《སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་སྣེ་ཁྲིད་མཛད་ནས་དབུལ་ཐར་མཁྲེགས་གཏོར་འཐབ་འཛིང་གི་རྒྱལ་ཁ་བླངས》ཞེས་པའི་དཔེ་དེབ་པར་སྐྲུན་འགྲེམ་སྤེལ་བྱས།

ཞིན་ཧྭ་གསར་འགྱུར་ཁང་གི་གློག་འཕྲིན་ལྟར། 《སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་སྣེ་ཁྲིད་མཛད་ནས་དབུལ་ཐར་མཁྲེགས་གཏོར་འཐབ་འཛིང་གི་རྒྱལ་ཁ་བླངས》ཞེས་པའི་དཔེ་དེབ་ཉེ་ཆར་ཀྲུང་གུང་ཀྲུང་དབྱང་ཏང་གི་སློབ་གྲྭའི་དཔེ་སྐྲུན་ཁང་གིས་པར་དུ་བསྐྲུན་ནས་རྒྱལ་ཡོངས་སུ་བཀྲམས།

ཏང་གི་ཚོགས་ཆེན་བཅོ་བརྒྱད་པའི་ཚུན་ལ། བློ་མཐུན་ཞི་ཅིན་ཕིང་སྲོག་ཤིང་ཡིན་པའི་ཏང་ཀྲུང་དབྱང་གི་མགོ་ཁྲིད་བརྟན་པོའི་འོག་ཏུ། ཏང་དང་རྒྱལ་ཁབ་ཀྱི་ལས་དོན་ལ་ལོ་རྒྱུས་རང་བཞིན་གྲུབ་འབྲས་ཐོབ་པ་དང་ལོ་རྒྱུས་རང་བཞིན་གྱི་འཕོ་འགྱུར་བྱུང་། དུས་རབས་གསར་པའི་རླབས་ཆེ་ཉམས་བརྗིད་ཀྱི་ལོ་རྒྱུས་འཕེལ་རིམ་ཇི་བཞིན་དུ་གསོན་ཉམས་ལྡན་པར་ཟིན་ཐོར་འགོད་ཆེད། ཀྲུང་གུང་ཀྲུང་དབྱང་དྲིལ་སྒྲོག་པུའུ་དང་ཀྲུང་གུང་ཀྲུང་དབྱང་ཏང་གི་སློབ་གྲྭས་མཉམ་འབྲེལ་སྒོས་རྩ་འཛུགས་བྱས་ཏེ“དུས་རབས་གསར་པའི་ལོ་རྒྱུས་རང་བཞིན་གྱི་གྲུབ་འབྲས་དང་ལོ་རྒྱུས་རང་བཞིན་གྱི་འཕོ་འགྱུར”ཞེས་པའི་ཕྲེང་བསྟར་ངག་ཐོག་རྒྱུ་ཆ་འཚོལ་ཞིབ་ཐོ་འགོད་དང་ལེགས་སྒྲིག་གི་བྱ་བ་བསྒྲུབས་ལ། ཐོག་དང་པོར་བསྒྲུབས་པ་ནི“དབུལ་ཐར་མཁྲེགས་གཏོར”གྱི་ངག་ཐོག་བགྲོ་གླེང་རེད།

དུས་རབས་གསར་པར་བསླེབས་རྗེས། དབུལ་ཕོངས་ལས་ཐར་བར་བྱེད་པའི་འཛམ་གླིང་གི་དཀའ་གནད་འདི་ལ་དམིགས་ཏེ། ཀྲུང་གོ་གུང་ཁྲན་ཏང་གིས་དབུལ་བོ་དབུལ་ནག་སེལ་བའི་དཀའ་ཚེགས་ཀྱི་ལས་འགན་ཡོངས་འགྲུབ་བྱས་ཏེ། མི་དམངས་ཡིད་ཚིམས་ཤིང་འཛམ་གླིང་གིས་ཡིད་སྨོན་བྱེད་པའི་དུས་རབས་ཀྱི་གྲུབ་འབྲས་བླངས་ཡོད། དཔེ་དེབ་འདི་ལས་ཚབ་མཚོན་རང་བཞིན་གྱི་དོན་དག་དང་ཚབ་མཚོན་རང་བཞིན་གྱི་མི་སྣ་གཙོ་ཐིག་ཏུ་བྱས་ཤིང་། དོན་དག་དངོས་སུ་བརྒྱུད་མཁན་གྱིས་མྱོང་བ་གླེང་བར་བརྟེན་ནས། བློ་མཐུན་ཞི་ཅིན་ཕིང་སྲོག་ཤིང་ཡིན་པའི་ཏང་ཀྲུང་དབྱང་གིས་ཏང་ཡོངས་དང་རྒྱལ་ཡོངས་མི་རིགས་སོ་སོའི་མི་དམངས་ལ་མཐུན་སྒྲིལ་སྣེ་ཁྲིད་མཛད་དེ་དབུལ་བོ་དབུལ་ནག་སེལ་བའི་ལོ་རྒྱུས་ཀྱི་པར་རིས་དེ་ཀློག་པ་པོའི་སྤྱན་ལམ་དུ་བསྟར་ཡོད་པ་དང་། དབུལ་ཐར་མཁྲེགས་གཏོར་ཐད་བླངས་པའི་ལོ་རྒྱུས་རང་བཞིན་གྱི་གྲུབ་འབྲས་དང་དེ་ལས་གྲུབ་པའི་དབུལ་ཐར་མཁྲེགས་གཏོར་གྱི་སྙིང་སྟོབས་གསོན་ཉམས་ལྡན་པར་མངོན་ཡོད་ལ། “གཏན་འཁེལ་གཉིས”ཀྱི་ཐག་གཅོད་རང་བཞིན་གྱི་དོན་སྙིང་མངོན་པར་མཚོན་ཡོད། དཔེ་དེབ་འདི་པར་དུ་བསྐྲུན་པ་ལས་ཀྲུང་གོའི་དབུལ་སེལ་གཏམ་རྒྱུད་བཟང་པོར་འཆད་པར་ཡུལ་དང་པོའི་རྒྱུ་ཆ་འདོན་སྤྲོད་བྱས་པ་དང་། ཀྲུང་གོའི་ཁྱད་ཆོས་ཀྱི་དབུལ་ཕོངས་ལ་རྒོལ་བའི་གཞུང་ལུགས་ཞིབ་འཇུག་ཟབ་མོར་སྤེལ་བར་ལོ་རྒྱུས་ཀྱི་རྒྱུ་ཆ་གསར་པ་འདོན་སྤྲོད་བྱས་ཤིང་། ཀྲུང་གོའི་མཚན་ཉིད་སྤྱི་ཚོགས་ཚན་རིག་གི་རང་བརྟེན་ཤེས་བྱའི་མ་ལག་འཛུགས་པར་ཐོན་ཁུངས་རྩ་ཆེན་འདོན་སྤྲོད་བྱས་པ་དང་། ཞི་ཅིན་ཕིང་གི་དུས་རབས་གསར་པའི་ཀྲུང་གོའི་ཁྱད་ཆོས་ཀྱི་སྤྱི་ཚོགས་རིང་ལུགས་དགོངས་པ་ཀུན་གྱི་སེམས་སུ་སིམ་པར་བྱེད་པར་གསོན་ཉམས་ལྡན་པའི་བསླབ་གཞི་འདོན་སྤྲོད་བྱས། །