བརྩམས་ཆོས་བདག་དབང་ལ་གནོད་པ་ཐེབས་ན་ཇི་ལྟར་བྱ།

བློ་མཐུན་རྩོམ་སྒྲིག་པ་ལགས།

2020ལོའི་ཟླ2པའི་ཚེས3ཉིན། གློག་བརྙན་འཕྲིན་སྨྱན་སྦྱོར་ཀུང་སི་ཞིག་གིས《ལུ་གུ་ཆུང་ཆུང》ཞེས་པའི་འགུལ་རིས་བརྩམས་ཆོས་གསར་པ་ཞིག་གི་དཔེ་སྐྲུན་དབང་ཆ་དང་འདྲ་བཟོ་དབང་ཆ། འགྲེམས་སྤེལ་བྱེད་དབང་བཅས་ངེད་རིག་གནས་བརྒྱུད་སྒྲོག་ཀུང་སིར་སྤྲད། དེའི་བཅོལ་དབང་དུས་ཡུན་ནི2019ལོའི་ཟླ2པའི་ཚེས30ཉིན་ནས2024ལོའི་ཟླ12པའི་ཚེས31ཉིན་བར་ཡིན། སྦྱིན་བདག་གཡང་བྷ་ཡིས་ངེད་རིག་གནས་བརྒྱུད་སྒྲོག་ཀུང་སིའི་ཆོག་འཐུས་ཅི་ཡང་མ་བརྒྱུད་པར། རང་འགུལ་གྱིས་སྤྱི་ཚོགས་སྟེང་ལ《ལུ་གུ་ཆུང་ཆུང》གི་བརྙན་ཐུང་ཡོངས་བསྒྲགས་སྒོས་ཕྱིར་འཚོང་བྱས་ཏེ་བརྩམས་ཆོས་བདག་དབང་ལ་གནོད་འཚེ་བཟོས་པའི་ཁར། ཁྲིམས་འགལ་གྱིས་དཔལ་འབྱོར་ཁེ་ཕན་མི་ཉུང་བ་ཞིག་ཀྱང་རེག་པར་བརྟེན། ངེད་རིག་གནས་བརྒྱུད་སྒྲོག་ཀུང་སིར་དཔལ་འབྱོར་གྱི་གྱོང་གུད་མི་ཉུང་བ་ཞིག་བཟོས། འདིར་ཁྱེད་བཅའ་ཁྲིམས་བློ་སྟོན་ཁང་ལ་དྲི་རྒྱུ་ཞིག་ཡོད་པ་ནི་ངེད་རིག་གནས་བརྒྱུད་སྒྲོག་ཀུང་སིས་སྦྱིན་བདག་གཡང་བྷ་མི་དམངས་ཁྲིམས་ཁང་དུ་ཞུ་གཏུག་བྱས་ཏེ། དཔལ་འབྱོར་གྱི་གྱོང་གུད་བཟོས་པར་སྐྱིན་ཚབ་གཞལ་འགན་འཁུར་དགོས་པའི་རེ་བ་བཏོན་ཆོག་གམ།

ཞེས་ཆོས་སྐྱོང་གིས།

བློ་མཐུན་ཆོས་སྐྱོང་ལགས།

རང་རྒྱལ་གྱི་དམངས་དོན་ཁྲིམས་གཞུང་གི་དོན་ཚན123པའི་གཏན་འཁེལ་ལྟར་ན། “དམངས་དོན་བྱེད་པོས་ཁྲིམས་ལྟར་བརྩམས་ཆོས་བདག་དབང་ལོངས་སུ་སྤྱད་རྒྱུ་སྟེ།དེའི་ཁྲོད་དཔེ་སྐྲུན་དབང་ཆ་དང་འདྲ་བཟོ་དབང་ཆ། འགྲེམས་སྤེལ་དབང་ཆ་བཅས་ནི་བརྩམས་ཆོས་ཀྱི་རྒྱུ་ནོར་བདག་དབང་གི་རིགས་གལ་ཆེན་ཞིག་ཡིན་པ་དང་། ཆོག་མཆན་མ་ཐོབ་པར་རང་དགར་ཕྱིར་འཚོང་བྱེད་པ་ནི་བརྩམས་ཆོས་ཀྱི་རྒྱུ་ནོར་བདག་དབང་ལ་གནོད་འཚེ་བཟོས་པའི་བྱ་སྤྱོད་ཀྱི་ཁོངས་སུ་གཏོགས”ཞེས་བཀོད་ཡོད།

མི་དམངས་ཁྲིམས་ཁང་གིས་སྦྱིན་བདག་གཡང་བྷས་ཕྱིར་འཚོང་བྱས་པའི《ལུ་གུ་ཆུང་ཆུང》གི་བརྙན་ཐུང་ནི། ཁྱོད་རིག་གནས་བརྒྱུད་སྒྲོག་ཀུང་སིར་འགྲེམ་སྤེལ་བྱེད་དབང་ཡོད་པའི《ལུ་གུ་ཆུང་ཆུང》གི་བརྙན་ཐུང་དང་གཅིག་མཚུངས་ཡིན་ལ། སྦྱིན་བདག་གཡང་བྷས《ལུ་གུ་ཆུང་ཆུང》ཕྱིར་འཚོང་བྱས་པ་ཁྲིམས་འགལ་ཡིན་པར་ངོས་བཟུང་སྟེ། སྦྱིན་བདག་གཡང་བྷས་ཁྱོད་རིག་གནས་བརྒྱུད་སྒྲོག་ཀུང་སིའི་དཔལ་འབྱོར་ཐད་གྱོང་གུད་བཟོས་པར་སྐྱིན་ཚབ་གཞལ་དགོས་པའི་དཔྱད་མཚམས་བཏང་ཆོག