང་དང་བྱིས་སྐྱོང་ཁང་དུ་མེ་ཟོན་བདེ་འཇགས་ཉེན་ཁའི་མངོན་མེད་རྐྱེན་ངན་ཞིབ་བཤེར་བྱས། མེ་ཟོན་ལྟ་སྐུལ་བས་བདེ་འཇགས་ཕྱིར་གཏོང་དང་མེ་ཟོན་བགྲོད་ལམ་བཟུང་སྤྱོད་དང་བཀག་པའི་གནད་དོན། མེ་ཟོན་སྒྲིག་ཆས་ལ་ཆག་སྐྱོན་ཤོར་བ་སོགས་ཀྱི་མངོན་མེད་རྐྱེན་ངན་གཙོར་བཟུང་ནས་ཞིབ་བཤེར་བྱས་པ་དང་།  ཡུལ་དངོས་ནས་སློབ་གྲྭ་ལ་དག་ཐེར་བཅོས་སྐྱོང་ལས་འགན་དང་འགོག་ཟོན་བྱེད་ཐབས་ཕྱིར་ལྡོག་བྱས། དེ་དང་མཉམ་དུ། མེ་ཟོན་ལྟ་སྐུལ་བ་སློབ་གྲྭ་སོ་སོར་སོང་ནས་མེ་ཟོན་བདེ་འཇགས་འགན་འཁུར་མི་སྣ་དང་དོ་དམ་མི་སྣར་མེ་ཟོན་བདེ་འཇགས་ཐད་ཀྱི་གསོ་སྦྱོང་སྤེལ་བ་དང་། སློབ་གླིང་གི་བདེ་འཇགས་ཉེན་ཁ་གཙོ་བོ་ཁྱབ་བསྒྲགས་བྱས་ཤིང་། དཔེ་མཚོན་མེ་སྐྱོན་གྱོད་གཞིར་དབྱེ་ཞིབ་བྱས་ཏེ་རིམ་པ་སོ་སོ་དང་ལས་གནས་སོ་སོའི་མི་སྣའི་མེ་ཟོན་བདེ་འཇགས་འགན་འཁྲི་སྔར་ལས་ཁ་གསལ་དུ་བཏང་།

དེར་མ་ཟད། ཞིང་ཆེན་ཡོངས་ཀྱི་གཞི་རིམ་མེ་ཟོན་རོགས་སྐྱོབ་དཔུང་སྡེས་ཁོངས་གཏོགས་ཀྱི་དངོས་ཡོད་གནས་ཚུལ་དང་ཟུང་འབྲེལ་བྱས་ཏེ་སློབ་གྲྭ་ཆུང་འབྲིང་དང་བྱིས་སྐྱོང་ཁང་གི་སློབ་མའི་ཉལ་ཁང་དང་ཟ་ཁང་། དཔེ་མཛོད་ཁང་། མེ་ཟོན་ཚོད་འཛིན་ཁང་སོགས་སུ་དངོས་འཐབ་སྦྱོང་བརྡར་བྱས་པ་དང་། དུས་ཐོག་ཏུ་མེ་གསོད་རོགས་སྐྱོབ་སྔོན་ཇུས་བཟོ་བཅོས་བྱས་ནས་འཐུས་ཚང་དུ་བཏང་སྟེ་ཐོལ་བྱུང་གི་གནས་ཚུལ་བྱུང་ན་མགྱོགས་མྱུར་སྒོས་ཁ་གཏད་འཇལ་ཐུབ་པ་དང་ཚན་རིག་དང་མཐུན་པའི་སྒོ་ནས་ཐག་གཅོད་བྱེད་ཐུབ་པ། ནུས་ཡོད་སྒོས་རོགས་སྐྱོབ་བྱེད་ཐུབ་པར་བྱས།

ཞིང་ཆེན་མེ་ཟོན་རོགས་སྐྱོབ་སྤྱིའི་རུ་ཁག་གི་འབྲེལ་ཡོད་འགོ་ཁྲིད་པས་བསྟན་དོན། གོ་རིམ་རྗེས་མར། ཞིང་ཆེན་ཡོངས་ཀྱི་མེ་ཟོན་སྡེ་ཁག་གིས་སློབ་གླིང་གི་མེ་ཟོན་བདེ་འཇགས་ཐད་ཀྱི་དྲིལ་སྒྲོག་སློབ་གསོ་སྤེལ་རྒྱུར་རྒྱུན་མཐུད་ངང་སྐུལ་འདེད་གཏོང་བ་དང་། རྒྱུན་རྣམ་ཅན་གྱི་འཁྲབ་སྦྱོང་དང་གནད་ཕིགས་ཅན་གྱི་གསོ་སྦྱོང་། ཆེད་ལས་ཅན་གྱི་མཛུབ་སྟོན་བཅས་བརྒྱུད་དེ་དགེ་སློབ་རྣམས་ཀྱི་མེ་ཟོན་བདེ་འཇགས་འདུ་ཤེས་དང་རང་འགོག་རང་སྐྱོབ་ནུས་པ་ཕྱོགས་ཡོངས་ནས་མཐོར་འདེགས་བཏང་སྟེ་རྒྱ་ཆེའི་དགེ་སློབ་རྣམས་ལ་སློབ་གླིང་གི་བདེ་འཇགས་ཁོར་ཡུག་བརྟན་པོར་བསྐྲུན་རྒྱུ་ཡིན་ཟེར།