ཅུང་ཙམ་བཞུགས་རོགས། གཅན་མེ་སྟག་གིས་བརྩམས།

ད་དུང་ཅུང་ཙམ་བཞུགས་རོགས་ཞེས

ངས་བུམ་པའི་ནང་གི་མེ་ཏོག་ལ་བཤད

མེ་ཏོག་གིས་སྐེད་པ་བསྒུར་ཏེ

མགོ་བོ་དང་ཁ་རུ་སྨད་སོང

ཅུང་ཙམ་བཞུགས་རོགས་ཟེར་དུས

ཕྱེ་མ་ལེབ་རྒྱང་དུ་འཕུར་སོང

ཅུང་ཙམ་བཞུགས་རོགས་ཟེར་དུས

ལོ་མའི་ངོ་གདོང་དམར་པོར་ཆགས་སོང

ཅུང་ཙམ་བཞུགས་རོགས་ཞེས

ངས་རང་གི་ལུས་པོར་བཤད

ལུས་པོ་ཁྱི་བཞིན་ཙོག་པུར་སྡོད་ཅིང

ཡུད་ཙམ་ནས་ན་ཟུག་གིས་འདར་ཡོམ་བྱེད་ཀྱིན་འདུག

ཅུང་ཙམ་བཞུགས་རོགས ང་ཡི་ས་གཞི

རི་གྲོག་དང་སྤང་ཐང

མ་ཎི་བརྐོས་པའི་རྡོ་བ་དང་བྲག་གཡང

སྨྲ་བ་བཅད་པའི་གངས་རི

— འདི་ཡོད་ཚད་ཁུ་སིམ་མེར་བསྡད་དེ

ང་ལ་བལྟས་འདུག

ཅུང་ཙམ་བཞུགས་རོགས་གནོངས་དང ང་ཡི་བརྩེ་དུང

ང་ཡི་མཉེས་གཤིན་དང་བཀུར་སྟི

ཁྱེད་ཅག་མེད་ཚེ

ང་གཅིག་པུ་གསོན་པ་ལ་སྙིང་པོ་མི་འདུག