མཚོ་སྔོན་ཞིང་ཆེན་མི་དམངས་སྲིད་གཞུང་དྲ་བ།
ཀན་ལྷོ། རྫས་ལུང་ཚེ་དར།
མདང་ནུབ་ཁ་ཆར་བབས་པས། །
ལུས་སེམས་ཕྱི་རློན་ནང་རློན། །
ཟིམ་ཟིམ་ཆུ་ཡི་ཐིགས་པ། །
མིག་གི་ལྷས་མཐར་འཁྱིལ་སོང་། །
ད་ནངས་ཉི་གཞོན་བཞད་པས། །
ཡིད་ཀྱི་པདྨ་གྲོལ་སོང་། །
སྙིང་གི་ན་ཟུག་ལྕི་མོ། །
ཚིག་གསུམ་གཏམ་གྱིས་གསོས་སོང་། །
དྲན་པ་དྲན་པའི་གསེང་གི། །
ཀླུ་ཆབ་གསེར་མིག་ཉ་ཆུང་། །
བདུད་རྩི་ཆང་རག་སེར་པོ། །
སྐྱོ་བའི་སེམས་གསོར་བཏུང་རོགས། །
ཕྱི་ནང་འདུར་རྒྱུག་རྒོད་པོ། །
ལྷམ་ཆུང་ཟད་པའི་གཞི་མ། །
འདུར་ན་དཀའ་ཚེགས་ཆེ་བ། །
མ་འདུར་འཐུས་ཤོར་ཚ་པོ། །
མི་ཁོམ་འཇིག་རྟེན་བྱ་ལས། །
ལུས་ཀྱི་འདོགས་ཐག་སྦོམ་པོ། །
མཇལ་འཛོམས་ན་གཞུང་སྐྱ་བོར། །
ངང་ཆུང་སེམས་རྩ་གཉོམ་པ། །
ཁ་བ་གཅིག་འབབ་གཉིས་འབབ། །
གངས་ཀྱི་ལྷུན་པོའི་རྒྱན་གཅིག །
སྙིང་སྡུག་མཚོ་ཆུང་ནོར་བུ། །
གངས་ཀྱི་མེ་ལོང་དྭངས་མོ། །
སེམས་པ་གངས་ལ་ཆགས་ཆགས། །
སྙིང་སྡུག་སྙིང་ལ་སྒོམ་པ། །
དུངས་པའི་གཞས་ཆུང་ཕྲ་མོ། །
རྒྱུད་དྲུག་དབྱངས་ལ་བརྒྱུས་འགྲོ། །
ང་ནི་ཕར་ལ་འགྲོ་འགྲོ། །
ཕར་ཕྱོགས་རྒྱ་རྫོང་ནགས་རེད། །
ཁྱོད་ནི་ཚུར་ལ་བསུ་བསུ། །
གསུང་སྐད་ཡིད་ལ་སིམ་པ། །
བརྩེ་བའི་ཐང་གཞུང་ཡངས་མོ། །
མཛོད་དགེ་གླིང་ཐང་འདྲ་བ། །
ཡིད་འོང་འབྲོག་མོའི་འཛུམ་མདངས། །
རུས་པའི་རྐང་གི་མེ་ཏོག །
པྲ་ཚག་ལང་ཤོར་འདྲ་ལེ། །
གཅེས་པའི་འབོད་བརྡ་འདྲ་ལེ། །
ནམ་ཟླ་དབྱར་གཞུང་ཞིག་ལ། །
མེ་ཏོག་གསོལ་སྟོན་རོལ་ཤོག །
སྣང་བ་ཞིག་ལ།
འུ་ཅག་ཚང་མ་རྒྱུག་ལམ་ཞིག་གི་སྣེ་མོ་ན། །
ལེགས་ཉེས་གང་གི་ལས་བྱ་མང་པོའི་སྣེ་མོ་ན། །
དཀར་ནག་གཉིས་ཀྱི་ས་བོན་འདེབས་པའི་ལས་སྣེ་ན། །
གདམ་ཀ་གང་དེའི་དབུ་ཁྱུད་སྦོམ་པོ་འདི་ནས་འབྲི། །
རྩལ་དྲུག་དཔའ་མཛངས་ཀུན་ནས་རྒྱས་ན་སྐྱིད་པ་ལ། །
བདག་པོ་དགའ་བའི་གསོས་སུ་སྨིན་ན་སྐྱིད་པ་ལ། །
ཁེ་ཕན་གོར་མོའི་ཅ་ནེ་བསྲུངས་ན་ཕངས་པ་ལ། །
སྤྱི་དོན་རིན་ཆེན་ཁུར་དུ་བླངས་ན་དགེ་བ་ལ། །
དོན་ལྡན་ལས་ཀྱི་རྔུལ་ཆུ་འབྱིན་པ་མ་མཐོང་ཡང་། །
ནག་ནོག་གྲིབ་མའི་གོ་འཛོལ་དེ་ཉིད་མཐོ་རུ་སྒྲོག །
རང་རང་ལས་ཀྱི་ལམ་ཕྲན་དེད་ན་ལེགས་པ་ལ། །
ཁོ་འདྲས་སྟོང་རུང་འཁོར་ཆེན་སྔར་བཞིན་འཁོར་བར་སྙམ། །
རང་གི་སེམས་བྱུང་རང་མདོག་རྫོད་པའི་གཤེད་དུ་གྱུར། །
ཚོར་བ་རེ་རེ་སྨྲེ་ངག་ལྟ་བུར་ཡི་གེར་ཕབ། །
སྣང་བ་ཞིག་ལ་རང་ཉིད་ཀུན་གྱིས་བསྐྱུར་ཉེན་ཞིག །
གཉུག་མར་གནས་པའི་གཤིས་སྤྱོད་འདི་ཉིད་རོལ་རྩེད་འདྲ། །
འབྲི་རྒྱུ་མང་ན་སྐོར་རྒྱག་རྒན་མོའི་ལབ་རྡོལ་འདྲ། །
ཚིག་ལོག་བརྡ་ལོག་མི་མང་སྡང་བའི་གཞི་རུ་འགུག །
ཁ་ཁོག་སྦུ་གུར་ཡ་ཡོ་མེད་པའི་གསོང་གཏམ་འདི། །
སྣང་བ་ཞིག་ལ་ལུས་སེམས་བདེ་བའི་དབུགས་དབྱུང་ཞིག །
